ၸၢႆးၵျေႃႇမိၼ်ႉ ဢႃယု 33 ပီ ၵူၼ်းဝၢၼ်ႈၼမ်ႉပႅၼ်ႈ တေဢၢင်ႈၵႂႃႇသိုဝ်ႉၼမ်ႉမၼ်းၻီႊသေႊ( ၼမ်ႉမၼ်းမဵၼ်) တီႈ ဝၢၼ်ႈၵွင်းလၢင်း ၺႃးၵႃးလုၵ်ႉတၢင်း မိူင်းယႆမႃးၼၼ်ႉ ၽႃႇတမ်သႂ်ႇသေၸဝ်ႈၵႃး လၵ်ႉဢဝ်တူဝ်မၼ်းၸၢႆး ပၢႆႈၼီ ထိုင် တီႈလႆႈလူႉတၢႆ။


ဝၼ်းတီႈ 27/08/2017 ယၢမ်းၵၢင်ၼႂ် 7 မူင်းပၢႆၼၼ်ႉ ပီႈၼွင်ႉၵူၼ်းႁိူၼ်း ထူပ်းႁၼ်တူဝ်တၢႆ ၸၢႆးၵျေႃႇမိၼ်ႉ တီႈႁိမ်း ၶၢင်ႈတၢင်းၾၢႆႇ ၶႂႃ ၵႂႃႇတၢင်းဝၢၼ်ႈၵုင်းသႃႇ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။


ၸၢႆးၸၢႆး ၽူႈပွင်ၵၢၼ် ပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 26/08 /2017 ယၢမ်းဝၢႆးဝၼ်း မွၵ်ႈ 4 မူင်းၶိုင်ႈ ၸၢႆးၵျေႃႇမိၼ်ႉ ၶီႇလူတ်ႉၶိူင်ႈၵႂႃႇသိုဝ်ႉၼမ်ႉမၼ်း(ၼမ်ႉ မၼ်းမဵၼ်) တီႈဝၢၼ်ႈၵွင်းလၢင်း။ ၽွင်းမၼ်းၸၢႆးႁွတ်ႈထိုင် ၼႂ်းၵႄႈ ဝၢၼ်ႈၼမ်ႉပႅၼ်ႈတင်း ဝၢၼ်ႈၵွင်းလၢင်းၼၼ်ႉၺႃး ၵႃးဢၼ် လုၵ်ႉတင်းမိူင်းယႆမႃးၼၼ်ႉ တမ်ၽႃႇ  မၼ်းၸၢႆးၼႅတ်ႈထူဝ်းႁႃ ပီႈၼွင်ႉမၼ်းၸၢႆးၵမ်းလဵဝ်။ ၵူၺ်းၵႃႈ ၽိူဝ်ႇပီႈၼွင်ႉ ႁွတ်ႈၽႅဝ် ၵႂႃႇတီႈလူတ်ႉၽႃႇၵၼ်ၼၼ်ႉ ဢမ်ႇႁၼ်တူဝ်မၼ်းၸၢႆး ထိုင်မႃး ဝၼ်းတီႈ 27 လိူၼ်ဢေႃႊၵတ်ႉသ် ယၢမ်းၵၢင်ၼႂ် ၵူၼ်းဝၢၼ်ႈၵူၼ်းသူၼ် ၵႂႃႇထူပ်းႁၼ် တူဝ်တၢႆ ၸၢႆးၵျေႃႇမိၼ်ႉ တီႈႁိမ်းၶူဝ်လူင် ယၢၼ်ဝဵင်းသီႇပေႃႉ 9 လၵ်း သဵၼ်ႈတၢင်းၵႂႃႇဝၢၼ်ႈၵုင်းသႃႇ ဝႃႈၼႆ။

ၵဵဝ်ႇၵပ်းလွင်ႈၼႆႉ ပီႈၼွင်ႉၸိူဝ်ႉၶိူဝ်း ၸၢႆးၵျေႃႇမိၼ်ႉ လၢတ်ႈဝႃႈ လႅပ်ႈၸဝ်ႈၵႃး တေဢဝ်တူဝ်မၼ်းၸၢႆးၵႂႃႇပႃး လႆႈႁၼ်လူတ်ႉၶဝ် ၼႅတ်ႈႁေႃႈပၢႆႈ ၵႂႃႇတၢင်းသီႇပေႃႉ။ ဢွၼ်ၵၼ်မႆႈၸႂ်ႈသေ ၸွမ်းသွၵ်ႈႁႃ တူဝ်ၸၢႆးၵျေႃႇမိၼ်ႉ တီႈႁူင်းယႃၸႄႈဝဵင်းလႃႈသဵဝ်ႈတင်း ၸႄႈဝဵင်းသီႇပေႃႉ ၵေႃႈဢမ်ႇႁၼ် ၽိူဝ်ႇထိုင် ႁၼ်တူဝ်ၵေႃႈ ၸၢႆးၵျေႃႇမိၼ်ႉပေႃးတၢႆယဝ်ႉ ဝႃႈၼႆ။


ဝၼ်းတီႈ 27 ဝၢႆးဝၼ်း 3 မူင်းၼၼ်ႉ ပီႈၼွင်ႉၸိူဝ်ႉၶိူဝ်းၸၢႆးၵျေႃႇမိၼ်ႉ လႆႈလုမ်းလႃးပူၼ်ႉၶၢပ်ႈတူဝ်ပၼ် - ဝႃႈၼႆ။


ၸၢႆးၸၢႆး သိုပ်ႇလၢတ်ႈထႅင်ႈဝႃႈ ၵူၼ်းႁေႃႈလူတ်ႉၵႃး ဢၼ်တမ်ၽႃႇသႂ်ႇ ၸၢႆးၵျေႃႇမိၼ်ႉၼၼ်ႉ လႆႈႁူႉဝႃႈ ပဵၼ်တႆး တင်းသွင် ၵေႃႉၽူဝ်မေး ၵူၺ်းၵႃႈ ၶဝ်သွင်ၵေႃႉၼႆႉ ယၢမ်းလဵဝ်ပၢႆႈဝႆႉ။ ၵဵဝ်ႇၵပ်းလွင်ႈၼႆႉ လႆႈတၢင်ႇလၢတ်ႈဝႆႉ တီႈႁူင်း ပလိၵ်ႈ ၸႄႈဝဵင်းသီႇပေႃႉဝႆႉ ႁႂ်ႈၸဝ်ႈၼႃႈတီႈၶဝ် သွၵ်ႈႁႃတူဝ် ၵူၼ်းႁေႃႈၵႃး လႅၼ်ႈပၢႆႈၼၼ်ႉ ပၼ်တူတ်ႈတၢမ်ႇ ၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းမီး ဝႃႈၼႆ။


မေႃယႃၸႄႈဝဵင်းသီႇပေႃႉ လႆႈၵူတ်ႇထတ်းတူဝ်တၢႆ ၸၢႆးၵျေႃႇမိၼ်ႉ လႆႈႁၼ်လုပ်ႇၵွၵ်းႁူဝ်မၼ်းၸၢႆး တႅၵ်ႇယွႆႈလႄႈ ၶႃၾၢႆႇသၢႆႉ ႁၵ်း။ ၸၢႆးၵျေႃႇမိၼ်ႉၼႆႉ ပဵၼ်ၵူၼ်းဝၢၼ်ႈၼမ်ႉပႅၼ်ႈ ဢိူင်ႇပႃႇမိူတ်ႇ ၸႄႈဝဵင်းသီႇပေႃႉ ဝႃႈၼႆ။


ၼႂ်းၸႄႈဝဵင်းသီႇပေႃႉၼႆႉ လူတ်ႉၵႃး/ လူတ်ႉၶိူင်ႈ ဢၼ်ဢမ်ႇမီးဝႂ်ၶွၼ်ႇ(လၢႆႊသႅၼ်ႊ) မီးတင်းၼမ်။ သင်ဝႃႈ  မီးပၼ်ႁႃ  လူတ်ႉၽႃႇၵၼ်/ တမ်ၵၼ်ၸိုင် ၶူၼ်ႉသွၵ်ႈႁႃ ပဵၼ်ဢၼ်ယၢပ်ႇၽိုတ်ႇ တႃႇၸဝ်ႈၼႃႈတီႈပလိၵ်ႈ တႄႉတႄႉ ဝႃႈၼႆ။


Photo by ပရဟတအဖွဲ.