ၶွင်ႊသီႊဢဝ်ၶိုၼ်းၸိုင်ႈတႆး ၸတ်းပၢင်လိူၵ်ႈတင်ႈ ႁူဝ်ပဝ်ႈမႂ်ႇ တီႈငဝ်ႈငုၼ်းလွႆတႆးလႅင်း။ မီးၵၢၼ်ယိုၼ်ႈၸိုဝ်ႈ ႁူဝ်ပဝ်ႈမႂ်ႇဝႆႉ 5 ၸဝ်ႈ။ သင်ဝႃႈဢမ်ႇလိူၵ်ႈလႆႈ ၸဝ်ႈယွတ်ႈသိုၵ်း ႁၢင်ႈႁႅၼ်းဝႆႉႁပ်ႉတၼ်းႁဵင်း သိုပ်ႇၵႂႃႇထႅင်ႈ။

ဝၼ်းတီႈ 13/02/14 (မိူဝ်ႈၼႆႉ) ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းပၢင်လိူၵ်ႈတင်ႈ ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး (RCSS) တီႈငဝ်ႈငုၼ်းလွႆတႆးလႅင်း၊ ပွၵ်ႈၵမ်းတီႈ 4 လူၺ်ႈလွၵ်းလၢႆး ၻီႊမွၵ်းၶရေႊသီႊ။

ၵဵဝ်ႇၵပ်းလွင်ႈၼႆႉ ယွၼ်ႉၸွမ်သိုၵ်းယွတ်ႈသိုၵ်း ဢၼ်ႁပ်ႉတၼ်းႁဵင်းႁူဝ်ပဝ်ႈ RCSS/SSA မႃးထပ်းၵၼ်  3 ၸူဝ်ႈပၢၼ် လႆႈတၢင်ႇလၢတ်ႈႁၢႆးငၢၼ်း ၼႂ်းပၢင်ၵုမ်ႁူဝ်ႁုပ်ႈပီ ၼႂ်းလိူၼ်ၵျႅၼ်ႊၼိဝ်ႊရီႊ (2014)ၼၼ်ႉဝႃႈ- ယႃႇပေတၢင်ႇယိုၼ်ႈၸိုဝ်ႈမၼ်းၸဝ်ႈ ၼႂ်းဢၼ်တေလိူၵ်ႈတင်ႈႁူဝ်ပဝ်ႈ (RCSS) မႂ်ႇထႅင်ႈၵမ်းၼႆႉ ဝႃႈၼႆလႄႈ မိူဝ်ႈလဵဝ် ပိူဝ်ႈတႃႇလိူၵ်ႈတင်ႈႁူဝ်ပဝ်ႈမႂ်ႇၼႆႉ ဢၼ်တၢင်းၼမ်ယိုၼ်ႈၸိုဝ်ႈဝႆႉ မီး 5 ၸဝ်ႈ- 1.ၸွမ်ႁၢၼ်ၸၢႆးယီႈ၊ 2.ၸဝ်ႈသိုၵ်းလူင်ၶိူဝ်းငိုၼ်း၊ 3.ၸဝ်ႈသိုၵ်းသီရိ၊ 4.ၸဝ်ႈသိုၵ်းၵွၼ်းၸိုၼ်ႈ၊ 5.ၸဝ်ႈသိုၵ်းပွင်ၶိူဝ်း ၸိူဝ်းၼႆႉ။

ၵဵဝ်ႇၵပ်းလွင်ႈၼႆႉ ၽူႈၵိူဝ်းၵုမ်ၶွင် RCSS/SSA ၸဝ်ႈၶိုၼ်းသႂ် လၢတ်ႈဝႃႈ- ပိူဝ်ႈတႃႇႁဵတ်းပၢင်လိူၵ်ႈတင်ႈ ဝၼ်းမိူဝ်ႈၼႆႉၼႆႉ ၽူႈမီးၸၼ်ႉၼႂ်း RCSS/SSA မႃးၸွတ်ႇၸေးၵၼ်ယဝ်ႉ၊ ၵူၼ်းၸိူဝ်းမီးသုၼ်ႇလႆႈ တွတ်ႈၶႅပ်းၵၢင်ၸႂ်သေ တေမႃးတွတ်ႈၶႅပ်းၵၢင်ၸႂ်ၼၼ်ႉ မီးတေဢမ်ႇယွမ်းမွၵ်ႈ 100 ၵေႃႉ။ လိူဝ်သေၼၼ်ႉ ပေႃႈဝၢၼ်ႈမႄႈမိူင်း၊ ၵူၼ်းထဝ်ႈၵူၼ်းၵႄႇ၊ ၵူၼ်းမီးၼႃႈမီးတႃၼႂ်းဝၢၼ်ႈဢိူင်ႇ၊ ပေႃႈမႄႈၵူၼ်းမိူင်းၸိူဝ်းမီး သုၼ်ႇလႆႈၵမ်ႈၽွင်ႈၵေႃႈ ပိုတ်ႇတိုဝ်ႉတၢင်းပၼ် ႁႂ်ႈၶဝ်ၸၢင်ႈလႆႈမႃးတွတ်ႈၶႅပ်းၵၢင်ၸႂ်ၸွမ်း။ တေလိူၵ်ႈတင်ႈ ၵႂႃႇလူၺ်ႈလၢႆးလွၵ်းပိူင် ၻီႊမွၵ်းၶရေႊသီႊ- ဝႃႈၼႆ။

ၵပ်းၵၢႆႇလွင်ႈၼႆႉသေ ၸဝ်ႈယွတ်ႈသိုၵ်း ၽူႈႁပ်ႉတၼ်းႁဵင်းႁူဝ်ပဝ်ႈဝႆႉယူႇယၢမ်းလဵဝ် ၵေႃႈလၢတ်ႈဝႃႈ- ပဵၵ်ႉသမ်ႉဝႃႈမၼ်းၸဝ်ႈဢမ်ႇသႂ်ႇၸိုဝ်ႈဝႆႉ ပိူဝ်ႈတႃႇလိူၵ်ႈတင်ႈ ဝႃႈၼႆသေတႃႉ ပေႃးယွၼ်ႉလွင်ႈတၢင်းသေ လွင်ႈလွင်ႈလႄႈ ဢမ်ႇလိူၵ်ႈတင်ႈလႆႈႁူဝ်ပဝ်ႈမႂ်ႇၸိုင် တႃႇတေႁပ်ႉတၼ်းႁဵင်းႁူဝ်ပဝ်ႈၵႂႃႇထႅင်ႈၼၼ်ႉ မၼ်းၸဝ်ႈၵေႃႈႁၢင်ႈႁႅၼ်းဝႆႉယူႇ- ဝႃႈၼႆ။

ၽူႈမီးၸၼ်ႉတီႈလွႆတႆးလႅင်း ၵေႃႉၼိုင်ႈၵေႃႈလၢတ်ႈဝႃႈ- ဢၼ်ၸဝ်ႈယွတ်ႈသိုၵ်း တေလိုဝ်ႈၵၢၼ်ၼႆႉ ၵမ်ႈၼမ်ဢွၼ်ၵၼ်ပၵ်းတႃပႂ်ႉတူၺ်းဝႆႉ၊ ပႃးၸဵမ်ၾၢႆႇလူင်ပွင်ၸိုင်ႈ။ ၾၢႆႇလူင်ပွင်ၸိုင်ႈၵေႃႈႁၼ်ထိုင်ဝႃႈ ၸဝ်ႈယွတ်ႈသိုၵ်းၼႆႉ မၼ်းတေလိင်ႉလွၵ်းၸိူင်ႉႁိုဝ်၊ တေဢဝ်ၵူၼ်းမႂ်ႇမႃးပုတ်ႈတႅၼ်းတီႈတၼ်းႁဵင်း ႁူဝ်ပဝ်ႈသေ တေၶိုင်ယႃႉပႅတ်ႈ ၶေႃႈၵိၼ်ၵႅၼ်ႇဢၼ်တူၵ်းလူင်းၵၼ်ဝႆႉတင်း လူင်ပွင်ၸိုင်ႈႁိုဝ်၊ မၼ်းတေ ၶႂ်ႈႁဵတ်းႁိုဝ် ၸိူဝ်းၼႆႉ ၾၢႆႇလူင်ပွင်ၸိုင်ႈၵေႃႈပၵ်းတႃပႂ်ႉတူၺ်းယူႇ။ တီႈတႄႉမၼ်း ဢမ်ႇၸႂ်ႈၸိူင်ႉၼၼ်၊ တၼ်းႁဵင်း ႁူဝ်ပဝ်ႈမႂ်ႇၼႆႉ ယွၼ်ႉပိူဝ်ႈ RCSS/SSA တမ်းလွၵ်းပိူင်မၼ်းဝႆႉယဝ်ႉလႄႈ ၽႂ်ၶိုၼ်ႈမႃးၵေႃႈတိုၼ်း တေလႆႈပႆၸွမ်း သဵၼ်ႈတၢင်း ဢၼ်တမ်းဝၢင်းဝႆႉၼၼ်ႉၵူၺ်း၊ ဢမ်ႇၸႂ်ႈတင်ႈၸႂ်ၶႂ်ႈလိင်ႉလွၵ်း လိင်ႉလၢႆးသေ ႁဵတ်းၸိူင်ႉၼၼ်- ဝႃႈၼႆ။

ယွၼ်ႉပိူဝ်ႈ RCSS/SSA ၼႆႉ တမ်းဝၢင်းလွၵ်းပိူင်ဝႆႉဝႃႈ 4 ပီ လိူၵ်ႈတင်ႈႁူဝ်ပဝ်ႈၼိုင်ႈပွၵ်ႈ။ မၼ်းၸဝ်ႈၵေႃႈ ယၢမ်ႈႁၢပ်ႇၵိုတ်ႉၵၢၼ်မႃးသၢမ်ၸူဝ်ႈသၢမ်ပၢၼ် ထပ်းၵၼ်ယဝ်ႉလႄႈ ၶႂ်ႈႁႂ်ႈၵူၼ်းမႂ်ႇၸိူဝ်းမႃးတၢင်းလင် မေႃၵၢၼ်လႄႈ ႁႂ်ႈသိုပ်ႇပုတ်ႈသိုပ်ႇႁၢပ်ႇႁၢမ်ၵႂႃႇၵူၺ်း၊ ဢမ်ႇၸႂ်ႈၵိုတ်းလိုဝ်ႈၵၢၼ်ဝႆႉတင်းပိုၵ်း- ၸဝ်ႈယွတ်ႈသိုၵ်း ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။