ၶွမ်ႊမတီႊႁူမ်ႈပႂ်ႉတူၺ်း လွင်ႈငမ်းယဵၼ်ၸႄႈမိူင်း Joint Monitoring Committee- State (JMC-S) လူင်း ပိုၼ်ႉတီႈႁူပ်ႉထူပ်း ၵူၼ်းမိူင်းတႆး ပွတ်းၸၢၼ်း 3-4 ၸႄႈဝဵင်း၊ ႁူဝ်ၵူၼ်းၼပ်ႉႁဵင် ဝႃႈၼႆ။


ဝၼ်းတီႈ 05-06/09/2017 ၶွမ်ႊမတီႊႁူမ်ႈပႂ်ႉတူၺ်း လွင်ႈငမ်းယဵၼ်ၸႄႈမိူင်း (JMC-S) ႁူပ်ႉထူပ်း ပီႈၼွင်ႉ ၵူၼ်းမိူင်း ၼႂ်းၸႄႈဝဵင်းမိူင်းၼၢႆး၊ ၸႄႈဝဵင်းမွၵ်ႇမႆႇ၊ ၸႄႈဝဵင်းႁူဝ်ပူင်းလႄႈ မိူင်းပွၼ် ၸိုင်ႈတႆးပွတ်းၸၢၼ်း။ သပ်းလႅင်း ၼႄ လွင်ႈလိၵ်ႈႁူမ်ႈမၢႆ NCA ၊ လွင်ႈပိူင်တိုဝ်းၵမ်သိုၵ်း CoC လႄႈ လွင်ႈၵၢၼ် တူင်ႉၼိုင်ၸုမ်း ထိုင်ၶၵ်ႉတွၼ်ႈလႂ် ၸဵမ် ၸိူဝ်းၼႆႉ ဝႃႈၼႆ။

ၽူႈၶဝ်ႈပႃးၼႂ်း JMC-S ၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လူင်းႁူပ်ႉထူပ်း ၵူၼ်းမိူင်းသေ သပ်းလႅင်း ၼႄ လွင်ႈပိူင်ပဵၼ် NCA ၊ CoC ပိူင်တိုဝ်းၵမ်သိုၵ်း။ ဝၢႆးလူင်းလၢႆးမိုဝ်း ၵိုတ်းတိုၵ်းယဝ်ႉ တွၼ်ႈတႃႇတပ်ႉသိုၵ်း တင်း သွင်ၾၢႆႇတေၸွမ်း ၶေႃႈတူၵ်းလူင်းၼၼ်ႉ သပ်းလႅင်းၼႄၵူၼ်းမိူင်း။ လိူဝ်ၼၼ်ႉ ယူႇတီႈၸုမ်း JMC-S ႁဝ်းၶႃႈၼႆႉ ၼိုင်ႈလိူၼ်ၼိုင်ႈပွၵ်ႈ ဢမ်ႇၼၼ် သွင်ပွၵ်ႈ တေႁူပ်ႉထူပ်း ၵူၼ်းမိူင်းၵႂႃႇထႅင်ႈ” ဝႃႈၼႆ။


ၵဵဝ်ႇၵပ်းလွင်ႈၼႆႉ ဝၼ်းတီႈ 05/09/2017 ယၢမ်းၵၢင်ၼႂ် ၶွမ်ႊမတီႊႁူမ်ႈပႂ်ႉတူၺ်း လွင်ႈငမ်းယဵၼ်ၸႄႈမိူင်း ႁူပ်ႉ ထူပ်းၵူၼ်းမိူင်းတီႈဝတ်ႉ/ၵျွင်းဢုတ်ႇ ၸႄႈဝဵင်းမိူင်းၼၢႆး မီးၵူၼ်းမိူင်းၶဝ်ႈႁူမ်ႈ 480 ပၢႆ။ ထိုင်ယၢမ်းဝၢႆးဝၼ်းသမ်ႉ လူင်းႁူပ်ႉထူပ်း ၵူၼ်းမိူင်း တီႈဝတ်ႉဢူးယိၼ်ႇ ဢိူင်ႇႁူဝ်ၼမ်ႉ ၸႄႈဝဵင်းမွၵ်ႇမႆႇထႅင်ႈ ဝႃႈၼႆ။


ထိုင်မႃး ဝၼ်းတီႈ 06/09/2017 ယၢမ်းၵၢင်ၼႂ်သမ်ႉ သိုပ်ႇၵႂႃႇႁူပ်ႉထူပ်း ၵူၼ်းမိူင်းတီႈႁူင်းႁေႃ ဝဵင်းႁူဝ်ပူင်း မီး ၵူၼ်းမိူင်းၶဝ်ႈႁူမ်ႈ 440 ၵေႃႉပၢႆ။ ထိုင်မႃး ယၢမ်းဝၢႆးဝၼ်းသမ်ႉ ၵႂႃႇႁူပ်ႉထူပ်းထႅင်ႈ ၵူၼ်းမိူင်းပွၼ် ၸႄႈဝဵင်းလွႆလႅမ် မီးၵူၼ်းၶဝ်ႈႁူမ်ႈ 461 ၵေႃႉ ၸဵမ်ၸိူဝ်းၼႆႉ ဝႃႈၼႆ။
ၶွမ်ႊမတီႊႁူမ်ႈပႂ်ႉတူၺ်း လွင်ႈငမ်းယဵၼ်ၸႄႈမိူင်း JMC-S ၼႆႉ လူင်းႁူပ်ႉထူပ်းၵူၼ်းမိူင်းတႆးမႃး မီးသွင် ပွၵ်ႈယဝ်ႉ။ မိူဝ်ႈပွၵ်ႈၵမ်းၼိုင်ႈ ၵၢင်လိူၼ် ဢေႃႊၵတ်ႉသ် 2017 သမ်ႉ ႁူပ်ႉထူပ်း ၵူၼ်းမိူင်း ၸႄႈဝဵင်းမိူင်းၵိုင်၊ လၢႆးၶႃး၊ ပၢင်လူင် လႄႈ ၼမ်ႉၸၢင် ၸဵမ်ၸိူဝ်းၼႆႉ ဝႃႈၼႆ။


ၶွမ်ႊမတီႊႁူမ်ႈပႂ်ႉတူၺ်း လွင်ႈငမ်းယဵၼ်ၸႄႈမိူင်း JMC-S ၼႆႉ ႁူဝ်ပဝ်ႈ JMC-S ၸွမ်ႁၢၼ် တၢၼ်းလၢႆႇဢွၼ် ႁူဝ်ၸုမ်းပွင်ၵၢၼ်သေ လူင်းႁူပ်ႉထူပ်းၵူၼ်းမိူင်း ၸိုင်ႈတႆးပွတ်းၸၢၼ်း။ ၼႂ်းၵေႃပွင်ၵၢၼ်တႄႉ RCSS၊ PNLO တူဝ် တႅၼ်းၵူၼ်းမိူင်းလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ၸဵမ်ၸိူဝ်းၼႆႉ ဝႃႈၼႆ။