ၸဝ်ႈၼႃႈတီႈ ပလိၵ်ႈမၢၼ်ႈ တၢင်းပွတ်း ၵဵင်းတုင် ဢမ်ႇပၼ် ၸဝ်ႈႁႆႈၸဝ်ႈၼႃး တေႃႉတၢင်ႇၶဝ်ႈပိူၵ်ႇ ၶဝ်ႈသၢၼ် ၶၢႆၸူးၼႃႈလိၼ်ၶိုၵ်ႉ တွၼ်းမၢႆ 4 မိူင်းလႃး ။

တင်ႈတႄႇလိူၼ်ၵျုၼ်ႊ မႃးတေႃႇယၢမ်းလဵဝ် ၸဝ်ႈၼႃႈတီႈပလိၵ်ႈမၢၼ်ႈ ဝဵင်းၵဵင်းတုင် တင်းၸိုင်ႈတႆး ပွတ်းဢွၵ်ႇၶူင်း ဢမ်ႇပၼ်ၵူၼ်း ၵႃႉၶၢႆၶဝ်ႈပိူၵ်ႇ ၶဝ်ႈသၢၼ် ၶၢႆတေႃႇ ၼႃႈလိၼ်ၶိုၵ်ႉတွၼ်း မၢႆ 4  မိူင်းလႃး ။ ပေႃးတေႃႉၵႂႃႇ တေထုၵ်ႇယိုတ်းဢဝ်လၢႆ ၊ ၵမ်ႈၽွင်ႈၵေႃႈ ဢဝ်ပွၵ်ႈၶိုၼ်း တၢင်းႁိူၼ်း ။


လုင်းၸၢႆးၼွႆႉ ၸဝ်ႈၼႃးၵဵင်းတုင် လၢတ်ႈဝႃႈ - “ ႁဝ်းၶႃႈၼႆႉ ၼိုင်ႈပီႁဵတ်းၼႃးသွင်ပွၵ်ႈ ၼႃးလူင် လႄႈ ၼႃးလေႃ (ၼႃးၶၢဝ်းမႆႈ) ၊ ငိုၼ်းဢၼ်လႆႈ သႂ်ႇတႃႇႁဵတ်းၼႃး ၼိုင်ႈပွၵ်ႈ ၼပ်ႉႁူဝ်သႅၼ်မၼ်း ၊ ပီၼႆႉၶၼ်ၶဝ်ႈသမ်ႉလူင်း ၊ ဢမ်ႇၸၢင်ႈသူင်ႇၶၢႆ ၊ ယၢပ်ႇၽိုတ်ႇလိူဝ်ႁႅင်းတႄႉၶႃႈ ။ သင်တိုၵ်ႉသိုပ်ႇပဵၼ်ၼႆယူႇၸိုင် ပီၼႃႈပီၼႂ်းတႄႉ ၵူၼ်းႁဵတ်းၼႃး တေဢမ်ႇလႅပ်ႈမီးယဝ်ႉ ။ ၵူဝ်ပႃးၵၼ် လူင်းမိူင်းထႆး ထႅင်ႈၵူၺ်းယဝ်ႉၶႃႈ ” - ဝႃႈၼႆ ။


ၵႃႈၸၢင်ႈၵူၼ်းႁဵတ်းၼႃး ၼိုင်ႈၵေႃႉ တေႃႇဝၼ်း လႆႈပၼ်ငိုၼ်း 7 ႁဵင် တေႃႇၼိုင်ႈမိုၼ်ႇ ။ ၵႃႈၾုၼ်ႇ (ပုၺ်) ထူင်လႂ်ဢမ်ႇယွမ်း သွင်မိုၼ်ႇပျႃး ယင်းဢမ်ႇသွၼ်ႇပႃး ဢၼ်ယွႆႈဢၼ်ယႅမ်း ၊ ႁဵတ်းၼႃးတႃႇလႆႈၶဝ်ႈ ၼိုင်ႈႁူင်းမူတ်းငိုၼ်း ၼပ်ႉႁူဝ်လၢၼ်ႉပျႃး ပီၼႆႉယၢပ်ႇၽိုတ်ႇတႄႉ ဝႃႈၼႆ ။


ၸၢႆးၼုမ်ႇ ၵူၼ်းၵႃႉၶဝ်ႈ (ႁပ်ႉသိုဝ်ႉၶဝ်ႈ) လၢတ်ႈဝႃႈ “ ႁဝ်းၶႃႈဢမ်ႇၸင်ႈႁပ်ႉသိုဝ်ႉၶဝ်ႈ တီႈၸဝ်ႈၼႃးၶဝ် ၵွပ်ႈဝႃႈသဵၼ်ႈတၢင်းၵႃႉၶၢႆ ၶဝ်ႈပိူၵ်ႇၶဝ်ႈသၢၼ် ၵဵင်းတုင် - မိူင်းလႃးဢိုတ်းဝႆႉ ။ ပီၼႆႉဢမ်ႇပဵၼ်ၵၢၼ်ၵႃႉၶႃႈ ၊ တိုၵ်ႉႁႃတူၺ်း လွၵ်ႈၵၢတ်ႇတႃႇ ဢဝ်ၵႂႃႇၶၢႆတူၺ်း တၢင်းမိူင်းမၢဝ်း ယူႇၶႃႈ ။ သင်ၵႃႈၶွၼ်ႇၸွမ်းတၢင်းဢမ်ႇၼမ် ၊ သင်သၢႆၼၼ်ႉဢမ်ႇႁႄႉႁၢမ်ႈ ” - ဝႃႈၼႆ ။


ၶၢၼ်ၶဝ်ႈပီၼႆႉ ၶဝ်ႈပိူၵ်ႇ 1 ထူင် 40 ၵီႊလူဝ်ႊ တူၵ်းမႅၼ်ႈငိုၼ်း 9,000 ပျႃး ၊ ပီၵၢႆသမ်ႉ 1 ထူင် တူၵ်းမႅၼ်ႈငိုၼ်း 13,000 ပျႃး ၊ ပီၼႆႉလႄႈပီပူၼ်ႉ ၶၢၼ်ၶဝ်ႈပိူင်ႈၵၼ် မွၵ်ႈ 4,000 ပျႃး ၊ ၵူၺ်းၵႃႈ ဢမ်ႇမီးၽႂ်ႁပ်ႉသိုဝ်ႉ ၊ ၶဝ်ႈမႂ်ႇၵေႃႈသမ်ႉ တေဢွၵ်ႇထႅင်ႈ ယဝ်ႉလႄႈ ၶၼ်ၶဝ်ႈပီၼႆႉ ၸၢင်ႈလူင်းထႅင်ႈလူးၵွၼ်ႇ ၵူၼ်းၶၢႆၶဝ်ႈ ၼႂ်းၵၢတ်ႇၵဵင်းတုင် ၸဝ်ႈၼိုင်ႈလၢတ်ႈ ။


ၸိူင်ႉၼင်ႇ ၸဝ်ႈၼႃးၵဵင်းတုင် ဢမ်ႇၶၢႆၶဝ်ႈ တေႃႇတၢင်းမိူင်းလႃးလႆႈၼၼ်ႉ တၢင်းပွတ်းမိူင်းယွင်းၵေႃႈ ဢမ်ႇပၼ်ၸဝ်ႈၼႃး တေႃႉတၢင်ႇၶဝ်ႈသၢၼ် လတ်းၸူးမိူင်းယု ၶဝ်ႈၸူးၼႃႈလိၼ်မိူင်းလႃး ။ ၽႂ်ဢဝ်ၵႂႃႇၵေႃႈထုၵ်ႇယိုတ်းလၢႆ ။ ဢၼ်လႆႈပဵၼ်မႃးၸိူင်ႉၼႆၼႆႉ ယွၼ်ႉပၢင်တိုၵ်းသိုၵ်းမၢၼ်ႈ တင်းသိုၵ်းၵူဝ်းၵၢင်ႉ ၊ ယွၼ်ႉၵူဝ်ၶဝ်ႈသၢၼ် လတ်းၽၢၼ်ႇမိူင်းလႃးသေ သူင်ႇၸူးၵမ်ႉၸွႆႈ ၵူဝ်ႈၵၢင်ႉလႄႈ ၸဝ်ႈၼႃႈတီႈမၢၼ်ႈၸင်ႇဢိုတ်းႁႅတ်ႉမႃး - ဝႃႈၼႆ ။


ဝဵင်းမိူင်းလႃးၼႆႉ ယူႇၼႂ်းၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း ယၢၼ်ႇၵႆဝဵင်းၵဵင်းတုင် ၵႂႃႇၼႃႈတၢင်းႁွင်ႇ 50 လၵ်း ။