ပီႈၼွင်ႉၵူၼ်းမိူင်း ဝဵင်းလၢင်းၶိူဝ်း ႁူမ်ႈၵၼ် ပတ်းၽဵဝ်ႈ ပွမ်ႈတူၼ်ႈမႆႉ တႃႇၵေႃႈသၢင်ႈၵျွင်းသွမ်း ၼႂ်းဝၢင်းဝတ်ႉၵျွင်းတေႃး ၶုတ်းလႆႈ ဢုမ်ငိုၼ်းၵဝ်ႇ 1 လုၵ်ႈ၊ ၵူၼ်းမိူင်းၸူမ်းသိူဝ်းပဵၼ်ဢၼ် ၵမ်ႉၸွႆႈတႃႇ ၵေႃႇသၢင်ႈဝတ်ႉၵျွင်း ။

Photo By သၢဝ်လၢင်းၶိူဝ်း

တွၼ်ႈတႃႇတေၵေႃႇသၢင်ႈဝတ်ႉၵျွင်းသွမ်း သင်ၶၸဝ်ႈ ဝတ်ႉဢတိသုၶ ဝတ်ႉပႃႇ(ၵျွင်းတေႃး) ႁိမ်းဝတ်ႉၵမ်ႇမထၢၼ်း ၸႄႈဝဵင်းလၢင်းၶိူဝ်း ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း ဝၼ်းတီႈ 15/11/2016 ယၢမ်း 10:00-11:00 မူင်း ပီႈၼွင်ႉၵူၼ်းမိူင်း ဝဵင်းလၢင်းၶိူဝ်း ဢွၼ်ၵၼ်ပတ်းၽဵဝ်ႈ ပွမ်ႈတူၼ်ႈမႆႉၸီႇလီႇ(မႆႉၶီႈလဵၵ်း)ၼႆသေ ၶုတ်းႁၼ်မႅၼ်ႈ ဢုမ်ငိုၼ်းၵဝ်ႇ 1 လုၵ်ႈ တႂ်ႈတူၼ်ႈမႆႉၸီႇလီႇ ၼႂ်းဝၢင်းဝတ်ႉ။ ပဵၼ်ငိုၼ်းၵဝ်ႇ မဵတ်ႉတႅင်းၵႃး တင်းမူတ်းမီး 450 ပၢႆ ဝႃႈၼႆ ။


ၸၢႆးလမ် ၽူႈဢွၼ်ႁူဝ် ၵေႃႇသၢင်ႈၵျွင်းသွမ်း လၢတ်ႈဝႃႈ “ ႁဝ်းၶႃႈ လႆႈၶုတ်းႁၼ် တီႈတႂ်ႈ တူၼ်ႈမႆႉ ၸီႇလီႇ(ၶီႈလဵၵ်း)၊ ၶုတ်းလူင်းၵႂႃႇ မွၵ်ႈၼိုင်ႈသွၵ်ႈၵူၺ်း၊ ဢုမ်ငိုၼ်းၼၼ်ႉ ပဵၼ်ဢုမ်လိၼ် မိူင်းၵိုင်ႁဵတ်းဝႆႉ၊ ပဵၼ်မဵတ်ႉငိုၼ်းတႅင်းၵႃး(ငိုၼ်းၵဝ်ႇ)။ တေပဵၼ်လၢႆရူႇပီးတႄႉဢမ်ႇႁူႉ” ဝႃႈၼႆ ။


ၸၢႆးလမ် သိုပ်ႇလၢတ်ႈထႅင်ႈဝႃႈ ၶုတ်းႁၼ် ၼႂ်းဝၢင်းဝတ်ႉလႄႈ ပဵၼ်ၶွင်သႃသၼႃ၊ ယွၼ်ႉၼၼ် ႁဝ်းၶႃႈဢွၼ်ၵၼ် ယုၵ်ႉလူႇတၢၼ်းပဵၼ်ၶွင်ဝတ်ႉတင်းမူတ်း မၼ်းၵူၺ်းၵေႃႇသၢင်ႈဝတ်ႉ ဢမ်ႇယဝ်ႉတူဝ်ႈ လႆႈသေတႃႉ ႁႂ်ႈပဵၼ်ဢၼ်ၵႅမ်ႉၸွႆႈတႃႇၵေႃႇသၢင်ႈဝတ်ႉၵျွင်း ဝႃႈၼႆ ။


ၸဝ်ႈတူၼ်ၶူး သုမိင်ႇၵလ ၽူႈၵွၼ်းဝတ်ႉၵျွင်းတေႃး လၢတ်ႈဝႃႈ “ ၸွမ်းၼင်ႇတင်းယုမ်ႇယမ်  ၸဝ်ႈပုတ်ႉထၽႃသႃမီးဝႆႉ ႁဵတ်းလီၵေႃႈလႆႈလီ ႁဝ်းတေႁဵတ်းၵျွင်းသုင်းသွမ်း၊ ငိုၼ်းလူႇၵေႃႈ ဢမ်ႇပေႃးမီးၼမ်၊ ၵူၺ်းၵႃႈ ၶုတ်းလႆႈဢုမ်ငိုၼ်းၼႆႉ တေပဵၼ်ဢၼ်ၵမ်ႉၸွႆႈ တႃႇႁဝ်းတေသၢင်ႈ ဝတ်ႉၵျွင်းသုင်းသွမ်းလႆႈတႃႇ ၼိုင်ႈပွတ်းၼိုင်ႈတွၼ်ႈ မုင်ႈမွင်းဝႆႉၼင်ႇၼႆႉ” ။


ၵူၺ်းၵႃႈ ငိုၼ်းဢၼ်ၶုတ်း လႆႈၼႆႉၵူၺ်းလႅပ်ႈတေပႆႇၵုမ်ႇထူၼ်ႈ မုင်ႈမွင်းတၵ်ႉၵႃႇသတ်ႉထႃး တီႈၸမ်တီႈၵႆ မႃးႁူမ်ႈလူႇတၢၼ်း ထႅင်ႈယူႇ ဝႃႈၼႆ ။


ၶွမ်ႊမတီႊတႃႇၵေႃႇသၢင်ႈဝတ်ႉၵျွင်းသွမ်းလၢတ်ႈဝႃႈ “ ငိုၼ်းၵဝ်ႇၼႆႉ ၵႃႈၶၼ်တေမီးၵႃႈႁိုဝ်ၵေႃႈ ဢမ်ႇႁူႉ၊ တေၶၢႆလႆႈဢမ်ႇၶၢႆလႆႈၵေႃႈဢမ်ႇႁူႉ။ ၵွပ်ႈၼၼ် သင်ၸိူဝ်ႉဝႃႈ မီးတၵ်ႉၵႃႇသတ်ႉထႃး တီႈၸမ်ၵႆ ၶႂ်ႈႁူမ်ႈလူႇတၢၼ်းၸိုင် ၵပ်းသိုပ်ႇလူႇတၢၼ်းမႃးလႆႈတီႈ ၸဝ်ႈၶူးသုမိင်ႇၵလ မၢႆၾူၼ်း 0949 387506 လႆႈယူႇ- ဝႃႈၼႆ ။


ငိုၼ်းၵဝ်ႇ(မဵတ်ႉတႅင်းၵႃး) ဢၼ်ၶုတ်းလႆႈၼႆႉ တႅမ်ႈဝႆႉလိၵ်ႈဢိင်းၵလဵၵ်ႈ ONE RUPEE INDIA ၊ GEORGVKING PMPEROK ႁဵတ်းဢွၵ်ႇမိူဝ်ႈပီ1907၊ 1919၊ ပဵၼ်ႁၢင်ႈႁူဝ်ၵူၼ်းဝႆႉ ဝႃႈၼႆ ။