ဝၼ်းတီႈ 11/09/2017  ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢွၼ်ႁူဝ်မူႇၸုမ်းၸိူဝ်း ႁူပ်ႉထူပ်းၽူႈၵိူဝ်းၵုမ်ၸိုင်ႈမိူင်း ဢွင်ႇသၢၼ်းၸုၵျီႇ၊ ၽူႈဢွၼ်ႁူဝ်တပ်ႉမတေႃႇသိုၵ်းမၢၼ်ႈ တီႈၼေႇပျီႇတေႃႇ။


ၵဵဝ်ႇၵပ်းလွင်ႈၼႆႉ ၸဝ်ႈယွတ်ႈသိုၵ်း လၢတ်ႈမိူဝ်ႈပၢင်သပ်းလႅင်းၸႅင်ႈၶၢဝ်ႇ မိူဝ်ႈဝၼ်းတီႈ 09/09/2017 တီႈၽူႈသိုဝ်ႇၶၢဝ်ႇၶဝ်ဝႃႈ- "ငဝ်းလၢႆးမိူင်းႁူမ်ႈတုမ်မိူင်းမၢၼ်ႈၼႆႉ ႁဝ်းၵိုတ်းသိုၵ်းၵၼ်မႃးၶၢဝ်းတၢင်း 5 ပီယဝ်ႉ၊ ၵူၺ်းၵႃႈ လွင်ႈၶိုပ်ႈၼႃႈၼႆႉဢမ်ႇပေႃးမီး။ ပွၵ်ႈၼႆႉ ဢိင်ၼိူဝ် NRPC တႅမ်ႈလိၵ်ႈႁွင်ႉမွၵ်ႇမႃး ႁႂ်ႈလႆႈႁူပ်ႉထူပ်းၵၼ် သၢင်ႈလွင်ႈယုမ်ႇယၼ်ၵၼ်။ ၼႂ်းတိုဝ်ႉတၢင်းၼႆႉ RCSS မုင်ႈမွင်းဝႃႈ တေလႆႈလွင်ႈယုမ်ႇယမ်ၵၼ်ၶိုၼ်ႈမႃး။

ပၼ်ႁႃဢၼ်မီးလွင်ႈထၢင်ႇၽိတ်းထၢင်ႇပိူင်ႈၼိူဝ်ၵၼ်ၸိူဝ်းၼႆႉၵေႃႈ မၼ်းတေလီၶိုၼ်ႈမႃး။ လီၶိုၼ်ႈမႃးဢၼ်ဝႃႈၼႆႉ ဢၼ်မီးလွင်ႈထၢင်ႇၽိတ်းထၢင်ႇပိူင်ႈၼိူဝ်ၵၼ်ၸိူဝ်းၼႆႉ မၼ်းတေႁၢႆၵႂႃႇ"-ဝႃႈၼႆ။


ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ တင်းႁူဝ်ပဝ်ႈ RCSS ၸွမ်သိုၵ်းလူင်ယွတ်ႈသိုၵ်း ႁူပ်ႉထူပ်းၵၼ်ပွၵ်ႈၵမ်းၼႆႉ ဝၢႆးသေပႃႇတီႇ NLD ၶိုၼ်ႈပဵၼ်လူင်ပွင်ၸိုင်ႈမႃးၼႆႉ ပဵၼ်ပွၵ်ႈထီႉၼိုင်ႈ။ မိူဝ်ႈပႆႇပဵၼ်လူင်ပွင်ၸိုင်ႈၼၼ်ႉၵေႃႈ သွင်ၾၢႆႇယၢမ်ႈထူပ်းၵၼ်ပွၵ်ႈၼိုင်ႈ။