ၵေႃၵမ်ၵၢၼ်လႅၼ်လိၼ်ထႆး – မၢၼ်ႈ ႁူပ်ႉထူပ်းဢုပ်ႇၵုမ်ၵၼ် ၵမ်းထူၼ်ႈ 90 လႅၵ်ႈလၢႆႈ ၶေႃႈမုလ်းၵၼ်လႄႈ ႁႃတၢင်းၵႄႈလိတ်ႈပၼ်ႁႃ ၸွမ်းလႅၼ်လိၼ်လႄႈတႃႇပႅင်းမႅတ်ႇထိူၼ်ႇၶိူဝ်းပႃႇမႆႉမိူင်းႁူမ်ႈတုမ်ဢႃႊသျႅၼ်ႊ ၸိူဝ်းၼႆႉ။


ဝၼ်းတီႈ 09/08/2017 ပူၼ်ႉမႃးၼႆႉသိုဝ်ႇၶၢဝ်ႇထႆး Mae Sai News ပိုၼ်ၽၢဝ်ႇဝႃႈ ၶွမ်ႊမတီႊ လႅၼ်လိၼ် ထႆး- မၢၼ်ႈ TBC ၸတ်းႁဵတ်းပၢင်ၵုမ် ပွၵ်ႈၵမ်းတီႈ 90 တီႈႁူင်းႁႅမ်းမႄႈၶူင်ၻဵတ်ႉတႃႉ ၿူႊတိၵ်ႊ ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး ၸိုင်းထႆး။ မီးၸဝ်ႈသိုၵ်းလူင် ၵီႊၻႃႊၵွၼ်ႊ ၸၼ်ႊ ထရႃႊ ၾၢႆႇထႆးလႄႈ ၸဝ်ႈသိုၵ်းဢွင်ႇတိၼ်ႇဢူး ၾၢႆႇမၢၼ်ႈ ဢွၼ်ႁူဝ်ႁူပ်ႉထူပ်း ဢုပ်ႇဢူဝ်းၵၼ်။


ဢုပ်ႇဢူဝ်းၵၼ်လၢႆလွင်ႈမိူၼ်ၼင်ႇ တႃႇပိုတ်ႇၵၢတ်ႇၼတ်ႉ (ၵၢတ်ႇ7ဝၼ်းၼိုင်ႈပွၵ်ႈ) တီႈၵိဝ်ႇၽႃဝွၵ်ႈ ဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၊ လွင်ႈတႃႇၸွႆႈထႅမ်ၵူၼ်းထႆးဢၼ်ၶဝ်ႈႁဵတ်းၵၢၼ်မိူင်းတႆး၊ လွင်ႈၵႄႈလိတ်ႈပၼ်ႁႃဢၢႆၵွင်ႉဢၢႆၵႂၼ်း ၾႆးမႆႈပႃႇ၊ လွင်ႈၸွမ်းႁႃတူဝ်ၵူၼ်းႁၢႆႉ ဢၼ်ပၢႆႈၶဝ်ႈ မိူင်းႁူမ်ႈ တုမ်မၢၼ်ႈ ၊ လွင်ႈ 2 ၽႅၼ်ႇလိၼ်တေႁူမ်ႈၵၼ်ၽုၵ်ႇတူၼ်ႈမႆႉလုမ်းလႃးပႃႇမႆႉ ဢႃႊသျႅၼ်ႊႁူမ်ႈၵၼ် 2 ၽႅၼ်ႇလိၼ်ၸိူဝ်းၼႆႉ။

ဝၼ်းတီႈ 13/06/2017 ၼၼ်ႉၵေႃႈ ဢိင်ၼိူဝ်ပၢင်ၵုမ်ၶွမ်ႊမတီႊ လႅၼ်လိၼ်ပွၵ်ႈၵမ်း 89 တူၵ်း လူင်းလႆႈၸႂ်ၵၼ်သေ ၶွမ်ႊမတီႊလႅၼ်လိၼ် TBC မၢၼ်ႈ- ထႆး ၸဝ်ႈသိုၵ်းလူင် ထူင်ႊၶျႆႊ မိုဝ်ႊၼၼ်ႊ လႄႈ ၵႅမ်ၸွမ်ႁၢၼ်တၢၼ်းဢူး (သိုၵ်းမၢၼ်ႈ) ဢိၵ်ႇၽူႈမီးပုၼ်ႈၽွၼ်း ထႅင်ႈလၢႆၵေႃႉလႄႈ ၵူၼ်းဝၢၼ်ႈ ၵူၼ်းမိူင်းတင်းသွင်ၾင်ႇမိူင်း ႁူမ်ႈၵၼ်ၽုၵ်ႇတူၼ်ႈမႆႉ။ ၵူၼ်းမိူင်းၾၢႆႇတႃႈၶီႈလဵၵ်း 150 ၵေႃႉ၊ ၾၢႆႇ မႄႈသၢႆ 350 ၵေႃႉတင်းမူတ်း 500ၵေႃႉ ႁူမ်ႈၵၼ် ၽုၵ်ႇတူၼ်ႈမႆႉ 2,000 တူၼ်ႈ တီႈဝၢၼ်ႈဝင်ႊ လၢဝ်ႊ ၸႄႈဝဵင်းၵဵင်းသႅၼ် ၸႄႈတွၼ်ႈ ၵဵင်းႁၢႆး တင်းတီႈဝၢၼ်ႈပုင်းထုၼ် ဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇ၊ ၼႂ်းလိူၼ်ၼႆႉၵေႃႈ တေႁူမ်ႈၵၼ်ၽုၵ်ႇထႅင်ႈဝႃႈၼႆ။


မိူဝ်ႈဝၼ်းတီႈ 27/04/2017 ၶွမ်ႊမတီႊ လႅၼ်လိၼ် TBC ၸတ်းႁဵတ်းပၢင်ၵုမ် ပွၵ်ႈၵမ်းတီႈ 89 ဢုပ်ႇဢူဝ်းၵၼ်လၢႆလွင်ႈ မိူၼ်ၼင်ႇ လွင်ႈပႃႇမႆႉ (ၽိုၼ်ပႃႇ) ဢႃႊသျႅၼ်ႊ၊ 2 .ပၼ်ႁႃဢၢႆ ၵွင်ႉဢၢႆၵႂၼ်း လႄႈ ၵၢၼ်ၽဝ်ပႃႇ၊ လွင်ႈပႅတ်ႈယုၵ်းယၵ်းလူင်းမႄႈၼမ်ႉသၢႆ၊ လွင်ႈႁူမ်ႈၵၼ်တီႉၺွပ်းၵူၼ်း ၽိတ်းမၢႆ မီႈပၢႆႈၶဝ်ႈၼႂ်းလႅၼ်လိၼ်တင်းသွင်ၾၢႆႇ၊ လွင်ႈႁူမ်ႈၵၼ်ၽဵဝ်ႈမူၺ်ႉတီႉၺွပ်း ၵူၼ်းၵႃႉၶၢႆယႃႈ မဝ်းၵမ်၊ လွင်ႈတူၺ်းလွမ်ပၢႆးယူႇလီလႄႈ ၸွႆႈၵၼ်ႁႄႉၵင်ႈ တၢင်းပဵၼ် ဢၼ်ၸၢင်ႈၽႄႈတိူၼ်းၸွမ်းလႅၼ် လိၼ်၊ လွင်ႈႁူမ်ႈမိုဝ်းၸတ်းပၢင်ပွႆး ၸွမ်းၾိင်ႈႁိတ်ႈႁွႆး ၸဵမ်ၸိူဝ်းၼႆႉ။