ၸဝ်ႈတူၼ်ၶူးသီႇႁၼႃႇတ ဢႃယု 56 ပီ ၸဝ်ႈၼင်ႈၵျွင်းပၢင်ႇ ဝဵင်းလၢႆးၶႃႈ ၵိုင်ႉၵၢင်ႉလူႉလွၼ်ႇ သုတ်းမုၼ် လူၺ်ႈတၢင်းပဵၼ်သွင်ႁူၼ် တီႈႁူင်းယႃၵူၼ်းမိူင်း ၸႄႈဝဵင်းလၢႆးၶႃႈ ။

ဝၼ်းတီႈ 20/09/2016 ယၢမ်း ၵၢင်ၼႂ် မွၵ်ႈ 07 မူင်း ၸဝ်ႈသီႇႁၼႃႇတ ၸဝ်ႈၵွၼ်းဝတ်ႉ ၵျွင်းပၢင်ႇ ၸႄႈဝဵင်းလၢႆးၶႃႈ ၸိုင်ႈတႆး ပွတ်းၸၢၼ်း လူႉလွၼ်ႇသုတ်းမုၼ် တီႈႁူင်းယႃ ၵူၼ်းမိူင်း ဝဵင်းလၢႆးၶႃႈ ယွၼ်ႉတၢင်းပဵၼ်ၼၢဝ်ႁႅင်းဢႄႇ၊ သွင်ႁူၼ်သေ ၵိုင်ႉၵၢင်ႉလူႉလွၼ်ႇသုတ်းမုၼ် ၽွင်းဢႃယု 56 ပီ၊ ဝႃႇသႃ 37 ဝႃႇ ။


ၸဝ်ႈတူၼ်ၶူး ပၼ်ႇတဝ ၵျွင်းပၢင်ႇ လၢႆးၶႃႈ လၢတ်ႈဝႃႈ “ ယူႇတီႈၸဝ်ႈ သြႃႇႁဝ်းပဵၼ်တၢင်းပဵၼ် ၼၢဝ်မႃးၼႆႉတေမီးမွၵ်ႈ 4 ဝၼ်းယဝ်ႉ၊ ၼၢဝ်သေ ႁႅင်းဢူၼ်ႈယဝ်ႉၶႂ်ႈပဵၼ်သွင်ႁူၼ်။ ႁႂ်ႈဝႃႈ ပဵၼ်တၢင်းပဵၼ်ႁၢဝ်ႈႁႅင်းတႄႉဢမ်ႇမီး။ မိူဝ်ႈဝႃး ယင်းတိုၵ်ႉဢုပ်ႇတၵ်ႉၵႃႇသတ်ႉထႃး ၶဝ်လီ လီယူႇ၊ ၽိူဝ်ႇထိုင်မႃးမိူဝ်ႈၼႆႉ ၵၢင်ၼႂ် ၵိုင်ႉၵၢင်ပဵၼ်ႁႅင်းသေ ၼႅတ်ႈဢဝ်ၵႂႃႇႁူင်းယႃ  လူႉလွၼ်ႇသဵင်ႈမုၼ်ၵႂႃႇ တီႈႁူင်းယႃ လၢႆးၶႃႈၼၼ်ႉယဝ်ႉ၊ ၶၢပ်ႈတူဝ်ၸဝ်ႈႁဝ်းၼႆႉ တေႃႈလဵဝ် ဢဝ်မႃးဝႆႉ တီႈၵျွင်းပၢင်ႇယဝ်ႉ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ဝၼ်းတေပူၼ်ႉၶၢပ်ႈတူဝ် ၸဝ်ႈတူၼ်ၶူး သီႇႁၼႃႇတတႄႉ ပႆႇတႅပ်း တတ်းၵၼ်။  တေႃႈလဵဝ် လုၵ်ႈၼွင်ႉတပေးၸဝ်ႈ လၢႆလၢႆတူၼ်တိုၵ်ႉမီးဝႆႉယူႇ တီႈလွႆၵေႃႇ၊ ဝဵင်းလိူဝ်ႇ လႄႈ ဢိၵ်ႇထႅင်ႈလၢႆလၢႆတီႈ တေမႃးဢုပ်ႇၵုမ်ၵၼ်သေ ၸင်ႇတေတႅပ်းတတ်း ဝၼ်းပူၼ်ႉ” ဝႃႈၼႆ ။


ၸဝ်ႈတူၼ်ၶူး သီႇႁၼႃႇတ ၼႆႉ ၸႃတိ တီႈၵိူတ်ႇပဵၼ် ဝၢၼ်ႈသၢင်း ၸႄႈဝဵင်းလၢႆးၶႃႈ ၸိုင်ႈတႆး ပွတ်းၸၢၼ်း၊ ပဵၼ်ၽူႈဢွၼ်ႁူဝ်တၵ်ႉၵႃႇသတ်ႉထႃး ႁဵတ်းသၢင်ႈၵၢၼ်ပရႁိတ၊ ပိုတ်ႇပၢင်သွၼ်လိၵ်ႈတႆးၶၢဝ်းမႆႈ၊  ပိုတ်ႇတိူၵ်ႈသွၼ်လိၵ်ႈလႄႈ ပိုတ်ႇ ပၢင်တြႃး ၸဵမ်ၸိူဝ်းၼႆႉ။ ထႅင်ႈၾၢႆႇၼိုင်ႈၵေႃႈ မိူဝ်ႈပီၵႆ၊ ပီဢွၼ် ၵူၼ်းပၢႆႈၽေးသိုၵ်း ၼပ်ႉႁူဝ်ပၢၵ်ႇပၢႆႈမႃးသွၼ်ႈ ယူႇတီႈၸဝ်ႈတူၼ်ၶူးၵျွင်းပၢင်ႇ လႆႈ ၸွႆႈထႅမ်ပၼ် တီႈယူႇတၼ်းသဝ်း။ ၸဝ်ႈတူၼ်ၶူးၼႆႉ  ပဵၼ်ၽူႈၶဝ်ႈၸုမ်းၼယၵ သင်ၶၸဝ်ႈ ဝဵင်းလၢႆးၶႃႈ-ၼႆယဝ်ႉ ။