ၸုမ်းၸၢဝ်းၶိူဝ်း ႁူပ်ႉဢုပ်ႇၵၼ် တီႈလုမ်းငဝ်ႈငုၼ်း ပႃႊတီႊႁူဝ်သိူဝ် တႃႈၵုင်ႈ။ မီးၵၢၼ်သပ်းလႅင်း ၼႄလွင်ႈ ၵၢၼ်ငၢၼ်း ဢၼ်လႆႈႁဵတ်းသၢင်ႈမႃးလႄႈ ဢၢၼ်းၶတ်းၸႂ်ၵၢၼ်ငၢၼ်း ဢၼ်တေႁဵတ်းသၢင်ႈၵႂႃႇ ႁႂ်ႈၶိုပ်ႈၼႃႈ ၶိုၼ်ႈသင်ႉ။

ပူၼ်ႉမႃးမိူဝ်ႈဝၼ်းတီႈ 11/11/2014 ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) တင်း ၸုမ်းဢူၺ်းလီၸၢဝ်းၶိူဝ်း ၽွမ်ႉႁူမ်ႈ (UNA) ႁူပ်ႉထူပ်းၵၼ်တီႈ ငဝ်ႈလုမ်းငဝ်ႈငုၼ်း ၻီႊမူဝ်ႊၶရေႊၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ၼိူဝ်သဵၼ်ႈတၢင်းပျေႇ (ၵိဝ်ႇၸဝ်ႈၾႃႉ) ၸႄႈဝဵင်းမယၢၼ်းၵူင်း ဝဵင်းလူင်တႃႈၵုင်ႈ။

တီႈပၢင်ႁူပ်ႉထူပ်းၵၼ်ၼၼ်ႉ ၸဝ်ႈၶုၼ်ထုၼ်းဢူး ႁူဝ်ပဝ်ႈပႃႊတီႊႁူဝ်သိူဝ် လႆႈသပ်းလႅင်းၼႄ လွင်ႈလႆႈၵႂႃႇ ႁူပ်ႉၸၼ်ႉၽူႈၼမ်း မိူင်းမၢၼ်ႈ မိူဝ်ႈဝၼ်းတီႈ 31/10/2014 တီႈႁိူၼ်းႁေႃၸွမ်ၸိုင်ႈတဵင်းၸဵင်ႇ တီႈၼေႇပျီႇတေႃႇ။

UNFC  ၼၢႆႁူင်သႃ  ဢုပ်ႇလၢတ်ႈသပ်းလႅင်း လွင်ႈၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) တင်း ၸုမ်းၸၢဝ်းၶိူဝ်း ၶွမ်ႊၶတီႊၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉ ၸိုင်ႈမိူင်း NCCT ႁူပ်ႉဢုပ်ႇ ၵၼ် ႁႃလွၵ်းလၢႆး ပိူဝ်ႈတႃႇၵၢၼ်ၵေႃႇသၢင်ႈလွင်ႈငမ်းယဵၼ် ၶိုပ်ႈၼႃႈၶိုၼ်ႈသင်ႉ- ၸိူဝ်းၼႆႉ။

ၾၢႆႇၼိုင်ႈၵေႃႈ ပေႃးႁူပ်ႉၵၼ်ထႅင်ႈတၢင်းၼႃႈၼႆ ယိူင်းဢၢၼ်းၶတ်းၸႂ် ႁႂ်ႈဢွၵ်ႇမႃးၽွၼ်းပၢင်ႈဢၼ်လီ၊ ၼင်ႇႁိုဝ် တေၸၢင်ႈမီး လွင်ႈယွၼ်ႇယၢၼ်းတေႃႇၵၼ်၊ တႅၵ်ႇလႅင်းတေႃႇၵၼ်၊ ၼင်ႇႁိုဝ်တေဢမ်ႇၵိုတ်း ဢမ်ႇယင်ႉသေ မုင်ႈၸူးယိူင်းမၢႆၵေႃႇသၢင်ႈ တပ်ႉသိုၵ်းၸိုင်ႈမိူင်းႁူမ်ႈတုမ်၊ ၼင်ႇႁိုဝ်တေပဵၼ်မႃး ပၢင်ဢုပ်ႇဢူဝ်း သၢမ်ၾၢႆႇ ၸိူဝ်းၼႆႉ။

ၼၢႆႁူင်သႃ ယင်းလၢတ်ႈဝႃႈ- ၸွမ်းၼင်ႇဢၼ် ၸုမ်းၸၢဝ်းၶိူဝ်း တင်းလူင်ပွင်ၸိုင်ႈမၢၼ်ႈ လႆႈႁူပ်ႉထူပ်း ဢုပ်ႇဢူဝ်းၵၼ်မႃးၸိူဝ်းၼၼ်ႉ လႆႈလဵပ်ႈႁဵၼ်းႁၼ်ဝႃႈ - တပ်ႉသိုၵ်းမၢၼ်ႈ ဢမ်ႇမီးလွၵ်းၸုၵ်းဢၼ်တႅၵ်ႇလႅင်း။ ယိပ်းၵမ်လၵ်းၵၢၼ်သိုၵ်း 6 ၶေႃႈသေ ႁဵတ်းႁႂ်ႈဢၼ်ဢုပ်ႇဢူဝ်းၵၼ်တင်း NCCT ၵႃႈပူၼ်ႉမႃး လူႉၵွႆၵႂႃႇ- ဝႃႈၼႆ။

ၽူႈယႂ်ႇၵူၼ်းလူင် ၸိူဝ်းႁူပ်ႉထူပ်းၵၼ်ပွၵ်ႈၼႆႉ  ၾၢႆႇ UNA မီးၽူႈၼမ်းမွၼ်း ၼၢႆႇငူၺ်ႇတဵင်း၊ ၽူႈၼမ်းရၶႅင်ႇ ဢူးဢေးတႃႇဢွင်ႇ။ ၽူႈၼမ်းတႆး ၸဝ်ႈၶုၼ်ထုၼ်းဢူး တင်း ၸၢႆးၼုတ်း။ ၾၢႆႇ UNFC မီးၽူႈၼမ်းၼႂ်း ပႃႊတီႊမိူင်းမွၼ်းမႂ်ႇ ၼၢႆႁူင်သႃ၊ ပဢူဝ်း (PNLO) ၶုၼ်ဢူၵ်ႉၵႃႇ၊ ၶျၢင်း CNF သလၢႆးၶရႃႇဢေး၊ ရၶႅင်ႇ ANC ဢူးထုၼ်းၸေႃႇ ၸိူဝ်းၼႆႉၶဝ်ႈႁူမ်ႈ- ငဝ်ႈငုၼ်း SNLD တႃႈၵုင်ႈ ဢွၵ်ႇၶၢဝ်ႇၵႂႃႇၼင်ႇၼႆ။