ၽူႈတႅၼ်းသၽႃး ၵူၼ်းမိူင်း ၸႄႈဝဵင်းသႅၼ်ဝီ သၢၼ်ၶတ်း လွင်ႈမိၵုၼ်ႇၶျၢၼ်း ၽူႈတႅၼ်းသၽႃးၵူၼ်းမိူင်း ၸၢဝ်း မွၼ်း တၢင်ႇလၢတ်ႈၼ်ႂ်းပၢင်ၵုမ် လွင်ႈၶႂ်ႈဢဝ်ၵေႃၵမ်ၵၢၼ် ၾႆးၾႃႉ ဝၢၼ်ႈၼွၵ်ႈၼႃးပၢင်ႇ သႂ်ႇၶဝ်ႈယူႇပႃႈတႂ်ႈ ႁွင်ႈ ၵၢၼ်လူင် ၾၢႆႇၾႆးၾႃႉ မိူင်းႁူမ်ႈတုမ် ၼေႇပျီႇတေႃႇ။


ဝၼ်းတီႈ 21/08/2017 ၼၼ်ႉ မိၵုၼ်ႇၶျၢၼ်း ၽူႈတႅၼ်းသၽႃးၸႄႈဝဵင်းပွင်ႇ ၸႄႈမိူင်းမွၼ်းၼၼ်ႉ တၢင်ႇ လၢတ်ႈ ၼႂ်းသၽႃးဝႃႈ - ၶႂ်ႈဢဝ်ၵေႃၵမ်ၵၢၼ်ၾႆးၾႃႉ ဝၢၼ်ႈၼွၵ်ႈၼႃးပၢင်ႇ သႂ်ႇၼႂ်းႁွင်ႈၵၢၼ်ၾႆးၾႃႉ မိူင်းႁူမ်ႈ တုမ်ၼႆၼၼ်ႉ ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ဝဵင်းသႅၼ်ဝီ သၢၼ်ၶတ်းဝႃႈ ဢမ်ႇတူၵ်းထုၵ်ႇလႅပ်ႈ တႃႇမိူင်းတႆး ဝႃႈၼႆ။ ၼွၵ်ႈ လိူဝ်ၼၼ်ႉ ၸၢႆးတၢၼ်ႉၸိၼ်ႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းသီႇပေႃႉ ၵမ်ႉထႅမ် ႁၼ်လီၸွမ်း ၸၢႆးဢူးၶမ်း ဝႃႈ ၼႆ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၵေႃၵမ်ၵၢၼ်ၾႆးၾႃႉ တူင်ႇတၢင်ႇပိုၼ်ႉတီႈၽႂ်မၼ်း ၼႂ်းမိူင်းတႆးႁဝ်းၼႆႉ ပေႃးတေယႃႉပႅတ်ႈၼႆတႄႉ ႁဝ်းၶႃႈဢမ်ႇၽွမ်ႉ ၵွပ်ႈသင်ၼႆ ၶႃႈ ႁဝ်းလႆႈထၢမ်တူၺ်း ပီႈၼွင်ႉၵူၼ်းမိူင်းၼႂ်းမိူင်းတႆးႁဝ်း တင်းပွတ်းႁွင်ႇ လၢႆလၢႆတီႈ ဢၼ်ၵူၼ်းမိူင်း ဝၢၼ်ႈၼွၵ်ႈၼႃး ပၢင်ႇႁဝ်း ႁဵတ်းၾႆးၾႃႉ ႁင်းၵူၺ်းၼၼ်ႉ မၼ်းသၢင်ႇထုၵ်ႇဝႆႉႁင်းၶဝ်ယဝ်ႉ။ ယွၼ်ႉၼၼ် ဢၼ်ပီႈၼွင်ႉၵူၼ်းမိူင်းတႆး ႁဝ်း သၢင်ႇထုၵ်ႇသေ ႁဵတ်းၾႆးၾႃႉ ႁင်းၽႂ်မၼ်းသေၸႂ်ႉၼၼ်ႉ သမ်ႉတေလႆႈယႃႉပႅတ်ႈသေ ၵႂႃႇယူႇတႂ်ႈၼႂ်းႁွင်ႈ ၵၢၼ်လူင် ၾႆးၾႃႉမိူင်းႁူမ်ႈတုမ်။  သဵင်ၵူၼ်းမိူင်း ႁဝ်းၵမ်ႈၼမ်တႄႉဢမ်ႇႁၼ်လီလႄႈ ၸင်ႇလႆႈသၢၼ်ၶတ်း ၼၼ်ႉၶႃႈယဝ်ႉ” ဝႃႈၼႆ။


ၼႂ်းပၢင်ၵုမ်သၽႃးၽူႈတႅၼ်းၵူၼ်းမိူင်းၵမ်ႈၼမ် ဢမ်ႇႁၼ်လီဢမ်ႇၵမ်ႉထႅမ် လွင်ႈတေယႃႉပႅတ်ႈ ၶွမ်ႊမတီႊၾႆးၾႃႉ ၸွမ်းဝၢၼ်ႈၼွၵ်ႈၼႃးပၢင်ႇၼၼ်ႉ ယွၼ်ႉမီးၾၢႆႇသၢၼ်ၶတ်းလႄႈယူႇတီႈ ႁူဝ်ပဝ်ႈ သၽႃးၵူၼ်းမိူင်းၵေႃႈ  ဢမ်ႇၸၢင်ႈ မၵ်းမၼ်ႈပၼ်လႆႈ ႁႂ်ႈတႅမ်ႈပဵၼ်ပိုၼ်း/မၢႆတွင်းဝႆႉၵူၺ်း ဝႃႈၼႆ။


ၼႂ်းမိူင်းတႆးပတ်းပိုၼ်ႉၼႆႉ ယွၼ်ႉပိူဝ်ႈ လူင်ပွင်ၸိုင်ႈ ၵူႈသိုပ်ႇၵူႈပၢၼ် ဢမ်ႇၶပ်းၶိုင်ပၼ်လႆႈ ၾႆးၾႃႉႁႂ်ႈထိုင်ၵူႈဝၢၼ်ႈ ၵူႈဢိူင်ႇလႄႈ ၵူၼ်းဝၢၼ်ႈ ၸင်ႇလႆႈလုၵ်ႉတင်ႈႁူဝ်ၶိူင်ႈၾႆးၾႃႉႁဵတ်းဢွၵ်ႇၸႂ်ႉ ႁင်းၽႂ်မၼ်း။ မိူင်းတႆးၼႆႉ မီးတၢတ်ႇႁူင်း ၸၢၵ်ႈၾႆးၾႃႉ ၵဵင်းတွင်း၊ ၼမ်ႉမၢဝ်း၊ ၼမ်ႉတူႈ၊ ၼမ်ႉယၢဝ်၊ ၸေႃႇၵျီႇ၊ ၼမ်ႉၽီလူး ၸိူဝ်းၼႆႉသေတႃႉ လူင်ပွင်ၸိုင်ႈ ဢဝ်ၵႂႃႇဝဵင်းယႂ်ႇ ဝဵင်းလူင်သဵင်ႈသဵင်ႈ။ ဝၢၼ်ႈ၊ ဢိူင်ႇ ဢၼ်ပႆႇမီးၾႆးၾႃႉတိုၵ်ႉမီးၼမ်။