ဢွၼ်ႇၸၢႆးတႆး ၵေႃႉယၢမ်ႈၵႂႃႇၶႅင်ႇႁိူဝ်းမိၼ်ၸေႈတူပ်ႉ တီႈမိူင်းၵျပၼ်ႊ ပူၼ်ႉမႃးမွၵ်ႈ 7 ပီၼၼ်ႉ ယၢမ်းလဵဝ်ဢႃယုမီး 19 ၊ ၶႅင်ႇႁိူဝ်းမိၼ်တူပ်ႉၸေႈ မိူင်းထႆးတွၼ်ႈၼိူဝ်ပေႉထႅင်ႈသေ တေလႆႈလူင်းၵႂႃႇၶႅင်ႇတီႈမိူင်းၵွၵ်ႇ(ၵုင်းထဵပ်း) ၸိုင်ႈထႆး ၼႂ်းဝၼ်းတီႈ 18 တေမႃးၼႆႉ ။

ဝၼ်းတီႈ 07-08/07/2016 ယၢမ်း 08:00-15:00 မူင်း ၼၼ်ႉ ဢွၼ်ႇၸၢႆးတႆး ၸိုဝ်ႈႁွင်ႉၸၢႆးမွင်း ထွင်းၻီး ၼႆႉ လႆႈၶဝ်ႈၶႄႉၶႅင်ႇပၢင်တူပ်ႉၸေႈႁဵတ်းပဵၼ် ႁိူဝ်းမိၼ်ၸေႈ ၶဝ်ႈၶႄႉတီႈပၢင်ၶႅင်ႇ ၼႂ်းၸၼ်ႉၸွမ်မႄႈၵျူဝ်ႉ ၵဵင်းမႆႇ ။ မၼ်းၸၢႆးပေႉလႄႈလႆႈထုၵ်ႇလိူၵ်ႈပဵၼ်တူဝ်တႅၼ်း မိူင်းထႆးတွၼ်ႈၼိူဝ်၊ တေလႆႈသိုပ်ႇၵႂႃႇၶႅင်ႇထႅင်ႈ တီႈမိူင်းၵွၵ်ႇ (ၵုင်းထဵပ်ႈ) ၊ သင်ပေႉတီႈၼၼ်ႈ တေလႆႈပဵၼ်တူဝ်တႅၼ်းမိူင်းထႆးသေ ၵႂႃႇၶႅင်ႇတီႈမိူင်းၵျပၼ်ႊ ထႅင်ႈၵမ်းၼိုင်ႈ ။ ႁိူဝ်းမိၼ်ၸေႈ ဢၼ်မၼ်းၸၢႆးဝိုတ်ႉပိုဝ်ႈၶိုၼ်ႈၼၼ်ႉ ယူႇၼိူဝ်ၵၢင်ႁၢဝ်ႁိုင် 17.53 သႅၵ်ႉသ်ၵႅၼ်ႊ / ဝိၼႃႊထီး ။


ၸၢႆးမွင်း ထွင်းၻီး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - “ ဝၼ်းတီႈ 7 ၼၼ်ႉ လႆႈၶႅင်ႇၵမ်းဢွၼ်တၢင်းသုတ်း၊ ၶႃႈမိၼ်လႆႈ တင်းႁိုင် 17.53 သႅၵ်ႉသ်ၵႅၼ်ႊ / ဝိၼႃႊထီး ၊ ဝၼ်းတီႈ 8 ၵေႃႈ ၶႅင်ႇထႅင်ႈ ၊ ၼၼ်ႉၵေႃႈႁိုင် 17.53 သႅၵ်ႉသ်ၵႅၼ်ႊ / ဝိၼႃႊထီးမိူၼ်ၵၼ် ၊ ၼႂ်းဝၼ်းၼၼ်ႉ ဢူၺ်းၵေႃႉၶႃႈၵေႃႈ 17 သႅၵ်ႉၵႅၼ်ႊပၢႆၼင်ႇၵဝ်ႇ ။ ၵွပ်ႈၼၼ်ႁဝ်းၶႃႈသွင်ၵေႃႉ လႆႈပဵၼ်တူဝ်တႅၼ်း ၸိုင်ႈထႆးတွၼ်ႈၼိူဝ်သေ တေလႆႈလူင်းၶႄႉၶႅင်ႇထႅင်ႈ တီႈၵုင်းထဵပ်ႈ ၊ သင်ပေႉတီႈၵုင်းထဵပ်ႈထႅင်ႈၸိုင် တေလႆႈၵႂႃႇၶႅင်ႇထိုင်မိူင်းၵျႃပၼ်ႊ ထႅင်ႈၵမ်းၼိုင်ႈဢေႃႈ ” - ဝႃႈၼႆ ။


ပၢင်ၶႄႉၶႅင်ႇႁိုဝ်းမိၼ်ၸေႈ မိူင်းထႆးတွၼ်ႈၼိူဝ်ၼႆႉ ၽူႈၶဝ်ႈၶႅင်ႇတင်းမူတ်း 30 ၵေႃႉ ၊ ၼႂ်းၼၼ်ႉ ႁိူဝ်းမိၼ်ၸေႈ ဢၼ်မိၼ်ႁိုင်လိူဝ်ပိူၼ်ႈသုတ်းသမ်ႉ ပဵၼ်ၸၢႆးမွင်း ထွင်းၻီး မိၼ်လႆႈတင်းႁိုင် 17.53 သႅၵ်ႉသ်ၵႅၼ်ႊ / ဝိၼႃႊထီး ၊ မိၼ်ႁိုင်လိူဝ်ပိူၼ်ႈတင်းမူတ်း ၼႆယဝ်ႉ ။ ၸၢႆးမွင်း ထွင်းၻီးၼႆႉ ပဵၼ်လုၵ်ႈၸၢႆး ၸၢႆးၺုၼ်ႉလႄႈ ၼၢင်းမွၼ်း ပဵၼ်ၵူၼ်းဝၢၼ်ႈလွႆယၢႆး ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ။ ယၢမ်းလဵဝ်ယူႇဝႆႉတီႈဝၢၼ်ႈႁူၺ်ႈသၢႆး ဢိူင်ႇမႄႈႁႄႉ ဝဵင်းၵဵင်းမႆႇ မိူင်းထႆးတွၼ်ႈၼိူဝ် ။


မိူဝ်ႈပီ 2009 ၽွင်းၸၢႆးမွင်း ထွင်းၻီး ဢႃယု လႆႈ 12 ပီၼၼ်ႉ လႆႈပဵၼ်တူဝ်တႅၼ်းမိူင်းထႆး သေ ၵႂႃႇၶႄႉၶႅင်ႇႁိူဝ်းမိၼ်ၸေႈ တီႈမိူင်းၵျႃပၼ်ႊ ၵမ်းၼိုင်ႈ ။ ၽွင်းၼၼ်ႉ ပၢင်ၶႅင်ႇၵေႃႉလဵဝ်လႆႈသူး (ရၢင်းဝလ်း) တီႈသၢမ် ၊ ပၢင်ၶႅင်ႇပဵၼ်မူႇလႆႈၶျၢမ်ႊၿီႊယၼ်ႊ ။ ၽွင်းၼၼ်ႉ ၸွမ်ၽွင်းလူင်ၸိုင်ႈထႆး ယၢမ်ႈလၢတ်ႈဝႆႉဝႃႈ - တေၸွႆႈထႅမ်ပၼ်ၵၢၼ်ႁဵၼ်းတေႃႇပေႃးယဝ်ႉ ။ ယွၼ်ႉမၼ်းၸၢႆးသၢင်ႈၸိုဝ်ႈသဵင်လီပၼ်မိူင်းထႆးလႄႈ ယင်းဝႃႈတေၶိုင်ပၼ်ၸၢႆးမွင်း ႁႂ်ႈပေႃးပဵၼ်ၵူၼ်းထႆးလူးၵွၼ်ႇ ဝႃႈၼႆဝႆႉ ။


ၾၢႆႇၶူးသွၼ်တီႈႁူင်းႁဵၼ်းၵေႃႈ ၸွႆႈယိုၼ်ႈယွၼ်း ႁႂ်ႈၸၢႆးမွင်း ထွင်းၻီး လႆႈပဵၼ်ၵူၼ်းလႆႈႁပ်ႉဝႂ်ၵပ်းတူဝ်ထႆး ၊ ႁပ်ႉပဵၼ်ၵူၼ်းထႆးၼႆသေတႃႉ ထိုင်ယၢမ်းလဵဝ် ဢႃယုလႆႈ 19 ပီ ၊ မၼ်းၸၢႆးယင်းတိုၵ်ႉလႆႈယိပ်းဝႂ်ၵပ်းတူဝ် ဢၼ်ႁူင်းႁဵၼ်းႁဵတ်းပၼ် ဝႂ်ဢၼ်လႆႈတိုဝ်ႉတၢင်းယူႇမိူင်းထႆး 10 ပီ၊ ဢၼ်တင်းၼမ်ႁူႉဝႃႈဝႂ်သိပ်းပီ ။