သုၼ်ႁဵၼ်းႁူႉလႄႈၶူၼ်ႉၶႂႃႉလွင်ႈတႆးဢၼ်မႂ်ႇၼႆႉ တေပိုတ်ႇတူဝ်ၼႂ်းဝၼ်းၸၼ်ၼႃႈၼႆႉ တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း၊ ၽူႈၶဝ်ၶွမ်ႊမတီႊၵေႃႉၼိုင်ႈလၢတ်ႈ ။

ၶူးၸၢႆးၶမ်းမိူင်း ၽူႈၸတ်းၵၢၼ် သုၼ်ႁဵၼ်ႁူႉလႄႈၶူၼ်ႉၶႂႃႉလွင်ႈတႆး  Photo: SHAN

ၶူးၸၢႆးၶမ်းမိူင်း ဢၼ်ပဵၼ်ၽူႈၵမ်ၵပ်း/ၸတ်းၵၢၼ် သုၼ်ႁဵၼ်ႁူႉလႄႈၶူၼ်ႉၶႂႃႉလွင်ႈတႆး (New center for Tai Studies) လၢတ်ႈဝႃႈ- တၢင်းယိူင်းဢၢၼ်း သုၼ်ၼႆႉ ပိူဝ်ႈတႃႇၶူၼ်ႉၶႂႃႉလွင်ႈၾိင်ႈငႄႈၾိင်ႈထုင်း ႁိတ်ႈႁွႆးတႆး ပိုၼ်းတႆးၸိူဝ်းၼႆႉ။ လိူဝ်သေၼၼ်ႉ ပိူဝ်ႈတႃႇပဵၼ်သုၼ်လဵပ်ႈႁဵၼ်းပႃး ၾိင်ႈငႄႈၾိင်ႈထုင်းၸၢဝ်းၶိူဝ်း ဢၼ်ယူႇသဝ်းၼႂ်းမိူင်းတႆး ၸဵမ်ၸိူဝ်းၼႆႉ ။


သုၼ်ႁဵၼ်းႁူႉလႄႈၶူၼ်ႉၶႂႃႉလွင်ႈတႆးၼႆႉ တေၸတ်းပၢင်ပိုတ်ႇသုၼ် ဝၼ်းတီႈ 26/09/2016 ။ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉၵေႃႈ ယင်းတိုၵ်ႉမီးတၢင်းယၢပ်ႇၽိုတ်ႇယူႇလၢႆလၢႆလွင်ႈ မိူၼ်ၼင်ႇဢွင်ႈတီႈ လုမ်းႁဵတ်းၵၢၼ်ၸိူဝ်းၼႆႉၵေႃႈ ယင်းပႆႇမီး။ မိူၼ်ၼင်ႇႁူင်းတူၺ်းလိၵ်ႈလၢႆးလႂ်၊ ႁႅင်းၵူၼ်းၸိူဝ်းၼႆႉၵေႃႈ ယင်းတိုၵ်ႉလူဝ်ႇထႅင်ႈတင်းၼမ်။ ထႅင်ႈလွင်ႈၼိုင်ႈၵေႃႈ ၵူၼ်းတႆးႁဝ်းၼႆႉ ဢမ်ႇပေႃးသူၼ်ၸႂ်၊ တႃႇတေႁဵၼ်းႁူႉလွင်ႈၸိူင်ႉၼႆၵေႃႈ ယင်းတိုၵ်ႉမီးဢေႇတႄႉတႄႉ- ၶူးၸၢႆးၶမ်းမိူင်း လၢတ်ႈ ။


ၸိူင်ႉႁိုဝ်ၵေႃႈလီ ၶူးၸၢႆးၶမ်းမိူင်း ၵေႃႈတိုၵ်းသူၼ်းႁႂ်ႈၵူၼ်းတႆးၵူႈၵေႃႉၵူႈၵူၼ်း ဢၼ်မီးယူႇၼႂ်းလူၵ်ႈၼႆႉ ႁႂ်ႈမႃးႁူမ်ႈၵၼ်ၸွႆႈထႅမ်သုၼ်ၼႆႉသေ ႁူမ်ႈၵၼ်ႁဵတ်းသၢင်ႈၵႂႃႇၵၢၼ်ငၢၼ်းၵႂႃႇ ။


မၼ်းၸၢႆးသိုပ်ႇလၢတ်ႈထႅင်ႈဝႃႈ- ဢမ်ႇဝႃႈၵူၼ်းတႆး ၵူၼ်းၵူႈတီႈၼႂ်းလူၵ်ႈၼႆႉ ႁႂ်ႈႁူႉဝႃႈမိူဝ်ႈလဵဝ်ၼႆႉ ၼႂ်းမိူင်းတႆးႁဝ်း ပိုတ်ႇသုၼ်ႁဵၼ်းႁူႉလွင်ႈတႆးယဝ်ႉ။ တၢင်းယိူင်းဢၢၼ်း ဢၼ်လႆႈႁဵတ်းသုၼ်ႁဵၼ်းႁူႉလႄႈ ၶူၼ်ႉၶႂႃႉ ၵဵဝ်ႇၵပ်းလွင်ႈတႆးၼႆႉၵေႃႈ ပိူဝ်ႈတႃႇပိုၼ်ၽႄႈၽိုၼ်ၶၢဝ်ႇ (News letter)ၽႃသႃဢိင်းၵလဵတ်ႈ ၼိုင်ႈပီလႂ် 2 ပွၵ်ႈ၊ တေပိုၼ်ၽႄႈတၢင်းၼွၵ်ႈမိူင်း ၼင်ႇႁိုဝ်ၵူၼ်းၼွၵ်ႈမိူင်းပေႃးတေႁူႉလႄႈသူၼ်ၸႂ် လဵပ်ႈႁဵၼ်းလွင်ႈတႆးလႄႈၸၢဝ်းၶိူဝ်းၼႂ်းမိူင်းတႆး- ဝႃႈၼႆ ။


လိူဝ်သေၼၼ်ႉ သုၼ်ႁဵၼ်းႁူႉလွင်ႈတႆးၼႆႉ တေႁဵတ်းပၢင်ဢုပ်ႇၵုမ် (Seminar) လႄႈႁဵတ်းၽိုၼ်ပပ်ႉ လိၵ်ႈလၢႆးဢွၵ်ႇပႃး ။


ၶူးၸၢႆးၶမ်းမိူင်း ယင်းလၢတ်ႈထႅင်ႈဝႃႈ- ယွၼ်းတိုၵ်းသူၼ်း ႁႂ်ႈၵူၼ်းၶိူဝ်းတႆးႁဝ်းၵူႈတီႈၵူႈတၢင်း ပၼ်တၢင်း ႁၼ်ထိုင်လႄႈ ၸီႉၸမ်ႈမႃး၊ ယဝ်ႉၵေႃႈမႃးၸွႆႈၵၼ်ပူၵ်းပွင် ၼင်ႇႁိုဝ်သုၼ်ႁဵၼ်းႁူႉလႄႈၶူၼ်ႉၶႂႃႉလွင်ႈတႆးၼႆႉ ပေႃးတေၶိုၼ်ႈယႂ်ႇမႂ်ႇသုင်ၵႂႃႇ- ဝႃႈၼႆ ။