ဢိင်ၼိူဝ် ၵူၼ်းၵႂႃႇဢႅဝ်ႇယဵမ်ႈဝႆႈသႃတူၼ်ႈမႆႉလိူင်ႇၵႃၶမ်း ဢၼ်ဢွၵ်ႇၾၢင်ႁၢင်ႈပဵၼ်ႁုၼ်ႇႁၢင်ႈပုတ်ႉထၸဝ်ႈ ၽြႃး တီႈဝၢၼ်ႈၼမ်ႉသွႆႈ ဢိူင်ႇမူင်ႈမူၼ်း ၸႄႈဝဵင်းၼမ်ႉၸၢင် ၼမ်မႃးၵူႈမိုဝ်ႉၵူႈဝၼ်းသေ ၸဝ်ႈသူၼ်ဢဝ် တီႈလိၼ်သူၼ်ၼႆႉ မွပ်ႈယိုၼ်ႈလူႇတၢၼ်းပၼ် သင်ၶၸဝ်ႈၼမ်ႉၸၢင် တႃႇႁဵတ်းပဵၼ်လိၼ်သႃသၼႃ ။

ပႃႈၼၢင်း ၵူၼ်းႁုင်ႉမိုဝ်ႉႁဵတ်းဝေယႃဝၸ်ႉၸ တႃႇလဵင်ႉလူပီႈၼွင်ႉၶႅၵ်ႇ ၸိူဝ်းမႃးဝႆႈၽြႃးၼၼ်ႉ လၢတ်ႈဝႃႈ- ၸဝ်ႈတီႈလိၼ်သူၼ် ၸိုဝ်ႈပႃႈယုင်း။ ပႃႈယုင်းၼႆႉ တီႈလိၼ်သူၼ်မၼ်း ဢၼ်မီးတူၼ်ႈမႆႉဢွၵ်ႇႁုၼ်ႇႁၢင်ႈၽြႃး ၼႆႉ မီးတၢင်းၵႂၢင်ႈ 2 ဢေႊၵႃႊ၊ မၼ်းယုၵ်ႉလူႇတၢၼ်းပၼ်သင်ၶၸဝ်ႈၼမ်ႉၸၢင်ယဝ်ႉ။ ပႃႈယုင်းလၢတ်ႈဝႃႈ ပေႃးဢဝ်ၶဝ်ႈၵၢပ်ႇၸုပ်ႈၼႆႉယဝ်ႉ တေဢမ်ႇၽုၵ်ႇသင်ထႅင်ႈယဝ်ႉ၊ တီႈလိၼ်ၽိုၼ်ၼႆႉ လႆႈဢဝ်ယုၵ်ႉလူႇ တၢၼ်းပဵၼ်လိၼ်သႃသၼႃၵႂႃႇယဝ်ႉ။ ၵူၼ်းႁိမ်းႁွမ်းၸိူဝ်းၼႆႉၵေႃႈ ၶဝ်ၶႂ်ႈလူႇတၢၼ်းတီႈလိၼ်ၼႆ ၶဝ်ၵေႃႈ လၢတ်ႈမႃးယူႇ၊ ၵူၺ်းၵႃႈ လွင်ႈလူႇတၢၼ်းၼႆႉ ပဵၼ်ၵၢင်ၸႂ်ၶဝ်ၵူၺ်း၊ ဢမ်ႇမီးလွင်ႈတဵၵ်းငႅၼ်ႉၵႅၼ်ႉၶေႃးၵၼ်- ဝႃႈၼႆ ။


ၵဵဝ်ႇၵပ်းလွင်ႈၼႆႉ သင်ၶၸဝ်ႈၼမ်ႉၸၢင်တူၼ်ၼိုင်ႈ ဢၼ်ဢွၼ်ႁူဝ်ၼမ်းၼႃႈတၵ်ႉၵႃႇသတ်ႉထႃး ၵႂႃႇဢႅဝ်ႇယဵမ်ႈဝႆႈသႃ တူၼ်ႈမႆႉလိူင်ႇၵႃၶမ်း ဢၼ်ဢွၵ်ႇႁုၼ်ႇႁၢင်ႈပုတ်ႉထၸဝ်ႈၽြႃး ၼၼ်ႉၵေႃႈလၢတ်ႈဝႃႈ-  ဢၼ်ဢဝ်တီႈလိၼ် မွပ်ႈလူႇတၢၼ်းပၼ် ပဵၼ်လိၼ်သႃသၼႃၼႆႉ မၼ်းပဵၼ်တၢင်းလူႇဢၼ်မီးၼႃးမုၼ်ယႂ်ႇလူင် ပဵၼ်တၢင်းလူႇတၢင်းတၢၼ်းဢၼ်ထွတ်ႈမျၢတ်ႈတႄႉတႄႉ။ ႁဝ်းၸဝ်ႈၵေႃႈ ဢွၼ်ၵၼ်သႃထုဢၼုမေႃးတၼႃႇ ၸူမ်းၸွမ်း- ဝႃႈၼႆ ။


မၼ်းၸဝ်ႈသိုပ်ႇလၢတ်ႈထႅင်ႈဝႃႈ- ၵူၺ်းၵႃႈဝႃႈ ဢၼ်ၵူၼ်းဢွၼ်ၵၼ်မႃးဝႆႈသႃတူၼ်ႈမႆႉ ဢွၵ်ႇႁုၼ်ႇႁၢင်ႈၽြႃး ယူႇၼႆႉ ႁဝ်းၸဝ်ႈၶႂ်ႈလၢတ်ႈၼႄဢိတ်းၼိုင်ႈ။ တူၼ်ႈမႆႉၼႆႉ မၼ်းပဵၼ်ႁုၼ်ႇႁၢင်ႈၽြႃးသေတႃႉ မၼ်းတိုၵ်ႉပဵၼ် တူၼ်ႈမႆႉယူႇ၊ ၵွပ်ႈဝႃႈမၼ်းယင်းပႆႇလႆႈတၢင်ႇဢၼေႇၵၸႃႇ။ ပေႃးၼပ်ႉထိုဝ်တူၼ်ႈမႆႉၼႆႉဝႃႈပဵၼ်ၽြႃးပဵၼ်ၸဝ်ႈ ၼႆသေ ဢွၼ်ၵၼ်မႃးဝႆႈတိၵ်းတိၵ်းတႄႉ မၼ်းတေပဵၼ်ဢၼ်ယုမ်ႇယမ်ၽိတ်းပိူင်ႈၵႂႃႇ၊ ၵွပ်ႈဝႃႈၸၢဝ်းပုတ်ႉထ သႃသၼႃၼႆႉ ယုမ်ႇယမ်ဝႃႈၽြႃးပဵၼ်ၸဝ်ႈ ပဵၼ်ဢၼ်သုင်သုတ်း ဢၼ်ထွတ်ႈမျၢတ်ႈသုတ်း ဢမ်ႇမီး ဢၼ်တႅၵ်ႈၼိူင်းလႆႈ။ ၵွပ်ႈၼႆ ႁဝ်းၵႂႃႇဝႆႈႁုၼ်ႇႁၢင်ႈၽြႃးတီႈလႂ်ၵေႃႈယဝ်ႉ ပေႃးၼႂ်းၸႂ်ႁဝ်းဢမ်ႇၸပ်းပႅၼ်း ဢမ်ႇၶုၵ်းၸႂ်လႆႈၵုၼ်းမုၼ်ၽြႃးပဵၼ်ၸဝ်ႈၼႆတႄႉ မၼ်းတေပဵၼ်ဢၼ်ယုမ်ႇၽိတ်းပိူင်ႈသေ တေႁဵတ်းႁႂ်ႈ လုၵ်ႈလၢၼ်ၸိူဝ်းမႃးတၢင်းလင်ၵေႃႈ ယုမ်ႇၽိတ်းပိူင်ႈၸိူင်ႉၼင်ႇႁဝ်း- လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


သူၼ်ၶဝ်ႈၵၢပ်ႇ ဢၼ်မီးတူၼ်ႈမႆႉလိူင်ႇၵႃၶမ်း ဢွၵ်ႇပဵၼ်ႁုၼ်ႇႁၢင်ႈပုတ်ႉထၽြႃးပဵၼ်ၸဝ်ႈၼႆႉ ပဵၼ်ၼႂ်း ဝၢၼ်ႈၼႃးသွႆႈ ဢိူင်ႇမူင်ႈမူၼ်း ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။ မီးၾၢႆႇတၢင်းဢွၵ်ႇတၢင်းၵႃး ၼမ်ႉၸၢင်-မိူင်းၼၢႆး။ ပေႃးလုၵ်ႉႁၢႆးၽၵ်းဢွၵ်ႇမႃးဢမ်ႇပေႃးၵႆၼၼ်ႉ ငႅၵ်းလဵဝ်ႉသၢႆႉၶဝ်ႈၵႂႃႇတၢင်းဢွၵ်ႇမွၵ်ႈ 1 ၵီႊလူဝ်ႊ။ ၵူၼ်းၶီႇၵႃးဢွၵ်ႇၶၢဝ်းတၢင်းၵႂႃႇမႃးၸွမ်းတၢင်းလူင်ၵေႃႈ မုင်ႈတူၺ်းယင်းႁၼ်တူၼ်ႈမႆႉလိူင်ႇၵႃၶမ်း ဢၼ်ဢွၵ်ႇႁုၼ်ႇႁၢင်ႈပုတ်ႉထၸဝ်ႈၼႆႉယူႇ ။


ၵူႈမိုဝ်ႉၵူႈဝၼ်းၼႆႉ မီးၵူၼ်းမႃးဢႅဝ်ႇယဵမ်ႈ မႃးလဵပ်ႈႁဵၼ်း မႃးဝႆႈသႃတူၼ်ႈမႆႉလိူင်ႇၵႃၶမ်း ဢၼ်ဢွၵ်ႇႁုၼ်ႇႁၢင်ႈ ပုတ်ႉထ ၽြႃးပဵၼ်ၸဝ်ႈၼႆႉ ၼမ်တႄႉတႄႉ။ ၵွပ်ႈၼၼ် ၵူၼ်းၼႂ်းဢိူင်ႇမူင်းမူၼ်း လႄႈႁိမ်းႁွမ်း ဢွၼ်ၵၼ်မႃး လူႇတၢၼ်း မႃးႁဵတ်းဝေယႃဝၸ်ႉၸၶဝ်ႈၽၵ်း လဵင်ႉလူပီႈၼွင်ႉၶႅၵ်ႇ ၸိူဝ်းမႃးဝႆႉသႃႈၵူႈဝၼ်း။ မိူဝ်ႈတႄႇမၼ်း ဢမ်ႇသဵင်ႈၼမ်သေတႃႉ ယေႈႁိုင်ယေႈၵူၼ်းၼမ်မႃးလႄႈ မိူဝ်ႈလဵဝ် ၼပ်ႉသွၼ်ႇတူၺ်း ၼိုင်ႈဝၼ်းလႆႈလဵင်ႉၶဝ်ႈ ပီႈၼွင်ႉၶႅၵ်ႇ ၽတ်ႉၽဵင်ႇမွၵ်ႈ 10 တၢင် (ၼိုင်ႈၸေႃး)ၼႆယဝ်ႉ ။


ဢၼ်တူၼ်ႈမႆႉလိူင်ႇၵႃၶမ်း ဢွၵ်ႇႁုၼ်ႇႁၢင်ႈပုတ်ႉထ ၽြႃးပဵၼ်ၸဝ်ႈမႃးၼႆႉ ပဵၼ်မႃးၸဵမ်မိူဝ်ႈႁူဝ်လိူၼ် ဢေႃႊၵတ်ႊသ်၊ ဢမ်ႇလႆႈတတ်း ၶိုၼ်းမႄးႁၢင်ႈၶိူင်ႈသင်၊ ပဵၼ်ႁုၼ်ႇႁၢင်ႈၽြႃးဢွၵ်ႇမႃးႁင်းၵူၺ်း သၽႃဝမၼ်း- ၼႆယဝ်ႉ ။