ၵႃး တင်း လူတ်ႉၶိူင်ႈသၢမ်လေႃႉ လေႃႇၽႃႇတမ်ၵၼ် တီႈၼႂ်းဢိူင်ႇယၢင်းလေႃး ဝဵင်းၵဵင်းတုင် ၾၢႆႇၵူၼ်းႁေႃႈလူတ်ႉ သၢမ်လေႃႉ မဝ်းလဝ်ႈသေ ႁေႃႈဝႆး ဝႃႈၼႆလႄႈ လႆႈသၢႆႈငိုၼ်းၸဝ်ႈလူတ်ႉၵႃး 4 လၢၼ်ႉၵျၢတ်ႉ ဝႃႈၼႆ။


ဝၼ်းတီႈ 14/08/2017 ယၢမ်းဝၢႆးဝၼ်း 4 မူင်းပၢႆၼၼ်ႉ ၵူၼ်းႁေႃႈလူတ်ႉၶိူင်ႈသၢမ်လေႃႉ တၢင်ႇမူမႃး 9 တူဝ် လုၵ်ႉတၢင်းဝၢၼ်ႈလၵ်း၊ ဝၢၼ်ႈၼွင်ၽၢမ် မႃးတၢင်ႇ ဝၢၼ်ႈယၢင်းလေႃး၊ လူတ်ႉၵႃး သမ်ႉ လုၵ်ႉတၢင်းဝဵင်းသေမႃး တင်းသွင်ၾၢႆႇလေႃႇတမ်ၽႃႇၵၼ် တီႈဝၢၼ်ႈယၢင်းလေႃး ဢိူင်ႇယၢင်းလေႃး ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇ။

ၸၢႆးသၢမ် ၵူၼ်းဝၢၼ်ႈယၢင်းလေႃး လၢတ်ႈဝႃႈ “ လူတ်ႉၶိူင်ႈသၢမ်လေႃႉၼႆႉ လုၵ်ႉတၢင်းဝၢၼ်ႈလၵ်းၼွင်ၽၢမ်မႃး ၼႂ်းလူတ်ႉၶိူင်ႈသမ်ႉ တၢင်ႇမူမႃး၊ ထႅင်ႈၾၢႆႇၼိုင်ႈၵေႃႈ ၵူၼ်းႁေႃႈလူတ်ႉၶိူင်ႈသၢမ်လေႃႉသမ်ႉ မဝ်းလဝ်ႈၵေႃႈပႃး သမ်ႉႁေႃႈဝႆး တေဢမ်ႇၵုမ်းလႆႈႁူဝ်လူတ်ႉၶိူင်ႈသၢမ်လေႃႉ ယွၼ်ႉႁူဝ် လူတ်ႉၽႅတ်း သေ လေႃႇတမ်သႂ်ႇ ၵႃးဢၼ်လုၵ်ႉတၢင်းဝဵင်းမႃး။ ၵႃးတင်း သၢမ်လေႃႉ တမ်ၽႃႇၵၼ်ၼႆႉတင်းသွင်ၾၢႆႇမီးလွင်ႈလူႉ သုမ်းၼင်ႇၵၼ်။ ၵူၺ်းၵႃႈ တင်းဢၼ်ၽိတ်းတႄႉ ပဵၼ်လူတ်ႉၶိူင်ႈသၢမ်လေႃႉ တေႃႈလဵဝ် ယူႇတီႈၸဝ်ႈၼႃႈတီႈၾၢႆႇ လူတ်ႉၵႃး ႁွင်ႉဢဝ်ၵူၼ်းႁေႃႈလူတ်ႉၶိူင်ႈသၢမ်လေႃႉၼၼ်ႉၵႂႃႇႁူင်းပလိၵ်ႈသေ  မၢပ်ႇမႂ်ႁႂ်ႈ သၢႆႈတႅၼ်းၶိုၼ်း ၵႃးဢၼ် လူႉၵွႆၼၼ်ႉ တႃႇငိုၼ်း 4 လၢၼ်ႉၵျၢတ်ႉ” ဝႃႈၼႆ။


ၵူၼ်းႁေႃႈလူတ်ႉၶိူင်ႈသၢမ်လေႃႉၼႆႉ ၸိုဝ်ႈႁွင်ႉ ၸၢႆးသႅင် ယူႇၼႂ်းဢိူင်ႇယၢင်းလေႃး ဝႃႈၼႆ။


ပူၼ်ႉမႃး ဝၼ်းတီႈ 13/08/2017 ယၢမ်းၵၢင်ၶိုၼ်း 11 မူင်းၼၼ်ႉ လူတ်ႉၵႃး လမ်းၼိုင်ႈ လေႃႇတမ်သႂ်ႇႁိူၼ်း ၵူၼ်း ဝၢၼ်ႈ ဝၢၼ်ႈဝေႃႇၶုတ်ႉ ဢိူင်ႇယၢင်းလေႃးၵဵင်းတုင် ယွၼ်ႉမဝ်းလဝ်ႈသေႁေႃႈၵႃး ဢမ်ႇၵုမ်းလႆႈႁႅင်းလူတ်ႉၵႃးလႄႈ လေႃႇ တမ်သႂ်ႇ။ ၵူၼ်းႁေႃႈၵႃးတႄႉ လႆႈမၢတ်ႇၸဵပ်းသေ သူင်ႇယူတ်းယႃတူဝ်ဝႆႉတီႈ ႁူင်းယႃၵူၼ်းမိူင်း ၸႄႈ ဝဵင်း ၵဵင်းတုင်။ ၵဵဝ်ႇၵပ်းလွင်ႈ ၵူၼ်းႁိူၼ်းဢၼ်ထုၵ်ႇၵႃးၽႃႇတမ်သႂ်ႇၼၼ်ႉ ဢမ်ႇမီးလွင်ႈမၢတ်ႇၸဵပ်းလူႉတၢႆသင်။ လွင်ႈလူႉ သုမ်း တီႈႁိူၼ်းတႄႉ ယူႇတီႈၾၢႆႇၸဝ်ႈၶွင်ၵႃး ဢဝ်ပုၼ်ႈၽွၼ်းသေ လႆႈသၢႆႈတႅၼ်းပၼ် ဝႃႈၼႆ။