ဝတ်ႉၾႃႉဝဵင်းဢိၼ်း လႅၼ်လိၼ်တႆး-ထႆး ၸတ်းပၢင်ပွႆးလူင် “ဝႆႈသႃၾႃႉဝဵင်းဢိၼ်း” ၼႂ်းဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈၶူပ်ႇ 67 ပီ။ လူႇတၢၼ်းၽြႃးႁိၼ်သႅင်၊ ၸဝ်ႈႁေႃၶမ်း ၾႃႉၼရေးသူၼ်၊ ၽႄၵုသူလ်ထိုင် ၽူႈၼမ်းသိုၵ်း လႄႈ သိုၵ်းႁၢၼ် ႁူမ်ႈပႃးၽူႈဢွၼ်ႁူဝ်တႆး ၸဝ်ႈၵွၼ်းၸိူင်း။

မိူဝ်ႈဝၼ်းတီႈ 7-8/02/14 ပူၼ်ႉမႃးၼႆႉ တီႈဝတ်ႉၾႃႉဝဵင်းဢိၼ်း လႅၼ်လိၼ်တႆး-ထႆး ၼႂ်းဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇ၊ ၸတ်းပၢင်ပွႆးယႂ်ႇလူင် “ပွႆးဝႆႈသႃၾရႃႉဝဵင်းဢိၼ်း” ။ မီးၵၢၼ်လူႇတၢၼ်း ႁုၼ်ႇႁၢင်ႈပုတ်ႉထၸဝ်ႈ / ၽြႃးႁိၼ်သႅင်၊ လူႇတၢၼ်းယိူင်းၸူးထိုင်ၸဝ်ႈႁေႃၶမ်း ၾႃႉၼရေးသူၼ် ဢိၵ်ႇၽႄၵုသူလ် ထိုင်ၽူႈၼမ်းသိုၵ်းလႄႈ သိုၵ်းႁၢၼ်ထႆး ၸိူဝ်းလူႉသဵင်ႈသုတ်းမုၼ်ၵႂႃႇ တႃႇၸိူဝ်ႉၸၢတ်ႈ ဝၢၼ်ႈမိူင်း၊ ႁူမ်ႈပႃးလူႇတၢၼ်းထိုင် ၸဝ်ႈၵွၼ်းၸိူင်း ၽူႈယၢမ်ႈဢွၼ်ႁူဝ်တပ်ႉသိုၵ်းလုၵ်ႉၽိုၼ်ႉ ၸိုင်ႈတႆး (SURA) ။ ပၢင်ပွႆးၼႆႉ ၸတ်းႁဵတ်းမႅၼ်ႈၶၢဝ်းလဵဝ် ၵၼ်တင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 67 ပီ။

ၸဝ်ႈၶူးပၺ်ၺႃ ၸဝ်ႈၵွၼ်းဝတ်ႉၾႃႉဝဵင်းဢိၼ်း လၢတ်ႈဝႃႈ- ၽူႈဢွၼ်ႁူဝ်ၸတ်းပၢင်ပွႆးၼႆႉ ပဵၼ်သင်ၶၸဝ်ႈ မီးၸိုဝ်ႈ သဵင်ၼႂ်းမိူင်းထႆးတူၼ်ၼိုင်ႈ (မၼ်းၸဝ်ႈဢမ်ႇၶႂ်ႈဢွၵ်ႇၸိုဝ်ႈ)။ မၼ်းၸဝ်ႈၼႆႉ မီးၸႂ်သတ်ႉထႃးၼိူဝ် ၸဝ်ႈႁေႃၶမ်း ၾႃႉၼရေးသူၼ် (ၸဝ်ႈႁေႃၶမ်းတူၼ်ဢၼ်တိုၵ်းပူတ်းပွႆႇပၼ်ၸိုင်ႈထႆးၵွၼ်းၶေႃ ပူၼ်ႉလွတ်ႈၶႃႈမၢၼ်ႈ မိူဝ်ႈ 400 ပီပၢႆပူၼ်ႉမႃး) ။ လိူဝ်သေၼၼ်ႉ မၼ်းၸဝ်ႈမီးၸႂ်ၶႂ်ႈၵမ်ႉၸွႆႈသင်ၶ ဝတ်ႉၽြႃႉဝဵင်းဢိၼ်း- ဝႃႈၼႆ။

ပၢင်ပွႆးဢၼ်ၸတ်းႁဵတ်းပွၵ်ႈၼႆႉ လႆႈဝႃႈပဵၼ်ပၢင်ပွႆးလူႇတၢၼ်းယႂ်ႇလူင် သဵင်ႈငိုၼ်းထႆးၼပ်ႉႁူဝ်လၢၼ်ႉ၊ မီးသင်ၶၸဝ်ႈ လႆႈႁပ်ႉၼိမၼ်တၼမႃးႁပ်ႉတၢင်းလူႇတၢင်းတၢၼ်း ႁူမ်ႈ 1,000 တူၼ်ပၢႆ၊ ဢွင်ႈတီႈပၢင်ပွႆး ၸတ်းတီႈၵွင်းႁေႃသိလ် ႁိမ်းတီႈဝႆႉၶုမ်ၵုတ်းၸဝ်ႈၵွၼ်းၸိူင်း။ ဝၼ်းပိုတ်ႇပၢင်ပွႆး မီးၽူႈၵွၼ်းၸႄႈတွၼ်ႈ ဝဵင်းၵဵင်းမႆႇ မႃးပဵၼ်ႁူဝ်ပဝ်ႈပိုတ်ႇပၢင်ပွႆး၊ ၼႂ်းဝၼ်းလူႇတၢၼ်း မီးသင်ၶၸိုဝ်ႈယႂ်ႇထႆးလၢႆၸဝ်ႈလၢႆၸႄႈဝဵင်း မႃးႁူမ်ႈႁေႃးထမ်း ဝၢၼ်းပရိတ်ႈ။ ပၢင်ပွႆးၼႆႉ မီးတၵ်ႉၵႃႇသတ်ႉထႃး ပီႈၼွႆႉထႆး-တႆး လၢႆတီႈလၢႆတၢင်း မႃးၶဝ်ႈႁူမ်ႈၼပ်ႉႁူဝ်ႁဵင်ၵေႃႉ- ၼႆယဝ်ႉ။

ဝတ်ႉၾႃႉဝဵင်းဢိၼ်းၼႆႉ ပဵၼ်ဝတ်ႉသင်ၶတႆး ယူႇၼိူဝ်သၼ်လွႆလႅၼ်လိၼ်တႆး- ထႆး၊ မိူဝ်ႈလဵဝ် မိးၸဝ်ႈၽိၵ်ႉၶုၸဝ်ႈတင်း သႃႇမၼေႇ ႁူမ်ႈ 60 တူၼ်ပၢႆ။ ၸဝ်ႈၵွၼ်းၸိူင်း (ၸဝ်ႈမူဝ်းႁဵင်း) ပဵၼ်ၽူႈဢွၼ်ႁူဝ်ၵေႃႇသၢင်ႈဝႆႉမိူဝ်ႈ 40 ပီပၢႆပူၼ်ႉမႃး။ မိူဝ်ႈလဵဝ် ဢွင်ႈတီႈၼႂ်းဝၢင်းဝတ်ႉၾႃႉဝဵင်းဢိၼ်း မီးဝႆႉမႃရၸိၼၸေႇတီႇ(ၵွင်းမူး)၊ ႁုၼ်ႇႁၢင်ႈၽြႃးလူင်၊ တီႈဝိပသ်ႉသၼႃႇၵမ်မထၢၼ် လႄႈ ၶုမ်ၵုတ်းၸဝ်ႈၵွၼ်းၸိူင်း ၸိူဝ်းၼႆႉ။