ၽွင်းတႅၼ်းသၽႃးၵူၼ်းမိူင်း/ ၸႄႈမိူင်း ၶွင်ပႃႊတီႊ သိူဝ်ၽိူၵ်ႇ တီႈမိူင်းၵိုင် ၸိုင်ႈတႆးပွတ်းၸၢၼ်း 3 ၵေႃႉ ထွၼ်တူဝ်ဢွၵ်ႇပႃႊတီႊသေ ၵႂႃႇၶဝ်ႈႁူမ်ႈပႃႊတီႊႁူဝ်သိူဝ်။ မိူဝ်ႈလဵဝ် မီးၽွင်းတႅၼ်းပႃႊတီႊသိူဝ်ၽိူၵ်ႇ ထွၼ်တူဝ် ဢွၵ်ႇယဝ်ႉသိပ်းပၢႆ။

ပူၼ်ႉမႃးမိူဝ်ႈဝၼ်းတီႈ 04/12/2014 ၽွင်းတႅၼ်း ၻီႊမူဝ်ႊၶရႅတ်ႊတိၵ်ႊပႃႊတီႊ ၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) ၸၢႆးထုၼ်းဢေး ၽွင်းတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင်၊ ၸၢႆးပၢင်ႇ ၽွင်းတႅၼ်းသၽႃးၸႄႈမိူင်း (ၶဵတ်ႇလိူၵ်ႈတင်ႈမၢႆ 1) ဝဵင်းမိူင်းၵိုင်၊ ၼၢင်းၶမ်းပိူင်း ၽွင်းတႅၼ်းသၽႃးၸႄႈမိူင်း (ၶဵတ်ႇလိူၵ်ႈတင်ႈမၢႆ 2) ဝဵင်းမိူင်းၵိုင် 3 ၵေႃႉၸိူဝ်းၼႆႉ ဢွၼ်ၵၼ်ထွၼ်တူဝ်ဢွၵ်ႇ ပႃႊတီႊသိူဝ်ၽိူၵ်ႇသေ ၶဝ်ႈႁူမ်ႈငဝ်ႈငုၼ်းၻီႊမူဝ်ႊၶရေႊသီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) - ၼႆယဝ်ႉ။

မိူဝ်ႈလဵဝ် တၢင်းမိူင်းၵိုင် ၵေးသီးၼႆႉ ပၢႆႉပႃႊတီႊသိူဝ်ၽိူၵ်ႇ လႆႈပူတ်းလူင်းယဝ်ႉတူဝ်ႈလီငၢမ်း။ တင်ႈတႄႇ ၽွင်းႁူဝ်ပီ 2014 မႃးႁၢၼ်ႉတေႃႇယၢမ်းလဵဝ် မီးၽွင်းတႅၼ်း ၼႂ်းပႃႊတီႊသိူဝ်ၽိူၵ်ႇ ထွၼ်တူဝ်ဢွၵ်ႇ ပႃႊတီႊသိူဝ်ၽိူၵ်ႇ တင်းမူတ်း 12 ၵေႃႉ။

ၼႂ်းၽွင်းတႅၼ်းပႃႊတီႊသိူဝ်ၽိူၵ်ႇ (SNDP) 12 ၵေႃႉၼၼ်ႉ တႃႇ 3 ၵေႃႉ ထွၼ်တူဝ်ဢွၵ်ႇပႃႊတီႊ မိူဝ်ႈဝၼ်းတီႈ 27/03/2014 သေ ၶဝ်ႈႁူမ်ႈပႃႊတီႊႁူဝ်သိူဝ်၊ ပဵၼ်ၽွင်းတႅၼ်းသၽႃးၸႄႈမိူင်း မိူင်းယႆ ၶဵတ်ႇပိုၼ်ႉတီႈ လိူၵ်ႈတင်ႈမၢႆ 1 ၸၢႆးၸၢမ်ႇၽေႇ။ ၽွင်းတႅၼ်းသၽႃးၸႄႈမိူင်းၵျွၵ်ႉမႄး ၶဵတ်ႇလိူၵ်ႈတင်ႈမၢႆ 2 ၸၢႆးတၢၼ်းမွင်ႇ။ ၽွင်းတႅၼ်း သၽႃးၸႄႈမိူင်း မိူင်းတူၼ် ၶဵတ်ႇလိူၵ်ႈတင်ႈမၢႆ 2 ၸၢႆးဝိၼ်းမျၢတ်ႉဢူး ၸိူဝ်းၼႆႉ။

ၽွင်းတႅၼ်းသၽႃးၸႄႈမိူင်း ၸႄႈဝဵင်းၼမ်ႉၸၢင် (ၶဵတ်ႇလိူၵ်ႈတင်ႈမၢႆ 2) ၸၢႆးသူႇရိၼ်ႇဢူး (တူႇရဵင်ႇဢူး)၊ ၽွင်းတႅၼ်းသၽႃးၸႄႈမိူင်း ၸႄႈဝဵင်းလၢႆးၶႃႈ ၸၢႆးၵျေႃႇၸေႇယ 2 ၵေႃႉၼႆႉ ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇ (SNDP) မိူဝ်ႈဝၼ်းတီႈ 02/12/2014 သေ ၶဝ်ႈႁူမ်ႈၼႂ်း ပႃႊတီႊႁူဝ်သိူဝ် (SNLD) ၼင်ႇၵဝ်ႇ။

ထိုင်မႃးမိူဝ်ႈဝၼ်းတီႈ 06/12/2014 ၽွင်းတႅၼ်း ပႃႊတီႊသိူဝ်ၽိူၵ်ႇ (SNLD) ၽွင်းတႅၼ်းသၽႃးၸႄႈမိူင်း ၵေးသီး လုင်းသၢင်ႇလႅင်း၊  ၽွင်းတႅၼ်းသၽႃးၸႄႈမိူင်း ၵေးသီး ၸၢႆးမွၼ်းလႅင်း။ ၵူၼ်းတႅၼ်းသၽႃးၵူၼ်းမိူင်း ၸၢႆးဢွမ်သႅင်မိူင်း 3 ၵေႃႉၼႆႉ လူင်းလၢႆးမိုဝ်း ထွၼ်တူဝ်ဢွၵ်ႇပႃႊတီႊ- ၼႆယဝ်ႉ။

မိူဝ်ႈဝၼ်းတီႈ 07/12/2014 ၽွင်းတႅၼ်းၸႄႈမိူင်း တၢင်ႉယၢၼ်း ၸၢႆးထုၼ်းဝိၼ်း (ႁွင်ႉၸၢႆးထုၼ်းသႃႇ) ၵေႃႈ ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇ။ ၸၢႆးထုၼ်းဝိၼ်းၼႆႉ မိူဝ်ႈပၢင်လိူၵ်ႈတင်ႈပီ 1990 ၼၼ်ႉၵေႃႈ လုၵ်ႉၼႂ်းပႃႊတီႊႁူင်းၶဝ်ႈ (တၸၺ) သေ ၶဝ်ႈၼႂ်းပႃႇတီႇႁူဝ်သိူဝ်။