ၸုမ်းၵူၼ်းၼုမ်ႇၸိုင်ႈတႆး (SSYNC) ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ၽိုၵ်းၽွၼ်ႉ ပဵၼ်ၽူႈပူင်သွၼ် ၵဵဝ်ႇၵပ်းၵၢၼ်လိူၵ်ႈတင်ႈ တီႈႁူင်းႁေႃးလူင်ၼွင်သႅင် (ဝၢၼ်ႈႁႆး) ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။

တီႈပၢင်ၵႅဝ်ႈ ပိုတ်ႇပၢင်ၽိုၵ်းၽွၼ်ႉၼၼ်ႉ ၸဝ်ႈသိုၵ်းလူင်ၶုၼ်သႅင် ၽူႈၼမ်းၼႂ်း ၵူႈလွင်ႈလွင်ႈ ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၊ ၶူးပူင်သွၼ်လူင် လုင်းၸၢႆးၾႃႈ၊ ၸၢႆးလဵၵ်ႉ ၽူႈၶၢၼ်ပၢၵ်ႇ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ၊ ၸၢႆးႁိၼ်သႅင် ၽူႈၼမ်းၼႂ်းၵူႈလွင်ႈလွင်ႈ ၸုမ်းၵူၼ်းၼုမ်ႇၸိုင်ႈတႆး (SSYNC) ၸိူဝ်းၼႆႉ ၵၢဝ်ႇလၢတ်ႈၶေႃႈၵႂၢမ်းၵႂႃႇ။

လိူဝ်သေၼၼ်ႉ ၸၢႆးသီႇႁၵျေႃႇ (ႁွင်ႉ) ၸၢႆးႁၵ်ႉ ၽွင်းတႅၼ်းၵူၼ်းမိူင်း ၸႄႈဝဵင်းမိူင်းယႆ၊ ၸၢႆးတၢၼ်းမွင်ႇ ၽွင်းတႅၼ်းသၽႃးၸႄႈမိူင်း ဝဵင်းၵျွၵ်ႉမႄး၊ လုင်းၸိုၼ်ႈပၢင်ႇၾႃႉ (ႁွင်ႉ) လုင်းၸၢမ်ႇၽေႇ ၽွင်းတႅၼ်းသၽႃးၸႄႈမိူင်း မိူင်းယႆ၊ ၸၢႆးသၢမ်ၾူၼ်သႅင် ၽူႈၵွၼ်းႁွင်ႈၵၢၼ်ၾၢႆႇပၢႆးပၺ်ၺႃလႄႈ ၵပ်းသိုပ်ႇတိတ်းတေႃႇၼွၵ်ႈမိူင်း ပႃႊတီႊႁူဝ်သိူဝ် ၶဝ်ၸိူဝ်းၼႆႉၵေႃႈ ၶဝ်ႈႁူမ်ႈပၼ်တၢင်းႁူႉ ပူင်သွၼ်ပၼ်။

ၸၢႆးႁိၼ်သႅင် ၽူႈၼမ်းၼႂ်းၵူႈလွင်ႈလွင်ႈ ၸုမ်းၵူၼ်းၼုမ်ႇၸိုင်ႈတႆး (SSYNC) လၢတ်ႈဝႃႈ- ပိုၼ်းႁဝ်းလႄႈသင်၊ ဢၼ်တႆးႁဝ်းလႆႈမႃး တုၵ်ႉယၢၵ်ႈယူႇယၢမ်းလဵဝ်ၼႆႉ မၼ်းတႄႇမႃးတီႈ လိၵ်ႈႁူမ်ႈမၢႆပၢင်လူင်၊ ယွၼ်ႉပိူၼ်ႈယႃႉ သၸ်ႉၸႃႇလႄႈ ႁဝ်းၸင်ႇလႆႈထူပ်းလွင်ႈတုၵ်ႉယၢၵ်ႈ (ၶၢမ်ႇ)။ ၵူၺ်းၵႃႈ ဢိင်ၼိူဝ်ငဝ်းလၢႆးလွင်ႈ ယၢပ်ႇၽိုတ်ႇသေ ပေႃးဢဝ်ၵၢၼ်မိူင်းဝႃႈ ယွၼ်ႉပိူၼ်ႈမႃးသေႃႇသူၼ်းသေ ယႃႇပေႁႂ်ႈပႃးၵႂႃႇၸွမ်းပိူၼ်ႈ။ ၶႂ်ႈႁႂ်ႈၵူၼ်းၼုမ်ႇ တင်းသဵင်ႈႁူႉဝႃႈ ပၼ်ႁႃႁဝ်းပဵၼ်သင်တႄႉတႄႉလႄႈ တေလႆႈၵႄႈလိတ်ႈတီႈလႂ်တႄႉတႄႉ၊ ပိူဝ်ႈတႃႇ ၵႄႈလိတ်ႈပၼ်ႁႃ မိူင်းတႆးႁဝ်းဢၼ်တႄႇပဵၼ်မႃး- ဝႃႈၼႆ။

ယိူင်းဢၢၼ်းပၢင်သွၼ် မီးယူႇ 3 ၶေႃႈ- 1.မိူင်းတႆးပွတ်းႁွင်ႇပတ်းပိုၼ်ႉ ႁႂ်ႈမီးၽူႈပူင်သွၼ် ၵဵဝ်ႇၵပ်း ၵၢၼ်လိူၵ်ႈတင်ႈ ပီ 2015 ၼိုင်ႈၸႄႈဝဵင်း 3 ၵေႃႉ။ 2.ၼင်ႇႁိုဝ်ၵူၼ်းၼုမ်ႇ တေမီးပိုၼ်ႉႁူႉသေ ၵမ်ႉထႅမ်လွင်ႈလွၵ်းပိူင်ၾႅတ်ႊၻရႄႊလ် ဢၼ်ဢိင်ၼိူဝ်ပိုၼ်ႉထၢၼ် လိၵ်ႈႁူမ်ႈမၢႆပၢင်လူင်။ 3.ၵူၼ်းၼုမ်ႇ ၸိူဝ်းပဵၼ်ၽူႈပူင်သွၼ်လူင်းၵႂႃႇယဝ်ႉၼၼ်ႉ တေၶိုၼ်းႁႂ်ႈသိုပ်ႇ ပဵၼ်ႁူပဵၼ်တႃတႃႇပၢင်လိူၵ်ႈတင်ႈ 2015 သေ သိုပ်ႇပိုၼ်ၽႄႈ ပၼ်တၢင်းႁူႉတၢင်းႁၼ် ပေႃႈမႄႈၵူၼ်းမိူင်းၵႂႃႇ။

ၸၢႆးလဵၵ်ႉ ၽူႈၶၢၼ်ပၢၵ်ႇ ပႃႊတီႊႁူဝ်သိူဝ်လၢတ်ႈဝႃႈ- ၵူၼ်းမိူင်းၵူႈၵေႃႉႁူမ်ႈၵၼ်ပွင်ၵၢၼ်ၸင်ႇ ၸိုင်ႈမိူင်း ဝၢၼ်ႈမိူင်း တေၶိုၼ်ႈယႂ်ႇ၊ တေၸၢင်ႈမီးလွင်ႈထၢင်ႇႁၢင်ႈတိူဝ်းတွၼ်းမႃး။ ၸင်ႇဝႃႈ ပႃႊတီႊ တပ်ႉသိုၵ်း ၵူၼ်းမိူင်း သၢမ်ၶႃၵဵင်းၼႆႉ ထုၵ်ႇလီႁူမ်ႈၵၼ်ပွင်သၢင်ႈၵႂႃႇ။ ပေႃးဢမ်ႇႁူမ်ႈယုၵ်ႉၽဵင်ႇ တေဢမ်ႇၸၢင်ႈထိုင်တီႈလႆႈ။ ယူႇတီႈတပ်ႉသိုၵ်းၵေႃႈလီ၊ ၵူၼ်းၼုမ်ႇၵေႃႈလီ၊ ပေႃးတင်းဝႃႈတေယုမ်ႇယမ် ၶေႃႈၵႂၢမ်းႁၢင်ႈလီဢွၼ်ႇဢၼ်ဝႃႈ ႁဝ်းဢမ်ႇၸွမ်းၾၢႆႇ၊ ႁဝ်းတေယူႇသုၼ်ၵၢင်ၵူၺ်းၼႆၼၼ်ႉ ၸွင်ႇႁဝ်းတေမႅၼ်ႈတႄႉႁႃႉ၊ ယူႇတီႈၵဝ်ၶႃႈ ႁၼ်ထိုင်တႄႉ ဢမ်ႇမႅၼ်ႈၶႃႈ။ တၵ်းတေလႆႈၸွမ်းၾၢႆႇဢေႃႈ၊ တၵ်းတေလႆႈၸွမ်းၾၢႆႇ ဢၼ်ထုၵ်ႇမႅၼ်ႈၸိုဝ်ႈၸႂ်ႈ ၸွမ်းထမ်းတြႃးၼၼ်ႉ- ဝႃႈၼႆ။

တီႈၼႂ်းပၢင်ၽိုၵ်းၽွၼ်ႉၼၼ်ႉ လႆႈပူင်သွၼ်ပၼ်လွင်ႈ သုၼ်ႇလႆႈသုၼ်ႇပဵၼ်ၵူၼ်း လႄႈ သုၼ်ႇလႆႈသုၼ်ႇပဵၼ်ၸၢဝ်းၶိူဝ်း၊ လွၵ်းပိူင်ၾႅတ်ႊၻရႄႊလ် ဢၼ်ဢိင်ပိုၼ်ႉထၢၼ်လိၵ်ႈႁူမ်ႈမၢႆပၢင်လူင်၊ ပိုၼ်ႉႁူႉၵဵဝ်ႇၵပ်းၵၢၼ်လိူၵ်ႈတင်ႈ၊ လၢႆးၸတ်းၵၢၼ်ပူင်သွၼ် ၸဵမ်ၸိူဝ်းၼႆႉသေ တေၸတ်းႁဵတ်းၵႂႃႇၶၢဝ်းတၢင်း 10 ဝၼ်း- ၼႆယဝ်ႉ။