ႁူဝ်ပဝ်ႈပႃႊတီႊ တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်ၶိူဝ်းတႆး ႁိုဝ်ပႃႊတီႊသိူဝ်ၽိူၵ်ႇ ဝဵင်းတႃႈၶီႈလဵၵ်း ဢွၼ်ႁူဝ်ၼေႃႇၽူႈတႅၼ်း လႄႈလုၵ်ႈၸုမ်း 1500 ၵေႃႉပၢႆ လူင်းပူၵ်းပၢႆႉ ၼႂ်းၸႄႈတွၼ်ႈတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း ။

တင်ႈတႄႇဝၼ်းတီႈ 01/10/2015 ပႃႊတီႊသိူဝ်ၽိူၵ်ႇ ဝဵင်းတႃႈၶီႈလဵၵ်း လူင်းပူၵ်းပၢႆႉ ၼေႃႇၽူႈတႅၼ်း ၸွမ်းၼႂ်းၸႄႈဝဵင်းတႃႈၶီႈလဵၵ်း တႃႇႁႂ်ႈပေႃႈမႄႈၵူၼ်းမိူင်းတေႁူႉၸၵ်း ၼေႃႇၽူႈတႅၼ်းသိူဝ်ၽိူၵ်ႇ ဢၼ်တေၶဝ်ႈလိူၵ်ႈတင်ႈ ပီ 2015 တႄႇလူင်းပူၵ်းပၢႆႉ ။


ၵဵဝ်ႇၵပ်းလွင်ႈၼႆႉ ၼၢင်းၽူး ၵေႃႉဢၼ်ပဵၼ်ၽူႈၶၢၼ်ပၢၵ်ႇ ပႃႊတီႊသိူဝ်ၽိူၵ်ႇ ဝဵင်းတႃႈၶီႈလဵၵ်း လၢတ်ႈဝႃႈ - ၸုမ်းပႃႊတီႊသိူဝ်ၽိူၵ်ႇႁဝ်းၶႃႈ လႆႈလူင်းပူၵ်းပၢႆႉ ၸွမ်းဝဵင်းတႃႈၶီလဵၵ်း ယဝ်ႉၵေႃႈ ပိုတ်ႇၽဵင်းၵႂၢမ်း ပႃႊတီႊသိူဝ်ၽိူၵ်ႇႁဝ်းၵႂႃႇၸွမ်းသဵၼ်ႈတၢင်း ၊ ၼႂ်းဝၼ်းလဵဝ် ဢၼ်ႁဝ်းၶႃႈလႆႈပူၵ်ပၢႆႉၵႂႃႇ ဝၢၼ်ႈပႃႇၵုၵ်ႉ ၊ ဝၢၼ်ႈၼမ်ႉလုၵ်း၊ ဝၢၼ်ႈၽၵ်းႁီႉ ၊ ဢိူင်ႇမိူင်းၽူင်း (ၵ) ၊ ဢိူင်ႇမိူင်းၽူင်း (ၶ) ၸဵမ်ၸိူဝ်ႉၼႆႉ ဝႃႈၼႆ ။


“ မၢင်ဢိူင်ႇမၢင်ဝၢၼ်ႈ ႁဝ်းၶႃႈဢမ်ႇၸင်ႈၵႂႃႇပူၵ်းပၢႆႉလႆႈၵူႈတီႈ ယွၼ်ႉဝႃႈ ရူတ်ႉ(ၵႃး) ၼမ် ႁဝ်းဢမ်ႇၸင်ႈၵိုတ်း၊ မၢင်ဝၢၼ်ႈ / မၢင်ဢိူင်ႇ ယူႇတီႈႁဝ်းၶႃႈသေ ဢဝ်ပၢႆႉၼေႃႇၽူႈတႅၼ်းၸိူဝ်းၼၼ်ႉ  သူင်ႇပၼ်ႁူဝ်ၼႃႈပႃႊတီႊႁဝ်းၸွမ်းဝၢၼ်ႈၽႂ်ဝၢၼ်ႈမၼ်း ႁႂ်ႈမိူဝ်းပူၵ်းၼႂ်းဝၢၼ်ႈၼႆယဝ်ႉ ” မၼ်းၼၢင်းသိုပ်ႇလၢတ်ႈထႅင်ႈၼင်ႇၼႆ ။


ၼေႃႇၽူႈတႅၼ်းလႄႈလုၵ်ႈၸုမ်း ဢၼ်ၵႂႃႇပူၵ်းပၢႆႉၸွမ်း တင်းမူတ်းမီး မွၵ်ႈ 1500 ၊ ရူတ်ႉ တင်းသဵင်ႈ 127 လမ်း ဝႃႈၼႆ ။


မိူဝ်ႈဝၼ်းတီႈ 2 ပူၼ်ႉမႃးၼၼ်ႉၵေႃႈ ပႃႊတီႊသိူဝ်ၽိူၵ်ႇဝဵင်းတႃႈၶီႈလဵၵ်း လႆႈဢွၼ်ၵၼ်ၵႂႃႇပူၵ်းပၢႆႉ ၼႂ်းဢိူင်ႇပႃႇလႅဝ်း ၸႄႈဝဵင်းၵဵင်းလပ်ႈ မိူၼ်ၼင်ႇ တီႈၵိင်ႇၸႄႈဝဵင်းတႃႈလိူဝ်ႇ ၊ ဝၢၼ်ႈၼမ်ႉၽႅင် ၊ ဝၢၼ်ႈၼမ်ႉၵႆးလႄႈ ဝၢၼ်ႈလူင် ၸဵမ်ၸိူဝ်ႉၼႆႉ ။ ၵူၼ်းၵႂႃႇပူၵ်းပၢႆႉၸွမ်း မီး မွၵ်ႈ 2000 ၵေႃႉပၢႆ ။


ၼေႃႈၽူႈတႅၼ်းပႃႊတီႊသိူဝ်ၽိူၵ်ႇ ဝဵင်းတႃႈၶီႈလဵၵ်း ဢၼ်တေၶဝ်ႈလိူၵ်ႈတင်ႈၼႆႉမီး - 1.  ၽူႈတႅၼ်းၸိူဝ်ႉၸၢတ်ႈ ၸၢႆးသၢၼ်းဢွင်ႇ ၊ 2. ၽူႈတႅၼ်းၶဵတ်ႇလိူၵ်ႈတင်ႈမၢႆ (1) ၸၢႆးၵွင်ၶမ်း ၊ 3. ၽူႈတႅၼ်းၶဵတ်ႇလိူၵ်ႈတင်ႈမၢႆ (2) မႄႈၶူးငူၺ်ႇမျႃႉ ၊ 4. ၽူႈတႅၼ်းၵူၼ်းမိူင်း ၸၢႆးဢွင်ႇၶမ်းသႅင် ၊ 5. ၽူႈတႅၼ်းၸၢဝ်းၶိူဝ်းမၢၼ်ႈ မိၼ်ႉထုၼ်းဢွင်ႇ ၊ 6. ၽူႈတႅၼ်းၸၢဝ်းၶိူဝ်းလႃးႁူႇ လုင်းၸႃႇမူး ၊ 7. ၽူႈတႅၼ်းၸၢဝ်းၶိူဝ်းဢႃးၶႃႇ လုင်းသႃးႁိူဝ်ႇ ၼႆယဝ်ႉ ။