တႄႇၼႂ်းလိူၼ် ဢေႃႊၵသ်ႉမႃး မေႃသွၼ် လိၵ်ႈတႆး 108 ၵေႃႉ လႆႈႁပ်ႉ ပုၼ်ႈၽွၼ်း သွၼ်လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈ တီႈၼႂ်း ဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ။

တႃႇတေသွၼ် လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈ ၼႆႉယူႇတီႈ ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းၵျွၵ်ႉမႄး လႆႈၸတ်းပၢင် မွပ်ႈယိုၼ်ႈ ပုၼ်ႈၽွၼ်း 2 ပွၵ်ႈ ။ ပွၵ်ႈထီႉၼိုင်ႈ မိူဝ်ႈ ဝၼ်းတီႈ 20/8/2015 လႆႈယိုၼ်ႈဢၢပ်ႈ ပၼ်ပုၼ်ႈၽွၼ်း မေႃသွၼ်လိၵ်ႈတႆး 33 ၵေႃႉ ၊ ပွၵ်ႈထီႉသွင် မိူဝ်ႈ ဝၼ်းတီႈ 2/9/2015 ၼႆႉ လႆႈယိုၼ်ႈပၼ် ပုၼ်ႈၽွၼ်း 75 ၵေႃႉ ၼႆယဝ်ႉ ။


ယွၼ်ႉဝႃႈ ႁူင်းႁဵၼ်း မၢင်ဝၢၼ်ႈ ၼႆႉ လုၵ်ႈႁဵၼ်းၼမ် ဢဵၼ်ႁႅင်း မေႃသွၼ်ဢေႇ ၊ မၢင်ဝၢၼ်ႈ လုၵ်ႈႁဵၼ်းဢေႇ ဢဵၼ်ႁႅင်းမေႃသွၼ် သမ်ႉၼမ် ၼႆသေ ၼင်ႇႁိုဝ် တေႁႂ်ႈမီး မေႃသွၼ် ၵူႈႁူင်းႁဵၼ်း ၼၼ်ႉ ယူႇတီႈ ၵေႃႈလိၵ်ႈလၢႆး လႄႈ ၾိင်ႈငႄႈတႆး ဝဵင်းၵျွၵ်ႉမႄး လႆႈတမ်း ဝၢင်းပၼ်ၼႃႈ တီႈ မေႃသွၼ်ၶဝ် ။


မေႃသွၼ် ၸိူဝ်းၼႆႉ တေၶဝ်ႈ သွၼ်တီႈ ႁူင်းႁဵၼ်း လူင်ပွင်ၸိုင်ႈတီႈ ဝၢၼ်ႈၼႅမ်းသႆး ၊ ႁူးသူၼ် ၊ တွင်ႇထိၵ်ႈ ၊ မိူင်းတၢင်ႈ (ၽိူမ်ႉမေႃသွၼ်) ၊ ဝၢၼ်ႈၵၢင် ၊ ၼႃးမူၼ်း (ၽိူမ်ႉမေႃသွၼ်) ၊ လူင်ၵဵင် ၊ ပၢင်ႇလေႃႉ ၊ ၶၢင်ႈၶၢႆး ၊ ၼမ်ႉပႅၼ်ႈ ၊ ၶိူဝ်းၼိမ်း ၊ ပၢင်ၸလွပ်ႈ ၊ မွၵ်ႇငႃးၸၢင်ႉ ၊ ၶၢႆးမွၼ် ၊ ဢႅၵ်ႉၵျီး ၊ တွင်ႇၶေႇ ၊ ပၢင်ၸူင် ၊ ၼမ်ႉႁူး ၊ လွၺ်ၸွင်ႈ ၊ ၵွင်းႁူင်း ၊ ပၢင်တီး ၊ လွၺ်ၶေႃ ၊ ၼႃးပဵင်း ၊ ၵဵင်ၵၢႆႇ ၊ လွၺ်ၵူင် ၊ ပျွင်ႇၶွင်း ၊ ၶၢၼ်းသႃႇ ၊ ႁူးၵွတ်ႈ ၊ ၸၢင်ႉႁိူၼ်း ၊ လူင်ဝၢႆ ၊ တေႃႉသၢင်ႇ ၊ ၼမ်ႉႁၢင်ႈၶိူင်ႈ ၊ ၼမ်ႉၶုမ် ၊ ပႃႇၶႃး ၊ ႁွင်ႊႁိူင်း (ႁွင်ႈႁႅင်း) ၊ ၵုင်းသႃႇ (မင်းၵုင်း) ၊ ႁူဝ်ၶူဝ် ၊ တေႃလိူဝ်ႇ ၊ ၼွင်ၵႂၢင် ၊ တေႃၵုတ်ႇ ၊ ပၢင်ႁုင်း ၊ ဢေးတႃႇယႃႇ ၊ ပုင်းလူင် ၊ မုင်ႈသႃႇ ၸိူဝ်းၼႆႉ ။


ၵဵဝ်ႇၵပ်း လွင်ႈၼႆႉ လုင်းၸၢႆးပႃႉ ႁူဝ်ပဝ်ႈလူင် ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းၵျွၵ်ႉမႄး မွၵ်ႇလၢတ်ႈ ၶေႃႈၵႂၢမ်း ပၼ်ႁႅင်းၸႂ် မေႃသွၼ်လိၵ်ႈတႆး ၶဝ်ၵူႈၵေႃႉ ။


လိူဝ်ၼၼ်ႉ မေႃသွၼ် ၸုပ်ႈၼိုင်ႈၵေႃႈ လႆႈလၢတ်ႈၼႄ တူဝ်ထူပ်း ၼႂ်းၵၢၼ်ႁဵၼ်း ၵၢၼ်သွၼ် လႄႈ လွၵ်ႈလၢႆး ၵႄႈလိတ်ႈပၼ် လွင်ႈၶွင်ႈၶမ် ဢၼ်လႆႈ ထူပ်းတီႈ ႁူင်းႁဵၼ်း ။