သိုၵ်းမၢၼ်ႈလိုပ်ႈလမ်းသူၼ်ႈသိုၵ်းတႆးၶၢမ်ႈတၢင်း လုၵ်ႉပွတ်းၸၢၼ်းၶိုၼ်ႈပွတ်းႁွင်ႇ ပဵၼ်ပၢင်တိုၵ်း ၵၼ်ၼႂ်း ၸႄႈဝဵင်းၵျွၵ်ႉမႄး။ သိုၵ်းမၢၼ်ႈတၢႆ 2 ၵေႃႉ ဝၢတ်ႇၸဵပ်း လိူဝ်ႁႅင်း 2 ၵေႃႉ။

ပူၼ်ႉမႃးမိူဝ်ႈဝၼ်းသုၵ်းထိ 21/12/12 ပွတ်းၼႂ် တင်ႈတႄႇမွၵ်ႈယၢမ်း 09:00-09:30 မူင်း၊ တပ်ႉသိုၵ်း ၸိုင်ႈတႆး (RCSS/SSA) တင်းသိုၵ်းမၢၼ်ႈ (ဢမ်ႇႁူႉမၢႆတပ်ႉ) ပဵၼ်ပၢင်တိုၵ်းၵၼ်တီႈဝၢၼ်ႈႁွင်ႈႁႅင်ႈ ဢိူင်ႇၼႃးမၢၵ်ႇၶေႃ၊ ယၢၼ်ၸဵင်ႇႁွင်ႇဝၼ်းဢွၵ်ႇ ဝဵင်းၵျွၵ်ႉမႄး 7 လၵ်း၊ ၸိုင်ႈတႆးပွတ်းႁွင်ႇ။ ၾၢႆႇသိုၵ်းမၢၼ်ႈတၢႆ 2 ၵေႃႉ၊ ဝၢတ်ႇၸဵပ်းလိူဝ်ၸႂ် 2 ၵေႃႉသေ ဢဝ်သူင်ႇၵႂႃႇယူတ်းယႃ တီႈႁူင်းယႃ ဝဵင်းၵျွၵ်ႉမႄး၊ ဢမ်ႇႁူႉ လွင်ႈလုသုမ်း ၾၢႆႇသိုၵ်းတႆး။

ၵပ်းၵၢႆႇလွင်ႈၼႆႉ လႆႈႁူႉဝႃႈတပ်ႉသိုၵ်းၸိုင်ႈတႆး (RCSS/SSA) ၽိုၵ်းၵၢၼ်သိုၵ်းပၼ်ၵူၼ်းမႂ်ႇယဝ်ႉ တူဝ်ႈသေ လုၵ်ႉတၢင်း ၸိုင်ႈတႆးပွတ်းၸၢၼ်း ဢၢၼ်းၶိုၼ်ႈၵႂႃႇတူင်ႉၼိုင်ၼႂ်းၸိုင်ႈတႆးပွတ်းႁွင်ႇ၊ ၾၢႆႇၼိူဝ်တၢင်းၵႃးဝဵင်းလိူဝ်ႇ-လႃႈသဵဝ်ႈ၊ သိုၵ်းမၢၼ်ႈ လႆႈၶၢဝ်ႇသေလမ်းယိုဝ်း ၸင်ႇလႆႈပဵၼ်ပၢင်တိုၵ်း ၵၼ်တီႈႁိမ်းဝၢၼ်ႈႁွင်ႈႁႅင်ႈၼႆႉ- ဝႃႈၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- သိုၵ်းမၢၼ်ႈတင်းသိုၵ်းတႆး ပဵၼ်ပၢင်တိုၵ်းၵၼ် တင်ႈတႄႇ ယၢမ်းၵၢင်ၼႂ် 9 မူင်း ၸမ်ၸမ်တေႃႇထိုင် 9 မူင်းၸမ်ၶိုင်ႈ။ ဢွၼ်ၼႃႈၼႆႉ  သိုၵ်းမၢၼ်ႈလႆႈငိၼ်းၶၢဝ်ႇ ဝႃႈ သိုၵ်းတႆး တေၶၢမ်ႈတၢင်းၼႆသေ လိုပ်ႈလမ်းၸွမ်းသူၼ်ႈသိုၵ်းတႆး၊ သိုၵ်းတႆးၵေႃႈႁူႉလွင်ႈဝႃႈသိုၵ်း မၢၼ်ႈလမ်း ၸွမ်းသူၼ်ႈ ၼႆလႄႈမူၵ်းပႂ်ႉယိုဝ်းၶိုၼ်း၊ သွင်ၾၢႆႇပဵၼ်ပၢင်တိုၵ်းၵၼ်ၸမ်ၸမ်မွၵ်ႈ 30 မိၼိတ်ႉ၊ ၾၢႆႇသိုၵ်းမၢၼ်ႈ ဝၢတ်ႇၸဵပ်း လိူဝ်ၸႂ် 4 ၵေႃႉ၊ ၼႂ်း 4 ၵေႃႉၼၼ်ႉ ၵႂႃႇတၢႆတီႈႁူင်းယႃၵျွၵ်ႉမႄး 2 ၵေႃႉ- ၵူၼ်းဝၢၼ်ႈလၢတ်ႈၼႄၼင်ႇၼႆ။

သိုပ်ႇလၢတ်ႈဝႃႈ- ဝၢႆးပၢင်တိုၵ်းယဝ်ႉ တီႈဝၼ်းၼၼ်ႉၵူၺ်းၼင်ႇၵဝ်ႇ၊ သိုၵ်းမၢၼ်ႈၸိၼႄးၵူၼ်းဝၢၼ်ႈ ဝႃႈ သိုၵ်းထိူၼ်ႇမႃးၵိုတ်း လိုဝ်ႈတီႈႁိူၼ်းၶဝ်သေဢမ်ႇပွင်ႇၶၢဝ်ႇပၼ်ၶဝ်၊ ပၼ်သိုၵ်းတႆးမႃးလိုဝ်ႈတီႈ ဝၢၼ်ႈတီႈႁိူၼ်းၶဝ်ၼႆသေ တိၵႂႃႇၵူၼ်းဝၢၼ်ႈႁွင်ႈႁႅင်ႈ 2 ၼႃႈႁိူၼ်း၊ ႁိူၼ်းၼိုင်ႈ မီးၵူၼ်းႁိူၼ်း 4 ၵေႃႉတိၵႂႃႇတင်းမူတ်း၊ ထႅင်ႈႁိူၼ်းၼိုင်ႈသမ်ႉမီးၵေႃႉလဵဝ် ၵူၼ်းၸၢႆးဢႃႇယုမွၵ်ႈ 50 ပၢႆ၊ တင်းမူတ်း တိၵႂႃႇ 5 ၵေႃႉ၊ ၵူၼ်းၸိူဝ်းၺႃး တိၺွပ်းၵႂႃႇၼႆႉ ႁၢၼ်ႉတေႃႇမိူဝ်ႈလဵဝ် သိုၵ်းမၢၼ်ႈပႆႇပွႆႇၶိုၼ်း- ဝႃႈၼႆ။