ပူၼ်ႉမႃးမိူဝ်ႈဝၼ်းတီႈ 04/10/2014 မၢၵ်ႇတႅၵ်ႇတီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း လၢႆတီႈ။ တီႈၼႃႈတိူင်းသိုၵ်း ဝၼ်းဢွၵ်ႇ (ယပၶ) တူၼ်ႈတီး တီႈၼိုင်ႈ၊ တီႈၼႃႈတပ်ႉၾၢႆႇတိတ်းတေႃႇၵပ်းသိုပ်ႇ 212 ၊ ၼႃႈလုမ်းၾၢႆႇပလိၵ်ႈ ၵုမ်းၸတ်းသဵၼ်ႈတၢင်း ၸိူဝ်းၼႆႉ။

ၵူၼ်းတူၼ်ႈတီးၵေႃႉၼိုင်ႈလၢတ်ႈဝႃႈ- တႅၵ်ႇၼႂ်းပွၵ်ႉၸဝ်ႈၸၢမ်ႇထုၼ်း ၼိူဝ်သဵၼ်ႈတၢင်းပူဝ်ႇၶျူၵ်ႈ၊ ၼႃႈတိူင်းသိုၵ်း ယပၶ တူၼ်ႈတီး၊ တီႈလၢၼ်ႇ/ၵဵတ်ႉ ၽၵ်းတူလူင်မၢႆ 1 လုၵ်ႈၼိုင်ႈ၊ ဢမ်ႇမီးလွင်ႈတိူဝ်ႉ ဝၢတ်ႇသင်၊ လဵၵ်းမုင်း ၸလွပ်ႈ/သႃလႃး တီႈပိူၼ်ႈၼင်ႈပႂ်ႉၶီႇလူတ်ႉၵႃးလင်ၼိုင်ႈ လဵၵ်းမၼ်းပိဝ်ၶိုၼ်ႈၵႂႃႇ။ လုၵ်ႈၼိုင်ႈ တႅၵ်ႇတီႈပွၵ်ႉ ၵျွင်းၵျီးၸူႉ၊ တီႈၼႃႈၽၵ်းတူ ထူးဝၼ်းထူး တပ်ႉၾၢႆႇတိတ်းတေႃႇၶွင်သိုၵ်းမၢၼ်ႈ၊ ၼႆႉၵေႃႈ ဢမ်ႇမီးလွင်ႈတိူဝ်ႉဝၢတ်ႇ။ ထႅင်ႈလုၵ်ႈၼိုင်ႈ တႅၵ်ႇတီႈပွမ်ႈယၢမ်း ပလိၵ်ႈ မၢႆ 15 ၾၢႆႇၵုမ်းၸတ်း သဵၼ်ႈတၢင်း၊ တီႈၼႆႈ မီးၵူၼ်းဝၢတ်ႇၸဵပ်း 2 ၵေႃႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ႁွင်ႈၵၢၼ်လူင်ၾၢႆႇႁူမ်ႇလူမ်ႈ လူင်ပွင်ၸိုင်ႈမိူင်းတႆး တင်း ၽူႈၵွၼ်းတပ်ႉပလိၵ်ႈမိူင်းတႆး၊ တပ်ႉၾၢႆႇၽဵဝ်ႈမၢၵ်ႇမၢႆ 903 ၶဝ် လူင်းၵႂႃႇၵူတ်ႇထတ်း။ ၵူတ်ႇထတ်းတူၺ်း လႆႈႁၼ်မၢၵ်ႇဢွၼ်ႇထႅင်ႈ 2 လုၵ်ႈ ဢၼ်ဢမ်ႇတႅၵ်ႇ တီႈႁိမ်းလုမ်းတိူင်းသိုၵ်း ယပၶ - ၼႆယဝ်ႉ။

ဢၼ်တႅၵ်ႇမီး 3 တီႈ၊ ဢၼ်ဢမ်ႇတႅၵ်ႇမီး 2 လုၵ်ႈ။ ယွၼ်ႉပိူဝ်ႈမၢၵ်ႇတႅၵ်ႇၼႆႉသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တူၵ်းၸႂ်။ ၵူၼ်းမိူင်းၸိူဝ်းႁိူၼ်းယူႇႁိမ်းမၢၵ်ႇတႅၵ်ႇၶဝ်ဝႃႈ သဵင်မၼ်းလင်ၼႅၼ်ႇ၊ တူၵ်းၸႂ်တႄႉတႄႉဝႃႈဝႃႈ၊ ႁိူၼ်း ၽၵ်းတူၵႅဝ်ႈ (မၢၼ်ႇ)ၸိူဝ်းၼႆႉ ပေႃးသၼ်ႇလူင်ၵႂႃႇ၊ ထွမ်ႇတူၺ်းၵေႃႈ မၼ်းဢမ်ႇၸႂ်ႈမၢၵ်ႇတႅၵ်ႇၶၢဝ်းပွႆး ဢွၵ်ႇဝႃႇၼႆ ႁူႉၵမ်းလဵဝ်- ဝႃႈၼႆ။

ယွၼ်ႉမၢၵ်ႇတႅၵ်ႇ ဝဵင်းတူၼ်ႈတီးၼႆႉသေ ၸဝ်ႈၼႃႈတီႈမၢၼ်ႈဢဝ်ႁူမ်ႇလူမ်ႈဝႆႉၼႅၼ်ႈၼႃ။ ၾၢႆႇၼိုင်ႈၵေႃႈ ၵူတ်ႇထတ်းၵူၼ်းၶဝ်ႈၵူၼ်းဢွၵ်ႇ ၼႂ်းဝဵင်းတူၼ်ႈတီးပႃးၽွင်ႈ- ၼႆယဝ်ႉ။