လူင်ပွင်ၸိုင်ႈမိူင်းၶႄႇ ၸီႉသင်ႇပူင်ၵႂၢမ်း ႁႂ်ႈတီႉၺွပ်းၵူၼ်း ၸိူဝ်ႉသၢႆၵလႃး/ မူႇသလိမ်ႇ ၸွမ်းလႅၼ်လိၼ်ၶႄႇ- တႆး။ ၼွၵ်ႈသေၼၼ်ႉ ၸွမ်းလႅၼ်လိၼ်တႆး- ထႆးၵေႃႈ ၸဝ်ႈၼႃႈတီႈမၢၼ်ႈ ၵူတ်ႇထတ်း ၶဵင်ႈၶႅင်။

ၸဝ်ႈၼႃႈတီႈၶႄႇ ဢဝ်ႁူမ်ႇလူမ်ႈၼႂ်းၼႃႈလိၼ်ၽွင်းငမ်းတူဝ်ၵဝ်ႇ သိၼ်းၵျဵင်း ဢုၺ်းၵူး Photo: internet

ၵဵဝ်ႇၵပ်းလွင်ႈၼႆႉ ၸွမ်းလႅၼ်လိၼ်ၶႄႇ- တႆး တၢင်းပွတ်းထုင်ႉမၢဝ်း ၸႄႈၵဝ်ႇ ၼွင်တဝ်းၸိူဝ်းၼႆႉ လူင်ပွင်ၸိုင်ႈၶႄႇ ၸီႉသင်ႇပူင်ၵႂၢမ်းလူင်း ႁႂ်ႈၶဵင်ႈၵၢၼ်ၵူတ်ႇထတ်း တီႉၺွပ်းၵူၼ်းၸိူဝ်းပဵၼ်ၸိူဝ်ႉသၢႆ ၶိူဝ်းၵလႃး /မူႇသလိမ်ႇ (သိၼ်းၵျဵင်း ဢုၺ်းၵူး) ၊ ၽႂ်ပွင်ႇၶၢဝ်ႇ ၽႂ်တီႉၺွပ်းပၼ်လႆႈၵူၼ်းၸိူဝ်းၼႆႉ တေလႆႈငိုၼ်း 600 ယႂၼ် (ငိုၼ်းၶႄႇ)- ၼႆယဝ်ႉ။

ၸၢဝ်းမိူင်း ႁိုဝ် ၵူၼ်းၵိုၵ်းမိူင်းၶႄႇ ၼႃႈလိၼ်ၽွင်းငမ်းတူဝ်ၵဝ်ႇ သိၼ်းၵျဵင်း ဢုၺ်းၵူးၼႆႉ ပဵၼ်ၸိူဝ်ႉသၢႆၶိူဝ်းၵလႃး မူႇသလိမ်ႇ။ ယၢမ်ႈၵေႃႇၵၢၼ်ႁၢႆႉၼႂ်းမိူင်းၶႄႇ ဢဝ်လႅဝ်းလမ်းၽၼ်းၵူၼ်းမိူင်း ၸွမ်းတႃႈလူတ်ႉၾႆး ၶုၼ်းမိင် ႁဵတ်းႁႂ်ႈ မီးၵူၼ်းတၢႆၼပ်ႉသိပ်း။

ၾၢႆႇၼိုင်ႈ ၼႂ်းၸိုင်ႈတႆးၵေႃႈ ဝၢႆးမၢၵ်ႇတႅၵ်ႇတီႈဝဵင်းလူင်တူၼ်ႈတီး ဝၼ်းတီႈ 04/10/2014 မႃးၼႆႉ ၸဝ်ႈၼႃႈတီႈမၢၼ်ႈ ဢဝ်လွင်ႈႁူမ်ႇလူမ်ႈၶႅင်ႁၢဝ်ႈ ၵူတ်ႇထတ်း ၵူၼ်းၸိူဝ်ႉသၢႆၵလႃးမူႇသလိမ်ႇၼင်ႇၵဝ်ႇ။ လွင်ႈၼႆႉ ၾၢႆႇၸဝ်ႈၼႃႈတီႈ မၢၼ်ႈၶဝ်ဝႃႈ ဢၼ်ၵေႃႇၵၢၼ်ႁၢႆႉ ဝၢင်းမၢၵ်ႇတႅၵ်ႇတီႈဝဵင်းတူၼ်ႈတီး (ၸိုင်ႈတႆးပွတ်းၸၢၼ်း) မိူဝ်ႈပူၼ်ႉမႃးၼႆႉ  ပဵၼ်ၵူၼ်းၵလႃး IS ၶဝ်- ၼႆယဝ်ႉ။

ၵပ်းၵၢႆႇလွင်ႈၼႆႉ ပေႃးဝႃႈပဵၼ်လူတ်ႉၵႃး လုၵ်ႉတၢင်းတူၼ်ႈတီး ဢွၵ်ႇတႃႈဢွၵ်ႇတၢင်းမႃးထိုင် တၢင်းမိူင်းတူၼ်- ပုင်ႇပႃႇၶႅမ်- ၼွင်ဢုၵ်းၸိူဝ်းၼႆႉ ၸွမ်းလၢၼ်ႇ(ၵဵတ်ႉ)ၵူႈတီႈ ၸဝ်ႈၼႃႈတီႈမၢၼ်ႈ ၵူတ်ႇထတ်းဝႂ်ၵပ်းတူဝ်၊ ထတ်းထၢမ်ထဵတ်ႈႁၢဝ်ႈႁႅင်း။ လူတ်ႉၵႃး လုၵ်ႉတၢင်းတူၼ်ႈတီး မႃးတၢင်းႁူဝ်မိူင်း၊ လုၵ်ႉတၢင်းတူၼ်ႈတီးမႃး သၢႆၵုၼ်ႁဵင်-ၵႃလိ၊ မိူင်းပဵင်း၊ ၵဵင်းတုင်၊ တႃႈၶီႈလဵၵ်းၸိူဝ်းၼႆႉၵေႃႈ ၸဝ်ႈၼႃႈတီႈမၢၼ်ႈ ၵူတ်ႇထတ်းၸွမ်းလၢၼ်ႇ(ၵဵတ်ႉ) တႄႉတႄႉဝႃႈဝႃႈ။ ႁၢၼ်ႉတေႃႇထိုင်မိူဝ်ႈလဵဝ်ၵေႃႈ တိုၵ်ႉထတ်းယူႇတိၵ်းတိၵ်း- လႆႈႁူႉၼင်ႇၼႆ။

ၵႃႈပူၼ်ႉမႃးၸွမ်းလၢၼ်ႇ(ၵဵတ်ႉ)ၸိူဝ်းၼႆႉ ပေႃးဝႃႈၸဝ်ႈၵႃး လူင်းၵႂႃႇပၼ်ငိုၼ်းၶဝ်ယဝ်ႉၵေႃႈ ပၼ်ပူၼ်ႉၵႂႃႇမႃး လႆႈယဝ်ႉ။ ၵူၺ်းၵႃႈ မိူဝ်ႈလဵဝ်ၼႆႉ ၸဝ်ႈၼႃႈတီႈမၢၼ်ႈၶဝ် မႃးၵူတ်ႇထတ်းတူၺ်း တီႈၼိူဝ်လူတ်ႉၵႃး၊ ပေႃးပဵၼ်ၼႃႈတႆးၸိူဝ်းၼႆႉ ဢမ်ႇထၢမ်၊ ၵူၺ်းၵႃႈ ပေႃးပဵၼ်ၼႃႈၵလႃးၸိူဝ်းၼႆႉ ထတ်းဝႂ်ၵပ်းတူဝ်၊ ၵိုင်ႇလီႁွင်ႉလူင်းလူတ်ႉၵႃးၵေႃႈ ႁွင်ႉလူင်း။ လၢၼ်ႇၸိူဝ်းၼႆႉ ၵႃႈပူၼ်ႉမႃးဢမ်ႇတူၺ်းသင်၊ ၵူၺ်းၵႃႈ မိူဝ်ႈလဵဝ်ၼႆႉ ၶဝ်ၵူတ်ႇထတ်းမႃးႁႅင်း- ၵူၼ်းၵႂႃႇတၢင်း ၵေႃႉၼိုင်ႈ လၢတ်ႈၼင်ႇၼႆ။