ၵေႃလိၵ်ႈလၢႆးလႄႈၾိင်ႈငႄႈတႆး တင်း ပီႈၼွင်ႉၵူၼ်းမိူင်း ၸႄႈဝဵင်းတႃႈၶီႈလဵၵ်း ႁူမ်ႈၵၼ်သေ တေၸတ်းႁဵတ်းပၢင်ဢုပ်ႇလၢတ်ႈတၢၼ်ႈၶႆႈ ပွၵ်ႈၵမ်းႁႅၵ်ႈ တၢင်းၸိုင်ႈတႆး ပွတ်းဢွၵ်ႇၶူင်း ၵဵဝ်ႇလူၺ်ႈလွင်ႈ  လိၵ်ႈလၢႆး ပၢႆးႁၼ် ။

တႄႇဢဝ် ဝၼ်းတီႈ 26-30/07/2016 ၵေႃလိၵ်ႈလၢႆးလႄႈ ၾိင်ႈငႄႈတႆးတင်း ပီႈၼွင်ႉၵူၼ်းမိူင်း တေႁူမ်ႈၵၼ် ၸတ်းႁဵတ်းပၢင်ဢုပ်ႇၶႆႈ လိၵ်ႈလၢႆးပၢႆးႁၼ် ပွၵ်ႈၵမ်းႁႅၵ်ႈ တီႈႁွင်ႈလိုၵ်ႉ၊ မိူင်းလဵၼ်း၊ မိူင်းၵူဝ်း ၼႂ်းၸႄႈဝဵင်းတႃႈၶီႈလဵၵ်း၊ ၸႄႈဝဵင်းမိူင်းၽျၢၵ်ႈလႄႈ ၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၼင်ႇႁိုဝ် ပီႈၼွင်ႉၵူၼ်းမိူင်း ပေႃးတေလႆႈႁပ်ႉႁူႉလွင်ႈငဝ်းလၢႆး ဝၢၼ်ႈမိူင်း ဢၼ်ပဵၼ် ယူႇယၢမ်းလဵဝ် ၼႆယဝ်ႉ ။


ၶူးႁိုၼ်း(ၵႃယၢင်း) ၽူႈတေမႃးဢုပ်ႇၶႆႈလၢတ်ႈၼႄ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယူႇတီႈႁဝ်းသေ တေဢဝ်ၵႂႃႇဢုပ်ႇၶႆႈၼႄ  လွင်ႈပိုၼ်းမိူင်း ၊ သုၼ်ႇလႆႈသုၼ်ႇပဵၼ်ၸၢဝ်းၶိူဝ်း ၸဵမ်ၸိူဝ်းၼႆႉ ။ ၵွပ်ႈပိူဝ်ႈဝႃႈ ငဝ်းလၢႆးၵၢၼ်မိူင်းၵေႃႈလႅၵ်ႈလၢႆႈမႃးယဝ်ႉ၊ ဢၼ်ပိူၼ်ႈဝႃႈ ၾႅတ်ႊတရႄႊ  မိူင်းႁူမ်ႈတုမ်ၸႅတ်ႈၸၢင်ႇၼၼ်ႉၵေႃႈ မီးသုၼ်ႇလၢတ်ႈၸႃမႃးတႅၵ်ႇတႅၵ်ႇလႅင်းလႅင်းယဝ်ႉလႄႈ။  ပေႃးၼႆႉ ၾႅတ်ႊတရႄႊသမ်ႉ ၶႂ်ႈဝႃႈႁိုဝ်လႃႇၼႆၼၼ်ႉ၊ သုၼ်ႇလႆႈသုၼ်ႇပဵၼ်ၸၢဝ်းၶိူဝ်းႁဝ်း တိုၼ်းမီးဝႆႉၸဵမ်ပိုင်းလႄႈ ႁဝ်းပႆႇလႆႈတင်ႈတူဝ်သေႁဵတ်းပဵၼ်ဢီႈသင် ဢၼ်ဝႃႈၼၼ်ႉ ၵူၼ်းမိူင်းႁဝ်းၵေႃႈ လီႁူႉပႃးၸွမ်း။ ပေႃးဝႃႈဢမ်ႇႁူႉၸွမ်းၵၢၼ်မိူင်း ဢမ်ႇႁူႉၸွမ်းငဝ်းလၢႆးဝၢၼ်ႈမိူင်းၼႆၵေႃႈ ၵၢၼ်မၢၵ်ႈမီး၊ ၵၢၼ်ပၢႆးပၺ်ၺႃ၊ ၸႃႉၵႂႃႇၵူႈလွင်ႈၸိူဝ်းၼႆႉ မၼ်းတေ ၸၢင်ႈပိူင်ႈႁွႆးမၼ်းၵႂႃႇ” ဝႃႈၼႆ ။


ၵဵဝ်ႇၵပ်းလူၺ်ႈ လွင်ႈတေၸတ်းႁဵတ်း ပၢင်ဢုပ်ႇလၢတ်ႈတၢၼ်ႈၶႆႈၼႆႉသေ ၸၢႆးဝၼ်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတႃႈၶီႈလဵၵ်းလၢတ်ႈဝႃႈ “ ႁဝ်းၶႃႈလႆႈ ႁွင်ႉၵူႈမူႇၵူႈဝၢၼ်ႈ မႃးဢုပ်ႇဢူဝ်းၵၼ်ယဝ်ႉ ႁၼ်ထိုင်ဝႃႈ ၵဵဝ်ႇလူၺ်ႈ လိၵ်ႈလၢႆးလႄႈသင်၊ ပၢႆးဝူၼ်ႉလႄႈသင်၊ ပၢႆးႁၼ်လႄႈသင် ၼင်ႇႁိုဝ် ပီႈၼွင်ႉၵူၼ်းမိူင်း တင်းပွတ်းဢွၵ်ႇၶူင်း ပေႃးတေလႆႈႁူႉလွင်ႈငဝ်းလၢႆး ၵၢၼ်မိူင်း ဢၼ်ပဵၼ်ယူႇယၢမ်းလဵဝ် ” - ဝႃႈၼႆ ။


ပၢင်ဢုပ်ႇၶႆႈ တင်းပွတ်းဢွၵ်ႇၶူင်းၼႆႉ တေၸတ်းႁဵတ်းပဵၼ်ပွၵ်ႈၵမ်းႁႅၵ်ႈ ၼႂ်းႁၢင်လိူၼ်ၵျူႊလၢႆႊ တေမီးၽူႈမီးပိုၼ်ႉႁူႉ မိူၼ် ၶူးပူင်သွၼ်လူင် လုင်းၸၢႆးၾႃႉ ၊ ၶူးႁိုၼ်း(ၵႃယၢင်း)လႄႈ ၶုၼ်ယုင်းၶဵဝ် ၸဵမ်ၸိူဝ်းၼႆႉ ။


ဝၼ်းတီႈ 26/07/2016 ယၢမ်းၵၢင်ၶမ်ႈ တေၸတ်းႁဵတ်းတီႈ ႁွင်ႈလိုၵ်ႉ ၊ ဝၼ်းတီႈ 27 ယၢမ်း ၵၢင်ဝၼ်း တီႈမိူင်းလဵၼ်း ၊ ဝၼ်းတီႈ 28 ယၢမ်းၵၢင်ၶမ်ႈ တီႈမိူင်းၵူဝ်း ၸႄႈဝဵင်းတႃႈၶီႈလဵၵ်း၊ ဝၼ်းတီႈ 29-30 တေၸတ်းႁဵတ်း တီႈၸႄႈဝဵင်း မိူင်းၽျၢၵ်ႈလႄႈ ၵဵင်းတုင် ၼႆယဝ်ႉ ။