ၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း EPRP ၸတ်းႁဵတ်းပၢင်ၾိုၵ်းလပ်ႉၼမ်ႉၵတ်ႉ ႁႂ်ႈၵူၼ်းၼုမ်ႇ ႁူႉပိုၼ်ႉထၢၼ် ၵၢၼ်သၢင်ႈမိူင်းလူၺ်ႈလွၵ်ႈပိူင်ၾႅတ်ႊၻရေႊ ၶၢဝ်းတၢင်း3ဝၼ်း။


ဝၼ်းတီႈ 20 -22 /08/2017 ၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း EPRP ၸတ်းႁဵတ်းပၢင်ႁူပ်ႉ ထူပ်းဢုပ်ႇၵုမ်  ပူၵ်းပွင်ၼမ်ႉၵတ်ႉၵူၼ်းၼုမ်ႇမိူဝ်းၼႃႈလႄႈ ပိုၼ်ႉထၢၼ်ၵၢၼ်မိူင်း မီးၵူၼ်းၼုမ်ႇၼႂ်း ၸုမ်းTYO, TYN, မိူင်းမေႃႇ ၸႄႈမိူင်းၶၢင်၊ ၼမ်ႉၶမ်း၊ လႃႈသဵဝ်ႈ ၊ ၵႃလီႉ၊ ၵုၼ်ႁဵင်၊ ပၢင်လူင်၊ ၵဵင်းတုင်၊ တႃႈၶီႈလဵၵ်း၊ မိူင်းၽျၢၵ်ႈ ၸိူဝ်းၼႆႉ ၶဝ်ႈႁူမ်ႈ 30 ပၢႆ ပၢင်သွၼ်ၸတ်းႁဵတ်းတီႈလုမ်း EPRP ဝဵင်းတူၼ်ႈ တီး ၸိုင်ႈတႆး ပွတ်းၸၢၼ်း ။

ပၢင်ၾိုၵ်းလပ်ႉၼမ်ႉၵတ်ႉၼၼ်ႉ ပိူင်လူင်တႃႇႁူႉလွင်ႈ ၾႅတ်ႊၻရေႊ ပိုၼ်ႉထၢၼ်ၵၢၼ်မိူင်း၊ လွင်ႈတူင်ႇဝူင်းၵူၼ်း၊  ၵၢၼ်မိူင်းၼွၵ်ႈမိူင်း၊ ၼႂ်းမိူင်းၸိူဝ်းၼႆႉလႄႈ တႃႇဝၢင်းၽႅၼ် ၵၢၼ်ပူၵ်းပွင် ၼမ်ႉၵတ်ႉ ၵူၼ်းၼုမ်ႇၵႂႃႇမိူဝ်းၼႃႈ။ ၽူႈမႃးလႅၵ်ႈလၢႆႈတၢင်းႁူႉပဵၼ် Dr.ဢလၢၼ်ႊ သမိတ်ႊ ပဵၼ်ၵူၼ်းမိူင်းဢွတ်ႊသတြေႊလီႊယိူဝ်ႊ ။


လွႆၶမ်းပၢင်ႇ ၵူၼ်းၼုမ်ႇၽူႈၶဝ်ႈႁူမ်ႈ လၢတ်ႈဝႃႈ - “လွင်ႈၾႅတ်ႊၻရေႊၼႆႉ မိူဝ်ႈဢွၼ်တၢင်း ပိူၼ်ႈ ဝႃႈၵေႃႈႁဝ်းဝႃႈၸွမ်းပိူၼ်ႈၵူၺ်း ဢမ်ႇႁူႉတီႈပွင်ႇမၼ်းလီလီ ၵမ်းၼႆႉတႄႉႁူႉၵႂႃႇၸႅင်ႈလႅင်းယဝ်ႉ ပၢင် ႁူပ်ႉထူပ်းၼႆႉမီးၽွၼ်းလီတႃႇၵူၼ်းၼုမ်ႇႁဝ်းတႄႉ ” ဝႃႈၼႆ။


ၸုမ်း EPRP (Ethnic Peace Resources Project) ၼႆႉ ၵႆႉဢွၼ်ၸတ်းႁဵတ်းပၢင်ၾိုၵ်းလပ်ႉၼမ်ႉ ၵတ်ႉၵူၼ်းၼုမ်ႇ၊ ၼၢင်းယိင်းၸိူဝ်းၼႆႉမႃး လၢႆပွၵ်ႈလၢႆၵမ်း ။ မိူဝ်ႈဝၼ်းတီႈ 14-16/07/ 2016 ၼၼ်ႉၵေႃႈ ၸုမ်းၵူၼ်းၼုမ်ႇတႆး TYO လႄႈၸုမ်း EPRP ႁူမ်ႈၵၼ် ၸတ်းႁဵတ်းပၢင်ၾိုၵ်းၾွၼ်ႉ ၽိူမ်ႉၼမ်ႉၵတ်ႉ ၵူၼ်းၼုမ်ႇ ၼင်ႇႁိုဝ် တေမေႃပူၵ်းပွင် ပဵၼ်ၽူႈဢွၼ်ႁူဝ်၊ ၵၢၼ်မိူင်းလွင်ႈ ၾႅတ်ႊၻရေႊ၊ ၵၢၼ်တူင်ႉၼိုင်တူင်ႇဝူင်းလႄႈ မေႃတမ်းဝၢင်းၽႅၼ်ၵၢၼ်မိူဝ်းၼႃႈ ၸဵမ်ၸိူဝ်း ၼႆႉ။