မိူဝ်ႈၼႆႉ ဝၼ်တီႈ 20/11/2016 ယၢမ်းၵၢင်ၼႂ် မွၵ်ႈ 10 မူင်းၶိုင်ႈ ၸုမ်းဢမ်ႇႁူႉၾၢႆႇ ဢဝ်မၢၵ်ႇႁွႆႈတိတ်း လူတ်ႉၵႃးသေ ၵိုတ်းၼိူဝ်ၶူဝ် ၼမ်ႉတူႈ ႁူဝ်ဝဵင်းသႅၼ်ဝီ ပွႆႇမၢၵ်ႇတႅၵ်ႇ။ လူတ်ႉၵေႃႈၵွႆ ၶူဝ်ၵေႃႈ ၵွႆၵႂႃႇၽွင်ႈ။ သဵၼ်ႈတၢင်းလူင် လႃႈသဵဝ် - မူႇၸေႈ ၵိုတ်းၵႂႃႇ ၸူဝ်ႈၶၢဝ်း ။

မၢၵ်ႇတႅၵ်ႇၼိူဝ်ၶူဝ်ၼမ်ႉတူႈ လႄႈၶူဝ်ပွင်ႇ လုၵွႆၵႂႃႇ

မိူဝ်ႈၼႆႉၵၢင်ၼႂ်  လူတ်ႉၵႃးလမ်းၼိုင်ႈ ပၢႆႉလူတ်ႉ SHN – 9F – 6481  လုၵ်ႉတၢင်း ဝဵင်းသႅၼ်ဝီ သေ လူင်းမႃးတၢင်းဝဵင်းၸၢၼ်း။ ၽွင်းထိုင် ၵၢင်ၶူဝ် ၼမ်ႉတူႈၼၼ်ႉ ၵိုတ်းလူတ်ႉဝႆႉသေၵူၼ်းၶပ်းလူတ်ႉပၢႆႈ ပႅတ်ႈ၊  ထိုင်ယၢမ်းၵၢင်ၼႂ် 10 မူင်းၶိုင်ႈ မၢၵ်ႇတႅၵ်ႇတီႈလူတ်ႉၵႃးလမ်းၼၼ်ႉ တိူဝ်ႉသႂ်ႇၵူၼ်းၵႂႃႇမႃး မၢတ်ႇၸဵပ်းၽွင်ႈ ၼႆ ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၸႄႈဝဵင်းသႅၼ်ဝီ လၢတ်ႈၼႄ ၼင်ႇၼႆ ။


“ ဢၼ်မၢတ်ႇၸဵပ်းသေ ႁွတ်ႈဝႆႉတီႈ ႁူင်းယႃတႄႉ မီး 3 ၵေႃႉဢေႃႈ။ ၸၢႆးထုၼ်းဢေး၊ ၸၢႆးမၢၼ်ႇဢွင်ႇ ၵူၼ်းဢေႃးပႃႇသၢႆႉပဵဝ်းယေး၊ ထႅင်ႈၵေႃႉ တႄႉဢမ်ႇႁူႉ။ ပဵၼ်လူတ်ႉၽႂ်ၵေႃႈဢမ်ႇႁူႉ။  ပဵၼ်ၽႂ်ႁေႃႈမႃးပွႆႇဝႆႉၵေႃႈဢမ်ႇႁူႉၶႃႈ။ ႁဝ်းၶႃႈ ၵေႃႈတိုၵ်ႉ ႁဵတ်းပၢင်ၵုမ်ၵၼ်ဝႆႉယူႇ” -  ဝႃႈၼႆ ။


ယွၼ်ႉမၢၵ်ႇတႅၵ်ႇသေ သဵၼ်ႈတၢင်းၵေႃႈ ၵိုတ်းၵႂႃႇ ႁၢင်ႈၼိုင်ႈ။ ယၢမ်းၼႆႉ ပွႆႇပၼ်ၵူၼ်းမိူင်း ၵႂႃႇမႃးၶိုၼ်း သေတႃႉ လွင်ႈႁူမ်ႇလူမ်ႈ ႁိမ်းႁွမ်းၼၼ်ႉ တႄႉ ၼႅၼ်ႈၼႃ မႃးလိူဝ်ၵဝ်ႇၼႆ- ၸၢႆးဢၢႆႈသႅင် သႅၼ်ဝီ လၢတ်ႈ ။


ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 16 ဢၼ်ပၵ်းငဝ်ႈငုၼ်းသႅၼ်ဝီ ၼၼ်ႉႁၢင်ႇယၢၼ် ၵၼ်တင်း တီႈမၢၵ်ႇတႅၵ်ႇ ၶူဝ်ၼမ်ႉတူႈ မွၵ်ႈလၵ်းပၢႆ ။


လုင်းၸၢႆးၶမ်းမွၵ်ႇ ၽူႈယၢမ်ႈႁၢပ်ႇၵၢၼ်လုၵ်ႉၽိုၼ်ႉ လၢတ်ႈ တီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - “ၽႅၼ်ၵၢၼ် ယႃႉ မင်ၶူဝ်ၼမ်ႉတူႈသႅၼ်ဝီၼႆႉ လႅပ်ႈၵဵဝ်ႇၵၼ်တၢင်း ပၢင်တိုၵ်း 105 လၵ်း၊ ပၢင်ႇသၢႆး  ။ လႅပ်ႈတေ ဝၢင်းၽႅၼ်လီလီသေမႃးႁဵတ်းဝႆႉ။ ၵူၺ်းၵႃႈ  ဢမ်ႇပေႃးလုၵွႆၼမ်။ ၺႃးႁိမ်း ၶၢင်ႈ တၢင်း ၼိူဝ်ၶူဝ်ၵူၺ်း။ တေႃႉတႄႉပွင်ႇပဵၼ်ႁူးၵႂႃႇ မွၵ်ႈ ဝၢႆႈ- မွၵ်ႉဝႃး  ။ ႁႅင်းမၢၵ်ႇ ဢမ်ႇယႃႉၶူဝ်ၵွႆလႆႈ” - ဝႃႈၼႆ ။


ၼႂ်းၸႄႈဝဵင်းသႅၼ်ဝီၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 16 ၊ တပ်ႉပလိၵ်ႈ ။ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းတႄႉ မီးၸုမ်းၶႄႇၵဝ်ႈၵၢင်ႉ၊ ၸုမ်းလွႆ တဢၢင်း၊ တႆး SSPP/SSA သေဢမ်ႇၵႃး တပ်ႉလွႆတႆးလႅင်း RCSS ၵေႃႈထိုင်ၽွင်ႈ ။ လိူဝ်ၼၼ်ႉ သိုၵ်းရၶႅင်ႇ ဢၼ်မႃး ၸွမ်းသိုၵ်းၶၢင်ၵေႃႈမီး ။