ႁိူဝ်းဝိၼ်ႁေႊလီႊၶွပ်ႊတိူဝ်ႊ သိုၵ်းမၢၼ်ႈမႃးလူင်း တီႈတပ်ႉၼမ်ႉပုၵ်း ၼႂ်းၸႄႈဝဵင်းၵေးသီး၊ သိုၵ်းမၢၼ်ႈ ဢဝ်ႁိူဝ်းဝိၼ် တိုၵ်းမႃးပၼ်ႇလဵပ်ႈ၊ ယိုဝ်းၶိူင်ႈၵွင်ႈလူင် ၽၢမ်းလွၵ်ႇ။

ၵဵဝ်ႇၵပ်းလွင်ႈၼႆႉ ဝၼ်းတီႈ 14/10/2014 (မိူဝ်ႈဝႃး) ပွတ်းၼႂ် ယၢမ်း 11 မူင်း ႁိူဝ်းဝိၼ်မႅင်းဝီႈ (ႁေႊလီႊၶွပ်ႊတိူဝ်ႊ) ၶွင်သိုၵ်းမၢၼ်ႈ မႃးလူင်းတီႈၼမ်ႉပုၵ်း။ ဢွၼ်ၼႃႈႁိူဝ်းဝိၼ်မႅင်းဝီႈ တေမႃးလူင်းၼႆႉ သိုၵ်းမၢၼ်ႈၶဝ် ဢဝ်ႁိူဝ်းဝိၼ်တိုၵ်း 3 လမ်း မႃးလဵပ်ႈပၼ်ႇၼိူဝ်ၵၢင်ႁၢဝ် ပေႃးယဝ်ႉႁိူဝ်းဝိၼ်မႅင်းဝီႈ ၸင်ႇလူင်း- ၼႆယဝ်ႉ။

ပူၼ်ႉမႃးမိူဝ်ႈဝၼ်းတီႈ 10/10/2014 ႁိူဝ်းဝိၼ်မႅင်းဝီႈသိုၵ်းမၢၼ်ႈ မႃးလူင်းတီႈၼမ်ႉပုၵ်း ၼင်ႇၵဝ်ႇ။ ထိုင်မႃးဝၼ်းတီႈ 13/10/2014 ၵေႃႈမႃးလူင်းထႅင်ႈ။ ၵမ်ႈၽွင်ႈဝႃႈ သိုၵ်းမၢၼ်ႈမႃးသူင်ႇၶိူင်ႈၵွင်ႈလူင်၊ သူင်ႇၵူၼ်း၊ မႃးႁပ်ႉၵူၼ်းဝၢတ်ႇၸဵပ်း ၸိူဝ်းၼႆႉ။

ဢွၼ်ၼႃႈႁိူဝ်းဝိၼ်သိုၵ်းမၢၼ်ႈတေမႃးလူင်း ၼႂ်းဝၼ်းတီႈ 13 ၼၼ်ႉ သိုၵ်းမၢၼ်ႈယူႇတီႈဝၢၼ်ႈတၽၢၼ်ႇသေ ယိုဝ်းၶိူင်ႈ ၵွင်ႈလူင် 60mm 20 လုၵ်ႈပၢႆ။ ယိုဝ်းသႂ်ႇႁိမ်းဝၢၼ်ႈပၢင်ႇၸေႈ ၸိူဝ်းၼႆႉ။ ႁဵတ်းႁႂ်ႈၵူၼ်းဝၢၼ်ႈ ဢွၼ်ၵၼ်ပၢႆႈၶဝ်ႈၵႂႃႇ ယူႇတီႈ ဝတ်ႉ/ၵျွင်းဝၢၼ်ႈဝၢပ်ႈ- ၼႆယဝ်ႉ။

ၵူၼ်းဝၢၼ်ႈၵမ်ႈၽွင်ႈဝႃႈ- သိုၵ်းတႆးဢမ်ႇၵႂႃႇယိုဝ်းၶဝ်ၵေႃႈ သိုၵ်းမၢၼ်ႈယိုဝ်းမၢၵ်ႇလူင်၊ တီႈတႄႉမၼ်း ၶဝ်ယိုဝ်းလွၵ်ႇ- ဝႃႈၼႆ။