ပိူဝ်ႈတႃႇႁၢင်ႈႁႅၼ်း ၶဝ်ႈႁူမ်ႈပၢင်ၵုမ်လူင် ပီႁူဝ်ပၢၵ်ႇ 21 ၼၼ်ႉ ဢွၼ်ၼႃႈပႆႇၸတ်းႁဵတ်းပၢင်ၵုမ်လူင်ဢၼ်ၼႆႉ တေၸတ်းႁဵတ်းပၢင်ၵုမ်လူင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢွၼ်တၢင်း ။ ၵွပ်ႈၼၼ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA လႄႈ ၸိူဝ်းဢမ်ႇလူင်း ႁူပ်ႉဢုပ်ႇၵုမ်ၵၼ် ၼႂ်းၵဵင်းမႆႇ ။

ၸွမ်းၼင်ႇၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ တေဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ၵုမ်လူင် ပီႁူဝ်ပၢၵ်ႇ 21 ဝႃႈၼင်ႇၼႆသေ ဢွၼ်ၼႃႈမိူဝ်ႈပႆႇၸတ်းပၢင်ၵုမ်လူင်ၼႆႉ တေမီးၵၢၼ်ၸတ်းပၢင်ၵုမ်လူင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းဢွၼ်တၢင်း။ ပၢင်ၵုမ်လူင်ၼႆႉ တေၸတ်းႁဵတ်းတီႈမၢႆႇၵျႃႇယၢၼ်ႇ ၼႃႈလိၼ် တပ်ႉသိုၵ်းလွတ်ႈလႅဝ်းၶၢင် (KIA) ၵုမ်းၵမ်သေ ႁႂ်ႈၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်း လႆႈၶဝ်ႈပႃး။ ပိူဝ်ႈတႃႇႁဵတ်းသၢင်ႈပၢင်ၵုမ်လူင်ၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA ယဝ်ႉလႄႈ ၸိူဝ်းပႆႇလူင်းလၢႆးမိုဝ်း လႆႈႁူပ်ႉထူပ်းဢုပ်ႇၵုမ်ၵၼ် တီႈႁူင်းႁႅမ်းၶုမ်ႉၽူးၶမ်း ၼႂ်းၵဵင်းမႆႇ ၸိုင်ႈထႆးပွတ်းႁွင်ႇ၊ ဝၼ်းတီႈ 08/07/2016 မိူဝ်ႈၼႆႉပွတ်းၼႂ် ။


တီႈပၢင်ၵုမ်ၼၼ်ႉ ၽူႈၵႅဝ်ပၢင် မွၵ်ႇလၢတ်ႈဝႃႈ- ဝၼ်းမိူဝ်ႈၼႆႉ ႁဝ်းၶႃႈၸုမ်းႁၢင်ႈႁႅၼ်း တႃႇတေပဵၼ်ပၢင်ၵုမ်လူင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလုၵ်ႉၽိုၼ်ႉ ဢၼ်ၵူႈမူႇၵူႈၸုမ်း တေၶဝ်ႈပႃးၼၼ်ႉ။ ႁဝ်းၶႃႈၸင်ႇလႆႈမႃး ဢုပ်ႇၵုမ်ၵၼ် ၵမ်းတီႈ 2 ၼႂ်းဝၼ်းမိူဝ်ႈၼႆႉ- ဝႃႈၼႆ ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉ ဢၼ်မႃးၶဝ်ႈႁူမ်ႈၵေႃႉၼိုင်ႈၵေႃႈ လၢတ်ႈဝႃႈ- ပၢင်ၵုမ်ဢၼ်တေႁဵတ်း ဝၼ်းမိူဝ်ႈၼႆႉ ႁူဝ်ယွႆႈမၼ်း တေဢုပ်ႇဢူဝ်းၵၼ်သင် ၸိူင်ႉႁိုဝ် ၶႃႈႁဝ်းၵေႃႈဢမ်ႇႁူႉ။ ၵူၺ်းၵႃႈ ဝၢႆးလင်ဝၼ်းတီႈ 20 ၼႂ်းလုၵ်ႈလိူၼ်ၼႆႉ ၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်း ဢၢၼ်းႁဵတ်းပၢင်ၵုမ်လူင် တီႈမၢႆႇၵျႃႇယၢၼ်ႇ၊ လႅပ်ႈတေဢုပ်ႇလွင်ႈၼႆႉ။ ပိူင်လူင်မၼ်း တေႁၢင်ႈႁႅၼ်းဝႆႉဝႃႈ ၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်းၼႆႉ ၼႂ်းပၢင်ၵုမ်လူင်ပီႁူဝ်ပၢၵ်ႇ 21 ၼႆႉ တေၶႂ်ႈလႆႈဢီႈသင်၊ တေႁႃၶေႃႈၶႂ်ႈလႆႈဢၼ်မိူၼ်ၵၼ်- ဝႃႈၼႆ ။


တီႈပၢင်ၵုမ်ၼၼ်ႉ ၽူႈၶဝ်ႈႁူမ်ႈ ၸုမ်းၶၢင် KIA ပဵၼ်ၸွမ်ႁၢၼ်ၵုၼ်ႇမေႃႇ၊ တပ်ႉသိုၵ်းၸိုင်ႈတႆး (SSPP/SSA) ၸွမ်သိုၵ်းလူင်သိူဝ်ထႅၼ်ႈ၊ တပ်ႉသိုၵ်းၸိုင်ႈတႆး (RCSS/SSA) ၵႅမ်ၸွမ်ႁၢၼ်ပွင်ၶိူဝ်း။ ၼွၵ်ႈသေၼၼ်ႉ မီးၽူႈမီးၸၼ်ႉၼႂ်းၸုမ်း လူင်းလၢႆးမိုဝ်း NCA ၊ ၼႂ်းလုၵ်ႈၸုမ်း ၶွင်ႇသီႇႁူမ်ႈတုမ်ၵူႈၸၢဝ်းၶိူဝ်း (UNFC) ၵေႃႈ ၽူႈယႂ်ႇၵူၼ်းလူင်မႃးၶဝ်ႈႁူမ်ႈလၢႆၵေႃႉလၢႆၸဝ်ႈ၊ မိူၼ်ၼင်ႇ ၶူးဢူးရႄႇ ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) ၸိူဝ်းၼႆႉ တင်းမူတ်းမီးႁိမ်း 30 ၵေႃႉ ။


တႃႇတေပဵၼ်မႃးပၢင်ၵုမ်ပွၵ်ႈၼႆႉ ဢိင်ၼိူဝ်မိူဝ်ႈပီ 1947 ပၢင်ၵုမ်ပၢင်လူင်ၼၼ်ႉ မီးၶၢင်၊ ၶျၢင်း၊ တႆး ႁူမ်ႈၵၼ်လူင်းလၢႆးမိုဝ်း တီႈပၢင်လူင်။ ပိူဝ်ႈတႃႇမၢႆတွင်းလွင်ႈဝႃႈၸႄႈမိူင်းၸိူဝ်းၼႆႉ ဢွၼ်ႁူဝ်ၼမ်းၼႃႈႁဵတ်း ပၢင်ၵုမ်လူင် ပၢင်လူင်မႃး။ ၵွပ်ႈၼၼ် ၵမ်းၼႆႉၵေႃႈ ပိူဝ်ႈတႃႇတေၶဝ်ႈႁူမ်ႈပၢင်ၵုမ်လူင် ပွၵ်ႈၵမ်း 2 ၼႆႉ ၵိုင်ႇလီမီးပၢင်ၵုမ်လူင်ၸုမ်းယိပ်းၵွင်ႈၵၢင်ႇ ဢၼ်ၶဝ်ႈပႃးၵူႈမူႇၵူႈၸုမ်း၊ ၼႆသေလႆႈႁဵတ်းပၢင်ၵုမ်ၵၼ်ၵႂႃႇ ပွၵ်ႈၵမ်းႁႅၵ်ႈ။ ၵမ်းၼႆႉ ထိုင်မႃးပွၵ်ႈၵမ်းသွင် ။


မိူဝ်ႈပၢင်ၵုမ်ၵမ်းႁႅၵ်ႈၼၼ်ႉ ၽူႈၶဝ်ႈႁူမ်ႈမီး တပ်ႉသိုၵ်းၸိုင်ႈတႆး (SSPP/SSA) ၸွမ်ႁၢၼ်ၸၢႆးထူး၊ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း၊ ၵႅမ်ႁူဝ်ပဝ်ႈ 1 တပ်ႉသိုၵ်းလွတ်ႈလႅဝ်းၶၢင် (KIA) ၸွမ်သိုၵ်းလူင် ဢႅၼ်ႇပၢၼ်းလႃႉ၊ ၵႅမ်ႁူဝ်ပဝ်ႈ 2 ၸွမ်ႁၢၼ်ၵုၼ်ႇမေႃႇ။ ပၢင်ၵုမ်ပွၵ်ႈႁႅၵ်ႈၼႆႉ ၸတ်းယဝ်ႉၵႂႃႇၽွင်း ႁူဝ်လိူၼ်ၵျုၼ်ႊ ဝၼ်းတီႈ 7-8 ပူၼ်ႉမႃး။