ပႃႇတီႇႁူဝ်သိူဝ် ပွတ်းဢွၵ်ႇၶူင်း ႁွင်ႉပၢင်ၵုမ်၊ ဢုပ်ႇဢူဝ်း လႆႈၸႂ်ဢွၵ်ႇလိၵ်ႈပိုၼ်ၽၢဝ်ႇ သၢၼ်ၶတ်း လွင်ႈဢၼ်ဢူးဢွင်ႇတွင်း တၢင်ႇလၢတ်ႈ ၼႂ်းသၽႃး ႁႂ်ႈဢဝ်ၸိုဝ်ႈၸႄႈဝဵင်း မႃးပဵၼ်ၸိုဝ်ႈၸႄႈမိူင်း။

မိူဝ်ႈဝၼ်းတီႈ 25-26/11/2014 (ၶၢဝ်းတၢင်း 2 ဝၼ်း) ငဝ်ႈငုၼ်းၻီႊမူဝ်ႊၶရေႊသီႊၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ၸိုင်ႈတႆးပွတ်းဢွၵ်ႇ ႁဵတ်းပၢင်ၵုမ်ၵၼ်တီႈ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။

လႆႈဢုပ်ႇၵုမ်ၵၼ်ဝႃႈ ဢၼ်ဢူးဢွင်ႇတွင်း တၢင်ႇထိုင်ၼႂ်းသၽႃး၊ လွင်ႈတႃႇတေလႅၵ်ႈလၢႆႈၸိုဝ်ႈၸႄႈမိူင်းၼၼ်ႉ သင်ၸိူဝ်ႉဝႃႈလႅၵ်ႈလၢႆႈတႄႉၼႆ ပၼ်ႁႃတီႈဢၼ်ဢမ်ႇဝူၼ်ႉဝႆႉ၊ ဢမ်ႇထၢင်ႇဢမ်ႇထိူမ်ဝႆႉၼၼ်ႉ မၼ်းၸၢင်ႈ ပဵၼ်မႃးတိၵ်းတိၵ်း။ ၵွပ်ႈၼႆလႄႈ ယူႇတီႈ SNLD ပွတ်းဢွၵ်ႇၶူင်းသေ လႆႈသၢၼ်ၶတ်းႁၢဝ်ႈႁၢဝ်ႈႁႅင်းႁႅင်း- ၽူႈၼမ်းၼႂ်း ၵေႃပွင်ၵၢၼ်ငဝ်ႈငုၼ်း SNLD ပွတ်းဢွၵ်ႇၶူင်း ၸၢႆးဝိၼ်းမျၢတ်ႉဢူး လၢတ်ႈ။

တီႈပၢင်ၵုမ်တႃႈၶီႈလဵၵ်းၼၼ်ႉ လႆႈဢုပ်ႇၵုမ်ၵၼ် ၵဵဝ်ႇၵပ်းလွင်ႈ ၵၢၼ်ၼႂ်းပႃႇတီႇ ပွတ်းဢွၵ်ႇၶူင်း၊ ပိူင်လူင်မၼ်း ဢုပ်ႇလွင်ႈဢူးဢွင်ႇတွင်း တၢင်ႇယွၼ်းၼႂ်းသၽႃး၊ လွင်ႈဝႃႈတေလႅၵ်ႈလၢႆႈၸိုဝ်ႈ ၸႄႈမိူင်း 7 ၸႄႈမိူင်း၊ ႁႂ်ႈဢဝ်ၸိုဝ်ႈၸႄႈဝဵင်း တင်ႈပဵၼ်ၸိုဝ်ႈၸႄႈမိူင်း။ ၵမ်းလိုၼ်းသုတ်း လႆႈၸႂ်ၵၼ်ဝႃႈ ဢမ်ႇလႆႈၸႂ်၊ ဢမ်ႇႁပ်ႉလႆႈ၊ သၢၼ်ၶတ်းလွင်ႈၼႆႉ- ၼႆယဝ်ႉ။

ၸၢႆးဝိၼ်းမျၢတ်ႉဢူး ၽွင်းတႅၼ်းသၽႃးၸႄႈမိူင်း လၢတ်ႈဝႃႈ- ပီႈၼွင်ႉတႆးႁဝ်းၼႆႉ တီႈမိူင်းဢႃသမ်ႇ (မိူင်းၵလႃး)ၵေႃႈ မီးယူႇလၢၼ်ႉမၼ်း 100 ပၢႆ၊ ၼႂ်းမိူင်းၶႄႇၵေႃႈမီးလၢၼ်ႉမၼ်း 100 ပၢႆ။ ၵူၺ်းၵႃႈ မိူင်းတႆး ဢၼ်ႁွင်ႉလႆႈမိူင်းတႆး တဵမ်ပၢၵ်ႇတဵမ်သဵင်ၼႆႉ မီးမိူင်းတႆး ဢၼ်ႁဝ်းၶႃႈယူႇသဝ်းမိူဝ်ႈလဵဝ်၊ တွၼ်ႈတၢင်းဢွၵ်ႇ ၸိုင်ႈမိူင်းႁူမ်ႈတုမ်မၢၼ်ႈၼႆႉၵူၺ်း။ လွင်ႈၼႆႉ မီးမႃးၸဵမ်မိူဝ်ႈလႂ်လႂ်လႄႈ ၸင်ႇလႆႈၸပ်းၸိုဝ်ႈမိူင်းတႆး မိူင်းတႆး တေႃႇထိုင်မိူဝ်ႈလဵဝ်။ သင်ၸိူဝ်ႉဝႃႈ ထိုင်ပၢၼ်ႁဝ်းၶႃႈသေ ၸိုဝ်ႈဢၼ်ဝႃႈမိူင်းတႆးၼႆႉ တေႁၢႆလၢႆၵႂႃႇၼႆတႄႉ ႁဝ်းၶႃႈၵူၼ်းမိူင်းတႆးတင်းသဵင်ႈၼႆႉ တေပဵၼ်ၽူႈမီးတၢင်းၽိတ်းယႂ်ႇလူင်ဢၼ်ၵိုၵ်းပိုၼ်းၵႂႃႇ၊ ၵွပ်ႈၼႆလႄႈ ႁဝ်းၶႃႈတိုၼ်းဢမ်ႇႁပ်ႉလႆႈလႃးလႃး- ဝႃႈၼႆ။

ၶေႃႈပိုၼ်ၽၢဝ်ႇ (Statement) သၢၼ်ၶတ်းၼႆႉ တေယိုၼ်ႈတၢင်ႇထိုင်ပႃးတီႈၸွမ်ၸိုင်ႈ/ သၽႃးၵူၼ်းမိူင်း၊ သၽႃးႁူမ်ႈတုမ် လႄႈ သၽႃးၸႄႈမိူင်းတႆး၊ ပႃးၸဵမ်ၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ- ၼႆယဝ်ႉ။

ၸၢႆးဝိၼ်းမျၢတ်ႉဢူး လၢတ်ႈထႅင်ႈဝႃႈ- ၸႄႈမိူင်းဢၼ်ႁဝ်းၶႃႈယူႇသဝ်း မိူဝ်ႈလဵဝ်ၼႆႉ ပဵၼ်လိၼ်မိူင်း တီႈႁဝ်းၶႃႈၵိူတ်ႇ၊ ပဵၼ်သၢႆၸႂ်ႁဝ်းၶႃႈ။ ၸဵမ်မိူဝ်ႈပႆႇမီးဝၢၼ်ႈမိူင်း ၸိုင်ႈမိူင်းႁူမ်ႈတုမ်ၼၼ်ႉ မိူင်းတႆးႁဝ်းၶႃႈၼႆႉ တိုၼ်းမီးမႃးယဝ်ႉလူး။ မိူၼ်ၼင်ႇႁဝ်းၶႃႈဢမ်ႇၽွမ်ႉ လွင်ႈတေဢဝ်ၸိုဝ်ႈၸၢဝ်းၶိူဝ်းႁၢႆသေ ဢဝ်ၸိုဝ်ႈၸႄႈဝဵင်း ၶိုၼ်ႈပဵၼ်ယႂ်ႇၼႆႉ တၢင်ႇၸၢဝ်းၶိူဝ်းၵေႃႈတိုၼ်းတေဢမ်ႇၽွမ်ႉ၊ ၶဝ်ၵေႃႈတိုၼ်းတေႁဵတ်းဢွၵ်ႇလိၵ်ႈပိုၼ်ၽၢဝ်ႇ သၢၼ်ၶတ်း မိူၼ်ႁဝ်းၶႃႈၼႆႉယူႇ- ႁဝ်းၶႃႈယုမ်ႇယမ်ၼင်ႇၼႆ။

သင်ၸိူဝ်ႉဝႃႈ ၶေႃႈယိုၼ်ႈတၢင်ႇထိုင်ၼႂ်းသၽႃး ၶွင်ဢူးဢွင်ႇတွင်းၼႆႉ မၼ်းဢမ်ႇထွႆလင်ပၼ်ၶိုၼ်း၊ မၼ်းဢမ်ႇၶိုၼ်းထွၼ်ပၼ်ၶိုၼ်းၼႆတႄႉ လွင်ႈၼႆႉ တေၸၢင်ႈတုမ်ႉတိူဝ်ႉလွင်ႈငမ်းယဵၼ် ၼႂ်းမိူင်းႁဝ်းလႆႈယူႇ၊ ႁဝ်းၶႃႈႁၼ်ထိုင်ၼင်ႇၼႆ- ၸၢႆးဝိၼ်းမျၢတ်ႉဢူးလၢတ်ႈ။

ဢူးဢွင်ႇတွင်းၼႆႉ ပဵၼ်ၽွင်းတႅၼ်းသၽႃးၵူၼ်းမိူင်း ၼႂ်းပႃႇတီႇသၢင်ႇသီႈ၊ လႆႈတၢင်ႇလၢတ်ႈထိုင်ၼႂ်းသၽႃး မိူဝ်ႈဝၼ်းတီႈ 17/11/2014 ဝႃႈ ၽိူဝ်ႇတႃႉဢဝ်ၸိုဝ်ႈၸၢဝ်းၶိူဝ်း တင်ႈပဵၼ်ၸိုဝ်ႈၸႄႈမိူင်းၼၼ်ႉ တႃႉဢဝ်ၸိုဝ်ႈၸႄႈဝဵင်း တင်ႈၶိုၼ်ႈပဵၼ်ၸိုဝ်ႈၸႄႈမိူင်း။ ၵဵဝ်ႇၵပ်းဢၼ် ဢူးဢွင်ႇတွင်း တၢင်ႇထိုင်ၼႂ်းသၽႃး လွင်ႈၼႆႉ မူႇၸုမ်းၼႂ်းမိူင်းတႆးၵေႃႈ လၢႆလၢႆၸုမ်းၵေႃႈ ဢွၵ်ႇလိၵ်ႈသၢၼ်ၶတ်း။