ပိူဝ်ႈတႃႇမူၼ်ႉမႄး ပိူင်ငဝ်ႈပိုင်းမိူင်း 2008 ၊ မတ်ႉတႃ 436 ၼၼ်ႉ ဢိင်ၼိူဝ်ၾၢႆႇသၢၼ်ၶတ်း ဢၼ်ပဵၼ်တပ်ႉသိုၵ်း ပေႉသဵင်ၼႂ်းသၽႃးလႄႈ ပႆႇၸၢင်ႈမူၼ်ႉမႄးလႆႈ။

ဝၼ်းတီႈ 25/06/2015 (မိူဝ်ႈဝႃး)ၼႆႉ မီးပၢင်ၵုမ်သၽႃး ၸိုင်ႈမိူင်းႁူမ်ႈတုမ် တီႈၼေႇပျီႇတေႃႇလႄႈ ၼႂ်းသၽႃးၼၼ်ႉ မီးၵၢၼ်ယင်ႇသဵင် လူၺ်ႈတွတ်ႈၶႅပ်းၵၢင်ၸႂ် ပိူဝ်ႈတႃႇမူၼ်ႉမႄးၵႄႈလိတ်ႈ ပိူင်ငဝ်ႈပိုင်းမိူင်း 2008 ၊ မတ်ႉတႃ 436 (ၵ)။ ၽွၼ်းပၢင်ႈ ၶွင်ၵၢၼ်ယင်ႇသဵင်ၼၼ်ႉ ၾၢႆႇသၢၼ်ၶတ်း ဢၼ်ပဵၼ်တပ်ႉသိုၵ်း (မီးတူဝ်တႅၼ်း 4/1 ၼႂ်းသၽႃး) ပေႉသဵင်။

ပၢင်ၵုမ်သၽႃး ၸိုင်ႈမိူင်းႁူမ်ႈတုမ်ပွၵ်ႈၼႆႉ ၽူႈၶဝ်ႈႁူမ်ႈ တင်းမူတ်းမီး 583 ၵေႃႉ။ ၼႂ်းသၽႃးၼႆႉ တူဝ်တႅၼ်းၾၢႆႇသိုၵ်းမီးဝႆႉ 4 ပုၼ်ႈ 1 ပုၼ်ႈ ။ သဵင်ၼႂ်းသၽႃး 100% ၼၼ်ႉ ၾၢႆႇတပ်ႉသိုၵ်းမီးဝႆႉ 25% ။ ပိူဝ်ႈတႃႇ မူၼ်ႉမႄးၵႄႈလိတ်ႈလႆႈ ပိူင်ငဝ်ႈပိုင်းမိူင်းၼႆႉ ၾၢႆႇၶႂ်ႈမူၼ်ႉမႄး တေလႆႈမီးသဵင် 75% ၶိုၼ်ႈၼိူဝ် ၸင်ႇတေပေႉလႆႈလႄႈမူၼ်ႉမႄးၵႄႈလိတ်ႈလႆႈ။

ဢၼ်တွတ်ႈၶႅပ်းၵၢင်ၸႂ် ၵမ်ႉထႅမ်ႁႂ်ႈမူၼ်ႉမႄး ပိူင်ငဝ်ႈပိုင်းမိူင်း မီး 388 ၵေႃႉ၊ ဢၼ်တွတ်ႈၶႅပ်းသၢၼ်ၶတ်း မီးသိုၵ်း 166 ၵေႃႉ၊ လိူဝ်သေၼၼ်ႉ မီးတူဝ်တႅၼ်းၼႂ်းသၽႃးထႅင်ႈ မွၵ်ႈ 20 ၵေႃႉပၢႆ၊  တင်းမူတ်း 180 ၵေႃႉပၢႆသေ ၾၢႆႇသၢၼ်ၶတ်း ပေႉပုၼ်ႈၵႂႃႇ ။

ၵွပ်ႈပဵၼ်ၸိူင်ႉၼႆလႄႈ တႃႇတေမူၼ်ႉမႄး ပိူင်ငဝ်ႈပိုင်းမိူင်း 2008 ၼႆႉ မၼ်းဢမ်ႇလႆႈယဝ်ႉ။ ပေႃးဝႃႈ ဢမ်ႇမူၼ်ႉမႄးလႆႈ မတ်ႉတႃ 436 (ၵ)ၼႆႉ ယဝ်ႉၵေႃႈ တႃႇတေမူၼ်ႉမႄးၶေႃႈယွႆႈယႅမ်းထႅင်ႈၼၼ်ႉ ၵေႃႈတေယၢပ်ႇထႅင်ႈ။ ၼွၵ်ႈသေၼၼ်ႉ မတ်ႉတႃ 436 (ၶ) ၵေႃႈ တေမီးၵၢၼ် တွတ်ႈၶႅပ်းယင်ႇသဵင်ၵၢင်ၸႂ် ၼႂ်းဝၼ်းတီႈ 30/06/2015 ။ မတ်ႉတႃ 436 (ၶ)ၼႆႉၵေႃႈ ၽွင်းတႅၼ်းသၽႃးမိူင်းႁူမ်ႈတုမ် တေလႆႈၵမ်ႉထႅမ် 75% ၵွၼ်ႇ ၸင်ႇတေမူၼ်ႉမႄးလႆႈ- ၵူၼ်းၼႂ်းဝူင်းပႃႊတီႊ ၵၢၼ်မိူင်းလၢတ်ႈ။

သၽႃးၸိုင်ႈမိူင်းႁူမ်ႈတုမ်ၼႆႉ လႆႈၶွတ်ႇၽွတ်ႈဝႆႉ ၶွမ်ႊမတီႊမူၼ်ႉမႄးပိူင်ငဝ်ႈပိုင်းမိူင်း။ ပိူင်ငဝ်ႈပိုင်းမိူင်း 2008 ၼႆႉ ထုၵ်ႇလႆႈမူၼ်ႉမႄးမတ်ႉတႃလႂ် တွၼ်ႈလႂ်ၵေႃႈ ၸုမ်းမူၼ်ႉမႄးပိူင်ငဝ်ႈပိုင်းမိူင်းၼႆႉ မူၼ်ႉမႄးဝႆႉသေ လႆႈၶိုၼ်းတၢင်ႇယိုၼ်ႈ ၼႂ်းသၽႃးၸိုင်ႈမိူင်းႁူမ်ႈတုမ်။ ၽူႈၶဝ်ႈႁူမ်ႈပၢင်ၵုမ် သၽႃးမိူင်းႁူမ်ႈတုမ် ၵမ်ႉထႅမ် 75% ၶိုၼ်ႈၼိူဝ်ၵွၼ်ႇ ၸင်ႇတေပေႉ၊ ၸင်ႇပဵၼ်မူၼ်ႉမႄးလႆႈ။

ၵမ်ႈၽွင်ႈထတ်းသၢင်ဝႃႈ- ပေႃးဝႃႈမၢႆမတ်ႉတႃ 436 (ၵ) ၼႆႉ မူၼ်ႉမႄးလႆႈတႄႉ တႃႇမူၼ်ႉမႄး 436 (ၶ)ၼၼ်ႉ ငၢႆႈငၢႆႈၵူၺ်း။ ၵူၺ်းၵႃႈ ပေႃးဢမ်ႇမူၼ်ႉမႄးလႆႈ 436 (ၵ)တႄႉ 436 (ၶ)ၼႆႉ ၶႂ်ႈမူၼ်ႉမႄး ၸိူင်ႉႁိုဝ်ၵေႃႈ တိုၼ်းဢမ်ႇမီးၽွၼ်းလီသင်၊ မၼ်းပဵၼ်ဢၼ်ယွႆႈယႅမ်းမၼ်းၵူၺ်း- ဝႃႈၼႆ။