ၵိူတ်ႇပိူင်ပဵၼ် ၾႆးမႆႈဝတ်ႉ / ၵျွင်းမုၼ်ၸဝ်ႈ ဝၢၼ်ႈၼႃးလိူဝ်ႇ မိူင်းၶိူဝ်း ၊ ၶူဝ်းၶွင် သႃသၼႃ လူႉသုမ်း ၵႃႈၶၼ်ၵိုင်ႇ ငိုၼ်းမၢၼ်ႈႁိမ်း ႁဵင်သႅၼ် ။

မိူဝ်ႈ ဝၼ်းတီႈ 07/09/2015 ၵၢင်ၶိုၼ်း 12:00 မူင်း ၊ ၾႆးမႆႈဝတ်ႉ မုၼ်ၸဝ်ႈ (သွင်ၸၼ်ႉ) ဝၢၼ်ႈၼႃးလိူဝ်ႇ ဢိူင်ႇမိူင်းၶိူဝ်း တူင်ႇဝဵင်းသီႇပေႃႉ ၸိုင်ႈတႆးပွတ်းႁွင်ႇ ။ ၵႃႈၶၼ် ဢၼ်လႆႈ လူႉသုမ်းၵႂႃႇ ငိုၼ်းမၢၼ်ႈ 800 သႅၼ် လိူဝ်လိူဝ် ။


ၵဵဝ်ႇၵပ်း လွင်ႈၼႆႉ ပဵၼ်ဝၼ်းသိလ် 8 ၶမ်ႈလႄႈ ၸဝ်ႈၵွၼ်းဝတ်ႉ ဢွၼ်သင်ၶ ၸဝ်ႈသၢင်ႇ ၼႂ်းဝတ်ႉဝႆႈၽြႃး လႆႈတႆႈတဵၼ်းလူင် ဢၼ်မီး တၢင်းသုင် ၼိုင်ႈသွၵ်ႇ ၼၼ်ႉသေ ထိုင်ၵၢင်ၶိုၼ်းမႃး ၾႆးတဵၼ်း သုတ်းလႄႈ လႆႈၸပ်းမႆႈၵႂႃႇ ၸွမ်းတုင်း ၽႅၼ်ႇၽႃႈၵင်ႈ ၾၢႆႇၼႃႈ ၽြႃးၼိူဝ်ဝတ်ႉ ၊ ႁဵတ်းႁႂ်ႈ ၾႆးလၢမ်ႈ လုၵ်ႉမႆႈ - ၼႆယဝ်ႉ ။


ၵွပ်ႈပိူဝ်ႈ တီႈဝတ်ႉ မီးၸဝ်ႈသၢင်ႇ ဢွၼ်ႇ 8 တူၼ် ၼွၼ်းဝႆႉၵူၺ်းလႄႈ ၶူဝ်းၶွင်တင်းသဵင်ႈ ဢၼ်ဝႆႉတီႈ ၼိူဝ်ဝတ်ႉ ၸၼ်ႉတႂ်ႈ ၸၼ်ႉၼိူဝ် ၾႆးမႆႈသဵင်ႈမူတ်း ၊ ဢမ်ႇတၼ်းလႆႈသင် ၊ ၵွင်မွင်းသႅင်ႇ တႃႇသီႇၵူႈ ၊ ၶူဝ်းၶွင် ၵူၼ်းဝၢၼ်ႈ ဢၼ်မႃးဝႆႉ တီႈဝတ်ႉ (ၵျွင်း) ၼၼ်ႉၵေႃႈ လႆႈသုမ်းပႃးၵႂႃႇ ၸွမ်းၾႆး ။ ၶဝ်ႈသၢၼ် ၶဝ်ႈလူၼ်ႉဝၢတ်ႇ ဢၼ်တၵ်ႉၵႃႇ သတ်ႉထႃး လူႇတၢၼ်းဝႆႉ 42 ထူင် ၼၼ်ႉၵေႃႈ မႆႈၵႂႃႇၸွမ်း ။


ဝတ်ႉ (ၵျွင်း) ၼႆႉ ပဵၼ်ဝတ်ႉ 2 ၸၼ်ႉ ၊ ၸၼ်ႉတႂ်ႈၵင်ႈဢုတ်ႇ ၊ ၸၼ်ႉၼိူဝ် ၵင်ႈပႅၼ်ႈ မုင်းသွတ်ႈ ၊ တၢင်းၵႂၢင်ႈ ၼႃႈယၢဝ်းမီး 7 ႁွင်ႈ ၊ ၼႃႈပွတ်းမီး 6 ႁွင်ႈ ၊ ၼိုင်ႈႁွင်ႈလႂ်မီး 7 သွၵ်ႇ ၊ ပိုၼ်ႉဝတ်ႉ သိူဝ်ႇလိၼ်ယၢင် (လိၼ်ပုၼ်) ။ ဝၢၼ်ႈ ဢၼ်မႃးၶိုၼ်ႈဝတ်ႉ ႁူဝ်ဝတ်ႉ (ၵျွင်း) ၼႆႉ မီး 10 ဝၢၼ်ႈ ၊ လင်ႁိူၼ်းမီး 400 လင်ၸမ်ၸမ် - ၼႆယဝ်ႉ ။


ၸဝ်ႈၵွၼ်းဝတ်ႉ ၸဝ်ႈသြႃႇ ပၺ်ၺႃသႃမိ လၢတ်ႈဝႃႈ - ဝတ်ႉလင်ၼႆႉ တၵ်ႉၵႃႇၶဝ် တိုၵ်ႉၵေႃႇသၢင်ႈ လူႇတၢၼ်းဝႆႉ မီးဢႃယု 10 ပီပၢႆၵူၺ်း ၊ ၵေႃႇသၢင်ႈၼႂ်းပီ 2002 သေ လႆႈယၢတ်ႇၼမ်ႉ ၶႂမ်ႈတဝ်ႈၵႂႃႇ ၼႂ်းပီ 2004 ၼၼ်ႉ ။ ဝတ်ႉလင်ၼႆႉ ပႆႇၽင်ႉပႆႇၵဝ်ႇ ၊ တိုၵ်ႉၵိုမ်း ၶိူင်ႇမၼ်ႈ ၶႅင်ႁႅင်းလီယူႇ - ဝႃႈၼႆ ။


တၵ်ႉၵႃႇ သတ်ႉထႃး ၸိူဝ်းမႃး ၶႄၾႆးတီႈဝတ်ႉ ၵေႃႉၼိုင်ႈၵေႃႈ လၢတ်ႈဝႃႈ - သင်ဝႃႈ ဝၢၼ်ႈႁဝ်းၸိူဝ်းၼႆႉ ၸမ်ဝတ်ႉတႄႉ ၶေးတေ တၼ်းလႆႈၶူဝ်း ဝတ်ႉၵျွင်း ၵမ်ႈၽွင်ႈယူႇ ၊ ပေႃးလိူၼ်ၵဝ်ႈ လပ်းတေမႃးၼႆႉ ႁဝ်းၶႃႈတေမႃးႁဵတ်း ပွႆးၾိင်ႈထုင်းႁဝ်း ၵၢင်ဝႃႇသႃ ၊ ၵမ်းၼႆႉ ၶူဝ်းဝတ်ႉ ၵျွင်းသင်ၵေႃႈ ဢမ်ႇလိူဝ် ၊ တီႈလူႇတၢၼ်း ႁဝ်းၶႃႈၵေႃႈ ဢမ်ႇမီးယဝ်ႉ - ဝႃႈၼႆ ။