ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး RCSS ၶပ်းၶိုင်ဢိတ်ႇဢွၵ်ႇပိုၼ်ၽႄႈပပ်ႉမၢႆတွင်း ၶွပ်ႈၶူပ်ႇ 10 ပီ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး SSNA ဢမ်ႇယွမ်းဝၢင်းၶိူင်ႈ တေႃႇၸဝ်ႈဢႃႇၼႃႇသိုၵ်းမၢၼ်ႈ၊ ၵေႃႇသၢင်ႈ လွင်ႈၽွမ်ႉႁူမ်ႈမၼ်ႈၵႅၼ်ႇ တင်း ၶွင်ႇသီႇဢဝ်ၶိုၼ်းၸိုင်ႈတႆး ။

ပပ်ႉမၢႆတွင်းၼႆႉ ပဵၼ်ပိူဝ်ႈတႃႇမၢႆတွင်း တပ်ႉသိုၵ်းၸိူဝ်ႉၸၢတ်ႈၸိုင်ႈတႆး SSNA ဢမ်ႇယွမ်းဝၢင်းၶိူင်ႈ တေႃႇၸဝ်ႈဢႃႇၼႃႇသိုၵ်းမၢၼ်ႈသေ ၵေႃႇသၢင်ႈလွင်ႈၽွမ်ႉႁူမ်ႈမၼ်ႈၵႅၼ်ႇ တင်း ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၶွပ်ႈၶူပ်ႇ 10 တဵမ် မိူဝ်ႈပီ 2015 ။


ၼႂ်းပပ်ႉလိၵ်ႈၼႆႉ ၶဝ်ႈပႃးၵႂၢမ်းၼမ်း ၸွမ်သိုၵ်းယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ။ ၵႂၢမ်းၼမ်း ၸွမ်ႁၢၼ်ၸၢႆးယီႈ ၵႅမ်ႁူဝ်ပဝ်ႈ 1 ၊ ၵႂၢမ်းၼမ်းၸဝ်ႈသိုၵ်းလူင်ၶိူဝ်းငိုၼ်း ၵႅမ်ႁူဝ်ပဝ်ႈ 2 ။ ၶေႃႈပိုတ်ႇၸႂ်။ တွၼ်ႈ 1 ပိုၼ်းၵႅပ်ႈ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး SSNA လႄႈ ၶႅပ်းႁၢင်ႈဝၼ်းမိုၼ်ႉသိုၼ်း ၵမ်ႈၽွင်ႈ။ တွၼ်ႈ 2 SSNA ၵေႃႇသၢင်ႈလွင်ႈၽွမ်ႉႁူမ်ႈတင်း RCSS ၊ ပိုၼ်ၽၢဝ်ႇႁူမ်ႈႁွမ်း ပဵၼ်မူႇၼိုင်ႈ ၸုမ်းလဵဝ်။ တွၼ်ႈ 3 ပိုၼ်းတူဝ်ၵႅပ်ႈ ၽူႈဢွၼ်ႁူဝ်ၼမ်းၼႃႈ လၢႆလၢႆၸဝ်ႈ မိူၼ်ၼင်ႇပေႃႈထဝ်ႈတေႇဝိင်ႇ၊ ၸဝ်ႈသိုၵ်းလူင်ၵၢၼ်းယွတ်ႈ၊ ၸွမ်ႁၢၼ်ၸၢႆးယီႈ၊ ၸဝ်ႈသႅင်ၸုမ်ႈ၊ ၸဝ်ႈသိုၵ်းဢွင်ႇမျႃႉ၊ ၸဝ်ႈၼေႃႇမိူင်းဢွၼ်ႇ၊ ၸဝ်ႈႁၢၼ်သူႈမၢၼ်၊ ၸဝ်ႈႁၢၼ်ၸၢႆးထုၼ်း ၸိူဝ်းၼႆႉ ။


တွၼ်ႈ 4 ပဵၼ်တွၼ်ႈပွင်ႈၵႂၢမ်း၊ ယွတ်ႈလိၵ်ႈ၊ ဝွၵ်း၊ ၵႃႇတုၼ်း ဢၼ်လၢႆၵေႃႉလၢႆၸဝ်ႈၶဝ်တႅမ်ႈသူင်ႇထိုင် မွၵ်ႇလၢတ်ႈပိုတ်ႇၸႂ် လၢတ်ႈၼႄလွင်ႈတူဝ်ထူပ်း ပၢႆးဝူၼ်ႉၵူႈလွင်ႈလွင်ႈ။ တွၼ်ႈ 5 တၢင်းႁၼ်ပိူင်းပၼ် တွၼ်ႈသွၼ်ၼႂ်းပိုၼ်း (ဢၼ်လႆႈတူဝ်ထူပ်းမႃးလွင်ႈလီလွင်ႈၸႃႉ)။ တွၼ်ႈ 6 ၶေႃႈထတ်းသၢင်ၽူႈၼမ်း။ ၶႅပ်းႁၢင်ႈတီႈမၢႆတွင်းၼႂ်းဝၼ်းမိူဝ်ႈၼႆႉလႄႈ ပွင်ႈၵႂၢမ်းၶိုၵ်ႉတွၼ်း ၸိူဝ်းၼႆႉ ။


ၼႂ်းပပ်ႉမၢႆတွင်းၼႆႉ သပ်းၸႅင်ႈၼႄလွင်ႈတၢင်း ၸဝ်ႈႁၢၼ်ၵၢၼ်းယွတ်ႈ လႆႈဢွၼ်ႁူဝ်ၽိုၼ်ႉဝၢႆႇၽၢတ်ႇဢွၵ်ႇ တပ်ႉသိုၵ်းမိူင်းတႆး (MTA) သေၵႂႃႇပူၵ်းတင်ႈ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး SSNA ဝႃႈ ပိူင်လူင်မၼ်း ယွၼ်ႉလွင်ႈႁဵတ်းၽိတ်းပၵ်းပိူင်မၢႆမီႈၵူႈမိူင်းမိူင်း မိူၼ်ၼင်ႇၵႃႉၶၢႆယႃႈမဝ်းၵမ် မႃးႁူမ်ႇၼိူဝ်ၵၢၼ်မိူင်း မိူင်းတႆး၊ ယွၼ်ႉႁၼ်ဝႃႈ ပေႃးသိုပ်ႇယူႇၼႂ်း MTA ဢၼ်ၸဝ်ႈၶုၼ်သႃႇဢွၼ်ႁူဝ်ၵႂႃႇၸိုင် ၵၢၼ်မိူင်းတႆး ၵၢၼ်ၸိူဝ်ႉၸၢတ်ႈတႆး တေဢမ်ႇၸၢင်ႈၶိုၼ်ႈယႂ်ႇလႆႈ၊ ၵၢၼ်လၢႆးလုၵ်ႉၽိုၼ်ႉတႆး ၸၢင်ႈၸူမ်ႁၢႆပႅတ်ႈ။ သမ်ႉထႅင်ႈၼႂ်း MTA မီးလွင်ႈၸႅၵ်ႇၽႄတႆးလႄႈၶႄႇ၊ ယုၵ်ႉယွင်ႈၶႄႇပဵၼ်ယႂ်ႇ တဵၵ်းတႆး၊ ထၢင်ႇလဵၵ်ႉတႆး၊ ပေႃးတႆးမီးတၢင်းၽိတ်းဢိတ်းဢီႈၵေႃႈ ဢဝ်တၢႆ၊ ပေႃးပဵၼ်ၶႄႇသမ်ႉ ပၼ်တူတ်ႈတၢမ်ႇဢိတ်းဢွတ်းၵူၺ်း ၸိူဝ်းၼႆႉ ။


ၸဝ်ႈသိုၵ်းလူင်ၵၢၼ်းယွတ်ႈ ၽူႈပွင်ၵၢၼ်ၵူႈလွင်ႈလွင်ႈ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) ၼႆႉ လႆႈၽိုၼ်ႉဝၢႆႇၽၢတ်ႇဢွၵ်ႇ MTA မိူဝ်ႈဝၼ်းတီႈ 06/06/1995 သေ ဢုပ်ႇဢူဝ်းၵၼ်တင်း ၸုမ်းသိုၵ်းမၢၼ်ႈယဝ်ႉ ၵိုတ်းသိုၵ်းဢမ်ႇၶဝ်ႈထမ်းတြႃးတင်းသိုၵ်းမၢၼ်ႈမႃး။ ၽွင်းၵိုတ်းသိုၵ်းၼၼ်ႉ လႆႈတူင်ႉၼိုင်ၵၢၼ်ၸိူဝ်ႉၸၢတ်ႈ မႃးလၢႆၸိူဝ်ႉလၢႆလွင်ႈ၊ လူႉသဵင်ႈသုတ်းမုၼ်ၵႂႃႇ ယွၼ်ႉတၢင်းပဵၼ်ၶႅၼ်ႊသိူဝ်ႊတပ်းမႅင်း မိူဝ်ႈဝၼ်းတီႈ 14/03/2004 တီႈႁိူၼ်းမၼ်းၸဝ်ႈ ငဝ်ႈငုၼ်းၶၢႆးသိမ်ႇ- ၼႆယဝ်ႉ ။


ယိူင်းဢၢၼ်း ဢၼ်လႆႈဢိတ်ႇဢွၵ်ႇပိုၼ်ၽႄႈပပ်ႉမၢႆတွင်းၼႆႉ ၸွမ်ႁၢၼ်ၸၢႆးယီႈ ၵႅမ်ႁူဝ်ပဝ်ႈ 1 ၶွင်ႇသီႇဢဝ်ၶိုၼ်းၸိုင်ႈတႆး လၢတ်ႈၼႂ်းတွၼ်ႈၵႂၢမ်းၼမ်း မၼ်းၸဝ်ႈဝႃႈ- “ပပ်ႉၼႆႉပဵၼ်ပပ်ႉလွင်ႈ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) ၊ တပ်ႉသိုၵ်းတပ်ႉၼႆႉ ႁၢႆၵႂႃႇယဝ်ႉသေတႃႉ ဢမ်ႇဝၢင်းၶိူင်ႈ ၵွင်ႈၵၢင်ႇပၼ် ၸုမ်းသိုၵ်းမၢၼ်ႈတင်းသဵင်ႈ၊ ဢၼ်ၵိုတ်းၸိူဝ်းၼၼ်ႉ ၶဝ်ႈႁူမ်ႈႁွမ်းတင်း ၶွင်ႇသီႇဢဝ်ၶိုၼ်းၸိုင်ႈတႆး၊ ၵၢၼ်ၸိူဝ်ႉၶိူဝ်းဝၢၼ်ႈမိူင်းၼႆႉ ပဵၼ်ယႂ်ႇလိူဝ်ၵၢၼ်သုၼ်ႇတူဝ်သုၼ်ႇၸုမ်း။ ၵွပ်ႈႁၼ်ၸိူင်ႉၼႆလႄႈ ၶႃႈႁဝ်းၵေႃႉပဵၼ်ၽူႈဢွၼ်ႁူဝ် SSNA ၸင်ႇလႆႈတႅပ်းတတ်းႁူမ်ႈႁွမ်းၵၼ်တင်း RCSS ။ ဢၼ်ႁဵတ်းဢွၵ်ႇပပ်ႉၼႆႉ ၵွပ်ႈပိူဝ်ႈၶႂ်ႈႁႂ်ႈတႆးႁဝ်းႁူႉႁၼ် လွင်ႈပဵၼ်တႄႉမီးတႄႉမၼ်း ႁႂ်ႈပေႃးလႆႈတွၼ်ႈသွၼ်လွင်ႈလီ လွင်ႈၸႃႉသေ ၸင်ႇလႆႈႁဵတ်းဢွၵ်ႇပပ်ႉၼႆႉမႃး”- ၼႆယဝ်ႉ ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ယၢမ်းလဵဝ် ၸွမ်သိုၵ်းယွတ်ႈသိုၵ်း ပဵၼ်ႁူဝ်ပဝ်ႈ၊ ၸွမ်ႁၢၼ်ၸၢႆးယီႈ ပဵၼ်ၵႅမ်ႁူဝ်ပဝ်ႈ 1 ၊ ၸဝ်ႈသိုၵ်းလူင်ၶိူဝ်းငိုၼ်း ပဵၼ်ၵႅမ်ႁူဝ်ပဝ်ႈ 2 ။ ငဝ်ႈၸိုင်ႈပၵ်းဝႆႉတီႈ လွႆတႆးလႅင်း လႅၼ်လိၼ်တႆး-ထႆး။ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်ၼႆႉ ။