ၸဝ်ႈသိူဝ်ၶၢၼ်ႇၾႃႉ ယွင်ႁူၺ်ႈ၊ ၵေႃႉပဵၼ်ၸွမ်ၸိုင်ႈ ၼႂ်းလူင်ပွင်ၸိုင်ႈမိူင်းတႆး ISG (ၸူဝ်ႈၶၢဝ်း) ဢၼ်ၵေႃႇတင်ႈၶိုၼ်ႈမႃးမိူဝ်ႈၼႂ်းပီ 2005 လူႉသဵင်ႈမုၼ်ၵႂႃႇတီႈႁိူၼ်းမၼ်းၸဝ်ႈ တီႈဝဵင်းဢေႃႊပိူဝ်ႊတႃႊ ၸိုင်ႈမိူင်းၶႅၼ်ႊၼၻိူဝ်ႊ၊ မိူဝ်ႈဝၼ်းဢႃးတိတ်ႉတီႈ 02/10/2016 - ၵူၼ်းၸမ်ၸႂ်မၼ်းၸဝ်ႈ လႄႈၼႂ်းပီႈၼႂ်းၼွင်ႉ လၢတ်ႈၼင်ႇၼႆ။

သၢႆႉၸဝ်ႈသိူဝ်ၶၢၼ်ႇၾႃႉ၊ ၶႂႃ-ၸဝ်ႈသူၺ်ႇတႅၵ်ႈ

ၸဝ်ႈသိူဝ်ၶၢၼ်ႇၾႃႉၼႆႉ ပဵၼ်လုၵ်ႈၸၢႆးလူင် ၸဝ်ႈၾႃႉမိူင်းယွင်ႁူၺ်ႈ၊ ၸဝ်ႈၾႃႉလူင်သူၺ်ႇတႅၵ်ႈ (ၵေႃႉပဵၼ်ၸွမ်ၸိုင်ႈၵေႃႉႁႅၵ်ႈ ၸိုင်ႈမိူင်းႁူမ်ႈတုမ်မၢၼ်ႈ 1948-52) လႄႈ ၸဝ်ႈမႄႈၼၢင်းႁိူၼ်းၶမ်း ၵေႃႉဢွၼ်ႁူဝ်ၵေႃႇတင်ႈ တပ်ႉသိုၵ်းၸိုင်ႈတႆး (SSA)။ မၼ်းၸဝ်ႈၼႆႉ လူႉသဵင်ႈမုၼ်ၵႂႃႇ ၽွင်းဢႃယု 78 ပီ ။

(ပိုၼ်းတူဝ်ၵႅပ်ႈ ၸဝ်ႈသိူဝ်ၶၢၼ်ႇၾႃႉ)

ၸိုဝ်ႈ - ၸဝ်ႈသိူဝ်ၶၢၼ်ႇၾႃႉ
ၸိုဝ်ႈတၢင်ႇဢၼ် - ၸဝ်ႈသိူဝ် ဢမ်ႇၼၼ် Tiger Yawnghwe
ပေႃႈ - ၸဝ်ႈသူၺ်ႇတႅၵ်ႈ (ၸဝ်ႈၾႃႉလူင်ယွင်ႁူၺ်ႈ ၸွမ်ၸိုင်ႈမိူင်းႁူမ်ႈတုမ် ဢၼ်ထုၵ်ႇ ၸုမ်းသိုၵ်းမၢၼ်ႈတီႉၺွပ်း ၶင်ၶွၵ်ႈလႄႈ ၼွၼ်းၽႄးၼႂ်းၶွၵ်ႈမိူဝ်ႈပီ 1962) ။
မႄႈ - ၸဝ်ႈၼၢင်းႁိူၼ်းၶမ်း (လုၵ်ႈၸဝ်ႈၶုၼ်သၢင်ႇတူၼ်ႈႁုင်း သႅၼ်ဝီ)
ၵိူတ်ႇမိူဝ်ႈ - 15/04/1938
ၼမ်ႉၵတ်ႉၸၼ်ႉလိၵ်ႈ - B.Sc ပီ 3

(သၢႆႉၵႂႃႇၶႂႃ) တႅဝ်းလင်- ၸဝ်ႈယိင်းသီႇတႃႇ၊ ၸဝ်ႈသိူဝ်ၶၢၼ်ႇၾႃႉ၊ ၸဝ်ႈမႄႈၼၢင်းႁိူၼ်းၶမ်း၊ ၸဝ်ႈၸၢင်ႉ ယွင်ႁူၺ်ႈ လႄႈ ၸဝ်ႈမီ ။ တႅဝ်းၼႃႈ- ၸဝ်ႈႁၢၼ် ယွင်ႁူၺ်ႈ၊ ၸဝ်ႈသႅင်လိုၼ်းၶမ်း၊ ၸဝ်ႈႁေႇမႃႇ

ပီႈၼွင်ႉႁူမ်ႈတွင်ႉ - မီး 6 ၵေႃႉ (ၸၢႆး 4 ယိင်း 2) ။

1.ၸဝ်ႈသိူဝ်ၶၢၼ်ႇၾႃႉ ။
2.ၸဝ်ႈသိူဝ်လိူၼ်ၾႃႉ (ၸဝ်ႈၸၢင်ႉ) ။
3.ၸဝ်ႈယိင်းသီႇတႃႇ
4.ၸဝ်ႈသိူဝ်ႁူမ်ႇၾႃႉ (ၸဝ်ႈမီ) ။
5.ၸဝ်ႈသိူဝ်ႁၢၼ်ၾႃႉ (ၸဝ်ႈႁၢၼ်) ။
6.ၸဝ်ႈယိင်းရတၼႃႇသႅင်လိုၼ်း (ၸဝ်ႈလိုၼ်း) ။

ၸဝ်ႈမႄႈၼၢင်းႁိူၼ်းၶမ်း

ၼႃႈႁိူၼ်း - ၼၢင်း Rosemary Catherine Otte ။
လုၵ်ႈလၢင်း - မီး 4 ၵေႃႉ-

1.ရီႊပႅၵ်ႊၶိူဝ်ႊ သၼ်ႊၻႃႊ (Rebecca Sanda Devi)
2.သိူဝ် (သူၺ်ႇတႅၵ်ႈ)
3.ၵျႄႊသီႊၶိူဝ်ႊ (ယိင်းသီႇတႃႇ) Jessica Ying-Sita
4.သိူဝ် (ၶမ်းသိူၵ်ႈ)
တီႈယူႇ - AlbertA, Canada (မိူင်းၶႅၼ်ႊၼၻိူဝ်ႊ)။

ၶၢဝ်းတၢင်းႁဵၼ်းႁူႉတၢင်းမေႃ

-ႁူင်းႁဵၼ်းၸၼ်ႉငဝ်ႈယွင်ႁူၺ်ႈ
-ႁူင်းႁဵၼ်းၼၢႆးၶၢဝ်ၵလေႃး-သႅၼ်ဝီ
-ႁူင်းႁဵၼ်း Doon, Dehra Dun, India (မိူဝ်ႈပီ 1949-1954)
-ႁူင်းႁဵၼ်းၸၼ်ႉၸွမ်တႃႈၵုင်ႈ (2 ပီ)
-ႁူင်းႁဵၼ်း Bell School of Languages, Cambrige
-ႁူင်းႁဵၼ်း CambrigeshoreTechincal Collage B.A. (Hons) Geology and Political Institutions, University of Keele 1964

ၸူဝ်ႈပၢၼ်လႄႈၶၢဝ်းတၢင်းၵၢၼ်ၸိူဝ်ႉၸၢတ်ႈ

-ပဵၼ်တီႈၵိူဝ်းၵုမ် ႁူမ်ႈတုမ်တီႇမူဝ်ႇၶရေႇၸီႇၸိုင်ႈတႆး (SDU)

ၼႃႈၵၢၼ် P. Geol., Association of Professionan Engineers, Geologists Geophysicists of Alberta.

တၼ်းႁဵင်း ၸဝ်ႈၾႃႉယွင်ႁူၺ်ႈ [ဝၢႆးၸဝ်ႈၾႃႉသႅင်ၾႃႉ (1962-1998) ၼွၼ်းၽႄး ၸဝ်ႈမႄႈၼၢင်းႁိူၼ်းၶမ်း လႆႈယုၵ်ႉယွင်ႈၶိုၼ်ႈပဵၼ်ၸဝ်ႈၾႃႉ]