ၵူၼ်းဝၢၼ်ႈ ၼမ်ႉလဝ်းပွၵ်ႉၸၢၼ်း (ၵွင်းမၢၵ်ႇလၢင်း) ၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇၵေႃႉၼိုင်ႈ မဝ်းယႃႈမႃႉဢဝ်မိတ်ႈတႅင်းလုၵ်ႈ မေးလႄႈတူဝ်ၵဝ်ႇ တၢႆထင်တီႈ။

ယႃႈမႃႉ

ဝၼ်းတီႈ 29 လိူၼ်မတ်ၶျ်ႉၵၢင်ၶမ်ႈ 8 မူင်း မွင်ႇသီႇဢႃႇယု (30)  ၸၢဝ်းလႃးႁူႇမဝ်းယႃႈမႃႉသေ လမ်းဢဝ်မိတ်ႈတႅင်းၵေႃႉပဵၼ်မေးၼၢင်း ၸိုဝ်ႈႁွင်ႉဢေးၼႃႇမီးဢႃႇယု (19) ပီ။ တိူဝ်ႉမၢတ်ႇတီႈသိုဝ်ႈသိုဝ်ႈႁူဝ်ၸႂ်လႄႈ ဢေးၼႃႇမီးတၢႆထင်တီႈၼႆ ၸၢႆးၸၢႆးၵူၼ်းတၢင်ႉယၢၼ်းလၢတ်ႈ။

ဝၢႆးသေမၼ်းၸၢႆးတႅင်းမေးမၼ်းတၢႆယဝ်ႉသမ်ႉသိုပ်ႇလမ်းတႅင်းလုၵ်ႈၸၢႆးၶႃဢႃယု 3 ၶူပ်ႇတိူဝ်ႉတီႈလုပ်ႇၶီႈၶၢင်ႈၾၢႆႇသၢႆႉ။ ၽွင်းၼၼ်ႉလုင်းၵျထီးၵေႃႉပဵၼ်ပူႇလုၵ်ႈဢွၼ်ႇၼၼ်ႉ သမ်ႉၸွမ်းၶႄလႄႈမိတ်ႈတႅင်းၺႃးၵျထီးထႅင်ႈ။တၢင်းပူႇတၢင်းလၢၼ်မၢတ်ႇၸဵပ်းလိူဝ်ႁႅင်းဝႃႈၼႆ။

ၸၢႆးသၢင်ႇၶိၼ်ႇၽူႈၵွၼ်းဢိူင်ႇမိူင်းၵၢဝ်လၢတ်ႈဝႃႈ- ၵူၼ်းဢၼ်ယူႇႁိမ်းႁိူၼ်းၶဝ် လႆႈငိၼ်းသဵင်ႁွင်ႉႁႆႈလႄႈဢွၼ်ၵၼ်ၵႂႃႇတူၺ်း လႆႈႁၼ်မွင်ႇသီႇဢဝ်မိတ်ႈတႅင်းၵူၼ်းႁိူၼ်းမၼ်း။ ၽွင်းၼၼ်ႉမေးၼၢင်းမၼ်းတႄႉတၢႆယဝ်ႉ။ ၵူၼ်းဝၢၼ်ႈၶဝ်ၸင်ႇဢွၼ်ၵၼ်ဢဝ် မၢၵ်ႇၵၢင်ႇပိုတ်းၸွႆႈ၊ ဢဝ်ၶွၼ်ႉဢဝ်မိတ်ႈမႃးဢၢင်ႈလွၵ်ႇငိုတ်ႈၶႄ။ ၵူၺ်းၵႃႈမိူဝ်ႈၵျထီး ႁၼ်ၵူၼ်းဝၢၼ်ႈၶိုၼ်ႈမႃးၼိူဝ်ႁိူၼ်းၼၼ်ႉ မၼ်းၸၢႆးၶိုၼ်းဢဝ်မိတ်ႈတႅင်းႁူဝ်ၸႂ်မၼ်းႁင်းၵူၺ်းသေ တၢႆထင်တီႈ။

ၼႂ်းၸိုင်ႈတႆးပွင်းၵၢင်ပွတ်းႁွင်ႇၵူႈတီႈတီႈ ယွၼ်ႉပိူဝ်ႈလဵၵ်ႉယႂ်ႇၼုမ်ႇထဝ်ႈ ဢွၼ်ၵၼ်သူႇသမ်းၵိၼ်ယႃႈမႃႉလိူင်ႇၼမ်ၼႃႈလႄႈ ၵၢၼ်ၵေႃႇၵၢၼ်ႁၢႆႉယွၼ်ႉယႃႈမဝ်းၵမ်ၵေႃႈ မီးယူႇၵူႈမိုဝ်ႉၵူႈဝၼ်း- ၵူၼ်းၼုမ်ႇလႃႈသဵဝ်ႈလၢတ်ႈ။