ၽွင်းႁၢင်လိူၼ်ၼူဝ်ႊဝႅမ်ႊၿိူဝ်ႊ (2014)ၼႆႉ ၸုမ်းၵပ်းသၢၼ် ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCCT) ၸတ်းႁဵတ်းပၢင်ၵုမ်ၵၼ်။ ဝၢႆးပၢင်ၵုမ်ယဝ်ႉ လႆႈသိုပ်ႇႁူပ်ႉထူပ်းဢုပ်ႇၵုမ် တင်း သုၼ်ၵၢၼ်လွင်ႈ ငမ်းယဵၼ်မၢၼ်ႈ (MPC) ဝၼ်းတီႈ 01-02/12/2014 တီႈၼႂ်းၵဵင်းမႆႇ ၸိုင်ႈထႆး။

ၸုမ်း MPC ႁပ်ႉႁူပ်ႉထူပ်းၸုမ်း NCCT ၼႂ်းၵဵင်းမႆႇ ပူၼ်ႉမႃးမိူဝ်ႈဝၼ်းတီႈ 27/11/2014

ႁူဝ်ၼႃႈၸုမ်း NCCT ၼၢႆႁူင်သႃ လၢတ်ႈဝႃႈ- ဢၼ်ဢုပ်ႇဢူဝ်းၵၼ်မိူဝ်ႈလဵဝ် တီႈၵဵင်းမႆႇ 2-3 ဝၼ်းၼႆႉ ပိူဝ်ႈတႃႇတေၵႄႈလိတ်ႈပၼ်ႁႃ ဢၼ်ၶွင်ႉၶမ်ၵၼ်သေ ပိူဝ်ႈတႃႇတႅပ်းတတ်းပၼ်ၶေႃႈတွပ်ႇ တႃႇတေႁူပ်ႉထူပ်း ဢုပ်ႇဢူဝ်းတင်းလူင်ပွင်ၸိုင်ႈ ၵွၼ်ႇပႆႇထိုင်ၶရိတ်ႊသမၢတ်ႊသ်ၼႆႉ- ဝႃႈၼႆ။

ဢိင်ၼိူဝ်ၸုမ်း MPC ႁပ်ႉႁူပ်ႉထူပ်းၸုမ်း NCCT ၼႂ်းၵဵင်းမႆႇ၊ ပူၼ်ႉမႃးမိူဝ်ႈဝၼ်းတီႈ 27/11/2014 သေ ၼၢႆႁူင်သႃ ၵေႃႈလၢတ်ႈဝႃႈ- ပိူင်လူင်မၼ်း ဢၼ်မႃးဢုပ်ႇၵၼ်ပွၵ်ႈၵမ်းၼႆႉ ပိူဝ်ႈတႃႇၵႄႈလိတ်ႈပၼ်ႁႃ ဢၼ်ၶွင်ႉၶမ်ၵၼ်ဝႆႉၵႃႈၵွၼ်ႇပူၼ်ႉမႃး၊ မိူၼ်ၼင်ႇ ဢၼ်ၶွင်ႉၶမ်ၵၼ်ဝႆႉ ၵဵဝ်ႇၵပ်းလွင်ႈႁူမ်ႇလူမ်ႈ ပိူဝ်ႈတႃႇ တေပူတ်းၵွင်ႈၵၢင်ႇသေ ႁဵတ်းတပ်ႉသိုၵ်းဢၼ်လဵဝ်၊ ဢၼ်ၾၢႆႇလူင်ပွင်ၸိုင်ႈ တၢင်ႇယိုၼ်ႈမႃး၊ ဢၼ်ၾၢႆႇၸၢဝ်းၶိူဝ်းဢမ်ႇႁပ်ႉလႆႈလႄႈ မီးလွင်ႈဢမ်ႇၶဝ်ႈၵၼ်သေ ႁဵတ်းႁႂ်ႈၵၢၼ်ၵေႃႇသၢင်ႈ လွင်ႈငမ်းယဵၼ် ၶႂ်ႈၵိုတ်းၵႂႃႇ ၸိူဝ်းၼႆႉ။ ပိူဝ်ႈတႃႇဝၢင်းၽႅၼ် ၵၢၼ်ဢုပ်ႇဢူဝ်းၵၼ် ၵွၼ်ႇပႆႇထိုင်ဝၼ်းၶရိတ်ႊသမၢတ်ႊ (ပီ 2014 ပႆႇသဵင်ႈ)ၼႆႉ။ ၵူၺ်းၵႃႈ တေပဵၼ်ဢမ်ႇပဵၼ်ၼၼ်ႉ ပႆႇၸၢင်ႈဝႃႈ။

ႁူဝ်ၼႃႈၸုမ်းၾၢႆႇပၵ်းတႃတူၺ်းလွင်ႈငမ်းယဵၼ် BNI ၊ ၸၢႆးလဵၵ်ႉ လၢတ်ႈဝႃႈ- ပေႃးဝႃႈလဵပ်ႈႁဵၼ်းတူၺ်း လွင်ႈငမ်းယဵၼ် မိူဝ်ႈလဵဝ်ၼႆႉသေ တႅၵ်ႈၵၼ်တင်းၵူႈပွၵ်ႈတႄႉ လွင်ႈငမ်းယဵၼ်ၼႆႉ မၼ်းလီမႃးယူႇ ၶႅၼ်းလိူဝ်ၵူႈပွၵ်ႈယူႇ၊ ၵူၺ်းၵႃႈ မၼ်းတေလႆႈၵႂႃႇထႅင်ႈၶၢဝ်းယၢဝ်း၊ တေပႆႇၵေႃႇသၢင်ႈလွင်ႈငမ်းယဵၼ်လႆႈငၢႆႈငၢႆႈ- ဝႃႈၼႆ။

ၾၢႆႇၸၢဝ်းၶိူဝ်း ၶႂ်ႈၵေႃႇတင်ႈၸိုင်ႈမိူင်းႁူမ်ႈတုမ်ၾႅတ်ႊၻရႄႊလ်၊ ၶႂ်ႈၵေႃႇတင်ႈတပ်ႉသိုၵ်းၾႅတ်ႊၻရႄႊလ်၊ ၵူၺ်းၵႃႈ ၾၢႆႇသိုၵ်းမၢၼ်ႈသမ်ႉဢမ်ႇႁပ်ႉ။

ဢူးလႃႉမွင်ႇသူၺ်ႇ လၢတ်ႈဝႃႈ- တပ်ႉသိုၵ်းမၢၼ်ႈၼႆႉ မီးႁႅင်းသိုၵ်းယူႇ သီႇသႅၼ်ႁႃႈ (450,000) ၊ ၸၢဝ်းၶိူဝ်းတင်းမူတ်းႁူမ်ႈၵၼ်သမ်ႉ ႁႅင်းသိုၵ်းဢမ်ႇမီးၼိုင်ႈသႅၼ် (100,000) ။ ၵွပ်ႈၼၼ် တႃႇတပ်ႉ သိုၵ်းမၢၼ်ႈ တေယွမ်းယႃႉတပ်ႉသိုၵ်းသေ မႃးႁူမ်ႈၵၼ်ၵေႃႇတင်ႈ တပ်ႉသိုၵ်းၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်ၼၼ်ႉ ၾၢႆႇသိုၵ်းမၢၼ်ႈဢမ်ႇယွမ်းငၢႆႈငၢႆႈ- ၼႆယူႇ။

ဢူးဢွင်ႇမိၼ်း (ၵႅမ်ႁူဝ်ပဝ်ႈ 2 ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် UPWC) လၢတ်ႈတီႈ ၸုမ်းၶၢဝ်ႇ DVB ဝႃႈ- မိူဝ်ႈလဵဝ်ၼႆႉ ၾၢႆႇၸၢဝ်းၶိူဝ်းၶဝ်မႆႈၸႂ်ပူၼ်ႉတီႈသေ ၶႂ်ႈဢဝ်လွင်ႈတပ်ႉသိုၵ်း ၾႅတ်ႊၻရႄႊလ် ၶိုၼ်ႈၼႃႈသေ ဢုပ်ႇဢူဝ်း။ ၸိူင်ႉႁိုဝ်ၵေႃႈယဝ်ႉ တပ်ႉသိုၵ်းလႄႈလူင်ပွင်ၸိုင်ႈၼႆႉ ၵၢင်ၸႂ်ပဵၼ်ဢၼ်လဵဝ်ၵၼ်ၵူၺ်း။ ၵွပ်ႈၼၼ် တပ်ႉသိုၵ်းၼႆႉ မၼ်းတေဝူၼ်ႉလွင်ႈပိူဝ်ႈတႃႇၵႅတ်ႇၶႄ လွင်ႈႁူမ်ႇလူမ်ႈဝၢၼ်ႈမိူင်းၵူၺ်း၊ လူင်ပွင်ၸိုင်ႈၼႆႉ တေဝူၼ်ႉလွင်ႈ ပိူဝ်ႈတႃႇဢဝ်ၵၢၼ်မိူင်းၵႄႈလိတ်ႈ ပၼ်ႁႃၵၢၼ်မိူင်းၵူၺ်း။

ဢၼ်ၸၢဝ်းၶိူဝ်းမႆႈၸႂ်သေ ၶႂ်ႈဢုပ်ႇဢူဝ်းလွင်ႈတပ်ႉသိုၵ်းၾႅတ်ႊၻရႄႊလ်ၼႆႉ မၼ်းပဵၼ်လွင်ႈမႆႈၸႂ်ၵူၺ်း၊ ပႆႇၵိုင်ႇထုၵ်ႇပဵၼ်။ လီလႆႈဢုပ်ႇဢူဝ်းလွင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်ဢွၼ်တၢင်း။ ပေႃးဢုပ်ႇဢူဝ်း လွင်ႈမိူင်းႁူမ်ႈတုမ်ၵေႃႈ ၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်လႄႈသင်၊ တပ်ႉသိုၵ်းၾႅတ်ႊၻရႄႊလ်လႄႈသင်၊ တပ်ႉပလိၵ်ႈၾႅတ်ႊၻရႄႊလ်လႄႈသင် ၸိူဝ်းၼႆႉတေဢွၵ်ႇမႃး ႁင်းၵူၺ်းမၼ်း ၶၵ်ႉတွၼ်ႈလႂ်ၶၵ်ႉတွၼ်ႈၼၼ်ႉ- ဢူးဢွင်ႇမိၼ်း လၢတ်ႈတီႈၸုမ်းယၢင်း ၽွင်းၵႂႃႇႁူပ်ႉထူပ်း လူင်ပွင်ၸိုင်ႈ တီႈၼေႇပျီႇတေႃႇ မိူဝ်ႈပူၼ်ႉမႃးၼင်ႇၼႆ။