ၼၢင်းၵွင်တိပ်ႉ ၽူႈတူင်ႉၼိုင် သုၼ်ႇလႆႈ ၸဝ်ႈႁႆႈၸဝ်ႈၼႃး၊ ယွၼ်ႉၵၢၼ်ၶုတ်းၶမ်း
ပွတ်းၼႃးႁႆးလူင် ၸိုင်ႈတႆးပွတ်းဢွၵ်ႇ၊ လႆႈႁပ်ႉရၢင်းဝလ်း (သူး)
ၸဝ်ႈသုၸၼ်ႇတီႇ ၵေႃႉတီႈ 7 ။
|
ၶူးသွၼ်ၼၢင်းၵွင်တိပ်ႉ (ၼၢင်းလႃႈ) ႁပ်ႉရၢင်းဝလ်း/ သူး ၸဝ်ႈသုၸၼ်ႇတီႇ |
ပူၼ်ႉမႃးမိူဝ်ႈဝၼ်းတီႈ 25/10/2014 ၶူးသွၼ်ၼၢင်းၵွင်တိပ်ႉ (ၼၢင်းလႃႈ)
ၵေႃႉတူင်ႉၼိုင် တေႃႇသူႈ တုၵ်းယွၼ်း သုၼ်ႇလႆႈ ၸဝ်ႈႁႆႈၸဝ်ႈၼႃး
ၸိူဝ်းထုၵ်ႇၶီႈလိၼ်ၶီႈသၢႆးထူမ်ႁႆႈ တူင်ႈၼႃး ယွၼ်ႉၵၢၼ်ၶုတ်းၶမ်း
ပွတ်းထုင်ႉၼႃးႁႆးလူင် ၼႂ်းၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း
ၸိုင်ႈတႆးပွတ်းဢွၵ်ႇ၊ လႆႈႁပ်ႉရၢင်းဝလ်း (သူး) ၸဝ်ႈသုၸၼ်ႇတီႇ
ဢၼ်မွပ်ႈယိုၼ်ႈယွင်ႈယေႃး ၼမ်ႉၵတ်ႉၵူၼ်းၼုမ်ႇ
ပိူဝ်ႈတႃႇႁႂ်ႈပဵၼ်တူဝ်ယၢင်ႇၵူၼ်းၼုမ်ႇ ႁဵတ်းသၢင်ႈၵၢၼ်ငၢၼ်း ၵႂႃႇ မိူဝ်းၼႃႈ။
ပၢင်ၵႅဝ်ႈ မွပ်ႈရၢင်းဝလ်း (သူး) ၸတ်းႁဵတ်းတီႈ ဝဵင်းၵဵင်းႁၢႆး
ၸိုင်ႈထႆးပွတ်းႁွင်ႇ၊ မီးပီႈၼွင်ႉတီႈၸမ်တီႈၵႆ၊ ၵူၼ်းၼုမ်ႇ ၸိူဝ်းတူင်ႉၼိုင်
တႃႇသုၼ်ႇလႆႈၻီႊမွၵ်းၶရေႊၸီႊ ၶဝ်ႈႁူမ်ႈႁိမ်းၸမ်ပၢၵ်ႇ။ ရၢင်းဝလ်းၼႆႉ
ပဵၼ်ၶႅပ်းဝႂ်ယွင်ႈယေႃး ၼမ်ႉၵတ်ႉၵူၼ်းၼုမ်ႇ ဢိၵ်ႇ ငိုၼ်းၻေႃႊလိူဝ်ႊ 3,000 ။
|
ပၢင်ၵႅဝ်ႈ မွပ်ႈရၢင်းဝလ်း ၸဝ်ႈၼၢင်းသုၸၼ်ႇတီႇ ပွၵ်ႈထူၼ်ႈ 7 ပီ 2014 |
လၢႆလၢႆပီပူၼ်ႉမႃးၼႆႉ ရၢင်းဝလ်း (သူး) ဢၼ်ၸဝ်ႈၼၢင်းသုၸၼ်ႇတီႇ
(ၼၢင်းၾႃႉၵဝ်ႇမိူင်းသီႇပေႃႉ) မွပ်ႈပၼ်ၼႆႉ လႆႈၸတ်းမွပ်ႈပၼ်ၽူႈတူင်ႉၼိုင်
ၵၢၼ်တူင်ႇဝူင်းၵူၼ်း၊ ၵေႃႉဢၼ်ႁဵတ်းသၢင်ႈၼႃႈၵၢၼ် ဢၼ်မီးၼမ်ႉတွၼ်းၽွၼ်းလီ
ပိူဝ်ႈတႃႇၵူၼ်းတင်းၼမ်။ ၵမ်းပွၵ်ႈႁႅၵ်ႈသုတ်း မိူဝ်ႈပီ 2008
ပဵၼ်ၸၢႆးၽူးမိူင်း ၽူႈၸွႆႈႁႅင်းၵၢၼ်။ ပီ 2009 ၸၢႆးသႅင်ၽၼ်း
ၽူႈႁၢပ်ႇၵၢၼ်ပူၵ်းပွင် မူႇဝၢၼ်ႈၼႂ်းမိူင်း။ ပီ 2010 ၼၢင်းမွၼ်းၵဵင်
ၽူႈႁၢပ်ႇၵၢၼ်ပၢႆးပၺ်ၺႃလႄႈ ၼႂ်းၸုမ်းၵပ်းသၢၼ် လွင်ႈၼၢင်းယိင်းတႆး။ ပီ 2011
မေႃယႃၸၢႆးပေႇတ လွႆၵေႃႇဝၼ်း။ ပီ 2012 ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း
(လၵ်းတႅင်ႇ) ဢိူင်ႇပဵင်းလူင် ၸႄႈဝဵင်းဝဵင်းႁႅင်။ ပီ 2013 ၸၢႆးသၢမ်ၾူၼ်သႅင်
ၼမ်ႉၶမ်း လုၵ်ႈၸုမ်းပႃႊတီႊႁူဝ်သိူဝ်၊ ၵေႃႉႁပ်ႉပုၼ်ႈၽွၼ်း ၾၢႆႇပၢႆးပၺ်ၺႃလႄႈ
ၵၢၼ်ၼွၵ်ႈမိူင်း။ ပီ 2014 ၼႆႉ ၶူးသွၼ် ၼၢင်းလႃႈ ပဵၼ်ၵေႃႉလႆႈႁပ်ႉရၢင်းဝလ်း
ၵေႃႉထူၼ်ႈ 7 ၼႆႉ။
|
ၽူႈၶဝ်ႈႁူမ်ႈ ပၢင်ၵႅဝ်ႈမွပ်ႈရၢင်းဝလ်း ၸဝ်ႈၼၢင်းသုၸၼ်ႇတီႇ ဢၼ်ၸတ်းတီႈၵဵင်းႁၢႆး |
Tags:
Human Right,
News