ၼႂ်းတူင်ႈၼႃး ၸႄႈဝဵင်းၵဵင်းတုင် လၢႆလၢႆတီႈ ထုၵ်ႇၼမ်ႉထူမ်ႈ ယွၼ်ႉၾူၼ်တူၵ်းႁၢဝ်ႈႁႅင်း၊ ၼမ်ႉၼွင်းလူၼ်ႉၾင်ႇၵႄးၼမ်ႉၶိုၼ် ထူမ်ႈၼွင်းတူင်ႈၼႃးၵူၼ်းမိူင်း မီးလွင်ႈလူႉသုမ်း တင်းၼမ်လၢႆ ။

Photo by รักเชียงตุง

ဝၼ်းတီႈ 10/11/2016 ယၢမ်းၵၢင်ၼႂ် ၼႃႈမိူင်းလႅင်း 2:00 မူင်းပၢႆ ၵႄးၼမ်ႉၶိုၼ် ၼွင်းလူၼ်ႉၾင်ႇ ထူမ်ႈတူင်ႈၼႃးၵူၼ်းမိူင်း ၸိူဝ်းႁိမ်းၾင်ႇၼမ်ႉၶိုၼ် ၾၢႆႇတႂ်ႈဝၢၼ်ႈၽၢႆဝဵင်း ဢိူင်ႇယၢင်းလေႃး ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။ ယွၼ်ႉၾူၼ်တူၵ်းႁၢဝ်ႈႁႅင်း ၼမ်ႉႁူၺ်ႈၼမ်ႉလွႆ လႆၼွင်းလူင်း ၼႂ်းၵႄးၼမ်ႉၶိုၼ် ။


ၸၢႆးသၢမ် ၸဝ်ႈၼႃး လၢတ်ႈဝႃႈ “ ၼႂ်းသွင်သၢမ်ဝၼ်းၼႆႉ ၾူၼ်တူၵ်းႁၢဝ်ႈႁႅင်းၼႃႇ တူၵ်းတင်းဝၼ်း တင်းၶိုၼ်း ဢမ်ႇၵိုတ်းသေၵမ်း ၼမ်ႉႁူၺ်ႈၼမ်ႉလွႆ လႆၼွင်းလူင်းသႂ်ႇၼႂ်းမႄႈၼမ်ႉၶိုၼ်လႄႈ ၼမ်ႉ ၸင်ႇၼွင်းလူၼ်ႉၾင်ႇ ထူမ်ႈတူင်ႈၼႃးၸိူဝ်းယူႇႁိမ်းၾင်ႇၼမ်ႉၶိုၼ်ၸိူဝ်းၼၼ်ႉ၊ ထုၵ်ႇ ၼမ်ႉထူမ်ႈတင်းၼမ်၊ ၵတ်ႉၵႃႈ ၼႃးၶႃႈႁဝ်းတၼ်းဢဝ်ၶဝ်ႈယဝ်ႉၶႃႈလႃႈ၊ သင်ဝႃႈ ဢမ်ႇတၼ်း ယဝ်ႉၸိုင် တေလႆႈယၢပ်ႇၽိုတ်ႇထႅင်ႈၵႃႈႁိုဝ်” ဝႃႈၼႆ ။


ၵဵဝ်ႇၵပ်းလူၺ်ႈၼမ်ႉထူမ်ႈၼႆႉ ၸဝ်ႈၼႃးမၢင်ၵေႃႉ တၼ်းဢဝ်ၶဝ်ႈဢွၵ်ႇ တူင်ႈၼႃးမူတ်း ၵေႃႈမီး၊ မၢင်ၵေႃႉတိုၵ်ႉၵွင်/ပုမ်ႇဝႆႉၵေႃႈမီး၊ မၢင်ၵေႃႉတိုၵ်ႉ ပၢတ်ႇဝႆႉသေ ပႆႇတၼ်းၵွင်/ပုမ်ႇၵေႃႈမီး ဝႃႈၼႆ ။


ၸၢႆးမူၼ်း ၵူၼ်းၼႂ်းပိုၼ်ႉတီႈ လၢတ်ႈဝႃႈ “ ၼႃးမၢင်တူင်ႈ တိုၵ်ႉၵွင်/ပုမ်ႇဝႆႉ သေပႆႇလႆႈပေႃႉ ၸိူဝ်းၼၼ်ႉထုၵ်ႇ ၼမ်ႉထူမ်ႈထိုင် ၶိုင်ႈၵွင်ၶဝ်ႈၵေႃႈမီး၊ မၢင်တူင်ႈတိုၵ်ႉပၢတ်ႇဝႆႉသေ ပႆႇတၼ်းလႆႈပုမ်ႇၵွင်ၵေႃႈမီးၶဝ်ႈ ပိူၵ်ႇၶဝ်ႈၽူးဝႆႉၸွမ်းတူင်ႈၼႃးၵေႃႈမီး၊ ၼႃးမၢင်တူင်ႈတႄႉ တၼ်းဢဝ်ယဝ်ႉသေ လွတ်ႈၾူၼ်ၵေႃႈမီး၊ ၼမ်ႉၼွင်းၼႆႉ မၼ်းၼွင်းယိုင်ႈဝႆႉႁဵတ်းၼၼ်ၵူၺ်း ထိုင်မႃး ယၢမ်းဝၢႆးဝၼ်း ၼႂ်းဝၼ်းတီႈ 10 ၼၼ်ႉ ၼမ်ႉၸင်ႇလူင်း” ဝႃႈၼႆ ။


ယွၼ်ႉသင်လႄႈ ၼမ်ႉၼွင်းထူမ်ႈလူၼ်ႉၾင်ႇၼမ်ႉၶိုၼ်ၼႆႉ ယွၼ်ႉၽူႈမီးပုၼ်ႈၽွၼ်းၶဝ် ဢမ်ႇၶုတ်းသၢႆးဢွၵ်ႇၼႂ်းမႄႈၼမ်ႉၵေႃႈပိူင်ၼိုင်ႈ ယွၼ်ႉၼၼ် မႄႈၼမ်ႉၶိုၼ်ၸင်ႇတိုၼ်ႈ သၢႆးၼမ်၊ ထႅင်ႈၾၢႆႇၼိုင်ႈသမ်ႉ ၸဝ်ႈႁႆႈၸဝ်ႈၼႃး ၸိူဝ်းတဵင်ၾၢႆတပ်ႉၾၢႆ တႃႇဢဝ်ၼမ်ႉၶဝ်ႈၼႃး/သၢင်းၼႃး ၼၼ်ႉ ၶဝ်ဢမ်ႇလၼ်ႇၾၢႆလူင်းၵေႃႈပိူင်ၼိုင်ႈ ၼမ်ႉၸင်ႈယိုင်ႈၶိုၼ်ႈသေ လူၼ်ႉၾင်ႇၼွင်းတူင်ႈၼႃး ၸဵမ်ၸိူဝ်းၼႆႉ” ဝႃႈၼႆ ။


ႁူဝ်လိူၼ်ၼူဝ်ႊဝႅမ်ႊၿိူဝ်ႊၼႆႉမႃး ၾူၼ်တူၵ်းႁၢဝ်ႈႁႅင်းထပ်းၵၼ် လၢႆလၢႆဝၼ်းၼႂ်းၸႄႈဝဵင်းၵဵင်းတုင် ႁဵတ်းႁႂ်ႈ ၼမ်ႉထူမ်ႈတူင်ႈၼႃး၊ ၼႂ်းမူႇဝၢၼ်ႈ လႄႈ သဵၼ်ႈတၢင်းၵႂႃႇမႃး ၸဵမ်ၸိူဝ်းၼႆႉ ဝႃႈၼႆ ။


ၼွၵ်ႈလိူဝ်သေၼႆႉ ၼႂ်းၸိုင်ႈတႆး ပွတ်းႁွင်ႇ ၼႂ်းဝဵင်းၵျွၵ်ႉမႄး ပူၼ်ႉမႃး မိူဝ်ႈဝၼ်းတီႈ 09/11/2016 ယၢမ်းၵၢင်ၼႂ် 3 မူင်းၼၼ်ႉ ထုၵ်ႇၼမ်ႉၼွင်းထူမ်ႈ ၸွမ်းဝၢၼ်ႈၸွမ်းတူင်ႈၼႃး မီးလွင်ႈလူႉသုမ်း တင်းၼမ်လၢႆ၊ လိူဝ်ၼၼ်ႉ ၼႂ်းၸိုင်ႈတႆး တၢင်းပွတ်းဢွၵ်ႇ ၸႄႈတွၼ်ႈတႃႈၶီႈလဵၵ်း ၸႄႈဝဵင်း ၵဵင်းလပ်ႈ  ၼိူဝ်သဵၼ်ႈတၢင်း လုၵ်ႉၵိင်ႇၸႄႈဝဵင်းတႃႈလိူဝ်ႇ ၵႂႃႇတၢင်းၵဵင်းလၢပ်ႈ ၸွမ်းသဵၼ်ႈတၢင်း ၸွမ်းတူင်ႈၼႃး ၼႂ်းမူႇဝၢၼ်ႈၸဵမ်ၸိူဝ်းၼႆႉ ထုၵ်ႇၼမ်ႉ ထူမ်ႈတင်းၼမ်တင်းလၢႆ မိူၼ်ၵၼ် ဝႃႈၼႆ ။