ၸုမ်းၽူႈၼမ်းၼႂ်း CSSU ဝၼ်းတီႈ 29/10/2014 ။ 1)ငဝ်းလၢႆး ၵၢၼ်ၵိုတ်းယိုဝ်းသၼ်ႇၶွၼ်း၊ 2)ငဝ်းလၢႆး လူင်းလၢႆးမိုဝ်းပတ်း ပိုၼ်ႉယိုတ်ႈယၢဝ်း၊ 3)တိုဝ်ႉတၢင်း ၵၢၼ်လိူၵ်ႈတင်ႈ ၵမ်းသွင်(ပီ 2015) ၸမ်ပူၼ်ႉ၊ 4)ႁဝ်းတႆး တိုၵ်ႉယူႇတီႈငဝ်းလၢႆး ပၼ်သၽေႃးတြႃးၵၼ်၊ ထူႇၼမ်ႉလၢႆးၽူင်ႉသႂ်ႇၵၼ်ယူႇၵွႆး။ တူၺ်းဢဝ်ငဝ်းလၢႆး ပႃႈၼိူဝ်ၼႆႉၵွႆး ၵေႃႈ ႁဝ်းတႆးလီႁူႉတူဝ်ဝႃႈ- ဢၼ်လႂ်ပဵၼ်တီႈၶႅင်၊ လႄႈဢၼ်လႂ်ပဵၼ်တီႈဢူၼ်ႈ တွၼ်ႈ တႃႇပၢႆးတိုၵ်းၵၢၼ်မိူင်း (Political Strategy )မိူင်းတႆးႁဝ်းၼၼ်ႉယူႇ။

ပၢင်ႁူပ်ႉထူပ်းၽူႈၼမ်းတႆး ၵမ်းတီႈ 1 တီႈဝဵင်းလူင်မိူင်းၵွၵ်ႇ ၸိုင်ႈထႆး 02-04/10/2014 သၢႆႉႁႃၶႂႃတႅဝ်းၼင်ႈ- ၸဝ်ႈၸွႆႉ မင်းႁၢႆး၊ ၸၢႆးၼုတ်း၊ ၸၢႆးသွင်သီႇ၊ ၸဝ်ႈၵၢႆႇၾႃႉ၊ ႁူဝ်ပဝ်ႈ SNDP ၸၢႆးဢၢႆႈပဝ်း ႁူဝ်ပဝ်ႈ RCSS ၸဝ်ႈယွတ်ႈသိုၵ်း၊ ႁူဝ်ပဝ်ႈ SNLD ၸဝ်ႈၶုၼ်ထုၼ်းဢူး၊ ၽူႈၼမ်းၼႃႈ SSPP ၸဝ်ႈသိူဝ်ထႅၼ်ႈ

ၼင်ႇႁိုဝ်ႁဝ်းၶႃႈ တေမူၼ်ႉမႄးလႆႈတီႈဢူၼ်ႈသေ ႁဵတ်းႁႂ်ႈတီႈၶႅင်ၵၢၼ်မိူင်း-မိူင်းတႆးႁဝ်းမၼ်ႈ ၸႄႇၼၼ်ႉ ႁဝ်းၶႃႈလူဝ်ႇႁူမ်ႈၵၼ်ႁဵတ်းၵၢၼ်ယဝ်ႉ၊ ဝဵၼ်ႉဝႄႈၵႂၢမ်းလၢတ်ႈလႄႈတၢင်းႁဵတ်း ဢၼ်တေႁဵတ်းႁႂ်ႈမၢင်ၸႂ်(တိူဝ်ႉသၢင်ႈ)ၵၼ်ၼၼ်ႉယဝ်ႉ၊ ၼႆႉဢမ်ႇၸႂ်ႈပၼ်သၽေႃး၊ ပဵၼ် ၵၢၼ်တိူၼ်သတိႁႂ်ႈႁဵတ်းၵၢၼ်ႁူမ်ႈၵၼ် တႃႇငမ်းယဵၼ်မိူင်းတႆးႁဝ်းၼၼ်ႉတင်းပိုၵ်း။
တေႁဵတ်းႁိုဝ်ႁူမ်ႈၵၼ်ႁဵတ်းလႃႇ ? လၢႆးႁဵတ်းမၼ်းၼႃႇမီးလႂ် ? ၼႆႁူႉတေထၢမ်ၵၼ်။ လွင်ႈၼႆႉ ႁဝ်းၶႃႈၸုမ်းၽူႈၼမ်းၼႂ်းၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ႁၼ်ထိုင်ဝႃႈ တင်ႈဢဝ်ဝၼ်းတီႈ 02/10/2014 မႃးၼႆႉ ၵွပ်ႈၽူႈၼမ်းတႆး(ၵၢၼ်မိူင်း/ၵၢၼ်သိုၵ်း) 2 ပႃႊတီႈ 2 တပ်ႉသိုၵ်းၸပ်းမိုဝ်းၵၼ်၊ တေႁူမ်ႈၵၼ်ႁဵတ်းၵၢၼ်မိူင်းတႃႇတႆး တႃႇမိူင်းတႆး ၼႆလႄႈလႆႈႁူမ်ႈၵၼ်ဝၢင်းလၵ်းပိူင်ၵၢၼ်မိူင်း တႃႇတေႁဵတ်းၵၢၼ်ႁူမ်ႈၵၼ်၊ ယူႇၼိူဝ်သဵၼ်ႈ တၢင်းၵၢၼ်မိူင်းဢၼ်လဵဝ်သေ ႁဵတ်းၵၢၼ်ႁူမ်ႈၵၼ်ၵႂႃႇၸိူင်ႉၼႆ။

လၢႆးႁဵတ်းမၼ်းတေမီးဝႃႈ- 1)ဢမ်ႇလၢတ်ႈၵႂၢမ်းဢၼ်တေမၢင်ၸႂ်ၵၼ်၊ 2)ဢမ်ႇႁဵတ်းၵၢၼ် ဢၼ်တေၸၢင်ႈတုမ်ႉတိူဝ်ႉၵၼ်၊ 3)ဢမ်ႇယႃႉၵဝ်းၽွၼ်းၵၢၼ်(ဢၼ်လီ)ၵၼ်လႄႈ ပၼ် သတိၽွၼ်းၵၢၼ်(ဢၼ်ၸႃႉ)ၵၼ်လူၺ်ႈၸႂ်ဝင်လီမဵတ်ႉတႃႇ၊ 4)ၵႆႉၶဝ်ႈႁႃသူႇၸႂ်းၵၼ်။ ၼႆႉပဵၼ်ၸၼ်ႉပိုၼ်ႉထၢၼ်ဢၼ်ၵူႈၵေႃႉတေႁဵတ်းလႆႈ၊ ၵွပ်ႈဝႃႈပဝ်ႈမၢႆၵၢၼ်မိူင်းၵူႈၸုမ်းမိူၼ် ၵၼ်၊ တႃႇတႆး တႃႇမိူင်းတႆးၼႆလွၼ်ႉလွၼ်ႉ။

ႁဵတ်းၵၢၼ်ႁူမ်ႈၵၼ်ၼႆႉတေမီးဝႃႈ- 1)ၵၢၼ်ၸွႆႈလိူဝ်သင်ၶူမ်း (ၵၢၼ်ၸွႆႈထႅမ်တူင်ႇဝူင်းၵူၼ်း)၊ 2)ၵၢၼ်ပၢႆးပၺ်ၺႃတၢင်းၸၢင်ႈ၊ 3)ၵၢၼ်ၾိင်ႈငႄႈၸိူဝ်းၼႆႉ၊ ႁူမ်ႈတင်း 4)ၵၢၼ်သူၼ်းတုမ် ၵူၼ်းမိူင်းၵေႃႈၼင်ႇၼၼ်၊ ၵွပ်ႈၸုၵ်းၼိူဝ်ပိုၼ်ႉထၢၼ်လၵ်းပိူင်ၵၢၼ်မိူင်း ဢၼ်လဵဝ်ၵၼ်လႄႈ ၶဝ်ႈႁဵတ်းၸွမ်းၵၼ် (ႁဵတ်းႁူမ်ႈၵၼ်) လႆႈမူၼ်ႈမူၼ်ႈသိူဝ်းသိူဝ်း။
ၵွပ်ႈပိူဝ်ႈၵၢၼ်ႁူပ်ႉထူပ်းၽူႈၼမ်းတႆး ၵမ်း 2 ၵမ်း 3 တေမီးထႅင်ႈယူႇၶိူဝ်းၶိူဝ်းလႄႈ တေႁဵတ်းႁႂ်ႈလွင်ႈၵွင်ႉၶမ်၊ လွင်ႈမၢတ်ႇမၢင်ၸတ်ႉၸႂ်ၵၼ်ၸၢင်ႁၢႆသေ တေႁဵတ်းႁႂ်ႈ လွင်ႈႁဝ်းတႆးၶိုၼ်းလီၵၼ်၊ ဝႆႉၼႃႈယုမ်ႉယၢႆႈ လူၺ်ႈၸႂ်ဢူတ်းယိူၼ်ႉ(ၶၼ်တီ) တင်းၸႂ်ႁပ်ႉတွၼ်ႈ(မဵတ်ႉတႃ)သေ ႁဵတ်းႁႂ်ႈမိူင်းတႆးၵတ်းယဵၼ်ႁိၼ်ႉၼွၼ်း၊ သိုပ်ႇႁဵတ်းႁႂ်ႈမိူင်းႁူမ်ႈတုမ်မျၢၼ်ႇမႃႇ လီမူၼ်ႈ သိူဝ်းသႃႇၵႂႃႇယုမ်ႇယမ်ၼင်ႇၼႆ။