ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ဝၢင်းၽႅၼ်လူင်းပိုၼ်ႉတီႈ ႁူပ်ႉထူပ်းပီႈ ၼွင်ႉၵူၼ်းမိူင်း တႃႇၶၢဝ်းတၢင်း 10 ဝၼ်းပၢႆ သပ်းလႅင်းလၢတ်ႈၼႄ ၵၢၼ်ငၢၼ်း ဢၼ်လႆႈႁဵတ်းသၢင်ႈ မႃး လႄႈ တွင်ႈထၢမ် သဵင်ႁူဝ်ၸႂ် ၵူၼ်းမိူင်း ၼႂ်းၸိုင်ႈတႆး ပွတ်းဢွၵ်ႇ၊ ၸၢၼ်းလႄႈ ႁွင်ႇ ၼႆယဝ်ႉ ။

ဝၼ်းတီႈ 04/10/2016 ယၢမ်းၵၢင်ၼႂ် 09:00 မူင်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လူင်းႁူပ်ႉထူပ်း ပီႈၼွင်ႉၵူၼ်းမိူင်း တီႈဝတ်ႉသုၶိတယူင်ႇ ၸႄႈဝဵင်းၼမ်ႉၸၢင် ၸိုင်ႈတႆး ပွတ်းၸၢၼ်း၊ သပ်းလႅင်းလၢတ်ႈၼႄ ၶၵ်ႉတွၼ်ႈ လွင်ႈငမ်းယဵၼ် လႄႈ ၵၢၼ်ၵိုတ်းတိုၵ်း ၼႂ်းၶၢဝ်း တၢင်း 5 ပီၼၼ်ႉ လႆႈႁဵတ်း သၢင်ႈၵၢၼ်ငၢၼ်းသင် မႃးလၢႆလၢႆ၊ လွင်ႈၶဝ်ႈႁူမ်ႈ ပၢင်ၵုမ်လူင် ပၢင်လူင် ႁူဝ်ပၢၵ်ႇ ပီ 21 လႄႈ တွင်ႈထၢမ် သဵင်ႁူဝ် ၸႂ်ၵူၼ်းမိူင်း ၶႂ်ႈႁႂ်ႈ RCSS/ SSA တင်ႇလၢတ်ႈ/ဢုပ်ႇလၢတ်ႈ ၼႂ်းပၢင်ၵုမ်ဢၼ်တေထိုင်မႃးၼႆႉၸိူင်ႉႁိုဝ် ၸဵမ်ၸိူဝ်းၼႆႉ ဝႃႈၼႆ ။


ၸဝ်းသိုၵ်းၸၢႆးငိုၼ်း ၽူႈၼမ်းၼႂ်းၶွမ်ႊမတီႊဢုပ်ႇၵုမ်လွင်ႈငမ်းယဵၼ် ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA လၢတ်ႈဝႃႈ “ ပၢင်ၵုမ်လူင် ပၢင်လူင် ႁူဝ်ပၢၵ်ႇပီ 21 ဢၼ်လႆႈ ၸတ်းႁဵတ်း မႃးယဝ်ႉၼၼ်ႉ ယွၼ်ႉပိူဝ်ႈဝႃႈ ႁူၵ်းလိူၼ်ၼိုင်ႈပွၵ်ႈ တေမီးပၢင်ၵုမ်ၵၼ်ထႅင်ႈၵမ်းၼိုင်ႈ ပေႃးၸိုင် ၼၼ် ယူႇတီႈၸုမ်းႁဝ်းၶႃႈၵေႃႈ သမ်ႉတေလႆႈၵႂႃႇၶိုၼ်ႈလႄႈ ၵွပ်ႈပိူဝ်ႈၼႆ ႁဝ်းၶႂ်ႈမႃးထွမ်ႇ တူၺ်းသဵင် ႁူဝ်ၸႂ်ၵူၼ်းမိူင်းဝႃႈ ၶဝ်ၸဝ်ႈၶႂ်ႈႁႂ်ႈႁဝ်းၶႃႈလၢတ်ႈၸိူင်ႉႁိုဝ် ၶႂ်ႈႁႂ်ႈၵႂႃႇဢုပ်ႇၸိူင်ႉႁိုဝ် ၶႂ်ႈမႃး ယွၼ်းတၢင်း ႁၼ်ထိုင်(ၶေႃႈၼႄၼမ်း)ၵေႃႈ ပိူင်ၼိုင်ႈ၊ ထႅင်ႈလွင်ႈၼိုင်ႈသမ်ႉ မႃးသပ်းလႅင်းၼႄ လွင်ႈဢၼ်ႁဝ်း ၶႃႈၵႂႃႇၶိုၼ်ႈပၢင်ၵုမ်လူင် ပၢင်လူင် ႁူဝ်ပၢၵ်ႇ ပီ 21 ၼႆႉမႃး၊ ထႅင်ႈတွၼ်ႈၼိုင်ႈသမ်ႉ ၶႂ်ႈႁႂ်ႈၵူၼ်းမိူင်း ႁဝ်းႁပ်ႉႁူႉဝႃႈ ၼႂ်းၶၢဝ်းတၢင်း 5 ပီ ဢၼ် RCSS/SSA လႆႈၶဝ်ႈမႃး ၼႂ်းၶၵ်ႉၵၢၼ် လွင်ႈငမ်းယဵၼ် ၵိုတ်းတိုၵ်းသေၶဝ်ႈမႃးၼႆႉ ႁဝ်းၶႃႈလႆႈႁဵတ်းသင်လၢႆလၢႆ ၸဵမ်ၸိူဝ်းၼႆႉ” ဝႃႈၼႆ ။


ပၢင်ႁူပ်ႉထူပ်းၵူၼ်းမိူင်း ၸႄႈဝဵင်းၼမ်ႉၸၢင်ၼႆႉ မီးၸုမ်းတူင်ႉၼိုင်တူင်ႇဝူင်းၵူၼ်းတႆး၊ ၸုမ်းပႃႇတီႈ ၵၢၼ်မိူင်းလႄႈ ပီႈၼွင်ႉၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈ လဵပ်ႈႁဵၼ်း မီး 250 ပၢႆ ဝႃႈၼႆ ။


ပူၼ်ႉမႃး ဝၼ်းတီႈ 2 သမ်ႉ RCSS/SSA လူင်းႁူပ်ႉထူပ်းပီႈၼွင်ႉ ၸႄႈဝဵင်းလၢႆးၶႃႈ တီႈဝတ်ႉၵျွင်း တေႃႇႁူဝ်ဝဵင်း၊ ဝၼ်းတီႈ 3 သမ်ႉ တီႈၵျွင်းၵၢင်ဝဵင်း သႅၼ်ဝီ ၸိုင်ႈတႆး ပွတ်းႁွင်ႇ၊ ၼွၵ်ႈသေၼၼ်ႉ ဝၼ်းတီႈ 4 သမ်ႉ ႁူပ်ႉထူပ်း ပီႈၼွင်ႉၸႄႈဝဵင်းၵဵင်းတုင် ၸဵမ်ၸိူဝ်းၼႆႉ။ တေထိုင် ဝၼ်းတီႈ 06/10/2016 သမ်ႉ တေသိုပ်ႇႁူပ်ႉထူပ်း ပီႈၼွင်ႉၵူၼ်းမိူင်း ၸႄႈဝဵင်းတူၼ်ႈတီး ထႅင်ႈဝႃႈၼႆ ။


ပၢင်ႁူပ်ႉထူပ်းၵူၼ်းမိူင်းၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လူင်းႁူပ်ႉထူပ်းၵူၼ်းမိူင်း  ၸတ်းႁဵတ်းပဵၼ်သၢမ်ၸုမ်းသေ လူင်းႁူပ်ႉထူပ်းၵူၼ်းမိူင်း မိူၼ်ၼင်ႇ ပွတ်းဢွၵ်ႇၶူင်း၊ ပွတ်းၸၢၼ်း လႄႈ ပွတ်းႁွင်ႇ တႃႇၶၢဝ်းတၢင်း  10 ဝၼ်းပၢႆ ၼႆယဝ်ႉ ။