သၽႃးမိူင်းႁူမ်ႈတုမ် မွပ်ႈငိုၼ်းႁဵင်သႅၼ်ပၼ် ၶွမ်ႊမတီႊ ပူၵ်းပွင်မုၼ်းလႅင်းၶိုၼ်ႈယႂ်ႇ ၸႄႈဝဵင်းသႅၼ်ဝီ  တႃႇပူၵ်းပွင်မုၼ်းလႅင်းၶိုၼ်ႈယႂ်ႇ ၸွမ်းဝၢၼ်ႈဢိူင်ႇ တႃႇပီ 2017-2018။


ဝၼ်းတီႈ 23/08/2017 ၽွင်းလူင်ၾၢႆႇၵၢၼ်ငိုၼ်း မိူင်းႁူမ်ႈတုမ် ပူင်ငိုၼ်းလူင်းပၼ် ၼႂ်ႈၸႄႈဝဵင်းသႅၼ်ဝီ ဢၼ်ၽူႈတႅၼ်းသၽႃးၵူၼ်းမိူင်း ၸၢႆးဢူးၶမ်း တၢင်ႇယွၼ်းဝႆႉ ပီ 2017-2018 ၶၢဝ်းတၢင်း 1 ပီ  တႃႇပူၵ်း ပွင်မုၼ်းလႅင်းၶိုၼ်ႈယႂ်ႇ ပၼ်ၵူၼ်းမိူင်း တႃႇမူႇဝၢၼ်ႈ 185 ဝၢၼ်ႈလႄႈ ပွၵ်ႉ 4 ပွၵ်ႉ ၼႂ်းၸႄႈဝဵင်းသႅၼ်ဝီ ၸႄႈ တွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၶႃႈႁဝ်းလႆႈ တၢင်ႇ ယွၼ်း ငိုၼ်းၼႂ်းပီ 2017-2018 ၶၢဝ်းတၢင်းၼိုင်ႈပီ တႃႇႁဵတ်းတႃႇသၢင်ႈပၼ်ၵူၼ်းမိူင်း ဢၼ်ၸွမ်း မူႇဝၢၼ်ႈၵူၼ်း မိူင်းႁဝ်း ဢၼ်တူၵ်းတၢင်းယၢပ်ႇၽိုတ်ႇ လူဝ်ႇတၢင်းၸွႆႈထႅမ် ၸိူဝ်းၼၼ်ႉ” ဝႃႈၼႆ။


သိုပ်ႇလၢတ်ႈထႅင်ႈ ဢၼ်ႁဝ်းၶႃႈဝၢင်းၽႅၼ်သေ တေလူင်းႁဵတ်းပၼ်ၵူၼ်းမိူင်းသမ်ႉ သဵၼ်ႈတၢင်း၊ ၶူဝ်၊ ၼမ်ႉ၊ ၾႆး ဢိၵ်ႇထႅင်ႈလၢႆလၢႆဢၼ်။ လွင်ႈတေလူင်းႁဵတ်းသၢင်ႈပၼ်ၵူၼ်းမိူင်းႁဝ်းၶႃႈၼႆႉ ႁဝ်းၶႃႈတေတူၺ်း မူႇဝၢၼ်ႈ ဢၼ်ထူပ်း တၢင်းယၢပ်ႇၽိုတ်ႇသႅၼ်း(A) (B) (C) ၸိူဝ်းၼႆ။ သင်ဝႃႈ ငိုၼ်း 1 ႁဵင် သႅၼ် လူင်းမႃးလႄႈ ဢမ်ႇၵုမ်ႇထူၼ်ႈတင်းမူတ်း ၼႆႉ ႁႂ်ႈပီႈၼွင်ႉၵူၼ်းမိူင်းႁဝ်း တၢင်ႇၶိုၼ်ႈမႃးထႅင်ႈပီၼႃႈ။ ႁႂ်ႈတၢင်ႇၶိုၼ်ႈမႃး တိၵ်းတိၵ်း။ ပေႃးမႃးၼပ်ႉသွၼ်ႇတူၺ်း ငိုၼ်း 1 ႁဵင်သႅၼ် တေႃႇပီၼႆႉ မၼ်းဢမ်ႇပေႃး တႃႇပူၵ်းပွင် ၼႂ်းဝၢၼ်ႈၼႂ်းမိူင်းႁဝ်း ဢၼ်လူဝ်ႇႁဵတ်းလူဝ်ႇသၢင်ႈ မီးတင်းၼမ်” ဝႃႈၼႆ။


ယူႇတီႈသၽႃးမိူင်းႁူမ်ႈတုမ် မွပ်ႈငိုၼ်းႁဵင်သႅၼ်ပၼ် ၽူႈတႅၼ်းၼိုင်ႈၵေႃႉ ပူၵ်းပွင်ၼႂ်းမူႇဝၢၼ်ႈ ၸႄႈဝဵင်းၽႂ်မၼ်း တႄႇမႃး ၸဵမ်မိူဝ်ႈပီ 2010 ပၢၼ်ၸွမ်ၸိုင်ႈတဵင်းၸဵင်ႇ ၼၼ်ႉယဝ်ႉ ဝႃႈၼႆ။


ၸၢႆးဢူးၶမ်း သိုပ်ႇလၢတ်ႈထႅင်ႈဝႃႈ ဝၼ်းတီႈ 25 တေထိုင်ၼႆႉ ၶႃႈႁဝ်းတေပွၵ်ႈမိူဝ်းတူၺ်း ၸွမ်းပိုၼ်ႉတီႈ ဢၼ် ႁဝ်းၶႃႈ ဝၢင်းၽႅၼ်တေပူၵ်းပွင်ႁဵတ်းသၢင်ႈပၼ်ၵူၼ်းမိူင်းႁဝ်း ၸိူဝ်းၼၼ်ႉ” ဝႃႈၼႆ။


ၼႂ်းၸႄႈဝဵင်းသႅၼ်ဝီ ၼႆႉ တင်းမူတ်း ဝၢၼ်ႈၵူၼ်းမီး 185 ဝၢၼ်ႈလႄႈ ပွၵ်ႉ 4 ပွၵ်ႉ ႁူဝ်ၵူၼ်းတင်းမူတ်းမီး 5 မိုၼ်ႇပၢႆ ဢၼ်လူဝ်ႇတီႈသုတ်းၵေႃႈ တေပဵၼ်ၾႆး၊ ၼမ်ႉ၊ ၶူဝ်၊ သဵၼ်ႈတၢင်း ၸိူဝ်းၼႆႉ ဝႃႈၼႆ။