ၵူၼ်းဝၢၼ်ႈၵူၼ်းသူၼ် ဝၢၼ်ႈၸေႊမႂ်ႇ လင်ႁိူၼ်း 100 ပၢႆ ၼႂ်းဢိူင်ႇၼွင်တဝ်း ၸႄႈမိူင်းမၢဝ်း ႁူမ်ႈၵၼ် ၼႄၵၢင်ၸႂ် တေႃႇၸဝ်ႈၼႃႈတီႈပလိၵ်ႈၶႄႇလွင်ႈတီႉၺွပ်းၵူၼ်းဝၢၼ်ႈထိုင်တီႈ လႆႈလူႉတၢႆၵႂႃႇ ၼႂ်းၶွၵ်ႈၼၼ်ႉ ဝႃႈၼႆ။


ဝၼ်းတီႈ 25/08/2017 ၵူၼ်းဝၢၼ်ႈၸေႊမႂ်ႇ  ဢွၵ်ႇၼႄၵၢင်ၸႂ် တေႃႇၸဝ်ႈၼႃႈတီႈပလိၵ်ႈၶႄႇ တီႈႁူင်းပလိၵ်ႈ ၼွင်တဝ်း ၸႄႈမိူင်းမၢဝ်း မိူင်းၶႄႇ။ ယွၼ်ႉပိူဝ်ႈၸဝ်ႈၼႃႈတီႈတီႉၺွပ်းၵူၼ်းဝၢၼ်ႈၸေႊမႂ်ႇ ၵႂႃႇလူၺ်ႈ ဢမ်ႇမီး တၢင်းၽိတ်းသင်သေ ပေႃႉထုပ်ႉထိုင်တီႈလူႉတၢႆၵႂႃႇၼႂ်းၶွၵ်ႈၼၼ်ႉ ဝႃႈၼႆ။


ၵူၼ်းဝၢၼ်ႈၼွင်တဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ဝၢႆးသေလုင်းၸၢႆးမွင်ႇၺုၼ်ႉ လႆႈသဵင်ႈၵႂႃႇယဝ်ႉၼၼ်ႉ ၾၢႆႇၸဝ်ႈၼႃႈတီႈၶႄႇၶဝ်ၵေႃႈ ဢမ်ႇမႃးၵႄႈလိတ်ႈပၼ်သင်ၶိုၼ်း ဢမ်ႇမႃးသၢႆႈတႅၼ်းသင်ပၼ်။ တၢင်းပူႇၵႄႇပူႇသႅၼ် သႅၼ်ၵေႃႈ ဢမ်ႇမႃးလၢတ်ႈသင်။ လွင်ႈပိူင်ပဵၼ် ၵၢၼ်တၢႆ လုင်းၸၢႆး မွင်ႇၺုၼ်ႉၼႆႉ တုၵ်းယွၼ်းၶႂ်ႈႁႂ်ႈ ၸဝ်ႈၼႃႈတီႈ ၶဝ်မႃးၵႄႈလိတ်ႈပၼ် ႁဝ်းၶႃႈပဵၼ်ၵူၼ်း ဝၢၼ်ႈၵူၼ်းသူၼ်ၶႂ်ႈႁူႉ ၶႂ်ႈႁၼ် ႁဵတ်းႁိုဝ်မၼ်းတၢႆၵႂႃႇ” ဝႃႈၼႆ။

ၵူၼ်းဝၢၼ်ႈၸေႊမႂ်ႇ မီးလင်ႁိူၼ်း 100 ပၢႆ ႁႂ်ႈလႆႈပဵၼ်ၼမ်ႉၼိုင်ႈၸႂ်လဵဝ် ဢဝ်ၵၼ်ဝႃႈပႃးၵၼ်ပဵၼ် ၸႃႉႁူမ်ႈၶီလီ ႁူမ်ႈသိူဝ်း ႁႂ်ႈလႆႈဢွမ်ႇလွမ်ႈၽွမ်ႉၵၼ်ၼႆသေ ဢွၼ်ၵၼ်ၵႂႃႇၼႄၵၢင်ၸႂ်တင်းဝၢၼ်ႈတင်းသူၼ်၊ ဝၢၼ်ႈၼွင် တဝ်းၼႆႉ မီးတေႃႇၼႃႈၵၼ် တင်းၸႄႈဝဵင်းၼမ်ႉၶမ်း။


မိူဝ်ႈပူၼ်ႉမႃး ဝၼ်းတီႈ 17 လိူၼ်ဢေႃႊၵတ်ႉသ်ၼႆႉ လုင်းၸၢႆးမွင်ႇၺုၼ်ႉ ဢႃယု 53 ပီ ပဵၼ်ၵူၼ်းဝၢၼ်ႈၸေႊမႂ်ႇ  ၵႂႃႇပၢင်ႁႅၼ်းသွမ်းလူႇတၢၼ်းသေ ပွၵ်ႈၶိုၼ်းႁိူၼ်းၼၼ်ႉ ႁူပ်ႉၺႃးပလိၵ်ႈၶႄႇ ၸိူဝ်းမႃးၵူတ်ႇထတ်း ၼႂ်းဝၢၼ်ႈၸေႊမႂ်ႇ။ ပလိၵ်ႈၶႄႇ တီႉၺွပ်းလႄႈ လုင်းမွင်ႇၺုၼ်ႉလၢတ်ႈဝႃႈ ၶႃႈပဵၼ်ၵူၼ်းၼႂ်းဝၢၼ်ႈၼွင်တဝ်းၵူၺ်း ၼႆသေတႃႉ ၸဝ်ႈၼႃႈတီႈပလိၵ်ႈၶႄႇၶဝ် ဢမ်ႇထွမ်ႇ တီႉၺွပ်းတၢင်ႇလူတ်ႉၵႃးၵႂႃႇ။


မိူဝ်ႈၽွင်းၵႂႃႇၸွမ်းလူတ်ႉၵႃးၼၼ်ႉ လုင်းမွင်ႇၺုၼ်ႉ သမ်ႉၵျွၵ်းလူင်းလူတ်ႉၵႃးသေ လႅၼ်ႈပၢႆႈ။ ၵူၺ်းၵႃႈ ပၢႆႈဢမ်ႇ ပူၼ်ႉသေ ၺႃးၸဝ်ႈၼႃႈတီႈၶႄႇၶဝ် တီႉၺွပ်းဢဝ်ၵႂႃႇပေႃႉထုပ်ႉ ယဵတ်ႈသႂ်ႇၶွၵ်ႈလူင် မိူင်းမၢဝ်း ဝႃႈၼႆ။


ၵူၼ်းဝၢၼ်ႈၼွင်တဝ်း သိုပ်ႇလၢတ်ႈထႅင်ႈဝႃႈ “ၽိူဝ်ႇထိုင် ဝၼ်းတီႈ 22 ဝၼ်းၼၼ်ႉမႃး လုင်းမွင်ႇၺုၼ်ႉတၢႆႁိုဝ်ၵေႃႈ ၶဝ်ဢမ်ႇလၢတ်ႈ၊ ဢမ်ႇတၢႆႁိုဝ်ၼႆၵေႃႈ ၶဝ်ဢမ်ႇလၢတ်ႈ။ ႁဝ်းၶႃႈၵူၼ်းဝၢၼ်ႈ လႆႈဢွၼ်ၵၼ် ၵႂႃႇတီႈၶွၵ်ႈ ၵမ်းလဵဝ် လႄႈ ၸင်ႇလႆႈႁူႉဝႃႈမၼ်းတၢႆ” ဝႃႈၼႆ။


လုင်းမွင်ႇၺုၼ်ႉၼႆႉ ပဵၼ်ၵူၼ်းၸႃတိမၢၼ်ႈမွၼ်း ဢိူင်ႇထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ မိူင်းၶၢင် တႄႇၼႃႈ ႁိူၼ်း ၸွမ်းပႃႈၶမ်းပိင်း ၵူၼ်းဝၢၼ်ႈၸေႊမႂ်ႇသေ မီးလုၵ်ႈယိင်းသွင်ၵေႃႉ။


တင်ႇတႄႇႁူဝ်လိူၼ်ဢေႃးၵတ်ႉသ်ၼႆႉမႃး  ၸဝ်ႈၼႃႈတီႈပလိၵ်ႈၶႄႇ ၵူတ်ႇထတ်းတီႉၺွပ်း ၵူၼ်းၸိူဝ်းၵႂႃႇႁဵတ်းၵၢၼ် ၼႂ်းမိူင်းမၢဝ်းႁၢဝ်ႈႁႅင်း ၼႆယဝ်ႉ။