ၸဝ်ႈၼႃႈတီႈ ပလိၵ်ႈ မႄႈသၢႆ ႁူမ်ႈၵၼ်လၢႆၾၢႆႇ ၶဝ်ႈတီႉၺွပ်း ႁႅင်းၵၢၼ် ယၢၼ်မိူင်း ၽိတ်းမၢႆမီႈတီႈ လႅၼ်လိၼ်တႆး - ထႆး တီႈၸႄႈဝဵင်း မႄႈသၢႆ ၸႄႈတွၼ်ႈ ၵဵင်းႁၢႆး ၺွပ်းလႆႈ ႁႅင်းၵၢၼ် ၽိတ်ႈမၢႆမီႈ 80 ပၢႆ ။

မိူဝ်ႈ ဝၼ်းတီႈ 08 လိူၼ် သႅပ်ႊထႅမ်ႊၿိူဝ်ႊ 2015 ၼႆႉ သိုဝ်ႇၶၢဝ်ႇထႆး ႁၢႆးငၢၼ်းဝႃႈ - ၸဝ်ႈၼႃႈတီႈ ပလိၵ်ႈထႆး ၊ သိုၵ်းႁၢၼ် ၊ ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈမိူင်း ႁူမ်ႈဢဵၼ်ႁႅင်း 200 ၵေႃႉ သေၶဝ်ႈၵူတ်ႇထတ်း တီႈယူႇသဝ်း ႁႅင်းၵၢၼ် ယၢၼ်မိူင်း ၽိတ်းမၢႆမီႈ တင်းသဵင်ႈ 7တီႈ ။ ထူပ်းႁႅင်းၵၢၼ် ယၢၼ်မိူင်း 80 ၵေႃႉပၢႆလႄႈ ပေႃႈလဵင်ႉတီႉ ၺွပ်းတူဝ်သေ ၵႂႃႇထတ်းထၢမ် ။


မၢင်ၸိူဝ်း မီးဝႂ်ၶၢမ်ႈမိူင်း လႄႈ ဝႂ်ႁႅင်းၵၢၼ် တဵမ်ထူၼ်ႈယူႇ ၵွႆးၵႃႈ ၸဝ်ႈႁိူၼ်း ဢမ်ႇလႆႈ တၢင်ႇလၢတ်ႈတီႈ ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈမိူင်း ၸွမ်းၼင်ႇ ပၵ်းပိူင်မၢႆမီႈ ၵူၼ်းၶဝ်ႈမိူင်း ၼႆယဝ်ႉ ။ တၢင်းၾၢႆႇ ၸဝ်ႈၼႃႈတီႈ တီႉၺွပ်း တင်းသဵင်ႈပၼ် တူတ်ႈတၢမ်ႇၸွမ်းၼင်ႇ ပၵ်းပိူင်မၢႆမီႈ ၸိုင်ႈမိူင်းမီး ၼၼ်ႉၼႆယဝ်ႉ ။


ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈမိူင်း လၢတ်ႈဝႃႈ - “ ၵၢၼ်ၶဝ်ႈ ၵူတ်ႇထတ်း တီႉၺွပ်း ႁႅင်းၵၢၼ် ယၢၼ်မိူင်းပွၵ်ႈၵမ်းၼႆႉ ယွၼ်ႉပိူဝ် မိူဝ်ႈၵၢင် လိူၼ်ဢေႃႊၵတ်ႉသ် ပူၼ်ႉမႃးၼၼ်ႉ လႆႈပဵၼ် မၢၵ်ႇတႅၵ်ႇတီႈ ရၢသ်ႊပရႃႊသူင်ႊ ၵၢင်ဝဵင်းလူင် မိူင်းၵွၵ်ႇ ၸိုင်ႈထႆးၼၼ်ႉသေ ၸဝ်ႈၼႃႈတီႈ ၸင်ႇလႆႈ ၶဝ်ႈၵူတ်ႇထတ်း လၢႆပိုၼ်ႉတီႈ ၵမ်ႈၼမ် တေပဵၼ်တီႈ ဢၼ်ႁႅင်းၵၢၼ်ယၢၼ် မိူင်းယူႇၼမ် ” ၼႆယဝ်ႉ ။