ႁူဝ်ပဝ်ႈ ပႃႊတီႊ သိူဝ်ၽိူၵ်ႇ SNDP ၸၢႆးဢၢႆႈပဝ်း တွပ်ႇလၢတ်ႈဝႃႈ ပႃႊတီႊ သိူဝ်ၽိူၵ်ႇ ၶႂ်ႈႁဵတ်း ပၼ်ၽွၼ်းလီ ပေႃႈမႄႈ ၵူၼ်းမိူင်းတႆး ၊ ပၢင်လိူၵ်ႈတင်ႈ 2015 လမ်ႇလွင်ႈတႃႇ ၵူၼ်းမိူင်းတႆး တႄႉတႄႉ - လွင်ႈၼႆႉ ၸုမ်းၶၢဝ်ႇ ၽူႈတွႆႇႁွၵ်ႈ လႆႈတွင်ႈထၢမ် ဝႆႉၼင်ႇၼႆ ။

ထၢမ်- ပၢင်လိူၵ်ႈတင်ႈပီ 2015 ၼႆႉ ယိူင်းဢၢၼ်း ပႃႊတီႊ သိူဝ်ၽိူၵ်ႇ မီးသင် ၽွင်ႈၶႃႈ ?။


တွပ်ႇ - တၢင်းဢဵၼ်းဢၢၼ်း ပႃႊတီႊ သိူဝ်ၽိူၵ်ႇႁဝ်းၼႆႉ ပေႃးဝႃႈ 2015 လိူၼ် ၼူဝ်ႊဝႅမ်ႊၿိူဝ်ႊ 8 ဝၼ်းမႃး ၊ ပေႃးႁဵတ်းပွႆး လိူၵ်ႈတင်ႈမႃး ႁဝ်းဢၢၼ်း ပေႉၼမ် ၊ ၽွင်းတႅၼ်းၼႆႉ ဢွၼ်တၢင်း ႁဝ်းၶဝ်ႈ ၶႄႉၶႅင်ႇ 210 ၵေႃႉ ၊ ၵူၺ်းၵႃႈ ယွၼ်ႉ ဢႃယု ဢမ်ႇတဵမ်ထူၼ်ႈ သမ်ႉ လွင်ႈတၢင်း တၢင်ႇၸိူဝ်ႉ တၢင်ႇပိူင်သေ မီး 207 ၵေႃႉၵူၺ်းယဝ်ႉ ။ 207 ၵေႃႉၼႆႉ ပေႃးဝႃႈ ႁဝ်းတူၺ်း ၼႂ်းပႃႊတီႊ ၸၢဝ်းၶိူဝ်းဢွၼ်ႇ ပႃႊတီႊ သိူဝ်ၽိူၵ်ႇ ႁဝ်းၼႆႉ ၽူႈတႅၼ်း (တႅၼ်းၽွင်း) ၼမ်သေပိူၼ်ႈ ။ ႁဝ်းဢဵၼ်းဢၢၼ်းဝႆႉ ပေႃးဝႃႈ ၵၢၼ်လိူၵ်ႈတင်ႈ 2015 မႃး တီႈမိူင်းတႆးၼႆႉ ႁဝ်းဢၢၼ်းပေႉသေ ဢၢၼ်းၶွတ်ႇၽွတ်ႈ လူင်ပွင်ၸိုင်ႈ မိူင်းတႆး ၊ ၵွပ်ႈပိူဝ်ႈဝႃႈ မိူင်းတႆးႁဝ်းၼႆႉ ႁဝ်းၶႂ်ႈႁႂ်ႈ တႆးၽွင်းငမ်း ၊ ပေႃးဝႃႈႁဝ်း ၽွင်းငမ်း (ဢုပ်ႇပိူင်ႇ) မိူင်းတႆးႁဝ်း ႁဝ်းၸင်ႇႁဵတ်း လႆႈၽွၼ်းလီ ပုၼ်ႈတႃႇ ဝၢၼ်ႈမိူင်း တႆးႁဝ်း ။ ၵွပ်ႈပိူဝ်ႈဝႃႈ တႆးႁဝ်းၼႆႉ ပေႃးႁဝ်းၵႂႃႇ တႅၵ်ႈၼိူင်း တင်းမိူင်းပိူၼ်ႈ ႁဝ်းပဵၼ်ဢၼ် တူၵ်းတႅမ်ႇ ၊ ၼႂ်းမိူင်းတႆး ႁဝ်းၵူၺ်းၵေႃႈ ပေႃးႁဝ်းမႃး တူၺ်းၸႄႈတွၼ်ႈ ၊ ၸႄႈတွၼ်ႈ တူၼ်ႈတီးလႄႈ ၸႄႈတွၼ်ႈ လွႆလႅမ် ၸႄႈတွၼ်ႈ လၢင်းၶိူဝ်းၼႆႉ ၸႄႈတွၼ်ႈ လွႆလႅမ် တင်းလၢင်းၶိူဝ်း တူၵ်းတႅမ်ႇ ။ ၸႄႈတွၼ်ႈ တၢင်းဝၼ်းဢွၵ်ႇ ၶူင်းၵေႃႈ ႁဝ်းတူၵ်းတႅမ်ႇဝႆႉ ။


ၵွပ်ႈပိူဝ်ႈၼႆ ႁဝ်းမီး ၸႂ်ၶႂ်ႈပူၵ်းပွင် ဝၢၼ်ႈမိူင်းႁဝ်း ၶႂ်ႈႁႂ်ႈ တႆးႁဝ်း ၶိုၼ်ႈယႂ်ႇ မႂ်ႇသုင် ၊ ၽွၼ်းလီ ဢၼ်တႆးႁဝ်း ဢမ်ႇလႆႈ ၶႂ်ႈႁႂ်ႈတႆး ႁဝ်းလႆႈ ။ ႁဝ်းၸင်ႇဝႃႈ သိူဝ်ၽိူၵ်ႇ ႁဝ်းၼႆႉ ႁဝ်းၶႂ်ႈ ပဵၼ်လူင်ပွင်ၸိုင်ႈ ၊ ႁဝ်းဢမ်ႇ ၸႂ်ႈလၢတ်ႈမိူဝ်ႈ လဵဝ်ၵူၺ်း ၊ လၢတ်ႈၸဵမ်မိူဝ်ႈ ပူၼ်ႉမႃး 2 - 3 ပီယဝ်ႉ ၊ ႁဝ်းလၢတ်ႈ ႁဝ်းၶႂ်ႈပဵၼ် လူင်ပွင်ၸိုင်ႈ ၊ ပေႃးဢမ်ႇပဵၼ် လူင်ပွင်ၸိုင်ႈ ႁဝ်းဢမ်ႇႁဵတ်း သင်လႆႈ ပိူဝ်ႈတႃႇ ၸၢဝ်းၶိူဝ်းတႆး ။ ႁဝ်းႁဵတ်း လူင်ပွင်ၸိုင်ႈၼႆႉ ၶႂ်ႈပဵၼ် လူင်ပွင်ၸိုင်ႈ မိူင်းတႆးၵူၺ်း ဢမ်ႇၵႃး ၵွပ်ႈပိူဝ်ႈသင်လႃႇ ၊ တီႈမိူင်းၶၢင်ၼႆႉ တင်းၼမ်ဝဵင်းမီး 18 ဝဵင်း ၊ ၼႂ်းၼႆႉ ပႃႊတီႊ သိူဝ်ၽိူၵ်ႇၶဝ်ႈ ၶေႉၶႅင်ႇ 9 ဝဵင်း ၊ ၵွပ်ႈပိူဝ်ႈဝႃႈ တီႈမိူင်းၶၢင်ၼႆႉ တႆးႁဝ်းမီးပဵၼ်ၶိုင်ႈ ၊ တီႈမိူင်းၶၢင်ၵေႃႈ ႁဝ်းယုမ်ႇယမ်ဝႃႈ ႁဝ်းတေပေႉ ၊ ငဝ်းလၢႆးမၼ်း ၶႅမ်ႉလႅပ်ႈလိူဝ်သေ မိူဝ်ႈပီ 2010 ၊ မိူဝ်ႈပီ 2010 ၼႆႉ တီႈမိူင်းၶၢင် ႁဝ်းလႆႈ ၽွင်းလူင် ၵေႃႉၼိုင်ႈလႄႈ ၽွင်းတႅၼ်း ၸိူဝ်ႉၸၢတ်ႈ ၵေႃႉၼိုင်ႈၵူၺ်း ။ ၼႂ်းလူင်ပွင်ၸိုင်ႈ မိူင်းၶၢင်ၵေႃႈ ပႃႊတီႊသိူဝ်ၽိူၵ်ႇႁဝ်း ဢၢၼ်းႁႂ်ႈလႆႈ ပႃးၸွမ်း တင်းၼမ် ။


မိူဝ်ႈပီ 2010 တီႈမိူင်း ယၢင်းလႅင်ၼႆႉ ႁဝ်းတေၵႂႃႇ ၶေႉၶႅင်ႇ ၊ ပိူၼ်ႈဢမ်ႇပၼ် ပႃႊတီႊ သိူဝ်ၽိူၵ်ႇ ၶဝ်ႈၶႄႉၶႅင်ႇ ၊ မိူင်းယၢင်းလႅင်ၼႆႉ တႆးႁဝ်း မီးၼမ်ၵေႃႈ ႁဝ်းဢမ်ႇလႆႈၶဝ်ႈ ။ မိူင်း ယၢင်းလႅင်ၼႆႉ မီး 7 ဝဵင်း ၊ ႁဝ်းတေၵႂႃႇ ၶဝ်ႈၶႄႉၶႅင်ႇ 6 ဝဵင်း ၊ ၵွပ်ႈပိူဝ်ႈၼၼ် ဝၢႆးမႃး တီႈမိူင်း ယၢင်းလႅင်ၵေႃႈ ႁဝ်းထၢင်ႇ ႁဝ်းတေပေႉ ၵွပ်ႈ   တႆးႁဝ်းမီးၼမ် ။


ထၢမ် - ဝၢႆးမႃး ၼႆၼၼ်ႉ ၶႂ်ႈဝႃႈပီ 2020 ၶႃႈႁႃႉ?။


တွပ်ႇ - ပေႃးႁဝ်းၶဝ်ႈတႄႉ ၼမ်လႄႈဢေႇ ႁဝ်းတေပေႉ ၊ ႁဝ်းပေႉဝႆႉ ၵမ်ႈၽွင်ႈယဝ်ႉ ။ ဝၢႆးမႃး ပေႃးတၢၼ်ႇ ၵႂၢမ်းတႆးႁဝ်းဝႃႈ ႁဝ်းယင်ႇ ႁၢၵ်ႈမၼ်း ဝႆႉယဝ်ႉ ၊ ပႃႊတီႊႁဝ်းၼႆႉ မၼ်းတေယႂ်ႇ မႃးတိၵ်းတိၵ်း ႁဝ်းယုမ်ႇယမ်ၸိူင်ႉၼႆ ။


ထၢမ် - ပၢင်လိူၵ်ႈတင်ႈ ပီ 2015 ၼႆႉ လမ်ႇလွင်ႈတႃႇ ၵူၼ်းမိူင်း ၸိူင်ႉႁိုဝ်ၶႃႈ ?။


တွပ်ႇ - လမ်ႇလွင်ႈ တႄႉတႄႉ ။ ဝၢႆးသေ ႁဝ်းလႆႈ လွတ်ႈလႅဝ်း သဝ်းၶေႃမႃးၼႆႉ ပႃႊတီႊ တႆးႁဝ်းၸိုၼ်ႈၸၢင်ႇ ဢၼ်ၶဝ်ႈၶႄႉၶႅင်ႇ မိူၼ်ၼင်ႇၵမ်းၼႆႉ မၼ်းပႆႇမီးမႃး ။ မိူဝ်ႈပူၼ်ႉမႃး မိူဝ်ႈ ၽသပလ ၵေႃႈမီးယူႇ ၊ ၵူၺ်းမၼ်းဢမ်ႇယႂ်ႇ ။ တေႃႈလဵဝ် ပႃႊတီႊ သိူဝ်ၽိူၵ်ႇႁဝ်းၼႆႉ ၶဝ်ႈတင်းၼမ်ဝဵင်း 68 ဝဵင်း ၼႂ်းၸိုင်ႈမိူင်း ႁူမ်ႈတုမ်မၢၼ်ႈ ။ ၼႂ်းၸိုင်ႈမိူင်း ႁူမ်ႈတုမ် မၢၼ်ႈၼႆႉ တင်းၼမ် ဝဵင်းမၼ်း 330 ဝဵင်း ၊ သိူဝ်ၽိူၵ်ႇႁဝ်းၵူၺ်း ႁဝ်းၶဝ်ႈၶႄႉၶႅင်ႇ 68 ဝဵင်း ။ မၼ်းလမ်ႇလွင်ႈၼႆႉ ၵမ်းၼႆႉတႄႉ ၽဝၵၢမ်ႇၵျမ်ႇမႃႇ ၸၢဝ်းၶိူဝ်း တႆးႁဝ်းၼႆႉ မၼ်းတေ လႅၵ်ႈလၢႆႈၵမ်းၼႆႉ ။ ပေႃးဝႃႈ ႁဝ်းပေႉၼမ် ၽဝ ၵမ်ၸႃတႃ (ၵၢမ်ႇၵျမ်ႇမႃႇ) ႁဝ်း ၸင်ႇတေလႅၵ်ႈလၢႆႈ ၊ ၶႂ်ႈႁႂ်ႈပေႃႈမႄႈ ၵူၼ်းမိူင်းတႆး ၸၢဝ်းၶိူဝ်းတႆး ႁူႉပွင်ႇဝႃႈ ၵမ်းၼႆႉ မၼ်းလမ်ႇလွင်ႈ တႄႉတႄႉ ၊ ႁဝ်းထုၵ်ႇလႆႈ ပၼ်ႁႅင်း ပႃႊတီႊသိူဝ်ၽိူၵ်ႇ ၊ ပႃႊတီႊ သိူဝ်ၽိူၵ်ႇၼႆႉ ၸင်ႇပဵၼ် တႆးၸိုၼ်ႈၸၢင်ႇ ၊ ၵွပ်ႈဝႃႈ ႁူဝ်ပဝ်ႈ ၵေႃႈပဵၼ်တႆး ၊ ၵႅမ်ႁူဝ်ပဝ်ႈ ၵေႃႈပဵၼ်တႆး ၊ ပေႃႈတႆး မႄႈတႆး ပဵၼ်တႆး ႁူဝ်ပၢၵ်ႇတဵမ် ပဵၼ်တႆး ၸိုၼ်ႈၸၢင်ႇ (ၸႅတ်ႈၸႅတ်ႈ) ၊ ၵွပ်ႈပိူဝ်ႈ ႁဝ်းပဵၼ်တႆး ၸိုၼ်ႈၸၢင်ႇလႄႈ ႁဝ်းၶႂ်ႈႁဵတ်း ပၼ်ၽွၼ်းလီ ၸၢဝ်းၶိူဝ်းတႆး ။


ၸၢဝ်းၶိူဝ်းတႆး ဢၼ်ဝႃႈၼၼ်ႉ ၵႃႈပဵၼ် ၸၢဝ်းၶိူဝ်း ဢၼ်ယူႇၼႂ်း မိူင်းတႆးႁဝ်း တင်းသဵင်ႈ ၵူၺ်းဢမ်ႇၵႃး တႆးႁဝ်း ဢၼ်ယူႇ ၼႂ်းမိူင်းၶၢင် ၊ တိူင်းၸၵၢႆး (ၸႄႈၵႅင်ႇ) ၊ တိူင်းဝဵင်းလိူဝ်ႇ (မၼ်းတလေး) ၊ မိူင်းယၢင်းလႅင် ၸိူဝ်းၼႆႉ ႁဝ်းၶႂ်ႈႁဵတ်း ၽွၼ်းလီပၼ် ၸၢဝ်းၶိူဝ်းႁဝ်း ၊ ပေႃးႁဝ်း ဢမ်ႇမီး ဢမ်းၼၢၸ်ႈ မၼ်းဢမ်ႇႁဵတ်း လႆႈသင် ပုၼ်ႈတႃႇ ပေႃႈမႄႈ ၵူၼ်းမိူင်း ။ ၵွပ်ႈပိူဝ်ႈၼႆ ႁဝ်းၶႂ်ႈႁႂ်ႈလႆႈ ဢမ်းၼၢၸ်ႈ ။


ထၢမ် - ပေႃးပေႉၵၢၼ် လိူၵ်ႈတင်ႈယဝ်ႉၼႆ တေႁဵတ်းပၼ်သင် ၵူၼ်းမိူင်းၶႃႈ ?။


တွပ်ႇ - ၵွပ်ႈပိူဝ်ႈဝႃႈ တႆးႁဝ်းၼႆႉ တူၵ်းတႅမ်ႇ ၊ ၵွပ်ႈဢမ်ႇမီး လွင်ႈၵတ်းယဵၼ်လႄႈ ပီႈၼွင်ႉတႆးႁဝ်း ပၢႆႈၵႂႃႇယူႇ မိူင်းထႆး မီးလၢၼ်ႉပၢႆၼႆ ။ ႁဝ်းၵေႃႈၵႂႃႇ ၺႃးမႃးယဝ်ႉ ၊ ဢွၼ်တၢင်းသုတ်း ႁႂ်ႈမၼ်း လႆႈၵတ်းယဵၼ် ၊ ပေႃးၵတ်းယဵၼ်ယဝ်ႉ ဝၢၼ်ႈမိူင်းမၼ်ႈ ၼိမ်ယဝ်ႉ ႁဝ်းၸင်ႇ တေႁဵတ်းၽွၼ်းလီ ပၼ်မိူင်းတႆးလႆႈ ။ မိူဝ်ႈလဵဝ် ဢဵၼ်းဢၢၼ်းႁဝ်းၼႆႉ ႁဝ်းၶႂ်ႈႁဵတ်းပၼ် ပေႃႈမႄႈၵူၼ်းမိူင်း ၾၢႆႇပၢႆးမၢၵ်ႈမီး ၊ ၵၢၼ်ပၢႆး ၽုၵ်ႇသွမ်ႈ ၊ ၾၢႆႇသဵၼ်ႈတႃႈ သၢႆတၢင်း ၊ ၾၢႆႇၾႆးၾႃႉ ၊ ၾၢႆႇပၢႆးယူႇလီ ၊ ၾၢႆႇပၢႆးပၺ်ၺႃ ။ ၾၢႆႇပၢႆးပၺ်ၺႃၵေႃႈ ႁဝ်းၶႂ်ႈႁႂ်ႈ တႆးႁဝ်းလႆႈ ႁဵၼ်းသွၼ်ၼႂ်း ႁူင်းႁဵၼ်း (လူင်ပွင်ၸိုင်ႈ ၊ ဢမ်ႇၸႂ်ႈ တၢင်းၼွၵ်ႈ ၊ ပေႃးႁဝ်းပေႉၼမ် ႁဝ်းပဵၼ် လူင်ပွင်ၸိုင်ႈမႃး ႁဝ်းတေႁဵတ်းႁႂ်ႈ မၼ်းလႆႈသွၼ် ။ ႁဝ်းလူဝ်ႇပေႉၼမ် ႁဝ်းလူဝ်ႇၽႅဝ်ၼႂ်း သၽႃး ၼမ်ၼမ်ၵူၺ်း ၊ မၢႆမီႈၼႆႉ မၼ်းပဵၼ်လႆႈယူႇ ။ မိူဝ်ႈလဵဝ် ၼႂ်းတူင်ႇမိူင်း ၵျွၵ်ႉမႄးၼႆႉ လိၵ်ႈတႆး တေသွၼ်ၼႂ်း ႁူင်းႁဵၼ်းယဝ်ႉ ။ ႁူဝ်ပဝ်ႈၵေႃႈ တေၵႂႃႇ ၶႄႉၶႅင်ႇတီႈ ၵျွၵ်ႉမႄး ၊ သၽႃးၸိူဝ်ႉၸၢတ်ႈ 6 ဝဵင်း ၊ မၢႆ 4 ၊ ၼွင်ၶဵဝ် ၵျွၵ်ႉမႄး သီႇပေႃႉ ၼမ်ႉတူႈ မိူင်းမိတ်ႈ မပဵင်း 6 ဝဵင်း ။ တီႈၼၼ်ႈ ပဵၼ်လွၼ်ႉတႆး မူတ်းမူတ်း ၊ တႆးႁဝ်း ၼမ်သေပိူၼ်ႈ ။