ၸၢႆးသႅင်မိူင်း ၽူႈတႅၼ်းသၽႃး ၵူၼ်းမိူင်း ၸႄႈဝဵင်းမိူင်းၵိုင် ငဝ်းငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး  SNLD တွင်ႈထၢမ် လွင်ႈၵၢၼ် ၵပ်းသိုပ်ႇသိုဝ်ႇသၢရ်(ၾူၼ်း)၊ ၵူၼ်းမိူင်းၵိုင် တေလႆႈၸႂ်ႉတိုဝ်းမိူဝ်ႈလႂ် ဝႃႈၼႆ ။

ဝၼ်းတီႈ 28/09/2016 ပၢင်ၵုမ်သၽႃးၵူၼ်းမိူင်း တီႈၼေႇပျီႇတေႃႇၼၼ်ႉ ယူႇတီႈၽွင်းလူင် ၾၢႆႇၵပ်းသိုပ်ႇလႄႈ တေႃႉသူင်ႇ ဢူးတၢၼ်ႉၸိၼ်ႇမွင်ႇ တွပ်ႇလၢတ်ႈဝႃႈ “ ယိူင်းဢၢၼ်း တႃႇတေၵပ်း သိုပ်ႇပၼ်တီႈၵႆၼႆသေ တီႈမိူင်းၵိုင် တႄႇလီႇၼေႃး မျၢၼ်ႇမႃႇလိမိတႅတ်ႉလႄႈ ဢေႃႇရီႇတူးမျၢၼ်ႇမႃႇ လိမိတႅတ်ႉၶဝ်တင်ႈဝႆႉ လၵ်းသဝ် GSM 4 ဢၼ်။ တေၶဵၼ်ႇတႅမ်ႈၽႅၼ်ၵၢၼ်တႃႇယုၵ်ႉမုၼ်း ၵၢၼ်ၵပ်းသိုပ်ႇ တိတ်ႇတေႃႇႁႂ်ႈငၢႆႈငႅမ်ႈဝႆးၽႂ်း။ တေႁွင်ႉ ၸုမ်း(ဢၼ်လူင်းသဵၼ်ႈၸိုဝ်ႈ မၢႆၾၢင်ပဵၼ် တၢင်းၵၢၼ်သေ) ႁဵတ်းၵၢၼ်ၾၢႆႇၵပ်းသိုပ်ႇသိုဝ်ႇသၢၼ်ၼွၵ်ႈမိူင်းၼႂ်းမိူင်း ၶဝ်သႂ်ႇငိုၼ်းၵမ်ႉ ၸွႆႈ(ဢဝ်ၼႂ်းငိုၼ်းၶဝ်ႈ ၸုမ်းၽႂ်မၼ်း 1 ပီ 2 ပႃႇသဵၼ်ႊ)။ တေဢမ်ႇဝႆႉပၢႆးမၢၵ်ႈမီးပဵၼ်ပိူင်လူင်၊ တေဢမ်ႇတူၺ်းၼမ်ႉတွၼ်း ငိုၼ်း၊ ယိူင်းဢၢၼ်းတႃႇၸိူဝ်းယူႇႁၢင်ႇယၢၼ်ဝဵင်း တႃႇပီႈၼွင်ႉၼိူဝ်လွႆၶဝ်တေ တိတ်းတေႃႇႁႃၵၼ်ငၢႆႈ လီၼၼ်ႉၵူၺ်း” ဝႃႈၼႆ ။


ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈဝႃႈ “ မိူင်းႁဝ်းၼႆႉ လၵ်းသဝ် မၼ်းတင်ႈဝႆႉမူတ်းယဝ်ႉ မိူၼ်ၸိူင်ႉၼင်ႇ သၢႆၾႆးၵေႃႈ သႂ်ႇယဝ်ႉမူတ်း။ ၵူၺ်းၵႃႈ ယွၼ်ႉပိူဝ်ႈမီးပၼ်ႁႃ သင်တႄႉ ဢမ်ႇႁူႉ ၊ မီးလၢႆႊ(သၼ်ယႃး) ယူႇသေတႃႉ ပႆႇၸႂ်ႉ လႆႈလႃးလႃး ၊ မၼ်းမိူၼ်ဝႃႈ ၶဝ်ပိုတ်ႇၸၢမ်းတူၺ်းၵူၺ်းႁႃႉပႆႇပဵၼ်တၢင်းၵၢၼ်ႁႃႉ။ ယွၼ်ႉၼၼ်လႄႈ ႁဝ်းဢမ်ႇႁူႉလီလီ ႁဝ်းၸင်ႇတႅမ်ႈလိၵ်ႈတွင်ႈထၢမ်  မိူဝ်ႈဝၼ်းတီႈ 29/08/2016” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ယူႇတီႈၽွင်းလူင် ၾၢႆႇၵပ်းသိုပ်ႇလႄႈ တေႃႇသူင်ႇ ပၼ်ၶေႃႈတွပ်ႇ ၶိုၼ်းသေတႃႉ  ဢမ်ႇပေႃးႁၢၼ်ႉၸႂ်၊ ၵူၺ်းၵႃႈ တေပဵၼ်ဢၼ်ပၵ်းတႃတႃႇ ၶဝ်တေဢမ်ႇယူႇ မဝ်မၢင်။ ယူႇတီႈၽွင်း တႅၼ်းၵူၼ်းမိူင်းၵေႃႉ ၼိုင်ႈသေ တေမိူဝ်းတူၺ်း မိူဝ်းထတ်း၊ ထၢမ်။ ၵွပ်ႈပိူဝ်ႈၼႆ သင်မီးလွင်ႈမီးတၢင်း မႃး တေဢဝ်မႃးဢုပ်ႇမႃးလၢတ်ႈထႅင်ႈ ၼႂ်းသၽႃး” ဝႃႈၼႆ ။


ၸႄႈဝဵင်း 21 ၸႄႈဝဵင်းၼႂ်းၸိုင်ႈတႆး ပွတ်းၸၢၼ်းၼႆႉ ဢၼ်လႆႈပိုတ်ႇဝႆႉ ၵၢၼ်ၵပ်းသိုပ်ႇ ဢေႃႊတူဝ်ႊဢဵၵ်ႊၶျဵင်ႊ 32 တီႈ၊ ADSL သမ်ႉ 18 တီႈ၊ လၵ်းသဝ် GSM (2G,3G) မီး 238 တီႈ၊ CDMA-800 MHZ သမ်ႉ 5 တီႈ၊ CDMA-450 MHZ (20) တီႈ ဢၼ်လႆႈၵေႃႇသၢင်ႈပိုတ်ႇဝႆႉ ။


ၼႂ်းၸႄႈဝဵင်းမိူင်းၵိုင်သမ်ႉ မိူဝ်ႈဝၼ်းတီႈ 08/11/2011 သမ်ႉ လႆႈပိုတ်ႇ ပၼ်လၢႆႊသၼ်ႊယႃႊ CDMA-450 MHZ (1) တီႈ။ လၢႆႊ(သၼ်ႊယႃႊ) GSM(2G,3G) (1) တီႈတင်း V-Sat (1)  ဢၼ်တေၵွင်ႉတင်းလၢဝ်ပွမ်(ၵျူဝ်ႇတူႉ) သမ်ႉ လႆႈပိုတ်ႇၼႂ်းဝၼ်းတီႈ 15/08/2016 ၼႆယဝ်ႉ။