ဝၢႆးလင်သိုၵ်းမၢၼ်ႈ ပူင်ၵႂၢမ်းၼၵ်းဝႃႈ ဝၼ်းတီႈ 24/10/2016 ဝၼ်းလိုၼ်းသုတ်း၊ ႁႂ်ႈသိုၵ်းဝႃႉထွၼ်ဢွၵ်ႇ ၼႃႈလိၼ် ဢၼ်မႃးပၵ်းၼႂ်းမိူင်းလႃးတင်းသဵင်ႈ၊ သိုၵ်းဝႃႉဢမ်ႇယွမ်းထွၼ်ဢွၵ်ႇၼႆႉ တင်ႈတႄႇဝၢႆးၼၼ်ႉမႃး လွင်ႈၶဵင်ႇတႃႉၶဵင်ႈၶႅင်ႁႅင်းသိုၵ်းတေႃႇၵၼ် ဝူင်ႈၵၢင် သိုၵ်းဝႃႉတင်းသိုၵ်းမၢၼ်ႈ ၽႄႈလၢမ်းထိုင်မႃးပွတ်းၸၢၼ်း တၢင်းလႅၼ်လိၼ်တႆး-ထႆး၊ ႁဵတ်းႁႂ်ႈသွင်ၾၢႆႇၶဵင်ႈၶႅင်ၵၢၼ်သိုၵ်း တေႃႇၵၼ် ။

တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA)

တင်ႈတႄႇၼၼ်ႉမႃး ၾၢႆႇသိုၵ်းမၢၼ်ႈတပ်ႉမတေႃႇၼႆႉ ၸိူဝ်းဢၼ်ၶၢမ်ႈတၢင်းၶူဝ်တႃႈၵေႃႈသေ ၵႂႃႇတၢင်းမိူင်းပဵင်း ၵေႃႈမီး၊ ၸိူဝ်းဢၼ်လုၵ်ႉတၢင်းတူၵ်းၶူင်း လုၵ်ႉတၢင်းလၢင်းၶိူဝ်း မိူင်းပၼ်ႇသေ ၶၢမ်ႈၶူဝ်တႃႈသၢင်း မႃးတၢင်းမိူင်းတူၼ် ၵေႃႈမီးယူႇတိၵ်းတိၵ်း။ ဢၼ်ၶၢမ်ႈၶူဝ်မႃးတၢင်းတႃႈသၢင်းသေ မႃးပၵ်းသဝ်းယူႇၼႂ်း ၸႄႈဝဵင်းမိူင်းတူၼ်ၵမ်ႈၼမ် ၵူၼ်းၼႂ်းပိုၼ်ႉတီႈၶဝ်ဝႃႈ- ပဵၼ်တႂ်ႈတိူင်းသိုၵ်းဝၼ်းဢွၵ်ႇ (ယပၶ) တူၼ်ႈတီး၊ တႂ်ႈတိူင်းသိုၵ်းဝၼ်းဢွၵ်ႇၵၢင် (ယလၶ) ၊ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 17 ၊ တပ်ႉၸုမ်းလူင် (တပ်ႉမ) 55 ၵၢတ်ႇလေႃႉ ၸိူဝ်းၼႆႉ- ၼႆယဝ်ႉ ။


ၵူၼ်းမိူင်းတူၼ်ၵေႃႉၼိုင်ႈလၢတ်ႈဝႃႈ- ၾၢႆႇသိုၵ်းမၢၼ်ႈၵေႃႈ တင်ႈတႄႇၶဝ်လႆႈငိၼ်းဝႃႈ သိုၵ်းဝႃႉတေမႃးတၢင်း ၶူဝ်တႃႈသၢင်း၊ တေၽႅၼ်ၵၢၼ်သေၸိူဝ်ႉသေပိူင် ၸိူဝ်းၼႆႉ ၶဝ်ထႅမ်ႁႅင်းသိုၵ်းမႃးသေ ၸွမ်းတႃႈၸွမ်းတၢင်း ၸွမ်းၵူတ်ႉတႃႈၶူင်းၼႆႉ ၶႂ်ႈဝႃႈမီးၵူႈၵူတ်ႉ။ မိူဝ်ႈၵူႈပွၵ်ႈ တီႈၶူဝ်တႃႈသၢင်းၵေႃႈ ၵူတ်ႇထတ်းတီႈလဵဝ်ၵူၺ်း၊ မိူဝ်ႈလဵဝ်ၼႆႉ ၵူတ်ႇထတ်းတၢင်းသွင်ၾင်ႇ၊ တၢင်းၾၢႆႇဢွၵ်ႇၶူင်းၵေႃႈ မႃးပၵ်းတပ်ႉပၢင်သဝ်းသေပႂ်ႉၵူတ်ႇထတ်း၊ ပေႃးဝႃႈမီးလူတ်ႉၵႃးၶၢမ်ႈၶူဝ်ၵႂႃႇမႃးၼႆၵေႃႈ တူဝ်သိုၵ်းမၢၼ်ႈၶဝ် ယွၼ်းၶီႇၸွမ်းသေပႂ်ႉတူၺ်းၸွမ်းပႃး မိူဝ်ႈၶၢမ်ႈၶူဝ်ၸိူဝ်းၼႆႉ- ဝႃႈၼႆ ။


ၵဵဝ်ႇၵပ်းလွင်ႈၼႆႉ ၵူၼ်းၼႂ်းပႃႇတီႇသၢင်ႇသီႈ မိူင်းတူၼ် ဢူးၵျဝူၺ်း ၵေႃႈလၢတ်ႈဝႃႈ- တေႃႈလဵဝ်ၼႆႉ ပၢင်တိုၵ်းတႄႉဢမ်ႇပႆႇပဵၼ်၊ ဢၼ်မီးၶၢဝ်ႇလိုဝ်းဝႃႈ ယိုဝ်းၵၼ်တီႈၼၼ်ႈတီႈၼႆႈၼႆတႄႉ မီးယူႇ၊ ၵူၺ်းၵႃႈ ၸႂ်ႈတႄႉဢမ်ႇၸႂ်ႈတႄႉၵေႃႈ ၽႂ်ဢမ်ႇႁူႉ။ ၵူၺ်းၵႃႈ မိူၼ်ၼင်ႇသဵၼ်ႈတၢင်းဢၼ်လုၵ်ႉမိူင်းတူၼ် ဢွၵ်ႇၵႂႃႇတၢင်းပုင်ႇပႃႇၶႅမ်ၼႆႉ မၢင်တီႈၵေႃႈႁၼ်သိုၵ်းဝႃႉ၊ မၢင်တီႈၵေႃႈႁၼ်သိုၵ်းမၢၼ်ႈၵႂႃႇၵႂႃႇမႃးမႃး၊ ၶဝ်ၼင်ႇၵၼ်ၵေႃႈ ဢမ်ႇႁဵတ်းသင်တီႈၵၼ်ၼင်ႇၵဝ်ႇ။ ၵူၺ်းၵႃႈ ဢၼ်လႆႈႁူႉတႄႉ တင်းသွင်ၾၢႆႇ ထႅမ်ႁႅင်းသိုၵ်းသေ ၶဵင်ႈၶႅင်တေႃႇၵၼ်တၢင်းလွႆၶီႈလဵၵ်း။ သိုၵ်းဝႃႉၾၢႆႇၼိုင်ႈ၊ ပီႇတုၸိတ်ႉလႃးႁူႇ တင်းသိုၵ်းမၢၼ်ႈ သမ်ႉပဵၼ်ၾၢႆႇၼိုင်ႈ။ သိုၵ်းဝႃႉၵေႃႈ ၵႂႃႇတၢင်းႁူၺ်ႈဢေႃႈၼႆႉ လူတ်ႉၵႃး 10 လေႃႉ၊ 12 လေႃႉၸိူဝ်းၼႆႉ တၢင်ႇႁႅင်းသိုၵ်း 40 ၵေႃႉတေႃႇထိုင် 50 ၵေႃႉသေၵႂႃႇမႃးယူႇ၊ လႆႈႁၼ်ၸိူင်ႉၼၼ်- ဝႃႈၼႆ ။


မီးၶၢဝ်ႇဢၼ်ပႆႇယိုၼ်ယၼ်လၢတ်ႈဝႃႈ- သိုၵ်းမၢၼ်ႈဢၼ်မႃးထိုင်တၢင်း ပွတ်းဢွၵ်ႇၶူင်းၼႆႉ မီးပႃးတပ်ႉၸုမ်းလူင် (တပ်ႉမ) 99 ၊ တပ်ႉမ 33 ။ လွင်ႈဢၼ်တပ်ႉမ 2 တပ်ႉႁွတ်ႈမႃးၼႆႉ ဢမ်ႇပႆႇယိုၼ်ယၼ်ၼင်ႇၵဝ်ႇ- ၵူၼ်းယူႇၼႂ်းပိုၼ်ႉတီႈလၢတ်ႈ ။


ၼႂ်းၸႄႈဝဵင်းမိူင်းသၢတ်ႇၼႆႉ သိုၵ်းမၢၼ်ႈတင်းသိုၵ်းဝႃႉ (တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA)  ၶဵင်ႈၶႅင်ၵၢၼ်သိုၵ်းတေႃႇၵၼ်လၢႆတီႈ၊ တေႃႇထိုင်မိူဝ်ႈဝႃး ဝၼ်းတီႈ 30/10/2016 ၵၢင်ၶမ်ႈၼႆႉ မီးၶၢဝ်ႇဝႃႈသိုၵ်းမၢၼ်ႈတင်းသိုၵ်းဝႃႉ ၶဵင်ႈၶႅင်တေႃႇၵၼ်တီႈ ႁူဝ်ဝဵင်းႁၢင်ဝဵင်း၊ လွင်ႈၼႆႉ ႁဵတ်းႁႂ်ႈၵူၼ်းမိူင်းတူၵ်းၸႂ် ၵူဝ်ပဵၼ်ပၢင်တိုၵ်းၵၼ်၊ ၵူၺ်းၵႃႈ တေႃႇထိုင်မိူင်းလႅင်း မိူဝ်ႈၼႆႉၵေႃႈ ဢမ်ႇငိၼ်းသဵင်ၵွင်ႈဢွၵ်ႇ- ၼႆယဝ်ႉ ။


ဢၼ်သိုၵ်းမၢၼ်ႈၸႂ်ႉသိုၵ်းဝႃႉထွၼ်ဢွၵ်ႇၼႆႉ ဢမ်ႇၵွမ်ႉၵႃႈဢၼ်ၶဝ်ႈပၵ်း ၼႂ်းၼႃႈလိၼ်မိူင်းလႃး ၸိုင်ႈတႆးပွတ်းဢွၵ်ႇၵူၺ်း၊ ၼႂ်းၸႄႈဝဵင်းမိူင်းသၢတ်ႇၵေႃႈ တေႃႈၼင်ႇၼၼ်၊ သိုၵ်းမၢၼ်ႈပူင်ႇသင်ႇဝႃႈ- ႁႂ်ႈသိုၵ်းဝႃႉထွၼ်သိုၵ်းဢွၵ်ႇတီႈ လွႆသၢမ်သုမ်။ ၵူၺ်းၵႃႈ ႁၢၼ်ႉတေႃႇထိုင်ယၢမ်းလဵဝ် သိုၵ်းဝႃႉယင်းဢမ်ႇ ထွၼ်ဢွၵ်ႇၵူၺ်းဢမ်ႇၵႃး ယင်းမႃးပၵ်းသဝ်း ၸွမ်းတေးႁူတ်ႈသၼ်လွႆသၢမ်သုမ်ထႅင်ႈ လၢႆလၢႆတီႈ- ၼႆယဝ်ႉ ။


ဢိင်ၼိူဝ်သိုၵ်းမၢၼ်ႈ တင်းသိုၵ်းဝႃႉ ၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉသေ တၢင်းလူင်ပွင်ၸိုင်ႈၶႄႇ ၾၢႆႇသိုၵ်းၶႄႇၵေႃႈ ၶိုင်ၶဝ်ႈၵႄႈၵၢင်မၼ်းသေ ၸွႆႈၵႄႈလိတ်ႈပၼ်ယူႇ။ ၾၢႆႇမိူင်းၶႄႇလႆႈၵပ်းသိုပ်ႇတိတ်းတေႃႇ တင်းသွင်မူႇသွင်ၸုမ်း။ ၾၢႆႇၼိုင်ႈၵေႃႈ ဝူင်ႈၵၢင်ၸုမ်းဝႃႉ တင်းၸုမ်းမိူင်းလႃး ဢၼ်ၸုမ်းဝႃႉ မႃးပူၼ်ႉပႅၼ်ၶဝ်ႈပၵ်းသဝ်း ၼႂ်းၼႃႈလိၼ်မိူင်းလႃးသေ ၸုမ်းဝႃႉတင်းၸုမ်းမိူင်းလႃး မီးပၼ်ႁႃၵၼ်ၼၼ်ႉၵေႃႈ ၾၢႆႇလူင်ပွင်ၸိုင်ႈၶႄႇ ႁွင်ႉဢဝ်တူဝ်တႅၼ်းသွင်ၸုမ်းၵႂႃႇတီႈဝဵင်းသိုဝ်းမဝ် ဢၼ်မီးၼႂ်းမိူင်းၶႄႇ၊ တေႃႇၼႃႈဝဵင်းပၢင်သၢင်းသေ ဢုပ်ႇဢူဝ်းၵၼ်- လႆႈႁူႉၼင်ႇၼႆ ။


မိူဝ်ႈၼႂ်းဝၼ်းတီႈ 28/10/2016 ၼၼ်ႉၵေႃႈ ၽူႈၵွၼ်းသိုၵ်းသုင်သုတ်း မိူင်းၶႄႇ ၵေႃႈယင်းမွၵ်ႇဢဝ် ၽူႈၵွၼ်းသိုၵ်းသုင်သုတ်းမၢၼ်ႈ မိၼ်းဢွင်ႇလၢႆႇသေ ၵႂႃႇႁူပ်ႉၵၼ်တီႈဝဵင်းၶုၼ်းမိင်၊ ၵူၺ်းၵႃႈ ႁၢၼ်ႉတေႃႇထိုင် ယၢမ်းလဵဝ် ဢၼ်သွင်ၾၢႆႇထူပ်းၵၼ်ၼႆႉ ယင်းပႆႇႁၼ်လွင်ႈလၢၵ်ႇလၢႆးသင် ။


ဢိင်ၼိူဝ်သိုၵ်းမၢၼ်ႈတင်းသိုၵ်းဝႃႉ ၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉသေ ၵူၼ်းဝၢၼ်ႈၵူၼ်းမိူင်းတႄႉ ဢွၼ်ၵၼ်မႆႈၸႂ် ၵူဝ်ပဵၼ်ပၢင်တိုၵ်း၊ ၸိူဝ်းဢၼ်ပၢႆႈၵႂႃႇတၢင်ႇတီႈ မိူၼ်ၼင်ႇပၢႆႈၵႂႃႇတၢင်းၵဵင်းတုင် တႃႈၶီႈလဵၵ်း ၵေႃႈမီး၊ ဢၼ်ပၢႆႈၵႂႃႇတၢင်းမိူင်းၶႄႇၵေႃႈမီး- ၼႆယဝ်ႉ ။


ၵူၺ်းၵႃႈ မိူဝ်ႈၶမ်ႈဝႃး (30/10/2016)ၼႆႉ ပွတ်းမိူင်းယွင်း မိူင်းယၢင်းၸိူဝ်းၼႆႉ ယွၼ်ႉပိူဝ်ႈဢမ်ႇပဵၼ် ပၢင်တိုၵ်းၵၼ်လႄႈ ၵူၼ်းဝၢၼ်ႈၵူၼ်းမိူင်းၸိူဝ်းပၢႆႈၽေးသိုၵ်းၵႂႃႇတၢင်းတီႈၵေႃႈ ၸိူဝ်းတိတ်းႁွႆႈၸပ်းပႅၼ်း သူၼ်ႁႆႈၼႃးၸိူဝ်းၼၼ်ႉ ဢၼ်ပွၵ်ႈၶိုၼ်းမႃးဝၢၼ်ႈသူၼ်ႁိူၼ်းယေး ၵေႃႈမီးၽွင်ႈ- ၼႆယဝ်ႉ ။