ၾၢႆႇၽွင်းငမ်း (ဢုပ်ႉပိူင်ႇ)ဝဵင်းၼမ်ႉၶမ်းလႄႈ မူႇၸေႊ ပိုၼ်ၽၢဝ်ႇတေပတ်းပူလူမႄး ႁူင်းၾႆးၾႃႉ ၶၢဝ်းတၢင်း 4 ဝၼ်း ၵူၼ်းမိူင်းမႆႈၸႂ် ၵူဝ်ၵူၼ်းလၵ်ႉၵူၼ်းၸူၼ်ဢဝ်တိုဝ်ႉတၢင်းၼႆႉသေ ႁႃလၵ်ႉၸွမ်းပွၵ်ႉၸွမ်း ဝၢၼ်ႈ။


ဝၼ်းတီႈ 22/08/2017 ႁွင်ႈၵၢၼ်ၾၢႆႇၾႆးၾႃႉ လူင်ပွင်ၸိုင်ႈ ပိုၼ်ၽၢဝ်ႇဝႃႈ တေၶိုၼ်းမႄးပတ်းပူ လူမႄး ႁူင်းၾႆးၾႃႉၼႆလႄႈ တေပိၵ်ႉၾႆး ၶၢဝ်းတၢင်း 4 ဝၼ်း 27 – 30/08/2017 တီႈဝဵင်းမူႇၸေႊ လႄႈၼမ်ႉၶမ်း ၵူၼ်းမိူင်းမႆႈၸႂ်ၵူဝ်ၵူၼ်းလၵ်ႉ ၵူၼ်းၸူၼ်ဢဝ်တိုဝ်ႉတၢင်းၼႆႉသေ လႄႇႁႃလၵ်ႉ ၸွမ်းဢိူင်ႇၸွမ်းဝၢၼ်ႈ။

ၸဝ်ႈၼႃႈတီႈ ၾၢႆႇၾႆးၾႃႉပိုၼ်ၽၢဝ်ႇဝႃႈ - ဝၼ်းတီႈ 27/08/2017 ၵၢင်ၼႂ် 7 မူင်းတေႃႇဝၼ်းတီႈ 30/08/2017 ဝၢႆးဝၼ်း 3 မူင်းၶိုင်ႈ တေတတ်းၾႆးၾႃႉ ဢၼ်သူင်ႇပၼ် ၼမ်ႉၶမ်း၊ မူႇၸေႊ၊ ၶၢဝ်း တၢင်း 4 ဝၼ်း ယွၼ်ႉတေမူၼ်ႉမႄးၶိူင်ႈ Main Transformer ၶိူင်ႈၸၢၵ်ႈမၢႆ 6 ႁူင်းၾႆးၾႃႉဝၢၼ်ႈ တၢတ်ႇမၢႆ 1 ၼမ်ႉမၢဝ်း ဝႃႈၼႆ။


ဝဵင်းၼမ်ႉၶမ်း၊ ဝဵင်းမူႇၸေႊၼႆႉ ပဵၼ်ၸႄႈဝဵင်း တိတ်းၸပ်းလႅၼ်လိၼ်ၶႄႇ၊ ၵူၼ်းတၢင်ႇၶိူဝ်း ၸိူဝ်း လုၵ်ႉထုင်ႉလိၼ်ပဵင်း မႃးႁဵတ်းၵၢၼ်ၼမ် ၵူၼ်းသူႇသမ်းၵိၼ်ယႃႈမဝ်းၵမ်ၵေႃႈၼမ် ၵူၼ်းလၵ်ႉ ၵူၼ်းၸူၼ်ၵေႃႈလိူင်ႇ ၵူၼ်းဝၢၼ်ႈၵူၼ်းမိူင်းမႆႈၸႂ် တႃႇႁူမ်ႇလူမ်ႈႁိူၼ်းယေးၽႂ်မၼ်း။


ၸၢႆးယီႈ ၼမ်ႉၶမ်း လၢတ်ႈဝႃႈ - ပေႃးပိၵ်ႉၾႆးၸိူင်ႉၼႆၼႆႉႁဝ်းၶႃႈ လႆႈၾၢင်ႉလိူဝ်သေၵဝ်ႇ ယွၼ်ႉၵူၼ်း လၵ်ႉၵူၼ်းၸူၼ်ၵေႃႈၼမ် ၵူဝ်ၶူဝ်းၶွင်ႁၢႆ ႁဝ်းၶႃႈလႆႈပၼ်ႇပုတ်ႈၵၼ်သေ ဢဝ်ႁူမ်ႇလူမ်ႈပွၵ်ႉ ၊ ဝၢၼ်ႈ ၽႂ်မၼ်း လူင်ပွင်ၸိုင်ႈတႄႉဢမ်ႇသူႈမႃးၸွႆႈသင်။


ၾၢႆၾႆးၾႃႉဢၼ်ဢွၵ်ႇတီႈတၢတ်ႇဝၢၼ်ႈတၢတ်ႇၼႆႉ လူင်ပွင်ၸိုင်ႈမၢၼ်ႈ ၶၢႆပၼ်မိူင်းၶႄႇဝႆႉ ၼပ်ႉႁူဝ် သိပ်းပီ ႁႅင်းၾႆးတႃႇ30% ၶၢႆပၼ်ၵူၼ်းမိူင်းၸႂ်ႉ၊  70% သမ်ႉၶၢႆပၼ်မိူင်းၶႄႇ ၶွမ်ႊပၼီႊ Junction River Co.Ltd သမ်ႉ မဝ်ဢဝ်ႁူင်းၾႆးၾႃႉၼႆႉတီႈလူင်ပွင်ၸိုင်ႈမၢၼ်ႈသေ ၸႅၵ်ႇၶၢႆပၼ်ၶိုၼ်း ၵူၼ်း မိူင်းတႆး မူႇၸေႊ၊ ၼမ်ႉၶမ်း၊ ပၢင်ႇသၢႆးၸိူဝ်းၼႆႉ ။ ၶွမ်ႊပၼီႊၼႆႉၵဵပ်းဢဝ်ငိုၼ်းၵႃႈၾႆး 1 ယူႊၼိတ်ႊ ၵူၼ်းမိူင်းလႆႈၸၢႆႇ 35 ပျႃး ပေႃးပဵၼ်ႁၢၼ်ႉတၢင်းၶၢႆ 1 ယူႊၼိတ်ႊ 75 ပျႃး။