မႂ်ႇသုင်တင်းသဵင်ႈၶႃႈ။ ၵဵဝ်ႇလူၺ်ႈ NRPC ၶွမ်ႊမတီႊၵေႃႇသၢင်ႈလွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈ ၶဝ်ႁၢမ်ႈႁႄႉ ၵႂႃႇတီႈ Workshop ပၢင်ၵုမ်ၵၢၼ်သၢင်ႈၶွင် ENAC ဢၼ်ၸုမ်းၸၢဝ်းၶိူဝ်းၶဝ်ႁူမ်ႈၵၼ်သေ တေႁဵတ်းၵၢၼ်ၾိုၵ်းၽွၼ်ႉၵႂႃႇၼၼ်ႉ ယူႇတီႈၸဝ်ႈၼႃႈတီႈထႆး ႁႂ်ႈလႆႈႁၢမ်ႈႁႄႉပၼ်ဢၼ်ဝႃႈၼၼ်ႉ ၵူႈပွၵ်ႈဢမ်ႇယၢမ်ႈမီးမႃး။ မိူၼ်ၸိူင်ႉၼင်ႇ ENAC ၼႆႉ ၶဝ်ႈၼႂ်းမိူင်းမၢၼ်ႈမႃးပေႃးမီးလၢႆပီယဝ်ႉ၊ ပၢင်ၾိုၵ်းၽွၼ်ႉၶဝ်၊ ပၢင်ၵုမ်ၵၢၼ်သၢင်ႈၶဝ်မႃးႁဵတ်းၼႂ်းမိူင်းၵေႃႈ ပေႃးမီးပဵၼ်လၢႆပွၵ်ႈ၊ ၼွၵ်ႈမိူင်းၵေႃႈဢၢၼ်ႇပွၵ်ႈမၼ်းပေႃးဢမ်ႇလႆႈ။ ၵူၺ်းၵႃႈ ၵူႈပွၵ်ႈတႄႉဢမ်ႇမီးလွင်ႈႁႄႉႁၢမ်ႈမႃး၊ မိူဝ်ႈလဵဝ် သမ်ႉမီးမႃးလွင်ႈႁႄႉႁၢမ်ႈၼႆႉ ပဵၼ်ဢၼ်လၢၵ်ႇလၢႆးဢၼ်ၼိုင်ႈ။


မိူၼ်ၼႆၵူၺ်းၼင်ႇၵဝ်ႇ ယူႇတီႈ NRPC ဢမ်ႇၸႂ်ႈၵမ်းသိုဝ်ႈၵေႃႈ ယူႇတီႈၽွင်းတၢင်သိုၵ်းၶွင်မိူင်းမၢၼ်ႈ ၼႄႉၼမ်းၸီႉၸမ်ႈၵႂႃႇလႄႈ ပၢင်ၵုမ် CSSU ၵေႃႈထုၵ်ႇႁႄႉႁၢမ်ႈမႃး ၸိူင်ႉၼၼ်ၵေႃႈမီးမႃး။ ၼႂ်းၵႄႈၼင်ႇၼႆ ႁဝ်းၶႃႈသမ်ႉလႆႈငိၼ်းၶၢဝ်ႇဢၼ်ၼိုင်ႈ၊ မိူဝ်ႈဢေႃႊၵတ်ႊသ် 24 ဝၼ်းၼၼ်ႉ ယူႇတီႈၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸုၵျီႇသေယဝ်ႉ ယွၼ်းႁူပ်ႉႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်းလူင်ယွတ်ႈသိုၵ်း။ ၵမ်းၼႆႉသမ်ႉ ယူႇတီႈ RCSS သမ်ႉၶိုၼ်းတုမ်ႉတွပ်ႇမႃးဝႃႈ- "လွင်ႈဢၼ်ၽူႈၵိူဝ်းၵုမ်ၸိုင်ႈမိူင်း ယိုၼ်ႈယွၼ်းမႃးၼႆႉ တေႁဵတ်းႁႂ်ႈလွင်ႈယုမ်ႇယမ်ၵၼ်မၼ်ႈၵိုမ်းၵႂႃႇမိူဝ်းၼႃႈသေဢမ်ႇၵႃး ယုမ်ႇယမ်ဝႃႈတေပဵၼ်တၢင်းၵမ်ႉၸွႆႈ ပိူဝ်ႈတႃႇၵေႃႇတင်ႈမိူင်းႁူမ်ႈတုမ်ၸိုၼ်ႈၸၢင်ႇယူႇၼႆလႄႈ ၶဝ်ၸဝ်ႈၵေႃႈႁပ်ႉႁၼ်ထိုင်လီယူႇ ဝႃႈၸိူင်ႉၼင်ႇၼၼ်။


ၵူၺ်းၵႃႈ ယူႇတီႈႁူဝ်ပဝ်ႈၸဝ်ႈယွတ်ႈသိုၵ်း တေမႃးႁူပ်ႉထူပ်းတင်းၽူႈၵိူဝ်းၵုမ်ၸိုင်ႈမိူင်းမိူဝ်ႈလႂ် ဢၼ်ဝႃႈၼၼ်ႉတႄႉ ႁဝ်းၶႃႈပႆႇလႆႈႁူႉၸွမ်း။ တီႈၼႆႈ ႁဝ်းၶႃႈမႃးထတ်းသၢင်ႁၼ်ဝႃႈ ႁူဝ်ပဝ်ႈၸဝ်ႈယွတ်ႈသိုၵ်းၼႆႉ ဢမ်ႇၸႂ်ႈဝႃႈ ပဵၼ်ႁူဝ်ပဝ်ႈ RCSS ၸုမ်းလဵဝ်။ ပဵၼ်ဝႆႉပႃးၽူႈၼင်ႈၸိုင်ႈ ဢမ်ႇၼၼ် ႁူဝ်ပဝ်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ။ မိူၼ်ၸိူင်ႉၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးၼႆႉ ဢၢင်ႈႁဵတ်းပၢင်ၵုမ်ၵၼ်လိူၼ်ၵျူႊလၢႆႊ ဝၼ်းတီႈ 20 တေႃႇထိုင်ဝၼ်းတီႈ 22 ၼၼ်ႉၵေႃႈ လႆႈထုၵ်ႇတၢင်းႁၢမ်ႈႁႄႉမႃး ယွၼ်ႉတပ်ႉသိုၵ်းမၢၼ်ႈၸီႉၼႄးလၢႆလၢႆလွင်ႈ။ ၵူၺ်းၵႃႈ ယူႇတီႈမၼ်းၸဝ်ႈသေယဝ်ႉ တႅမ်ႈလိၵ်ႈတွပ်ႇၵႂႃႇတီႈႁူဝ်ပဝ်ႈ NRPC ၵေႃႉပဵၼ်ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸုၵျီႇ။


လွင်ႈတၢင်းတႄႉဝႃႈ CSSU ၼႆႉ ဢမ်ႇမီးလွင်ႈတၢင်းယိူင်းဢၢၼ်းယႃႉလူႉလွင်ႈငမ်းယဵၼ်၊ ယဝ်ႉၵေႃႈၼႂ်း CSSU ၼႆႉ ၼင်ႇၶဝ်မၢပ်ႇဝႃႈ- ပႃးဝႆႉၸုမ်းၼွၵ်ႈမၢႆမီႈဢၼ်ဝႃႈၼၼ်ႉ တိုၼ်းဢမ်ႇမီး၊ သင်ၸိူဝ်ႉဝႃႈမီးလွင်ႈႁူႉထိုင်ၸွမ်းလွင်ႈ CSSU ၼႆၸိုင် ထၢမ်ထိုင်မႃးလႆႈၵမ်းသိုဝ်ႈယူႇ ဢဝ်ၸဵမ်ၸိူဝ်းၼႆႉၵႂႃႇ၊ မၼ်းၸဝ်ႈလႆႈတႅမ်ႈတွပ်ႇၵႂႃႇမိူဝ်ႈပူၼ်ႉမႃးၼႆႉ ၼင်ႇၼၼ်။ ဢိင်ၼိူဝ်လိၵ်ႈၼႆႉသေႁိုဝ် ဢမ်ႇၼၼ်ၵေႃႈ ယွၼ်ႉလူၺ်ႈတၢင်ႇလွင်ႈတၢင်ႇတၢင်းႁိုဝ်တႄႉၵေႃႈဢမ်ႇႁူႉ မိူဝ်ႈလဵဝ်ၽူႈၵိူဝ်းၵုမ်ၸိုင်ႈမိူင်း ယိုၼ်ႈယွၼ်းမႃးဝႃႈ ႁႂ်ႈလႆႈႁူပ်ႉၵၼ်ၼႆယဝ်ႉ။


တီႈၼႆႈ ႁဝ်းၶႃႈၶႂ်ႈမႃးယွၼ်းထတ်းသၢင်ၼႄၵၼ်တူၺ်းဝႃႈ- ၽူႈၵိူဝ်းၵုမ်ၸိုင်ႈမိူင်းလႄႈ ႁူဝ်ပဝ်ႈ CSSU ႁူပ်ႉၵၼ်သေယဝ်ႉ တေၵိူတ်ႇမီးမႃးၽွၼ်းလီၸိူင်ႉၼင်ႇႁိုဝ်ၼႆၼၼ်ႉ။ ၼႂ်းၵႄႈၼႆႉ ႁဝ်းၶႃႈလႆႈငိၼ်းၶၢဝ်ႇ ဢၼ်ၼိုင်ႈဝႃႈ ယူႇတီႈလူင်ပွင်ၸိုင်ႈလႄႈ တင်းတပ်ႉမတေႃႇသိုၵ်းမၢၼ်ႈ ယိုၼ်ႈယွၼ်းႁႂ်ႈ RCSS ထွၼ်ဢွၵ်ႇပႅတ်ႈ ၼႂ်းၶၵ်ႉၵၢၼ် NCA ၼႆၵေႃႈမီးမႃး။ ၵွပ်ႈပိူဝ်ႈၸိူင်ႉႁိုဝ်လႄႈ ၸႂ်ႉထွႆဢွၵ်ႇ၊ ယွၼ်ႉပိူဝ်ႈၵိူတ်ႇပဵၼ်ပၢင်တိုၵ်း တင်းပီႈၼွင်ႉမၢၼ်ႈ တင်းတပ်ႉသိုၵ်းမၢၼ်ႈမႃးၵေႃႈမီး၊ တင်းပီႈၼွင်ႉ TNLA သိုၵ်းလွႆၵေႃႈ ပဵၼ်ပၢင်တိုၵ်းၵၼ်မႃး။ ဝၢႆးသေလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း တႄႇဢဝ်ပီ 2015 လိူၼ်ဢွၵ်ႊထူဝ်ႊၿိူဝ်ႊ 15 ဝၼ်း တေႃႇထိုင်ဝၼ်းမိူဝ်ႈၼႆႉၸိုင် ယူႇတီႈ RCSS ၼႆႉ လႆႈတွၵ်ႉတႅၵ်ႉပဵၼ်ပၢင်တိုၵ်းၵၼ်မႃး တင်းတပ်ႉသိုၵ်းမၢၼ်ႈ 10 ပွၵ်ႈ၊ ယဝ်ႉၵေႃႈလႆႈပဵၼ်ပၢင်တိုၵ်းလူၺ်ႈၵၼ်တင်း TNLA တပ်ႉသိုၵ်းတဢၢင်း/ပလွင်ႈမႃး 39 ပွၵ်ႈ။


ပေႃးမႃးတူၺ်းၸိူင်ႉၼႆ RCSS ၼႆႉ မၼ်းႁဵတ်းႁႂ်ႈတုမ်ႉတိူဝ်ႉၾၢင်ႁၢင်ႈ NCA ၊ မိူၼ်တင်းၼႄဝႃႈ လူင်းလၢႆးမိုဝ်း ၵိုတ်းတိုၵ်းယဝ်ႉၵေႃႈ ဢမ်ႇမီးလွင်ႈပႅၵ်ႇပိူင်ႈလၢၵ်ႇလၢႆးသင်မႃး၊ ႁဵတ်းႁႂ်ႈတၢင်ႇမူႇတၢင်ႇၸုမ်း ၸိူဝ်းဢၢင်ႈ တေလူင်းလၢႆးမိုဝ်းၼၼ်ႉ ၸၢင်ၸႂ်ၵႂႃႇၼႆ ယူႇတီႈတပ်ႉသိုၵ်းမၢၼ်ႈႁၼ်ထိုင်ၸိူင်ႉၼၼ်။ သင်ဝႃႈၶဝ်သူၼ်းဢီးႁႂ်ႈ RCSS ထွႆဢွၵ်ႇၵႂႃႇတီႈၼႂ်းၶၵ်ႉၵၢၼ်လွင်ႈငမ်းယဵၼ်ၵေႃႈ ပွင်ႇဝႃႈႁႂ်ႈထွႆဢွၵ်ႇၼႂ်းၶၵ်ႉၵၢၼ် NCA ၊ ၵူၺ်းၵႃႈ ယူႇတီႈတေႃႇဢွင်ႇသၢၼ်းၸုၵျီႇ ဢမ်ႇယွမ်းႁပ်ႉ။ ယွၼ်ႉပိူဝ်ႈမၼ်းၼၢင်းပွင်ႇၸႂ်ဝႃႈ ပေႃႈဝႃႈတၢင်း RCSS ထွႆဢွၵ်ႇၵႂႃႇၵေႃႈ မိူၼ်တင်းဝႃႈလၢႆးၵၢၼ် NCA လူႉယဝ်ႉ။


ၵွပ်ႈသင်လႄႈဝႃႈၼၼ် ၸိူဝ်းဢၼ်လူင်းလၢႆးမိုဝ်း NCA ယဝ်ႉၼၼ်ႉမီးယူႇ 8 ၸုမ်း၊ ၼႂ်းၼၼ်ႉဢၼ်ႁႅင်းယႂ်ႇ တေမီးပီႈၼွင်ႉယၢင်း KNU ပႃးတင်း RCSS ။ ပေႃးဝႃႈ RCSS ထွႆဢွၵ်ႇၵႂႃႇယဝ်ႉ မီးၸုမ်းယၢင်းၽိူၵ်ႇၸုမ်းလဵဝ်ၵူၺ်း တေဢမ်ႇၸၢင်ႈၵွၼ်းၵိူင်ႈလႆႈ၊ ၸိူဝ်းဢၼ်ပႆႇလူင်းလၢႆးမိုဝ်းလႄႈသင်၊ တင်းလူင်ပွင်ၸိုင်ႈဢိၵ်ႇပႃးတင်း တပ်ႉသိုၵ်းမၢၼ်ႈၼၼ်ႉလႄႈသင် တေၵွၼ်းၵိူင်ႈယၢပ်ႇၵႂႃႇ။ မိူၼ်ၸိူင်ႉရၶႅင်ႇ၊ ၶျၢင်း၊ ပဢူဝ်း ၸိူဝ်းဢၼ်လူင်း လၢႆးမိုဝ်းဝႆႉၼၼ်ႉတႄႉ တေႃႉတႄႉမီးၸိုဝ်ႈၵူၺ်း၊ ဢမ်ႇမီးၵူၼ်းသိုၵ်းၼမ်လၢႆလႄႈ ယူႇတီႈလူင်ပွင်ၸိုင်ႈ တေဢမ်ႇၼပ်ႉယမ်၊ ယဝ်ႉၵေႃႈယူႇတီႈတပ်ႉသိုၵ်း တေဢမ်ႇၼပ်ႉယမ်လႄႈ ႁဵတ်းႁႂ်ႈလွင်ႈၵွၼ်းၵိူင်ႈၵၼ် တေယၢပ်ႇၵႂႃႇ။ မိူဝ်းၼႃႈ တႃႇတေသိုပ်ႇႁူမ်ႈပႆၸွမ်းၵႂႃႇလၢႆးၵၢၼ် NCA ၼၼ်ႉတေယၢပ်ႇၵႂႃႇၼႆလႄႈ တေႃႇဢွင်ႇသၢၼ်းၸုၵျီႇဢမ်ႇႁပ်ႉ ႁဝ်းၶႃႈလႆႈႁၼ်ထိုင်ၸိူင်ႉၼၼ်။


ၵူၺ်းၵႃႈ ဢမ်ႇႁပ်ႉသေတႃႉၵေႃႈ သင်ၸိူဝ်ႉဝႃႈ ယူႇတီႈႁူဝ်ပဝ်ႈ RCSS လႄႈတင်းၽူႈၵိူဝ်းၵုမ်ၸိုင်ႈမိူင်း လႆႈႁူပ်ႉၺႃးၵၼ်ၸိုင် ယူဝ်ၶေးဝႃႈမႃးဝႃႈ - "တပ်ႉသိုၵ်းမၢၼ်ႈတႄႉယိုၼ်ႈယွၼ်းၸိူင်ႉၼင်ႇၼႆယဝ်ႉ၊ ၵူၺ်းၵႃႈၵဝ်ၶႃႈတႄႉဢမ်ႇႁပ်ႉ၊ ၵဝ်ၶႃႈတႄႉတေဢဝ်ၾၼ်ဢဝ်ငဝ်းသူၸဝ်ႈယူႇ။ ၵွပ်ႈပိူဝ်ႈၸိူင်ႉၼႆ ပိူဝ်ႈတႃႇတပ်ႉမတေႃႇတေလႆႈယုမ်ႇယမ်ၼၼ်ႉ ၶႂ်ႈႁႂ်ႈ RCSS ဢွၼ်ႁဵတ်းပၢင်ၵုမ်ၸၼ်ႉၸိူဝ်ႉၸၢတ်ႈၸၢဝ်းၶိူဝ်း ၼႂ်းတႆး။ ၵူၺ်းၵႃႈ ၼင်ႇႁိုဝ်တပ်ႉမတေႃႇတေဢမ်ႇႁၼ်ၽိတ်း မိူၼ်ၸိူင်ႉသူၸဝ်ႈယိုၼ်ႈယွၼ်းဝႃႈ တူၼ်ႈတီး ပၢင်လူင် ၵဵင်းတုင်ၸိူဝ်းၼၼ်ႉ ဢမ်ႇၸႂ်ႉသေ သင်ၸိူဝ်ႉၵႂႃႇႁဵတ်းတီႈလၢင်းၶိူဝ်းႁိုဝ်ႉ၊ ဢမ်ႇၼၼ် တီႈမွၵ်ႇမႆႇသေတီႈတီႈၸိူင်ႉၼၼ် တေဢမ်ႇထုၵ်ႇႁႃႉ"-ၼႆ ယူဝ်ၶေးလဝ်ႇဝွၼ်းၸိူင်ႉၼၼ်ႁိုဝ်ၼႆ ႁဝ်းၶႃႈလၢမ်းထၢင်ႇဝႆႉၸိူင်ႉၼၼ်။


တီႈၼႆႈ ႁဝ်းမႃးၶႆႈၸႂ်ဝႃႈ ပၢင်ၵုမ်ၵၢၼ်ၸိူဝ်ႉၸၢတ်ႈၸၢဝ်းၶိူဝ်းၼႆႉ လမ်ႇလွင်ႈပုၼ်ႈတႃႇၸၢဝ်းၶိူဝ်းတႆးႁဝ်းမွၵ်ႈၵႃႈႁိုဝ်၊ ၸွင်ႇသမ်ႉလူဝ်ႇလႆႈႁိပ်ႈၼႅတ်ႈႁဵတ်းၼႂ်းဝႆးဝႆးၼႆႉယဝ်ႉၶႃႈႁႃႉၼႆ ႁဝ်းၶႃႈလီလႆႈဝူၼ်ႉတူၺ်းဢၼ်ၼိုင်ႈ။ ပၢင်ၵုမ်ဢၼ်ၼႆႉ ပိူဝ်ႈၶဝ်ႈၸိုဝ်ႈဝႃႈၸၼ်ႉၸိူဝ်ႉၸၢတ်ႈၸၢဝ်းၶိူဝ်းတႆးၼႆလႄႈ ၶေႃႈတႅပ်းတတ်းဢၼ်လႆႈမႃးတီႈ ပၢင်ၵုမ်ၼၼ်ႉ ၾၢႆႇလူင်ပွင်ၸိုင်ႈမၢႆထိုင်ဝႃႈ တေပဵၼ်သဵင်ၸၢဝ်းၶိူဝ်းတႆး တင်းမူတ်းတင်းသဵင်ႈႁူမ်ႈဢွၵ်ႇမႃးၼႆ ႁဝ်းၶႃႈတေထဵင်ယၢပ်ႇယူႇ။ ၵူၺ်းၵႃႈ ၼႂ်းတႆးဝၼ်းမိူဝ်ႈလဵဝ် လွင်ႈပိၼ်ႇပႆႇယုမ်ႇယမ်ၵၼ် တိုၵ်ႉထိုင်ၼႂ်းၶၵ်ႉၵၢၼ် ဢၼ်လႆႈၶဝ်ႈႁႃၵၼ်ယူႇ၊ ၵဵဝ်ႇလူၺ်ႈၶေႃႈတႅပ်းတတ်းၵၢၼ်မိူင်း ၵၢၼ်ၸိူဝ်ႉၸၢတ်ႈၼႆႉ ဢၼ်လူဝ်ႇလႆႈလူင်ႉလႅင်း ပွင်ႇပိုင်ႈၵၼ်တိုၵ်ႉမီးတင်းၼမ်တင်းလၢႆ၊ တိုၵ်ႉမီးယူႇလၢႆတွၼ်ႈ။ ၵွပ်ႈပိူဝ်ႈၸိူင်ႉၼႆ ပၢင်ၵုမ်ၵၢၼ်ၸိူဝ်ႉၸၢတ်ႈ ၸၢဝ်းၶိူဝ်းတႆးၼႆႉ ပေႃးဝႃႈႁဝ်းၶႃႈၼႅတ်ႈႁဵတ်းၼႆ ၶေးတေပႆႇတၢင်တူဝ်လႆႈသဵင်တႆးတင်းလုမ်ႈၵွၼ်ႇႁိုဝ် ၼႆႉၵေႃႈတေလႆႈဝူၼ်ႉဢၼ်ၼိုင်ႈ။


ထႅင်ႈၾၢႆႇၼိုင်ႈၵေႃႈ ၸၢင်ႈမိူၼ်ၼင်ႇပိုတ်ႇၼႄလွၵ်းတႅၼ်းႁဝ်းပႅတ်ႈ တီႈပၢင်လဵၼ်ႈလၢႆးၼၼ်ႉႁိုဝ်ၼႆၵေႃႈ လီလႆႈဝူၼ်ႉယူႇ။ မိူၼ်ၸိူင်ႉၼင်ႇ လွင်ႈလႆႈထဵင်ၵၼ်ၶတ်းၵၼ်မႃး ၼႂ်းပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်ၼၼ်ႉ ၶေႃႈဢၼ်ဝႃႈ ဢမ်ႇမီးသုၼ်ႇၽၢတ်ႇဢွၵ်ႇၼႂ်းၸိုင်ႈမိူင်းႁိုဝ် ဢမ်ႇမီးသုၼ်ႇၽၢတ်ႇဢွၵ်ႇၼၼ်ႉ တၢမ်တူဝ်ၼၢင်း ဢွင်ႇသၢၼ်းၸုၵျီႇလႆႈဝႃႈ မိူဝ်းၼႃႈထႃႇပၢႆမႃးၸင်ႇၵွႆႈဢုပ်ႇၵၼ် ဝႃႈၼႆသေယဝ်ႉလႄႈ ဢဝ်ပၢင်ၵုမ်ၶိုၼ်းလီၵႂႃႇ ၵမ်းၼိုင်ႈ၊ ၵူၺ်းၵႃႈဢမ်ႇယဝ်ႉတူဝ်ႈ။ ၵဵဝ်ႇလူၺ်ႈၶေႃႈၵႂၢမ်းဢၼ်ၼႆႉ တေလႆႈသိုပ်ႇထဵင်ၵၼ် သိုပ်ႇၶတ်းၵၼ်ၵႂႃႇထႅင်ႈယူႇ။


ၵမ်းၼႆႉ ပေႃးႁဝ်းၶႃႈၼႅတ်ႈႁဵတ်း ပၢင်ၵုမ်ၸိူဝ်ႉၸၢတ်ႈၸၢဝ်းၶိူဝ်းတႆးၼႆၸိုင် ၵဵဝ်ႇလူၺ်ႈၶေႃႈၵႂၢမ်းဢၼ်ၼၼ်ႉၵေႃႈ ၵႃႈတေလႆႈယိုၼ်ယၼ်မၵ်းမၼ်ႈယဝ်ႉ၊ ႁဝ်းတေသႂ်ႇပႃးဝႃႈ ထုၵ်ႇလီၽၢတ်ႇဢွၵ်ႇႁိုဝ်ႉ၊ ဢမ်ႇၼၼ် တေဢမ်ႇသႂ်ႇပႃး ယဝ်ႉၼႄႇ။ ဢၼ်ၼႆႉပေႃးႁဝ်းၶႃႈမီးလွင်ႈတႅပ်းတတ်းယဝ်ႉၸိုင် ႁူႉၵႃႈၾၢႆႇလူင်ပွင်ၸိုင်ႈလႄႈ ၾၢႆႇတပ်ႉသိုၵ်းမၢၼ်ႈၵေႃႈ တေႁူႉၵႂႃႇယဝ်ႉ။ ပေႃးဝႃႈၶဝ်လႆႈႁူႉငိူၼ်ႈႁူႉႁွႆးၵႂႃႇၼႆၸိုင် လၢႆးဢၼ်တေၵႄႈလိတ်ႈ တေႃႇႁဝ်းမႃး ပိူၼ်ႈတေၸၢင်ႈႁၢင်ႈႁႅၼ်းဝႆႉတူဝ်ႈတၼ်းယဝ်ႉ၊ တႄႇဢဝ်ၸိူဝ်းၼႆႉၵႂႃႇၼၼ်ႉ ၸွင်ႇႁဝ်းၶႃႈပႃႈၶိုတ်းတၼ်းပိူၼ်ႈဝႆႉႁိုဝ်၊ ၸွင်ႇႁဝ်းပႃႈမီးလွင်ႈႁၢင်ႈႁႅၼ်းဝႆႉယဝ်ႉႁိုဝ်။


ၵွပ်ႈပိူဝ်ႈၸိူင်ႉၼႆလႄႈ ပၢင်ၵုမ်လွင်ႈငမ်းယဵၼ် ဢမ်ႇၼၼ်ၵေႃႈ ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈၸၢဝ်းၶိူဝ်းတႆး ဢၼ်ဝႃႈၼၼ်ႉ ႁဝ်းၶႃႈထုၵ်ႇလီႁဵတ်းၼႂ်းဝႆးဝႆးၼႆႉယူႇၼႄႇ၊ ဢမ်ႇၼၼ်ၵေႃႈ ႁဝ်းၶႃႈလီႁႃလၢႆးၵႄႈလိတ်ႈမၼ်း သေယဝ်ႉ လီႁႃလၢႆးငိူင်ႉဝႄႈမၼ်းသေ ၸၼ်ၶၢဝ်းယၢမ်းၵႂႃႇႁိုဝ် ဢၼ်ဝႃႈၼၼ်ႉတႄႉ ဢမ်ႇလိူဝ်တီႈၽူႈယႂ်ႇၵူၼ်းလူင် ႁဝ်းၶဝ်ဝူၼ်ႉ။ ၵူၺ်းၵႃႈ ၼႂ်းၸိုင်ႈမိူင်းလႄႈသင်၊ ၼႂ်းၽွင်းတႅၼ်းသၽႃးလႄႈသင်၊ ၼႂ်းၸၢဝ်းၶိူဝ်းတင်းၼမ်တင်းလၢႆ လႄႈသင်၊ ၵဵဝ်ႇလူၺ်ႈၵၢၼ် NCA ၼႆႉမႃး ဢမ်ႇပေႃးမီးတၢင်းမုင်ႈမွင်းၵၼ်၊ ဢမ်ႇပေႃးမီးလွင်ႈၸိူမ်ႈၸႂ်ၵၼ်မႃး တႄႉတႄႉၼၼ်ႉယဝ်ႉၼႆတႄႉ ႁဝ်းၶႃႈတေလႆႈႁၼ်ဢၼ်ပဵၼ်တႄႉမီးတႄႉမၼ်းယူႇ။


ၵွပ်ႈပိူဝ်ႈၸိူင်ႉၼႆ ပေႃးၵဵဝ်ႇလူၺ်ႈလွင်ႈၵၢၼ် NCA ၼႆႉမႃး ႁဝ်းၶႃႈမူႇလႂ်ၸုမ်းလႂ်သေဢမ်ႇဝႃႈ - 1.တေလႆႈတူၺ်း ပုၼ်ႈပၢင်ႈတႃႇမူႇၸုမ်း။ 2.တေလႆႈတူၺ်းပုၼ်ႈပၢင်ႈတႃႇၸိူဝ်ႉၸၢတ်ႈၸၢဝ်းၶိူဝ်း။ တၢင်းလုမ်ႈၼၼ်ႉသမ်ႉ တေမီးၵႃႈႁိုဝ်ဢၼ်ဝႃႈၼၼ်ႉ ၼၵ်းၼၵ်းၼႃၼႃသေယဝ်ႉ ၸင်ႇၵွႆႈတႅပ်းတတ်းၼၼ်ႉ လီသေပိူၼ်ႈ။


ပဵၼ်ႁိုဝ်ၵေႃႈယဝ်ႉ ပေႃးဢဝ်ၾိင်ႈၵၢၼ်သၢင်ႈလွင်ႈငမ်းယဵၼ်ဝႃႈၸိုင် မိူၼ်ၸိူင်ႉတီႈၵိူဝ်းၵုမ်ၸိုင်ႈမိူင်းလႄႈ တင်းႁူဝ်ပဝ်ႈ RCSS ဢမ်ႇၼၼ် ၽူႈၼင်ႈၸိုင်ႈ CSSU တေႁူပ်ႉၵၼ်ၼႆႉ သင်ၸိူဝ်ႉပဵၼ်မႃး ၽႂ်ဢမ်ႇၵၢၼ်ႉၽႂ်၊ မီးၽွၼ်းလီၼင်ႇၵၼ် ၸင်ႇတေလႆႈဝႃႈပဵၼ်ပၢင်ၵုမ်ဢၼ်ဢွင်ႇမၢၼ်ထိုင်တီႈ ၼႆယဝ်ႉ။ ၵွပ်ႈပိူဝ်ႈၸိူင်ႉၼႆလႄႈ ႁဝ်းၶႃႈတင်းမူတ်းတင်းသဵင်ႈ ၼင်ႇႁိုဝ်ၾၢႆႇလႂ်ၵေႃႈတေဢမ်ႇသုမ်း၊ တင်းသွင်ပႃႈသွင်ၾၢႆႇမီးလွင်ႈဢွင်ႇပေႉၼင်ႇၵၼ် မီးၽွၼ်းလီၼင်ႇၵၼ်ၼၼ်ႉတႄႉ ထုၵ်ႇလီႁႃငိူၼ်ႈႁႃလၢႆးသေယဝ်ႉ ဢဝ်ၶၢဝ်းယၢမ်းသေဝူၼ်ႉၵႂႃႇ ၼၵ်းၼၵ်းၼႃၼႃယူႇ။ ယွၼ်းထတ်းႁၼ်ၼင်ႇၼႆသေ ၶွတ်ႇယွတ်ႈပၢႆၵႂၢမ်းတီႈၼႆႈ။


ႁိုၼ်း ၵႃယၢင်း