ၸုမ်းၵူၼ်းၼုမ်ႇတႆး Tai Youth Network လူင်းပိုၼ်ႉတီႈ ႁူပ်ႉထူပ်း ၵူၼ်းၼုမ်ႇတႆး တၢင်းပွတ်းဢွၵ်ႇၶူင်း ႁႃတၢင်း တႃႇ ႁူမ်ႈမိုဝ်း တူင်ႉၼိုင်ၵၢၼ်ၵူၼ်းၼုမ်ႇ ၵႂႃႇမိူဝ်းၼႃႈ ဝႃႈၼႆ။


တႄႇဢဝ် ဝၼ်းတီႈ 09-13/09/2017 ၸုမ်းၵူၼ်းၼုမ်ႇတႆး TYN လူင်းပိုၼ်ႉတီႈ ႁူပ်ႉထူပ်း ၵူၼ်းၼုမ်ႇတႆး ၸႄႈ ဝဵင်းတႃႈၶီႈလဵၵ်း၊ ပုင်ႇပႃႇၶႅမ်၊ ၼႃးၵွင်းမူး၊ မိူင်းတူၼ်၊ တႃႈလိူဝ်ႇ၊ ပႃႇလႅဝ်းၵဵင်းလၢပ်ႈ၊ ၵဵင်းတုင်လႄႈ မိူင်းပဵင်း ၸိုင်ႈ တႆးပွတ်းဢွၵ်ႇၶူင်း။ ယိူင်းဢၢၼ်း ဢၼ်လႆႈမႃးႁူပ်ႉထူပ်းၵူၼ်းၼုမ်ႇတႆးပွတ်းဢွၵ်ႇၶူင်းၼႆႉ ႁႂ်ႈလႆႈမိုတ်ႈၵိုဝ်းၸမ် ၸႂ်တင်းၵူၼ်းၼုမ်ႇၼႂ်းပိုၼ်ႉတီႈ၊ ႁႂ်ႈမီးၽူႈတၢင်တူဝ်ၵူၼ်းၼုမ်ႇတႆး မိူင်းတႆးပွတ်းဢွၵ်ႇၶူင်း၊ ႁႂ်ႈမီးလွင်ႈၵွင်ႉ သၢၼ် ၵပ်းသိုပ်ႇသေ သၢၼ်မိုဝ်းၵၼ်တူင်ႉၼိုင် ဝႃႈၼႆ။

ၸၢႆးလွႆၶမ်းပၢင်ႇ ၽူႈပွင်ၵၢၼ်ၸုမ်းၵေႃႁူမ်ႈသၢင်ႈၵူၼ်းၼုမ်ႇတႆး TYN လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယိူင်း ဢၢၼ်း ဢၼ်လႆႈမႃးႁူပ်ႉထူပ်း ၵူၼ်းၼုမ်ႇတႆးႁဝ်း တၢင်းပွတ်းဢွၵ်ႇၶူင်းၼႆႉ ႁႂ်ႈႁဝ်းၶႃႈ လႆႈၵွင်ႉသၢၼ်ႁူမ်ႈမိုဝ်း ၵူၼ်း ၼုမ်ႇတႆးႁဝ်း တၢင်းပွတ်းဢွၵ်ႇ။ ယဝ်ႉၵေႃႈ သပ်းလႅင်းၼႄ လွင်ႈပိုၼ်းဝၼ်းလင်ၵေႃႁူမ်ႈသၢင်ႈၵူၼ်းၼုမ်ႇတႆး TYN မီးယိူင်းဢၢၼ်းၽႅၼ်ၵၢၼ်လႄႈ ၵၢၼ်တူင်ႉၼိုင်ၸိူင်ႉႁိုဝ်။ လိူဝ်ၼၼ်ႉ ပေႃးၽႅဝ်မႃး ပၢင်ၵုမ်လူင် ၵူၼ်းၼုမ်ႇတႆး ဢၼ်တေၸတ်းႁဵတ်း ၼႂ်းပီ 2017 လိူၼ်ၻီႊသႅမ်ႊပိူဝ်ႊ တေမႃးၼႆႉ ၶႂ်ႈႁႂ်ႈ ၵူၼ်းၼုမ်ႇတႆးပွတ်း ဢွၵ်ႇၶူင်း ၶဝ်ႈ ႁူမ်ႈပႃး” ဝႃႈၼႆ။


ၽူႈပွင်ၵၢၼ်လႄႈ ၽူႈၵိူဝ်းၵုမ် ၵေႃႁူမ်ႈသၢင်ႈၵူၼ်းၼုမ်ႇတႆး TYN ဢၼ်လူင်းပိုၼ်ႉတီႈႁူပ်ႉထူပ်းၵူၼ်းၼုမ်ႇတႆး ပွတ်းဢွၵ်ႇၶူင်း၊ မီးတူဝ်တႅၼ်းၵူၼ်းၼုမ်ႇ 7 ၵေႃႉ- ၸိူဝ်းယူႇ ပၢင်ႇဢူး၊ လႃႈသဵဝ်ႈ၊ ၼမ်ႉလၼ်ႈ၊ သႅင်ၵႅဝ်ႉ၊ ပၢင်လူင်၊ ၵႃလီႉ၊ ၸဵမ်ၸိူဝ်းၼႆႉ ဝႃႈၼႆ။


ပၢင်ၵုမ်ၵေႃႁူမ်ႈသၢင်ႈၵူၼ်းၼုမ်ႇတႆးၼႆႉ ၸတ်းႁဵတ်း 2 ပီ 1 ပွၵ်ႈ၊ လိူၵ်ႈတူဝ်တႅၼ်း ၽူႈဢွၼ်ႁူဝ်၊ ၽူႈပွင်ၵၢၼ်မႂ်ႇ ၶွမ်ႊမတီႊ။ ယိူင်းဢၢၼ်း ၸုမ်းၵေႃႁူမ်ႈသၢင်ႈၵူၼ်းၼုမ်ႇတႆး TYN ၼႆႉၵၢမ်ႇၵျမ်ႇမႃႇၵူၼ်းၼုမ်ႇတႆး ႁႂ်ႈမီးၼႂ်းမိုဝ်း ၵူၼ်းၼုမ်ႇတႆး။ ၼႃႈၵၢၼ်ဢၼ်တမ်းဝႆႉတႄႉ - 1) ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ၊ 2) တၢင်တူဝ်သဵင်ႁူဝ်ၸႂ်ၵူၼ်း ၼုမ်ႇ၊ 3) ၵွင်ႉသၢၼ်တင်းၵူၼ်းၼုမ်ႇတၢင်ႇၸၢဝ်းၶိူဝ်း ၸဵမ်ၸိူဝ်းၼႆႉ ဝႃႈၼႆ။


လွင်ႈၵၢၼ်တူင်ႉၼိုင်ၸုမ်းၵေႃႁူမ်ႈသၢင်ႈၵူၼ်းၼုမ်ႇတႆး TYN သမ်ႉ ဢွၼ်ၵူၼ်းၼုမ်ႇတႆးၶိုၼ်ႈလွႆ လဵပ်ႈႁဵၼ်း သၽႃႇဝ ၾိင်ႈတိုၼ်းပဵၼ်၊ ႁူမ်ႈၵၼ်ၽုၵ်ႇသွမ်ႈတူၼ်ႈမႆႉလႄႈ ၵၢၼ်ႁၵ်ႉသႃသိင်ႇဝႅတ်ႉလွမ်ႉ။ ယဝ်ႉၵေႃႈ ၸတ်းပၢင် သွၼ် ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇလႄႈ ဢိၵ်ႇပႃးတူင်ႉၼိုင်ၼႂ်းၵၢၼ်မိူင်း ၵၢၼ်ငမ်းယဵၼ် ၵၢၼ်တူင်ႇဝူင်း ၵူၼ်းလၢႆလၢႆ လွင်ႈ ၸဵမ်ၸိူဝ်းၼႆႉ။