ၸုမ်းၵူၼ်းၼုမ်ႇတႆး TYO ပွတ်းႁွင်ႇ ဢွၼ်ၵၼ်လူင်းပိုၼ်ႉတီႈ ၸႅၵ်ႇပၼ်ၽႃႈပိၵ်ႉပၢၵ်ႇ(Mask) လႄႈ ပၼ်တၢင်းႁူႉ လွင်ႈတၢင်းပဵၼ်ၸိူဝ်ႉမႅင်း ၶႆႈဝတ်းယႂ်ႇ H1N1 တီႈၼမ်ႉၶမ်းလႄႈထုင်ႉလွႆႁူဝ်သိူဝ်။


ဝၼ်းတီႈ 19 – 20 /08/2017 ၸုမ်းၵူၼ်းၼုမ်ႇတႆး TYO ဝဵင်းၼမ်ႉၶမ်းလႄႈ ထုင်ႉလွႆႁူဝ်သိူဝ် ဢွၼ် ၵၼ်ၵႂႃႇပႆတၢင်း ၸႅၵ်ႇၽႃႈပိၵ်ႉပၢၵ်ႇ (Mask)လႄႈ ပၼ်တၢင်းႁူႉၵူၼ်းမိူင်း လွင်ႈတၢင်းပဵၼ် ၸိူဝ်ႉမႅင်း H1N1 ၸိူဝ်းၼႆႉ တီႈၵၢတ်ႇလူင်ဝဵင်းၼမ်ႉၶမ်း၊ ၸွမ်းသဵၼ်ႈတႃႈသၢႆတၢင်းလႄႈ မၢၼ်ႈဝဵင်းတႂ်ႈ ထုင်ႉ လွႆႁူဝ်သိူဝ် ၸိူဝ်းၼႆႉ။

ၸၢႆးဢွၼ်ႇပိုၼ်းတႆး ၽူႈၶဝ်ႈၸုမ်းပွင်ၵၢၼ်ၵူၼ်းၼုမ်ႇ TYO လၢတ်ႈဝႃႈ - “လႆႈႁၼ်ၼႂ်းၶၢဝ်ႇၵူၼ်းၸပ်း တၢင်းပဵၼ်ၼမ်တိူဝ်းမႃးလႄႈ ၸုမ်းၵူၼ်းၼုမ်ႇတႆးမႆႈၸႂ်ပေႃႈမႄႈၵူၼ်းမိူင်းသေ ၸင်ႇဢွၼ်ၵၼ်မႃး ၸႅၵ်ႇၽႃႈပိၵ်ႉသူပ်း (မၢၵ်ႉ)တႃႇ 10,000 ၽိုၼ် ၸႅၵ်ႇၼႂ်းဝဵင်းၼမ်ႉၶမ်း 6,000 ၽိုၼ်လႄႈ ဝၢၼ်ႈဝဵင်း တႂ်ႈ ထုင်ႉလွႆႁူဝ်သိူဝ် 4,000 ၽိုၼ် ႁဝ်းၶႃႈလႆႈဢဝ်ငိုၼ်းၵွင်ၵၢင်ၵူၼ်းၼုမ်ႇႁဝ်းၶႃႈသေ သိုဝ်ႉၸႅၵ်ႇ မိုၼ်ႇဢၼ်ၼႆႉလႆႈၸႂ်ႉငိုၼ်းၵႂႃႇ 3 သႅၼ်ပျႃး ပၢႆ ” ဝႃႈၼႆ။


ၾၢင်ႁၢင်ႈတၢင်းပဵၼ် ၶႆႈဝတ်းယႂ်ႇ H1 N1 ၼႆႉ မိူၼ်ၼင်ႇမီးလူမ်းၼၢဝ်၊ ဢႆ၊ ၶူႈၼင်ၶူမ်း၊ ၶေႃးၸဵပ်း၊ ၶီႈမုၵ်ႈလႆ၊ ၸဵပ်းၸွမ်းၼိူဝ်ႉၸွမ်းတူဝ်၊ ႁူဝ်ၶႆႈ၊ ၵတ်းသၼ်ႇ၊ မၢင်ၵေႃႉပဵၼ်တွင်ႉၵႂႃႇၶႂ်ႈႁၢၵ်ႈ၊ ပေႃးပဵၼ် ႁႅင်းၸိုင်တေထူၺ်ႈ ၸႂ်ဝႆး၊ ထူၺ်ႈၸႂ်ယၢပ်ႇ၊ သူပ်းၶဵဝ်၊ မိုဝ်းၶဵဝ်ၸိူဝ်းၼႆႉ ထိုင်တီႈပေႃးလိုမ်းတူဝ် -ဝႃႈၼႆ။


မိူဝ်ႈဝၼ်းတီႈ 30 – 31 /07/2017 ၼၼ်ႉၵေႃႈ ၸုမ်းၵူၼ်းၼုမ်ႇတႆး TYO ပွတ်းႁွင်ႇဢဵၼ်ႁႅင်းၸမ် 20 ၵေႃႉ ဢွၼ်ၵၼ်ၵႂႃႇ ပႆတၢင်း ၸႅၵ်ႇၽႃႈပိၵ်ႉပၢၵ်ႇလႄႈ ပၼ်တၢင်းႁူႉၵူၼ်းမိူင်း လွင်ႈတၢင်းပဵၼ် ၸိူဝ်ႉမႅင်း H1N1 ၸိူဝ်းၼႆႉ ၸွမ်းၼိူဝ်သဵၼ်ႈတၢင်း၊ ပိုၼ်ႉတီႈႁွင်ႈၵၢၼ်လူင်ပွင်ၸိုင်ႈ၊ ႁူင်းႁပ်ႉလဵင်ႉ လုၵ်ႈဢွၼ်ႇ (ဢမ်ႇမီးပေႃႈမႄႈ) ၸိူဝ်းၼႆႉ။


တေႃႈလဵဝ် ၼႂ်းမိူင်းႁူမ်ႈတုမ် မိူင်းမၢၼ်ႈပတ်းပိုၼ်ႉ ၵူၼ်းမိူင်း ဢၼ်ၸပ်းတၢင်းပဵၼ် ၶႆႈဝတ်းယႂ်ႇ H1N1 ၼႆႉ မီးၵႂႃႇ ယဝ်ႉ 277 ၵေႃႉ၊ ဢၼ်လူႉတၢႆၵႂႃႇ ယွၼ်ႉတၢင်းပဵၼ်ၼႆႉ မီးၵႂႃႇယဝ်ႉ 27 ၵေႃႉ ဝႃႈၼႆ။