ပူၼ်ႉမႃးမိူဝ်ႈဝၼ်းတီႈ 13/10/2014 ၽူႈၵွၼ်းတိူင်းသိုၵ်း ဝၼ်းဢွၵ်ႇၵၢင် ယလၶ (ၶူဝ်လမ်) ၸွမ်ႁၢၼ် ၵူဝ်ႇၵူဝ်ႇၼၢႆႇ လၢတ်ႈတီႈ ၽူႈၼင်ႈလုမ်း တပ်ႉသိုၵ်းၸိုင်ႈတႆး (SSPP/SSA) တီႈၶူဝ်လမ် ဝႃႈ ႁႂ်ႈတပ်ႉသိုၵ်းၸိုင်ႈတႆး ပၵ်းယူႇႁၢင်ႇပၼ်သဵၼ်ႈတၢင်း ပၢင်ႇၸေႈ-လွႆယွႆး-ၶူဝ်လွင်း ၼိုင်ႈၾၢႆႇ 3 လၵ်း- ဝႃႈၼႆ။

သဵၼ်ႈတၢင်း ပၢင်ႇၸေႈ-လွႆယွႆး-ၶူဝ်လွင်းၼႆႉ ယူႇၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ ပဵၼ်သဵၼ်ႈတၢင်း ဢၼ်သိုၵ်းမၢၼ်ႈၵႂႃႇမႃး သူင်ႇၶဝ်ႈၼမ်ႉတၢင်းၵိၼ် သဵၼ်ႈတၢင်းၼိုင်ႈ၊ ႁၢင်ႇယၢၼ်ဝၢၼ်ႈႁႆး ငဝ်ႈငုၼ်း SSPP/SSA မွၵ်ႈ 5-6 လၵ်းၵူၺ်း။ သဵၼ်ႈတၢင်းၼႆႉ SSPP/SSA ႁဵတ်းသၢင်ႈမႃး မိူဝ်ႈပီ 1995 ၊ ၾၢႆႇသိုၵ်းမၢၼ်ႈမႃး ပၵ်းယူႇမိူဝ်ႈပီ 2005 ၵူၺ်း- ၼႆယဝ်ႉ။

ဢွၼ်ၼႃႈၼႆႉ ဝၼ်းတီႈ 09/10/2014 ၵေႃႈ ၽွင်းလူင်ၾၢႆႇႁူမ်ႇလူမ်ႈလႄႈလႅၼ်လိၼ် လူင်ပွင်ၸိုင်ႈမိူင်းတႆး ၸဝ်ႈသိုၵ်းလူင်ဢွင်ႇတူႇ တၢင်တူဝ်ၸွမ်ၽွင်းလူင်မိူင်းတႆး၊ လူင်းလၢႆးမိုဝ်းသေ တႅမ်ႈလိၵ်ႈထိုင် ၽူႈၼင်ႈလုမ်း တပ်ႉသိုၵ်းၸိုင်ႈတႆး (SSPP/SSA) ဝဵင်းလူင်တူၼ်ႈတီး၊ ႁႂ်ႈ တပ်ႉသိုၵ်းၸိုင်ႈတႆး  ထွၼ်ဢွၵ်ႇတပ်ႉပၢင်သဝ်း လႄႈ ႁႅင်းသိုၵ်းဢၼ်တူင်ႉၼိုင် ၼႂ်းပိုၼ်ႉတီႈ တွၼ်ႈၾၢႆႇဢွၵ်ႇပၢင် ၼႂ်းၵုၼ်ပၢင်ၵုၼ်ၶူင်း။ တၢင်းပွတ်း ဢိူင်ႇမိူင်းၵၢဝ် ၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ၊ ပွတ်းတွၼ်ႈထုင်ႉလွႆလၢင်း ၼမ်ႉသီႇၸဵင်ႇၸိူဝ်းၼႆႉ တေဢမ်ႇလႆႈတူင်ႉၼိုင်၊ ႁႂ်ႈထွၼ်ဢွၵ်ႇၵႂႃႇယူႇ ၾၢႆႇတူၵ်းပၢင်သဵင်ႈသဵင်ႈ- ဝႃႈၼႆ။

ၵုၼ်ပၢင်ၵုၼ်ၶူင်းၼႆႉ ပဵၼ်တွၼ်ႈၾၢႆႇတူၵ်းၶူင်း၊  တေႃႇၼႃႈ-ၼႃႈလိၼ်ဝႃႉ (UWSA) ၵုမ်းၵမ် ၾၢႆႇဢွၵ်ႇၶူင်း။