ၵူၼ်းၼုမ်ႇတႆး ဝဵင်းၵႃလိ 27 ၵေႃႉ လဵပ်ႈႁဵၼ်း ၽိူမ်ႉထႅမ်ၼမ်ႉၵတ်ႉ လၢႆးတႅမ်ႈလိၵ်ႈ ပွင်ႈၵႂၢမ်း Article တီႈဝတ်ႉၵုင်းပဝ်း ။


ဝၼ်းတီႈ 20/06/2016 ယၢမ်း 08:00-16:00 မူင်း ၸဝ်ႈၶူး ၶမ်းလႅင်း (ၶေႇမိၼ်ႇတ) ဢွၼ်ႁူဝ်ၼမ်းၼႃႈ ၾိုၵ်းၾွၼ်ႉပူင်သွၼ်ပၼ် သင်ၶၸဝ်ႈလႄႈ ၵူၼ်းၼုမ်ႇတႆး လၢႆးတႅမ်ႈလိၵ်ႈ ပွင်ႈၵႂၢမ်း (Article) တီႈဝတ်ႉၵုင်းပဝ်း  ဝဵင်းၵႃလိ ၸိုင်ႈတႆး ပွတ်းၸၢၼ်း ။

ၸဝ်ႈၶူး ၶမ်းလႅင်း (ၶေႇမိၼ်ႇတ) လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယိူင်းဢၢၼ်းတႄႉၵေႃႈ ၵူၼ်းၼုမ်ႇတႆးႁဝ်း ပႆႇမေႃၶူၼ်ႉၶႂႃႉ ၊ လဵပ်ႈႁဵၼ်း ၊ တႅမ်ႈလိၵ်ႈလၢႆး မီးတင်းၼမ် ။ ယဝ်ႉၵေႃႈ ဢၼ်ႁဝ်းထုၵ်ႇ တႅမ်ႈ / ထုၵ်ႇႁဵတ်းၵေႃႈ တိုၵ်ႉၵိုတ်းတင်းၼမ် ။ ယွၼ်ႉၼၼ်လႄႈ ပေႃးႁဝ်းၶူၼ်ႉၶႂႃႉ လဵပ်ႈႁဵၼ်းသွၼ် ၵၼ်ၸိုင် မိူဝ်းၼႃႈမႃး တေၵမ်ႉထႅမ်ပၼ်လႆႈၵၢၼ်သွၼ်၊ ၵၢၼ်ႁဵၼ်း ပၢႆးပၺ်ၺႃၸိူဝ်ႉၸၢတ်ႈၵႂႃႇ မိူဝ်းၼႃႈ ” ဝႃႈၼႆ ။


ၸဝ်ႈၸၢင်း ထမ်ႇမဝရ ၽူႈလဵပ်ႈႁဵၼ်း လၢတ်ႈဝႃႈ “ ယူႇတီႈၶႃႈႁဝ်း ၽူႈလဵပ်ႈႁဵၼ်းၵေႃႉၼိုင်ႈသေ ၊ မိူဝ်ႈပႆႇလဵပ်ႈႁဵၼ်းႁူႉတႄႉ လွင်ႈဝႃႈ လၢႆးတႅမ်ႈလိၵ်ႈ လၢႆးႁႃၶူၼ်ႉၶႂႃႉၼၼ်ႉ ၶႃႈႁဝ်းၶဝ် ဢမ်ႇပႆႇႁူႉၸၵ်း လၢႆးမၼ်းတႄႉတႄႉ ဢၼ်ႁူႉၵေႃႈ ပဵၼ်ၵမ်ႉဢေႇၵူၺ်း ။ ၽိူဝ်ႇထိုင် တီႈၶႃႈႁဝ်း လႆႈတူဝ်ထူပ်း လဵပ်ႈႁဵၼ်းမႃးယဝ်ႉၼႆ ပဵၼ်ဢၼ်တႃပၢင်ႇႁူလႅင်းမႃး ။ ယဝ်ႉၵေႃႈ ဢၼ်ၶႃႈႁဝ်း ဢမ်ႇပႆႇယၢမ်ႈႁၼ် ယၢမ်ႈထူပ်းၼၼ်ႉၵေႃႈ ပဵၼ်ဢၼ်လႆႈႁူႉလႆႈႁၼ်တႄႉတႄႉ” ဝႃႈၼႆ ။


ၵူၼ်းၼုမ်ႇတႆးလႄႈ သင်ၶၸဝ်ႈ ၸိူဝ်းၶဝ်ႈႁူမ်ႈ လဵပ်ႈႁဵၼ်း ၼႂ်းပၢင်သွၼ် 27 ၼႆႉ လႆႈၸႅၵ်ႇၽႄ ႁဵတ်းပဵၼ်ၸုမ်း 5 ၸုမ်း ၊ ၼိုင်ႈၸုမ်းလႂ် ႁူဝ်ၶေႃႈၼိုင်ႈဢၼ် ၊ တႃႇႁႂ်ႈၶူၼ်ႉၶႂႃႉ လွင်ႈပိုၼ်း ဝဵင်းၵႃလိ ႁႂ်ႈလႆႈတူဝ်ထူပ်း တႅမ်ႈတင်ႇၶိုၼ်ႈမႃး ၼႂ်းၶၢဝ်းတၢင်း 10 ဝၼ်း ႁႂ်ႈယဝ်ႉ ဝႃႈၼႆ ။


ၵဵဝ်ႇၵပ်းလွင်ႈၵၢၼ်ၾိုၵ်းၾွၼ်ႉလၢႆးတႅမ်ႈလိၵ်ႈ ပွင်ႈၵႂၢမ်းၼႆႉ ယူႇတီႈၸဝ်ႈၶူး ၶမ်းလႅင်း (ၶေႇမိၼ်ႇတ) ပူင်သွၼ်ၾိုၵ်းၾွၼ်ႉၽိူမ်ႉၼမ်ႉၵတ်ႉ ပၼ်သင်ၶၸဝ်ႈလႄႈ ၵူၼ်းၼုမ်ႇတႆး မီးသၢမ်ပွၵ်ႈယဝ်ႉ ။ မိူဝ်ႈဝၼ်းတီႈ 03/06/2016 လႆႈၾိုၵ်းၾွၼ်ႉပၼ် လုၵ်ႈႁဵၼ်း ႁူင်းႁဵၼ်း ပူၵ်းပွင်ၵူၼ်းၼုမ်ႇ ၸိုင်ႈတႆး ဝတ်ႉယၢင်းပူး ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇ ။ ဝၼ်းတီႈ 12/06/2016 သမ်ႉ လႆႈပူင်သွၼ်ပၼ်ၵူၼ်းၼုမ်ႇတႆး တီႈဝိႁၢရ်ထၢတ်ႈတေႃႇ လွႆလႅမ် ၸိုင်ႈတႆး ပွတ်းၸၢၼ်း ၼႆယဝ်ႉ ။